Read Western Dani Matiyut 20 Bible Online

Matiyut 20 - Western Dani bible

Matiyut 20

¹Yetut nen wone ambinom yorage logonet, “At mbogut paga mendek abu'me piige menggim nogo ti, aap ambi nggween unde nen at eyabu eeppiyaawak nduk, o kuubondendok aakumi kwaarinabi wundeegerak nogo pogom aret o.

²Nage nagagerik, aakumi kwaarogo eyabume nappiige logonet, Ne ambit paga eekwi kiinok, onggo wu ambiret wokkiroorak op ilik? Yorage mbareegi, Op aret o, yogo mbareegwa, eyabu me nappiyareegerak.

³Nappiyareegerak eekwi iigak, at peebi o mo mbigarogon wundi nage nagagerik, aap ando kunggo menggam we ugun wonogwe enegen iige nagagerik,

⁴Wologwe. Kit kunduk, an neyabu eekwi me, kinom eeri nanip o. Eeri nogwe kiinok, onggo ti, eerumonggotak pekkagak ndak-ndak aret wokkiraagin o, yorage mbareegi, nogogwaarak.

⁵Ti'nuk, o liingge inom, kiyoma inom, wungge nagagerik, togop mban yorage, nappiige, eereegerak.

⁶Ti'nuk, oonegen kiluk yikit nduk eeke kagak, wundi nanuk, aap ando we wonogwe enegen iige nagagerik, Wologwe. Kit o kubondendok nen nok, kiyoma kuli yabu eeka'lek nonggop nduk yime we puk mban ogotik?

⁷Yorage mbareegi, it nen, Yabu eeriyak nduk, ambi yo'niroolik me, we aret ogoorik o. Yogo mbareegwa, aap nogo nen, Kit kunduk, an neyabu eekwi me time kinom eeri nanip o.

⁸ Yorage nagagerik, ti'nuk, o kiip age mbareegi, at eyabu unde nogo nen at ayeloman eyabu lengganinaka nogo yoge logonet, It aap yabu eekwi nogo wiirage logomenggendik, wogwe iinok, it peebi unggwagaarak nogo onggo inaa'nduk wogorage, ndi, inaa'nduk unggwagaarak nogo onggo peebi wogorage, eeru o.

⁹Yoge mbareegi, it oonegen kiluk yikit nduk eeke kagak peebi yabu eeri unggwogogwaarak nogo, wogo mbareegwa, wu ambitak-ambitak wogorage,

¹⁰ti'nuk, it inaa'nduk unggwogogwaarak nogo nen, Nit ta, nggwok aret kolaagun o, mbarit wogogwaarak kwe, it kunduk, wu ambitak-ambitak wogorage,

¹¹eeke mbareegi, kologo nogogwaarik, aap eyabu unde nogo inanini eeppogo logonet, inoone mumun paga at yogwi,

¹²It peebi unggwagaarak yi, we mbuuluk aret eekaarak. Ndi, nit perak, mo andi paga yabu ta'li laarak nggwok eekoorak kwe, kat nen, Inom ndak-ndak eekaarak, mba'nuk onggo ninom ndak-ndak wo'niragandak yi, meek aret keego o.

¹³Yogo mbareegwa, at eyabu unde nen aap it mendek ambi yoge logonet, Wulaga wae. Yabu ne ambit eekwi niinok, onggo wu ambit wo'niroorak op aret o, yinuk, yogotak nogo ndak-ndak eekirak me, an maluk eekkinakirak lek o.

¹⁴An niniki nen it peebi unggwagaarak nogo, kat wokkigirak ndak-ndak wogoraakit mbakirak me, kawu wokkigirak ti aret ko'nok nak o.

¹⁵An namendek paga niniki mba'nuk eeriyak mage nduk yagan ya? Ndi, an inabuwa nen wogorage neenok, kat kanini nen yo'negen ya? yinuk, yoreegerak.

¹⁶ Togop me, it peebi mendek nogo ti, inaa'nduk ogwe, ndi, inaa'nduk mendek nogo ti, peebi ogwe, eerugun o,” yinuk, yoragagerak.

¹⁷Ti'nuk, Yetut at oone waganggwi 12 nogo inom o Yerutalem wogo logonet, inalik eeppiinok yorage logonet,

¹⁸“Wologwe wae. Nit o Yerutalem aret nogo ogoorik o. Time unggwi namonggoorak me, an aap aret nda'nagagirak nogo, neebe pigogo, it Ala unde inoweewi inom, it Ala wone liiru mbanak unde inom, wogorage kenok, it aap nogo nen nooruwak nduk, wone mbanugun o.

¹⁹Wone mbambunuk, it aap endekem konenggulik mendek nen nenggali wakwi, ya'mbiran nggora eerogo nookwi, neebe eyo karo-karo paga nabenogo panugwi, ee'nabuwak nduk, wogoraagun o. Wogorogwe iinok, nooko mbaremengga, nogo mbere yippunuk, ko'lu Ala nen neenik agago mippanigin o,” yinuk, yoragagerak.

²⁰Yorage mbareegi, at Tebereyut apuri inagalo nogo aagalogwe inom Yetut owagam wogo nogogwaarik, abu'me tebe yinuk, kwe nogo nen Yetut yoge logonet, “An ambi ngginogiri o.”

²¹Yoge mbareegi, at Yetut nen, “Kat kiniki mbakendak yu o.” Yoge mbareegi, kwe nogo nen, “An naagalogwe mbere yi, kat kabu'me piyaawam time kat keebe peenok-peenok logorak yoraanok nduk, yokkigi o.”

²²Yoge mbareegi, at Yetut nen, “Kit nggino yo'nugwi ti, kineenggo'lek logonet, nggino yo'nogo ogotik o. An nagi toolak nagin nogo ti, kit noorak op mbakop?” Yorage mbareegi, it nen, “E o. Nit noorak op aret o.”

²³Yogo mbareegwa, Yetut nen, “An nagi toolak kit noorak op aret kwe, neebe peenok-peenok pinagarak ti perak, an nen eeppinagarak lek o. Nogoba nen punogo piyareegerak nogo mban aret piyaagin o.”

²⁴Yoragagerak it ando 10 nogo nen inaruk konenggo nogogwaarik, it owe-awot imbirak nogo inanini agaket eeginabeegwaarak.

²⁵ Eeginako mbareegwa, at Yetut nen wiiragagerak wogo mbareegwa, yorage logonet, “It aakumi endekem mendek inarum menggaarak ti, inoone omaawi paga lengganinakwi, ndi, it inogobamini aap nggwok nen inapuri eerit nugu logowak nduk, inoone omaawi paga yorogwe, eeko menggaarak kineenu kwe,

²⁶kit togop lek o. An aap aret nda'nagagirak yi, kit nen nake eeko logobagip nduk, woroolik o. Ata, an nen kit kinake eeke, ndi, kit aakumi apit an kinake kambiminggirak paga kinonggo mbambunuk, wondet eerogo pinagage, eerikit nduk wagagirak nogo ndak-ndak, kit ambi, An noreewi inenggela'me nen aap nggwok logokit, mbake kenok ti, at kinayeloman aret age, ndi, kit ambi, An naa'nduk tiyanak logokit, mbake kenok ti, at kinabu'me logonet, kinake eeke, eeko logowak o,” yinuk, yoragagerak.

²⁹Yetut at oone waganggwi inom o Yeriko nen wundi wogo mbareegwa, aakumi ambik mugurok wogwe iigak,

³⁰aap mbere inigen mbuk tu nggwok ambet paga kwi'ndak logonet, “Yetut tu yi paga wage,” inaruk konenggo nogogwaarik, inoone nggwok togon yogo logonet, “Ninogoba wae. Kat Ndawut ombooluk yi, ninabuwa mbaru o,” yinuk, yogwi iigak,

³¹it aakumi nen aap nogo inoone puk aruwak nduk, mberirogogwaarak kwe, kagak, abunuk inoone nggwok nabenak mban yogo logonet, “Ninogoba wae. Kat Ndawut ombooluk yi, ninabuwa mbaru o.”

³²Yogwi nogo at Yetut aruk konengge nagagerik, yungguk togon puk a'nuk, yorage logonet, “Nonggop eekkinaburak mba'nuk yogo ogotik o?”

³³Yorage mbareegi, it nen, “Ai, ninogoba. Ninigen mbuk yi, obeelom ee'ninabenok nduk, yokkogo o.”

³⁴Yogo mbareegwa, at Yetut nen inabuwa mbake nagagerik, inigen eenggi awo mbaaniige kagak, inigen nogo pagak yogo nogogwaarik, Yetut inom wogogwaarak.