Read Western Dani Matiyut 21 Bible Online

Matiyut 21 - Western Dani bible

Matiyut 21

¹It Yetut inom wogogwaarak nogo, o Yerutalem panggo yi wogo logonet, o Mbetapage puurom Tayitun paga ari wogo nogogwaarik, nogome logonet, Yetut nen at oone waganggwi mbere nappiige logonet,

²“O yaga'lelo irukuna time nanip o. O time awo mbo unggwi nanuk, keledai keeleluwi mbarenak aagaluk imbirak wonogwe iigo logomonggotik, piinogo wogoret niri wa'nu o.

³Ndi, aap ambi nen, Kit nonggop nduk eeko ogotik? yokkirage kenok, kit nen yogo logonet, Ninogoba keledai lek me, Wa nanip o, yo'nirage mbaki, wa wogo o, yogwi kiinok, at nen, Ti kenok, mbet-mbet wonok nanip o, yokkirage kenok, wonok woraamunggup o,” yinuk, eerogo nappiyareegerak.

⁴ Ti eerogo nappiyareegerak nogo ti, at Ala nen yoge kagak yoraga nogo nen ari logonet, “Kinowe endagembogut keledai amborowak paga kwi'ndak kinowagam wage o. At iniki yanggonak logonet, yokkirage menggerak nogo, Keledai aagaluk amborowak paga kwi'na'nuk, wage ti kaanip o, yinuk, O Tiyon aagalogwe nogo yoraanip o,” yinuk, yoragagerak nogo a'me lik yuwak nduk, eerogo nappiyareegerak.

⁵

⁶Eerogo nappiige mbareegi, at Yetut oone waganggwi nogo, nogo nogogwaarik, Yetut yoragagerak nogo ndak-ndak aret eeko logonet,

⁷keledai aagaluk imbirak wogoret wogo nogogwaarik, inayum keledai amborowak paga ndoombogo mbareegwa, Yetut ti paga kwi'nagagerak.

⁸It aakumi nggwok kuwak aago ando nen inayum tu nggwok paga mbiganogo ndoombit wogwe, ndi, it ando nen eyo engga kalenogo tu nggwok paga ndoombit wogwe,

⁹ eeko mbareegwa, nogo paga wage kagak, it ando inaa'nduk wogwe, it ando ambo'me wogwe, eeko logonet, “Ndawut ombooluk yi, Otana, yuwok o. Ninogoba Ala endage paga wage yi, wogoppuwok o. It mbogut irimbaga menggaarak kunduk, Otana, yuwak o,” yinuk, keekok agan wogogwaarak.

¹⁰Agan wogwe iigak, at Yetut o Yerutalem unggwage mbareegi, it o kota time menggerak abok aret noone-koone yogo logonet, “Ie! Wologwe! Aap yi ta mbakop?”

¹¹Yogo mbareegwa, it aakumi kuwak aago nogo nen, “Aap yi, Ala nen yoge kagak yo'niraga o Nggalileya awi Nataret mendek Yetut nogo aret o,” yinuk, yorogogwaarak.

¹²At Yetut nogo nen Ala awi wurik me unggwage nagagerik, it Ala awi wurik me time at ambi ageerok at ambi onggo kunggolagak eekwi nogo mugogo wumbiige, it wu onggo-onggo eeko menggaarak inageyo ndoonak inom, it towe puume onggo mbanggo menggaarak inageyo kwi'ndak menggaarak inom, a'nggan nggininogo wuppege, eeke nagagerik,

¹³ it yorage logonet, “Ala nen, An nawi wurik ti, tamban eeko menggam aret yogo logowak o, yinuk, yereegerak liiru mbaneegerak kwe, kit perak, o yi aap yogoot woppunuk, kumaa'nari unggwogo menggam eerogo pugwi kiigi o,” yinuk, yoragagerak.

¹⁴Yorage nagagerik, it inigen mbuk mendek inom, inendop maluk mendek inom, Ala awi wurik me Yetut owagam wogo mbareegwa, at nen obeelom eeginabeegerak.

¹⁵Obeelom eeginake mbareegi, it Ala unde inoweewi inom, it Ala wone liiru mbanak unde inom, nogo nen at Yetut yi iya tit, ndi iya tit, eeke inom, ndi, it wologwe mbuulogwe nen Ala awi wurik awoore'nggam time ina'mit yogo logonet, “Ndawut ombooluk Otana yuwok o,” yogwe wonogwe nogo inom, inigen iigo nogogwaarik, inanini agaket yogo logonet,

¹⁶ “It wologwe yi yogwe nogo, kat karuk konengge agandik a?” Yogo mbareegwa, at Yetut nen, “E o. Naruk konengge agarik o. It elege awo ngget ndarak inom, elege awo inelak nunggwi inom, nen kendage tiyappagago logowak nduk, koonogo piyareegindak o, yinuk, yereegerak Ala wone liiru mbanak nogo, kit pekkaga'lek ogotik ya?”

¹⁷Yorage nagagerik, it aap nogo teppiinok, o kota nggwok time nen wundi nage nagagerik, o Mbayitani aret nogo yi nagagerak.

¹⁸Nogo yinuk, ko'lu o weege mbareegi, at Yetut iyok paga o kota nggwok Yerutalem nogome wage logonet, mbi abu eeke mbareegi,

¹⁹eyo wuli ambi tu paga wonage enegen kage nagagerik, alome panggo yi nanuk, eyo nogo anggen yugu lek we engga mban wonage kage nagagerik, eyo eebe nogo yoge logonet, “Kat eyo yi, kanggen abu yega'lek aret logomunggun o.” Yoge mbareegi, eyo wuli nogo, o ti eyom aret mbuk agagerak.

²⁰Mbuk age it Yetut oone waganggwi nogo inigen kogo nogogwaarik, “Wi,” yinuk, pi wako logonet, “Eyo wuli yi, nonggop togon mbet-mbet mbuk aga?”

²¹ Yogo mbareegwa, at Yetut nen, “Kit kiniki mbere lek ambit aret logonet, Ala abet mbakwi kiinok, an eyo wuli yi eekirak yogobi mban eeko logomunggup lek o. Ata, kit nen puurom yi kunduk, yogo logonet, Aan wogonogo yi yenggenak me lebennari nage keyaagin o, yogwi kiinok, ndak-ndak aret eeke kaamunggup o.

²²Kit tamban eeko logonet, Ndogop aret eeke keyane, yinuk, mbakwi nogo abok aret kiniki abet mba'nuk Ala nggino yogwi kiinok ti, eeppinagage aret kaamunggup o, yinuk, abet aret yokkiragi o,” yoragagerak.

²³At Yetut nogo Ala awi wurik me unggwage nagagerik, aakumi mamunirage kagak, it Ala unde inoweewi inom, aakumi inoweewi inom, Yetut owagam wogo nogogwaarik, at yogo logonet, “Kat yi eekak ndi eekak eeke yi ti, ta oone paga eeke menggendak? Ta nen yokkereegerak paga eeke menggendak?”

²⁴Yogo mbareegwa, Yetut nen, “An kunduk, wone ambi kin wokkiyaminggirak onggo yo'nugwi kiinok, an eerit nage yi, ta oone paga eeke minggirak nogo ti, paganogo yokkiraagin o.”

²⁵Yorage nagagerik, it yorage logonet, “At Yiime Wuppiiga Yaya nogo ti, ta nen yoreegerak paga wuppiige nagagerak? Mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Kit yinip nda!” Yorage mbareegi, it-it wone mbanggo logonet, “Nit nen, Mbogut paga nen yoreegerak paga yiime wuppiige nagagerak o, yogwi niinok, at nen, Ndi, ti kenok, kit kiniki at abet mbaka'lek nonggop nduk wonogotak, yinuk, yo'niraagin o.

²⁶Ndi, nit nen, Aakumi nen yoreegwaarak paga yiime wuppiige nagagerak o, yogwi niinok, it aakumi abok aret, At Yaya ti, Ala nen yoge kagak yoraga mendek aret o, yogwe me, ninagabiti o,” yinuk,

²⁷Yetut yogo logonet, “Nit nineenggo'lek o,” yoreegwaarak. Yogo mbareegwa, at nen, “Ndi, ti kenok, an kunduk, an eeke yi, ta nen yo'nereegerak paga eeke minggirak ti, yokkiraagin lek o,” yinuk, yoragagerak.

²⁸Yorage nagagerik, ambinom yorage logonet, “An wone yi yokkirage neegak, kit nonggop mbarumunggup o? Aap ambi apuri wologwe mbere me, ogoba nen manggu ndarak nogo owagam nage nagagerik, yoge logonet, Naput wae. Kat yogondak neyabu eeppanege logot o.

²⁹Yoge mbareegi, aput manggu nogo nen, E o, nogoba, yoreegerak kwe, eeri noolik puk agagerak.

³⁰Ti'nuk, ogoba nogo nen awot ambo'me mendek nogo owagam nage nagagerik, togop aret yoge mbareegi, at nen, Neebi o, yoreegerak kwe, ti'nuk, iniki yunggu yinuk, eeri nagagerak.

³¹ Inogoba eeriyak iniki mbareegerak nogo apuri mbere me, ambi ta nen eereegerak mbakop?” Yorage mbareegi, it nen, “Lek o. At peebi mendek nogo nen aret eereegerak kogo o.” Yogo mbareegwa, at Yetut nen, “It aakumi mondok ineenik logorak mbakwi iinok, obeelom eerit nugu logorak Ala mbake wone nogo, at Yaya nen mamunggira wagagerak kwe, kit nen, Yi abet aret yo'nirage, mbaka'lek kiigak, it o unde inake wu kuwak eeka inom, kumi terak wurinaka inom, nogo nen mban abet mbareegwaarak. Ndi, it aret abet mbareegwaarak kinigen iigo nogotik, Ao, nit kunduk, ninomaluk mbo punuk, abet mbaruwok o, yuurak op aret kwe, mbo punuk, abet mbaka'lek wonogwe me, kit awo Ala abu'me unggwi naga'lek kiigak, it o unde inake wu kuwak eeka inom, kumi terak wurinaka inom, inaa'nduk aret unggwi nogo agaarik o, yinuk, abet aret yokkiragi o,” yoragagerak.

³²

³³ Yorage nagagerik, ambinom yorage logonet, “Wone eegu laarak ambi yokkirage me, kinaruk liirogon konenggo logonip o. Aap ambi nggween unde nen anggur awi yappunuk, yagat wuke, amburu mburunogo wuraburak tenggap mendaake, ndi, tum wakak eyo tiyarogon ndoongge, eeke nagagerik, anggen mbanak nogo ando it kologwe, ando at wogogwi, eeko logowak nduk, aap at eyabu aago me arum piinok, o alik me nagagerak.

³⁴Nage nagagerik, time logonet, anggur anggen yugu nogo mbaniyak eyom panggo ari kagak, Anggen mbanak an wo'niriyak nogo, wo'niri woraawak o, yinuk, at nagagim arum wonogwe nogome awuri inowagam nappiya wagagerak.

³⁵Nappiya wage mbareegi, it at awi yareegerak arum wonogwe nogo nen at awuri nogo pippiinok, ambi yawi wakwi, ambi mondok miin wakwi, ambi yugum toguurit wakwi, eeginabeegwaarak.

³⁶Eeginako mbareegwa, aa'nduk at awuri mbereeret nappiya wagagerak kwe, ti'nuk, apit togon nappiya wagagerak nogo wogo mbareegwa, it kunduk, togop aret eeginabeegwaarak.

³⁷Eeginako mbareegwa, peebi aap nogo nen, Napuluk yi perak, ayuk wuko logonet, keyage warogo waagun o, yinuk, aput lombok aret nappi wagagerak.

³⁸Aput nappi wagagerak nogo, at awi yareegerak tum wonogwe nogo nen inigen kogo nogogwaarik, it-it wone mbanggo logonet, Eyate koloorak yi aret me, mondok wappunuk, eyate nit aret kolaawok o.

³⁹Yogo nogogwaarik, eebe pigogo anggur awi yarak me nen yagat endekem wumbogo nogogwaarik, mondok wareegwaarak.

⁴⁰Togop eereegwaarak me, inogoba nggween unde nogo wage kenok, it at eyabu yareegerak arum wonogwe nogo, nonggop eeginabigin mbakop?”

⁴¹Yorage mbareegi, it nogo nen, “Lek o! Inogoba wage kenok, it aap maluk lombok nogo ti, mondok lek eerogo inooppiinok, inobaane'me awi yareegerak arum logonet, anggen mbaniyak eyom paga anggen mbanogo wogogo logowak nduk, aap alik mippiyaagin o,” yinuk, yoreegwaarak.

⁴² Yogo mbareegwa, Yetut nen, “It yugum paga o wuka nen O wuko logonet, yugum ambi mbo pereegwaarak nogo, Yugum ogowa ndoonnaga o. At ninogoba nen aret eereegerak me, Mondok iya lombok eereegerak kogo nogoorik, Pi wako ogoorik o, yinuk, yereegerak liiru mbanak nogo kit pekkaga'lek ogotik ya?

⁴³Ti kenok, kit Ala abu'me pinagarak aret wonogogutak kwe, pinagagin lek o. Kinobaane'me it aakumi anggen mbanogo wogogo logorak nogo mendek aret at abu'me piyaagin o.

⁴⁴It aakumi yugum ti paga ngginnari wogwe iinok, ineebe kalenak-pugunik eerogo wambugun kwe, yugum ti nen abut loguk togon aakumi inoba ngginnari wangge kenok perak, ineebe mondok yigirik-noonom eerogo piige logonet, liirubu aa'ngga pogom eerogo piyaagin o,” yinuk, yoragagerak.

⁴⁵It Ala unde inoweewi inom, aap Pariti inom, nogo nen at Yetut wone eegu laarogo yorage nogo inaruk konenggo nogogwaarik, “Nit niinok ari o,” yinuk, yelok kogo nogogwaarik,

⁴⁶pigaawok nduk, eereegwaarak mendek, aakumi ambik nen, “Aap yi, Ala nen yoge kagak yo'niraga nogo mendek at aret kogo o,” yinuk, yogwe me, inagabiti nen puk ogogwaarak.