Read Western Dani Matiyut 23 Bible Online

Matiyut 23 - Western Dani bible

Matiyut 23

¹Ti'nuk, at Yetut nen it aakumi ambik kuwak aago inom, at oone waganggwi inom, yorage logonet,

²“It Ala wone liiru mbanak unde inom, aap Pariti mendek inom, nen, Muta yorage nagagerak obaane'me nit aret yorogo logowok o, yinuk, yogwe me,

³it nen, Yogop ee'nu, ndogop ee'nu, yokkirogwe iinok, liippunuk, eeko logorak op aret kwe, it eeka'lek logonet, yokkirogo menggaarak nogo ti, maluk aret me, kit togop eeko logogup o.

⁴It nen aaninggin ambik waganogo aakumi inuum paga piinok, luwi aago nugwi iigak, yeenggwaaroorak mbaka'lek inigen pengge agan mbaganggo menggaarak.

⁵ It yi mendek ndi mendek eekwi abok aret nogo ti, Aakumi inigen niyaawak o, yinuk, eerit nugu logonet, kiwone mbanak yonggolak inenggaawak paga nabenogo keele maakwi, inayum o'lu paga nggagik-nggogok eerak pugunogo wuppunuk tamban eekwi, eeko menggaarak.

⁶Ndi, laago lako logonet, it aap yo'nggok kero kwi'nogo menggam mban kwi'nogwe, it aap Yakuri tamban eeko menggam oolo me kwi'nogwe,

⁷yi mendek ndi mendek onggo kunggo menggam, Nit mban keyage wappinanuwak, mbakwi, aakumi nen, Ngguru wa, yinuk, yo'niroorak mbakwi, eeko logorak inikilom mbako menggaarak kwe,

⁸kit perak, mamunggirage minggirak an nalik aret o. Ndi, kit nore-kore lombok wonogwe me, aakumi nen, Ngguru wae, yokkiroorak lek o.

⁹Kit kinogoba mbogut paga mendek ambit aret me, it aap nggween paga yime mendek ambi, Nogoba o, yinuk, yoriyak mage o.

¹⁰Wone lengganogo yokkirage minggirak ambit an Keritut aret me, aakumi nen, Wone lengganinaka o, yokkiroorak lek mban o.

¹¹ Aap kinenggela'me ambi mondok nggwok logorak mbake kenok, at ti, kinayeloman aret logowak o.

¹² Kit kiniki tiyappakwi kiinok, tebembinagage, ndi, kiniki tebeppakwi kiinok, tiyappinagage, eeke kaamunggup o,” yinuk, yoragagerak.

¹³Wone ambinom yorage logonet, “Kit Ala wone liiru mbanak unde aap Pariti kinom kiniki laakot logonet, eeko monggotak yi, aakumi at mbogut paga mendek abu'me unggwogwe iyo, tu narogo wumbiigwi, kit unggwaga'lek logonet, it unggwi woroorak mbakwi nogo, tu non mbanogo piigwi, eeko monggotak me, kinabuwa o! (

¹⁴Kit Ala wone liiru mbanak unde Pariti kinom kiniki laakot logonet, eeko monggotak yi, it kumi nanu inamendek tigippiinet nugwi, ndi, kit maluk eekwi ti, kin age kero tamban nggorek eerit nugwi, eeko monggotak me, kinabuwa o. Peebi onggo aaninggin mondok iya lombok kinoba kwippinagage kaamunggup o.)

¹⁵Kit Ala wone liiru mbanak unde Pariti kinom kiniki laakot logonet, eeko monggotak yi, aap ambiriluk kinoone wagangge logowak nduk, yi awi ndi awi kwaarit nugwi, aakumi inawi wanggerit nugwi, eeko nogootik, kinoone wagangge kenok, kit kani omoonuk wunuk mban ari menggim unggwi namunggup nduk, eeko logonet, at perak, maluk nggwok lombok eekko'nok kinom unggwi nawak nduk, eeppogo monggotak me, kinabuwa o!

¹⁶Kinigen mbuk logonet, aakumi tu nigiigo monggotak yi, kit nen yogo logonet, Ninoone abet mbaruwak nduk, Ala awi wurik endage kunogo aakumi yorogwe niinok ti, we aret agan nugwi kwe, mbuti emas Ala awi wurik me nabenak wonage nogo endage kunogo aakumi yorogwe niinok ti perak, ninoone yogwe nogo mondok-mondok eeko logorak nduk, yogwe me, ti iya o, yinuk, yogo monggotak me, kinabuwa o!

¹⁷Kiniki lek kinigen mbuk yi, kit nen mbuti emas iya ilik, mbuti emas Ala awi wurik me pi unggwogwe paga Ala ake leennage menggerak me, awi wurik ti, iya a?

¹⁸Kit yogo monggotak ambi yi o. Ala ake warogo kani kunggo menggam endage kunogo aakumi yorogwe niinok ti, we aret yogwe kwe, Ala ake kani kunggo menggam pugu endage kunogo aakumi yorogwe niinok ti perak, yogwe nogo mondok-mondok logorak nduk yogwe me, iya o, yinuk, yogo monggotak me, kinabuwa o!

¹⁹Kinigen mbuk yi, Ala ake pugu ti, iya ilik, Ala ake pugu nogo kani kunggo menggam kani kuni wage paga Ala ake leennage menggerak me, kani kunggo menggam ti, iya a?

²⁰Togop me, kit Ala ake warogo kani kunggo menggam endage kunogo yorogwe kiinok ti, eebe ogobakkigirik inom, yi mendek ndi mendek time pugu nogo inom, lambuk togon endage kunogo aret yorogwe,

²¹ndi, Ala awi wurik endage kunogo yorogwe kiinok ti, o eebe wurik inom, at time menggerak Ala eebe nogo inom, lambuk togon endage kunogo aret yorogwe,

²² ndi, kit nen mbogut endage kunogo yorogwe kiinok ti, at Ala wone lengganinake menggim inom, at eebe time kwi'ndak menggerak Ala inom, lambuk togon endage kunogo aret yorogwe, eeko monggotak me, yokkiragi o.

²³ Kit Ala wone liiru mbanak unde aap Pariti kinom kiniki laakot logonet, eeko monggotak yi, wone a'me mban koonggwi, aakumi inabuwa nen eeppiinet nugwi, kiniki liirogon eekwi, eekwi ti, Ala wone lengganak alom nggwok ti aret kagak, eeka'lek mbo punuk, we liboongga logwe, yibiingga logwe, kiinde logwe, ando we mbuuluk nibinogo Ala ake pogo monggotak nogo mban eeko monggotak me, kinabuwa! Wone alom nggwok nogo eeko logonet, mbuulogwe-mbaalogwe ti inom nabenogo eeriyak me eeko monggotak o.

²⁴Kit kinigen mbuk logonet, aakumi tu nigiigo monggotak yi, niyo nonggo logonet, laami mbuulogwe kinambe me unggwage kenok, kilirogo mbo nappogo monggotak kwe, tapi niyowa'na yonggolak kagak niyo nunggwi kenok, luk togon kinikime wangge menggerak kiigi o.

²⁵Kit Ala wone liiru mbanak unde aap Pariti kinom kiniki laakot logonet, eeko monggotak yi, aakumi inamendek yumbu-lambu agago kologo monggotak inom, An mban kola, mbako monggotak inom, nogo ti, kinagiiwa'na kunduk, kinarengga'na kunduk, tookkologo monggo'nom time eno korok aago kagak, agabolo endekem mban kooko monggotak me, kinabuwa o.

²⁶Kit aap Pariti kinigen mbuk yi, kinagiiwak akenggwe aa'nduk kookkologwe kiinok, endekem inom koorak aret kaamunggup o.

²⁷ Kit Ala wone liiru mbanak unde aap Pariti kinom kiniki laakot logonet, eeko monggotak yi, aap kanggaatak nggween taambiigo menggam ineebe pili agaatak inowak nggininik nggween abu'na kagak obaga awi abe laambu wurik menggi kwak monggotak me, kinabuwa o.

²⁸It aakumi nen kineebe pekkiigo logonet, Aap obeelom, kinombakwi kwe, kiniki laakot logonet, eeko monggotak inom, yi maluk ndi maluk eeko monggotak inom, kinikime yagabit aago wonage kagi o,” yinuk, yoragagerak.

²⁹Wone ambinom yorage logonet, “Kit Ala wone liiru mbanak unde aap Pariti kinom kiniki laakot logonet, eeko monggotak yi, kit nen it maan Ala nen yorage kagak yoraga nogo inowak pereegwam ogobakkigikwi, ndi, it aap maan iniki abe koonak nogo inowak paga inabiriiwak ogobakkigirogo mippiigwi, eeko logonet,

³⁰Ninombomini nen aap Ala yorage kagak yoraga inooreegwaarak nogo ti, ineenik wonogogwaarak ti eyom paga nit ninom logonetak en, aap nogo inoo'netak lek o,

³¹yogwe nogo paga, it Ala yorage kagak yoraga inooreegwaarak inombowologwe nogo, Nit aret ogoorik o, yinuk, paganggo monggotak me, kinabuwa o.

³²Kinombomini ineenggi ando pereegwaarak nogo, kit nen age yobok togon aret eeko logonip o.

³³ Kit waalo muuru nogo mendek awi wiganak yi, Ala nen owak loonogo kani omoonuk wunuk mban ari menggim time nappinagage kenok, nonggop togon kole mbaganumunggup o? Abu meek aret o.

³⁴Ti kenok, an nen it aap Ala nen yorage kagak yoraga inom, aap iniki warak mendek inom, aap Ala wone liiru mbanak unde inom, kinowagam nappiya woraminggirak ando eyo karo-karo paga nabenogo inookwi, ando kit tamban eeko monggo'nom time ya'mbiran nggora eerogo inookwi, ando muguret-magaret eerogo mappiigwi, eeginabumunggup o.

³⁵ Ti paga at Kaben iniki koonak kagak amiya wambeegerak kuli nen nok, aap Mbakariya aput Takariya nogo, Ala awi wurik me ake warogo kani kunggo menggam oolo time wareegutak kuli, it aap iniki abe koonak menggaarak inamiya nggween paga yime wambit nagagerak nogo, abok aret kit kinoba luurik aret logogin o.

³⁶Kit aakumi yogondak wonogwe yi, wone yi abok aret aaninggin kit kinoba aret logogin o, yinuk, abet aret yokkiragi o,” yinuk, yoragagerak.

³⁷Wone ambinom yorage logonet, “Kat kota Yerutalem ao! Kota Yerutalem ao! Kat nen it Ala yorage kagak yokkiraga nogo inooke, it aap Ala nen yonggo nappiya wage kenok, yugum paga toguurit-tagaarit eerogo inooke, eeke menggendak me, ao. An ta, towe ayam iyagalo nen oo'nuwe a'naabit abu'me tebembiirogo menggi kwak, kaagalogwe kuwak eeppiyaakit lak ao, mbakitak kwe, Neebi, ari menggendak nogo o.

³⁸Teppagaminggirak me, kame yi, we o wogo aret logogin o.

³⁹ Kat nen, At nogoba endage paga wage yi, wogoppuwok o, yinuk, awo yaga'lek logonet, an neega'lek aret logomunggun o, yinuk, abet aret yokkigi o,” yoragagerak.