Read Western Dani Matiyut 24 Bible Online

Matiyut 24 - Western Dani bible

Matiyut 24

¹At Yetut Ala awi wurik me nen wundi nage kagak, at oone waganggwi nogo Ala awi taati wurik nogo titigiruwok nduk, Yetut owagam wogo mbareegwa,

²at Yetut nen it yorage logonet, “O yayi wurik wonage abok aret kinigen kogwe ilik lek a? Yugum ambi oba lu'luk aago logorak lek o. Abu tigitogon langgunogo nappugun o, yinuk, abet aret yokkiragi o,” yoragagerak.

³Ti'nuk, puurom Tayitun paga lagangge nagagerik, alik taati kwi'ndak wonage me, at oone waganggwi nogo owagam ka nogo nogogwaarik, at yogo logonet, “Togop arigin o, yo'niragandak nogo, mandenom arigin o? Ndi, kat woroorak inom, o age yobok ariyak inom, panggoni wage kenok, nineenu ariyak mendek nano eeke kaagun? Yo'niret o.”

⁴Yogo mbareegwa, at Yetut nen it yorage logonet, “It aakumi ambik nen an nendage kunit wogo logonet, Keritut ti, an aret o, yinuk, aakumi ambik iniki nomoninabugun me, kit togon kiniki nomongginakwi iyo, tum wako logonip o.

⁵

⁶Wim nggaganggwi, wim nambukwi, eekwi abok kinaruk konenggo logomonggotak kwe, kiniki lek arubok o. Ti arit woramenggerak kwe, Yi age yobok ari wage logonet eeke, mbarubok o.

⁷Aakumi inanebunu ndegek wim nambukwi, aap endagembogut ambi awuri nen aap endagembogut ambi awuri inom wim nambukwi, eekwi iigak, o yi awi ndi awi mbi noogelo age, mi nggwok nuk ari, eerigin ti,

⁸it kumi elege ndaruwok nduk aa'nduk enegen paganak yagan wako mengga kwak, togop ndak-ndak aa'nduk kinoba aaninggin-paaninggin eeppinagage kaamunggup o.

⁹ O ti eyom paga it aakumi nen pigogo kinoba andi-pandi eeppinaganuk, kinooruwak nduk, wogorogwe, kit an noone waganggotak paga, it aakumi inanebunu lombok nen inanini agaket kinombakwi, eerugun o.

¹⁰Ti eyom paga aap ambik ineebi nomba'nuk abe wone mbo pugwi, at ambi nen at ambi wariyak abok mbangge, at ambi nen at ambi anini agaket ombake, eerugun o.

¹¹Ndi, aap ambik wogo logomenggaarik, we piliret, Ala nen yo'nege ambi yokkira o, yinuk, aakumi ambik iniki nomoninabugun o.

¹²It aakumi nen Ala wone taganogo mbo punuk, maluk lombok eekwi ti, nggwok arigin me, aakumi ambik iniki aganggen paga Ala wone mugurok nogo logomenggaarak kwe, iniki miin age logonet, anggon aret aganabigin o.

¹³Togop aret arit wage kagak kwe, kiniki kwi'ndak nu'lek kiigak, o age yobok yi wage kenok, kinagap ndarigin o.

¹⁴Ala abu'me piyoorak obeelom wone yi, aakumi anebunu lombok ineenu aruwak nduk, yi awi ndi awi abok aret abu paganogo yoranet nogwe kiinok perak, o age yobok aret arigin o,” yinuk, yoragagerak.

¹⁵ Kit liiru mbanak pekkogwe yi, kiniki liippinip o. “At Ala nen yoge kagak yoraga Ndaniyen nogo nen, ari logonet, maluk eerogo puurak mendek ogole warak lombok woraagin o, yinuk, abok yereegerak nogo, Ala ake leenak menggim taati mi'nari wage kinigen kamonggotak ti eyom paga,

¹⁶ it o Yureya iname ugun wonogwe nogo nen inamendek tilaabaga kola laganggwi, ineyabu me wonogwe nogo nen inayum iname kola wogwe, eerugwaarik o. Ata, time nen aret kole mbaganit puurom paga kumaa'nari nawak o.

¹⁷

¹⁸

¹⁹O ti eyom paga it kumi inabila inom, inaagalogwe awo inelak kuninakwi inom, ti perak, inabuwa o.

²⁰It kole mbaganiyak nogo, o mayu tit kunik eeke paga ilik, tamban eekwi paga a? age kero, tamban mban eeko logowak o.

²¹ At Ala yi mendek ndi mendek wakkagagerak kuli nen nok, yogondak kuli aakumi inoba aaninggin-paaninggin eeppiigo nogogwaarak nogo ti we mbuuluk negen aret eeppiigo nogogwaarak. Yogondak kunduk, mbuuluk aret eeppiigwi kwe, o ti eyom paga inoba aaninggin-paaninggin alik tam warak lombok eeppiigwi iyaagun o.

²²Aaninggin-paaninggin inoba piyoorak eyom nogo ti, Ala nen kuli panggoppi woraagin lek kenok, aakumi inagap ndarigin lek abok aret inoorigin me, at Ala nen at apuri miirogo leeninabeegerak mendek nogo inookwi iyo, kuli pigin aret o.

²³Ti eyom paga, aap ambi nen, Keritut nogo, yi kaanip o, yokkirage, ndi, ambi nen, Keritut nogo, ti kaanip o, yokkirogwe, eekwi iinok, kiniki abet aret mbarubok o.

²⁴It ando nen we piliret, Keritut nogo an aret o, ndi, Ala nen yo'nege kagak yokkiraga mendek ti, an aret o, yinuk, agan wogo logomenggaarik, it aakumi ugun iniki nomoninakwi, ndi, it Ala apuri miirogo leeninabeegerak nogo, iniki nomoninaburak op kaamun ilik? yinuk, nomoninakwi, eeruwok nduk, inagabiti warak mendek inom, eerubok mendek inom, eeremenggaarak kwe, it agan woraagun ti, kiniki abet mbarubok o.

²⁵Ti eeriyak ti, awo eeka'lek kagak wone yi paganogo yokkirage me, kiniki liippinip o.

²⁶ O karume aakumi lek me wonage o, yokkirogwe iinok, pekka nogwe, Oome aken time agaarik o, yokkirogwe iinok, abet mba'nuk pekka unggwogwe, eerubok o.

²⁷Oonegen wundi wage menggim nen o yabok pindanggegetak abinak o eneeri-ambut nok, woreni nage menggi kwak, an aap aret nda'nagagirak woroorak nogo togop aret arigin o.

²⁸ Wam pili agaatak wonage me nogome aret towe enggaanggum nengga ninggiko menggaarak o,” yinuk, yoragagerak.

²⁹ Wone ambinom yorage logonet, “Kineebe aaninggin-paaninggin eeppinagago mbaremengga, Oonegen apit age, tut abinak lek age, Laaluguragan mbogut paga nen nggaru-nggaru nggween paga wambit wage, It mbogut oolo yime inomaawi menggaarak nogo, inaganak nugirage, Eerigin o.

³⁰ Eeke mbaremenggi, ne ti eyom paga an aap aret nda'nagagirak woroorak ineenu ariyak mendek ambi mbogut paga time eeke kenok, it aakumi nggween paga inanebunu lombok nen leenggu maakwi iigak, an aap aret nda'nagagirak nogo nobanggi-nobangge li'luk eekko'nok, nomaawi warak logonet, mbogut paga ndugwi enggela'me wage neyaagun o.

³¹Ndi, oone nggwok eeka trompet nogo oone eeke kenok, it nayeloman mini malayikat nogo nappiya wage neenok, wogo logomenggaarik, an napuri miirogo leeninabeegirak o agi-ogu nen, aru-ogwe nen, ilin-unggut wonogwe nogo abok aret kuwak eerogo piya woraagun o,” yinuk, yoragagerak.

³²Yorage nagagerik, ambi yorage logonet, “Eyo wuli anggup larikit nduk eeke menggerak nogo kiniki wakkaanip o. Eno'mbak paga agarip wungge nagaatik, anggup lake kenok, O kiniyak muk panggo yegerak kagi o, yogo monggotak nogo pogom,

³³Togop eerigin o, yinuk, yokkiragarak yi, eeke kinigen kogo logomonggotik, E! Koorok panggo yegerak me, wage aret kogo o, yinuk, mbarumunggup o.

³⁴Kit yogondak wonogwe yi, awo lek aga'lek kiigak eeriyak abok yokkiragarak nogo, tigitogon a'me lik ari kaamunggup o, yinuk, abet aret yokkiragi o.

³⁵Mbogut-nggween yi, lek arigin aret kwe, an noone ti perak, lek arigin lek mondok aret logogin o,” yoragagerak.

³⁶ Wone ambinom yorage logonet, “An aap aret nda'nagagirak yi, o ndi eyom paga woroorak inom, oonegen mande paga woroorak inom, nogo aakumi abu ineenggo'lek aret o. It mbogut paga menggaarak malayikat kunduk, ineenggo'lek aret. Ndi, an Ala aput kunduk, neenggo'lek mban aret o. An nogoba perak, alik eenu menggerak o.

³⁷ It aakumi aap Nu wonage kagak eeko nogogwaarak nogo pogom, an aap aret nda'nagagirak woroorak eyom paga togop aret arigin o.

³⁸Niyo nggwok ne ambit kilak togon awo yenggenit lagangga'lek kagak, it aakumi nen mbi nunggwi, amburu nunggwi, aap nen kumi kologwe, kumi nen aap kologwe, eerit nugwi tit iigak, at Nu yiiro wurik me unggwagagerak.

³⁹ Unggwage mbareegi, it aakumi nen, Ndogop arigin, mbaka'lek, iniki we ugun kobak iigak, yi nggwok ne ambit kilak togon yenggenit lagangge logonet, ineebe apit yi ndonggoninabeegerak nogo pogom, an aap aret nda'nagagirak woroorak eyom paga togop aret eeginabi woraagin o.

⁴⁰O ti eyom paga aap mbere imbirak yabu eekwi me, ambi wagangge, ambi teppege, eeke kaamunggup o.

⁴¹Ndi, kumi mbere imbirak mbi worakwi me, ambi wagangge, ambi teppege, eeke kaamunggup.

⁴²Togop me, kinogoba an nogo, o ngge eyom paga woroorak kineenggo'lek me, kiniki tum wako logonip o.

⁴³ At aap awi unde nen, Yogoot iyagalo ne ndi eyom paga woraagin, eenu a'netak en, tu paappunuk, amendek kiraari unggwage kero, nogo yega'lek mondok-mondok tum wake logonetak o, yinuk, kineenu a'nip o.

⁴⁴Togop me, an aap aret nda'nagagirak yi, kit nen, Ne ndi eyom woroorak, mbaka'lek kiigak, woraagin aret me, kit mondok pipuk-papuk aago logonip o,” yinuk, yoragagerak.

⁴⁵Wone ambinom yorage logonet, “Ti kenok, aap nggwok ayeloman ambi nen at ogoba apuri inarum logonet, inambi noorak wogorage logowak nduk, mippereegerak iniki warak yabu li'lak eeke menggerak nogo ta o?

⁴⁶Ogoba nen ayeloman togop eeke me ka wage kenok, ayeloman iniki ale'nggen arigin o.

⁴⁷Ogoba nen at amendek abok aret ayeloman nogo unde logowak nduk, mippigin o, yinuk, abet aret yokkiragi o.

⁴⁸Ndi, aap ayeloman nogo ti, obaabut abu maluk me, Nogoba elaambirik, logonuk woraagin, mbaki o, yinuk,

⁴⁹ogoba ayeloman mini at oreewi ando nogo yawi inooke, it amburu nenok, kumili aganaka mendek inom lambunik logonet, yi mendek ndi mendek ugun lagap mban nenet nege, amburu nengge, eeke kenok perak, nonggop o?

⁵⁰Lek o! Aap ayeloman nogo nen, Nogoba ne ndi eyom paga woraagin o, ndi, Oonegen ndi paga woraagin o, mbaka'lek ugun kobak kagak wage logomenggerik,

⁵¹ayeloman nogo eebe nibik-nobak eerogo it aakumi iniki laakot logonet, eeko menggaarak piige menggim nogome mambemenggerak logonet, leenggu maake, eyak nggilik maake, eeke logogin mbaki o,” yinuk, yoragagerak.