Read Western Dani Matiyut 26 Bible Online

Matiyut 26 - Western Dani bible

Matiyut 26

¹At Yetut wone ti abok aret yorage nagagerik, it at oone waganggwi nogo yorage logonet,

² “Nogo mbere yippunuk, laago Obaga Mbo Nagagerak lariyak kineenu me, lakwi eyom paga an aap aret nda'nagagirak yi, eyo karo-karo paga nabembanuwak nduk, neebe pigogo aakumi wogoraagin o,” yinuk, yoragagerak.

³Yorage kagak, it Ala unde inoweewi inom, aakumi inogobamini inom, aap Ala unde inowe nggwok endage Kayapat awoore'nggam time kuwak eeko nogogwaarik,

⁴at Yetut kote aret pippunuk, waruwok nduk, inom wone mbanggo logonet,

⁵“At ili yogo logonet, wat-wat yogwe iyo, laago lakwi paga pigoorak mage o,” yinuk, yereegwaarak.

⁶At Yetut o Mbetaniya aap Timon awin aaga'ne kunik wonagagerak nogo ame wonage me,

⁷ kwe ambi iri'ngga narwastu amburu onggo abu nggwok pogo menggaarak mendek nogo, yiiwak yugum mendaarak paga toolak wonok Yetut owagam wage nagagerik, at Yetut mbi nengge kagak, anobak paga kilippereegerak.

⁸Kilippege nogo, it Yetut oone waganggwi inigen kogo nogogwaarik, inanini nen mberogo logonet, “Amburu yi paga onggo wu nggwok kumbunuk, aakumi inamendek lek wogoroorak op kagak, nonggop nduk aanom warogo eekerak?”

⁹

¹⁰Yogwe nogo Yetut yelok iige nagagerik, it yorage logonet, “Kwe yi nen abu obeelom ee'nakerak me, nonggop nduk, mberogo ogotik?

¹¹ It inamendek lek ti, kinom mondok logomunggup kwe, an perak, kit ninom mondok logogin lek o.

¹²Kwe yi nen amburu noba kilippanegerak nogo ti, an kangge neenok, neebe ndoome mambaniyak nogo nduk pipuk eerogo panegerak me, teppinip o.

¹³Obeelom wone wonok yi awi ndi awi yoranet nugu logonet, kwe yi ee'nakerak nogo, aberak logowak nduk, yoranet nugu logogun o, yinuk, abet aret yokkiragi o,” yoragagerak.

¹⁴Yorage mbareegi, it aap 12 mendek ambi endage Yurat Ikariyot nogo nen it aap Ala unde inoweewi inowagam nage nagagerik, yorage logonet,

¹⁵“Yetut nogo yi o, yokkirage neenok, onggo ngge wo'nirumunggup o?” yinuk, yorage mbareegi, onggo wu mbuti perak anggen 30 wogoreegwaarak.

¹⁶Wogoreegwaarak ti eyom paga nen at Yurat nogo, “O ngge eyom paga, Eebe nogo yi o, yoroorak nanonggwan age kaamun?” yinuk, enegen wagangge nagagerak.

¹⁷Laago Roti Piika'lek Mendek lappunuk, ne aa'nduk noorak eyom paga, it Yetut oone waganggwi nogo nen Yetut owagam wogo nogogwaarik, at yogo logonet, “Laago Obaga Mbo Nagagerak noorak nggeeme pipuk eerogo pagagwi a nawi o?”

¹⁸Yogo mbareegwa, Yetut nen, “Kit o kota time unggwogo logomonggotik, aap time mendek ambi yogo logonet, At Ngguru nen, An eeppaniyak koonak nogo, muk panggo yi wagaarak me, it noone waganggwi ninom kat kame time laago Obaga Mbo Nagagerak larogo nawok o, yinuk, yegerak, yoret o.”

¹⁹Yorage mbareegi, it at oone waganggwi nogo at Yetut lengganinabeegerak nogo ndak-ndak eeko logonet, laago Obaga Mbo Nagagerak nogo pipuk eerogo pugwi a nogogwaarak.

²⁰O kiip age mbareegi, Yetut at oone waganggwi 12 nogo inom nogo nogogwaarik, kwi'na'nuk,

²¹mbi nonggo logonet, at Yetut nen, “Aap kit mendek ambi nen nooruwak nduk aakumi yoraagin, kagi, yinuk, abet aret yokkiragi o.”

²²Yorage mbareegi, iniki abu puru yogo nogogwaarik, inalik nen ambi yogak eeko logonet, “Ai, nogoba. An aret ilik, lek a?”

²³ Yogo mbareegwa, Yetut nen, “At nimbirak nineenggi tenggap me tamonogo nunggwi yi nen aret neebe nooruwak nduk, yoraagin o.

²⁴An aap aret nda'nagagirak yi, an eeriminggirak nabok wone liiru mbanak ndak-ndak eeri nagin kwe, at aap it aakumi neebe nooruwak nduk yoramenggerak ti perak, abuwa o. At nda'nariyak lek mendek aret nda'nagagerak o.”

²⁵Yorage mbareegi, at Yurat Yetut eebe waruwak nduk yoramenggerak nogo nen Yetut yoge logonet, “Ai, Ngguru. An aret ilik?” Yoge mbareegi, Yetut nen, “Kat nen aret yikkolagan o,” yoreegerak.

²⁶Yoge nagagerik, mbi nonggo logonet, at Yetut nen roti eenggime wagangge nagagerik, “Nogoba Ala wa,” yinuk, karerogo, at oone waganggwi nogo wogorage logonet, “Roti yi, an neebe aret me, waganogo nanip o.”

²⁷ Yorage nagagerik, amburu yiiwa'na toolak nogo eenggime waganogo, “Nogoba Ala wa,” yinuk, wogorage logonet, “Kit aap ambik kinomaluk lek eerogo pinaganuk, Ala kinom lambumbinagarak wone abok yokkirage yi, kit abet mbarubagip nduk, namiya kilirik aret me, kit abok aret nanip o.

²⁸

²⁹Ndi, an ta, o yogondak yi kuli paga nen nok, peebi an nogoba abu'me piige menggim logonet, anggur amburu ngget mendek ninom noorak eyom ari waga'lek kagak, an anggur amburu yi, nengga'lek aret logogin, yokkiragi o,” yoragagerak.

³⁰Yorage nagagerik, ndawi wappunuk, wundi nogo nogogwaarik, puurom Tayitun paga lagi nogogwaarak.

³¹ Puurom Tayitun paga lagi nogo logonet, at Yetut nen, “An nen aap ndomba ndegeninaka wake neenok, Ndomba kombogonak nogo mondok kole ma'narugun o, yinuk, Ala yereegerak liiru mbanak me, kit abok aret oonikiya yi paga, Aap ti, nineenggo'lek o, yinuk, teppaninuk, kole mbaganumunggup o.

³² An neenik agago mippanege kenok perak, kit naga'lek kiigak, an naa'nduk o Nggalileya time nagin o,” yoragagerak.

³³Yorage mbareegi, at Peterut nogo nen, “Lek o. It abok aret, Yetut nineenggo'lek o, yinuk, teppaganuk mbaganggwi iigak kwe, an nalik perak, teppaganuk mbaganigin mondok lek o.”

³⁴Yoge mbareegi, at Yetut nen, “Yogondak oonikiya yi paga ayam oone awo yaga'lek kagak, kat ne kenagan paga, Yetut ti, neenggo'lek, yumunggun o, yinuk, abet aret yokkigi o.”

³⁵Yoge mbareegi, at Peterut nen, “An nimbirak kambuurak kenok, kambuurak aret me, Yetut neenggo'lek ti perak, an yigin abu lek o.” Yoge mbareegi, it at oone waganggwi nogo abok aret togop mban yoreegwaarak.

³⁶Ti'nuk, Yetut at oone waganggwi nogo inom o endage Nggetemani ari nogo nogogwaarik, Yetut nen at oone waganggwi nogo yorage logonet, “An iru time tamban eeri nage me, kit yayi logonip o.”

³⁷Yorage nagagerik, Peterut inom, at Tebereyut apuri mbere nogo inom, wogoret nage nagagerik, iniki puru ari logonet, aaninggin lombok agagerak.

³⁸Age nagagerik, “Wologwe wae. An niniki puru ari logonet, kambuurak ee'nake me, kit yime logonet, tum wakwi, ndi, an togon tum wakkola nage, eeruwok o.”

³⁹ Yoraanuk, nirurogon nage nagagerik, enete wanduk togon nggween paga ngginna'nuk, Ala yoge logonet, “Ai, nogoba. An ee'naburak yiiwa'na toolak kwak yi, noorak lek teppaniyak op mbake keenok, teppanu o. Ndi, lek kenok, an niniki mbake eerigin ti lek o. Ata, kat kiniki mbake aret eerigin o,” yinuk, tamban eereegerak.

⁴⁰Tamban eeke nagagerik, at oone waganggwi nogo inowagam wagagerak. Wage nagagerik, nogo yugwi enegen iige nagagerik, Peterut yoge logonet. “Wulaga. Kit ne ambiriluk ninom tum wako logorak meek kenok nogo yogo ogotik?

⁴¹Niniki nen obeelom eeriyak mbakwi kwe, nineebe nen eeriyak meek ee'ninake menggerak me, maluk eeriyak kinikime nggagani wage kero, tum wako logonet, tamban eeko logonip o.”

⁴²Yoge nagagerik, ne ambi teppiinok nage nagagerik, Ala yoge logonet, “Ai, nogoba. An ee'naburak amburu toolak kwak yi, nengga'lek me teppaniyak meek kenok, kat kiniki mbake aret eerigin o,” yinuk, tamban eereegerak.

⁴³Tamban eeppunuk, iyok paga wage nagagerik, it aap nogo, nogo yuurak eeginake mbareegi, nogo yugwi iyareegerak.

⁴⁴Nogo yugwi iigak, teppiinok, nage nagagerik, aa'nduk ne mbere paga Ala yoreegerak nogo, peebi ne ambinom tamban eeke logonet, togop aret yoreegerak.

⁴⁵Tamban eeppunuk, it at oone waganggwi nogo inowagam wage nagagerik, “Kit yonggonggologo logonet, nogo mban yogo logorak mbako ogotik ya? It maluk eeko menggaarak nen an aap aret nda'nagagirak neebe nooruwak nduk wogoroorak eyom muk panggo yi wagaarak yi kaanip o.

⁴⁶At neebe nooruwak nduk, nonggo mbanggerak nogo muk koorok wage yi aret me, nawok nduk, mi'na'nip o,” yinuk, yoragagerak.

⁴⁷At Yetut awo yorage kagak, it Ala unde inoweewi inom, it aakumi inogobamini inom, nen aap ambi aago paloowi waganggwi, mbim mbanak waganggwi, ee'nuk, Yetut wa nawak nduk, nappiyareegwaarak nogo it aap 12 mendek yendennagagerak Yurat nogo inom aret nogogwaarak.

⁴⁸Ndi, at Yetut eebe waruwak nduk, onggo mbaneegerak nogo nen, aa'nduk inom wone mbangge logonet, “Yelok kaabagip nduk, an nen at ambi kambugege neenok, Aap nogo ti aret, mba'nuk, piganu o,” yinuk, wone inom mbaneegerak me,

⁴⁹at nogo nok-nok Yetut owagam nage nagagerik, “Nogoba ngguru wa,” yinuk, kambugereegerak.

⁵⁰Kambugege mbareegi, at Yetut nen, “Wulaga! Kat eerikit nduk wagandak nogo eeru o.” Yoge mbareegi, it aap nogo kok nogo logonet, Yetut pigaganeegwaarak.

⁵¹Pigaganggo mbareegwa, Yetut inom menggaarak aap ambi nen paloowi nggigik togon agago aap Ala unde inowe nggwok ayeloman nogo aruk tabok togon nappereegerak.

⁵²Tabonogo nappege mbareegi, at Yetut nen, “It aap paloowi paga inookwi iinok, it nen onggo paloowi paga aret inooko menggaarak me, kobaloowi ti, awiina yonggolu o.

⁵³An nili yuwak nduk, yogondak yi paga it malayikat apit ineebe 12 aago wo'niruwak nduk, an nogoba nggino yoriyak meek mbaken?

⁵⁴Nggino yoriyak op aret kwe, yoge neenok, Togop eeriyak, Ala wone liiru mbanak nogo nonggop togon a'me lik yuurak mbaken? A'me lik yuwak nduk, an yoga'lek aret agarik o.”

⁵⁵ Yoge nagagerik, ne ti paga at Yetut nen it aap wogogwaarak nogo yorage logonet, “Aap yogoot wagangga piginabi nogo mengga kwak, an togop aret pi'nabuwok nduk, tege wooluwak inom, yawi mbanak inom, wonok wogotak ya? Ko'lu-kii'me Ala awi wurik me mamunggirage neegak, pi'naka'lek wonogotak kwe,

⁵⁶ it Ala yorage kagak yoraga nen liiru mbaneegwaarak nogo a'me lik yuwak nduk, an ee'nabi wogotak me, op aret o.” Yorage mbareegi, at oone waganggwi nogo nen Yetut teppunuk, kole mbaganeegwaarak.

⁵⁷Kole mbaganggo mbareegwa, it Yetut pigaganeegwaarak nogo nen eebe wonok aap Ala unde inowe nggwok Kayapat owagam it aap Ala wone liiru mbanak unde inom, it Yakuri inogobamini inom, kuwak eerak wonogwe me, nogogwaarak.

⁵⁸Nogwe iigak, at Peterut nogo inambo'me yanabek at Ala unde inowe nggwok nogo awoore'nggam panggo yi nage nagagerik, unggwi na'nuk, “Nonggop eeppugwi iyaamun?” yinuk, at Ala unde inowe nggwok nogo awuri inenggela'me inom aret kwi'nagagerak.

⁵⁹Kwi'ndak wonage kagak, it Ala unde inoweewi inom, it wone amburu mbanggo menggaarak abok aret inom, “At Yetut waruwok nduk, taani nen pilit wone at oba pugwi iyaamun?” yinuk,

⁶⁰ aap ambik nen pilit wone oba lenggenugun ta'lek wogogwaarak kwe, alom kwaaka'lek aret wonogwe me, ti'nuk, peebi aap mbere wogo nogogwaarik, yorogo logonet,

⁶¹ “Aap yi nen, An Ala awi wurik minogo punuk, obaane'me wuke neegak, nogo mbere aret yumunggup, yereegerak o.”

⁶²Yorogo mbareegwa, at Ala unde inowe nggwok nogo, mi'nage nagagerik, Yetut yoge logonet, “It aap yi, wone yagandak koba pagagwi me, onggo ambi yoraamunggun a, lek a?”

⁶³ Yoreegerak kwe, at Yetut nogo oone lek puk wonagagerak. Puk aret wonage mbareegi, at Ala unde inowe nggwok nen, “Kat Keritut Ala aput kenok, paganogo yo'niraanok nduk, at Ala eenik menggerak endage kumbunuk yokkigi o.”

⁶⁴ Yoge mbareegi, at Yetut nen, “Yagandak ti aret o. Togop me, kit abok aret an ambi yokkira o. O yogondak yi kuli paga nen an aap aret nda'nagagirak yi, at Omaawi Lombok Menggerak eenggi abe'nggan kwi'ndak wonage logominggirik, mbogut paga ndugwi enggela'me wambi wage neyaamunggup o, yinuk, yokkiragi o.”

⁶⁵ Yorage mbareegi, at Ala unde inowe nggwok nogo nen ayum mondok nggoguk togon eerogo nappege logonet, “Wologwe! Ala miyuk-meya eerogo pege yi kagak, wone ambi ngge inom yo'niraawak nduk, tokkogo ogotik? At yegerak abu konenggotak me,

⁶⁶nonggop eeruwi mbakop?” Yorage mbareegi, it nen, “Mondok wariyak aret o.”

⁶⁷ Yogo nogogwaarik, woori enete me lenggenggogwe, ineenggi lingginik paga wakwi, ndi, ando ineenggi telak wakwi, eeko logonet,

⁶⁸“Wulaga Keritut wae. Ta nen kooke kagan? Yu nda!” yinuk, yogo nogogwaarak.

⁶⁹Yogwi iigak, at Peterut nogo oore'nggam taati kwi'ndak wonage me, kolaga inayeloman ambi wage nagagerik, “Kat kunduk, at Yetut o Nggalileya mendek kimbirak nege menggendak keegi o.”

⁷⁰Yoge mbareegi, at Peterut it abok inenggaanom paga, “Kat yagandak ti, an neenggo'lek ubi!”

⁷¹Yoge nagagerik, tu unggwogo menggam ari wungge mbareegi, kolaga ambi nen Peterut enegen kage nagagerik, it time wonogwe nogo yorage logonet, “Aap yi nogo Yetut Nataret mendek imbirak menggerak aret o.”

⁷²Yorage mbareegi, at Peterut ambinom ari logonet, “An aap ti, mondok neenggo'lek abet aret yokkigi o,” yinuk, ombo owak mbaneegerak.

⁷³Mbangge nagagerik, nogome wonage me, ti'nuk, it ugun taati mi'ndak wonogwe nogo nen Peterut yogo logonet, “Koone ari ti paga kat it mendek abet aret yelok keego o.”

⁷⁴Yogo mbareegwa, “An aap ti, abu neenggo'lek me, nombo owak o,” yinuk, ombo owak awo mbangge kagak, ayam oone aret yereegerak.

⁷⁵Ayam oone ari mbareegi, at Yetut nen, “Ayam oone awo yaga'lek kagak, kat ne kenagan paga, Yetut ti, an neenggo'lek, yumunggun o,” yinuk, yoreegerak nogo, at Peterut iniki abe'nage mbareegi, wundi nanuk, iniki puru ari logonet, le nggwok yereegerak.