Read Western Dani Matiyut 27 Bible Online

Matiyut 27 - Western Dani bible

Matiyut 27

¹ O weege mbareegi, it Ala unde inoweewi abok inom, it aakumi inogobamini inom, Yetut wari yak wone amburu mbambunuk,

²eebe keele maarogo at o unde gubernur endage Pilatut nogo wonok iri nogogwaarak.

³ Ndi, aakumi nen Yetut waruwak nduk, onggo mbaneegerak at Yurat nogo nen it wone amburu mbangga nen Yetut wariyak kooneegwaarak nogo kage nagagerik, iniki wakko'nok, wu mbuti perak anggen 30 nogo wonok, iyok paga it aap Ala unde inoweewi inom, it aap inanggok inom, inowagam pi wage nagagerik,

⁴“Ai. At maluk eerulik kagak, an nen warubagip nduk, onggo mbanggirak me, maluk aret eekirak o.” Yorage mbareegi, it nen, “Wone ti, nit ninoba agaarak mbaken? Ti kat kobaalombok aret o.”

⁵Yogo mbareegwa, at Yurat nen wu mbuti perak nogo Ala awi wurik me time yubunik-telenak eerogo mambege nagagerik, wundi nanuk, enggaanok keele yilunggola nage nagagerik, kambeegerak.

⁶ Kangge mbareegi, it Ala unde inoweewi nogo nen wu mbuti perak nogo waganggo nogogwaarik, “Wu yi, aap amiya paga onggo mbanak aret me, Ala ake wu pogo menggam taati puurak mage o, yinuk, liiru mbanak me,

⁷it aap nggiru kanggwi iinok, nggween taambiigo logowok nduk, aap nggween mendek paga togolowak ogobakkigike menggim nogome aret wu mbuti perak yi paga onggo mbanuwok o,” yinuk, koombunuk, nggween nogo onggo mbaneegwaarak.

⁸Nggween ti, aakumi inamiya kilirik paga onggo kunik me, endage, “Aap Amiya Wundeegim aret o,” yinuk, yogo nogogwaarak me, yogondak awo yogwe aret wonogwe o.

⁹ Ti eereegwaarak nogo ti, Ala yoge kagak yoraga Yeremiya nen ari logonet, “It aakumi Iterali mendek nen, At eebe onggo ti, wu mbuti perak anggen 30 puurak op o, yogogwaarak nogo aret waganogo at ninogoba Ala nen yo'nereegerak ndak-ndak, aap nggween mendek togolowak ogobakkigike menggim onggo mbanggologogwaarak o,” yinuk, yoragagerak nogo, ne ti eyom paga aret a'me lik yereegerak.

¹⁰

¹¹At Yetut nogo aap o unde gubernur owagam mi'nari wage mbareegi, at gubernur nogo nen eegwa'me wagangge logonet, “Yakuri inowe kendagembogut kat aret ilik?” Yoge mbareegi, at Yetut nen, “Ti kat nen aret yagan o.”

¹²Yoreegerak kwe, it aap Ala unde inoweewi inom, aap inanggok inom, nen wone at oba lenggenogo pugwi iigak, at onggo ambi abu yoroolik puk aret wonagagerak.

¹³Puk aret wonage mbareegi, at Pilatut nen, “Yi wone ndi wone koba lenggenogo pagagwi yi, kat konengga'lek agandik?”

¹⁴Yoreegerak kwe, onggo yoraga'lek puk aret mbareegi, at gubernur nogo nen, “Aap yi iya kagi,” yinuk, pi wareegerak.

¹⁵Ndi, it aap Yakuri laago lako logonet, kuwak eeko menggaarak nogo nen, “Aap keele maarak ambi ti, piinogo wo'niret o,” yogwi iinok, at gubernur nogo nen piinogo wogorage nagagerak me,

¹⁶ti eyom paga aap maluk nggwok eerit nage nagagerak paga endage ineenu ogogwaarak Mbarabat nogo, keele maarak wonage me,

¹⁷it aakumi kuwak eeko mbareegwa, at Pilatut nen, “Nit eeruwok lak, at mban eerit nage yi nineebi a,” yinuk, at Yetut wonok wogwe yelok iige nagagerik, it yorage logonet, “Kit kiniki nen ta piinogo wokkiroorak mbakop? At Mbarabat ilik, Yetut endage Keritut yogwe nogo piinogo wokkiroorak a?” yoragagerak.

¹⁸

¹⁹Yorage nagagerik, owak looninake menggim taati kwi'na'nuk, wonage me, aap ambi wage nagagerik, Pilatut yoge logonet, “Pilatut wae. Kat kakwe nogo, oonikiya yi paga abi kage logonet, Aap ti iniki abu koonak kagak maluk eeppugwi, kage nagarik, niniki aaninggin ambik agaarak me, nore nen maluk eeppege kero, yori nak o, yo'nege mbaki, yokkiri wagi o,” yoreegerak.

²⁰Nogo yoge kagak, it Ala unde inoweewi inom, aap inanggok inom, nogo nen it aap kuwak aago nogo yorogo logonet, “Mbarabat keele piinogo teppege logonet, Yetut wariyak wo'niraawak nduk, Pilatut yo'nip o,” yinuk, wone inikime manabit nogogwaarak.

²¹Inikime manabit nogwe at gubernur nogo iige nagagerik, “Aap mbere me, ambi ta piinogo teppuurak mbakop?” Yorage mbareegi, it nen, “Mbarabat aret o.”

²²Yogo mbareegwa, at Pilatut nen, “Ndi, ti kenok, at Yetut endage Keritut yogwe yi, an nonggop eerogo pi o?” Yorage mbareegi, it abok nen at yogo logonet, “Eyo karo-karo paga nabenogo puurak aret o.”

²³Yogo mbareegwa, at nen, “At maluk ngge eekerak paga yogop o?” yoragagerak kwe, “Lek o. Eyo karo-karo paga nabenogo puurak aret,” yinuk, abunuk inoone nggwok paga ya-mba yogogwaarak.

²⁴ Yogo mbareegwa, at Pilatut nen, “An noone we aanom warogo ari, ndi, nawone-kawone yogo logonet, maluk nggwok eeriyak age, eeke,” kage nagagerik, niyo toolak waganogo it aap kuwak aago inenggaanom paga eenggi kooke logonet, “Aap yi, amiya an noba arigin lek o. Kit kinoba aret logogin me, kinobaalombok aret koonggo logonip o,” yinuk, yoragagerak.

²⁵Yorage mbareegi, it aakumi abok aret inoone wonggok togon yogo logonet, “At amiya ti, nit ninapuri-ninombowologwe ninom ninoba logorak op aret o.”

²⁶Yogo mbareegwa, at Mbarabat nogo keele piinogo teppereegerak kwe, Yetut perak, ya'mbiran wappunuk, eyo karo-karo paga nabenogo puwak nduk, wogoragagerak.

²⁷Wogorage mbareegi, it gubernur awuri yigin unde nogo nen at Yetut wonok wone amburu mbanggo menggam unggwogo nogogwaarik, ineebe abok aret Yetut eebe ninggippunuk, wonogo logonet,

²⁸ayum nggooppunuk, yum alik maa'ngga warak yippugwi,

²⁹alok komaarogo anobak paga yippugwi, mbim obate mbanak eenggi abe'nggan wogogwi, eeppogo nogogwaarik, ineebe at abu'me tebe yinuk, agi'ndok kanggo logonet, “Wa! It aap Yakuri inowe kendagembogut kat aret me, wa. Ninogoba wa,” yinuk,

³⁰woori lengga eerogo pugwi, mbim obate mbanak eenggi me nogo ndimbunuk anobak me tela eerogo wakwi, eeppunuk,

³¹miyuk-meya eerogo pogo nogogwaarik, yum maa'ngga warak nogo nggooppunuk, at ayum nogo yippogo nogogwaarik, eyo karo-karo paga nabembuwok nduk, wonok wundi nogogwaarak.

³²Wundi nogwe me, aap o Kirene mendek endage Timon inikiigun wage me, inom lambunggo nogogwaarik, inoone omaawi paga, “Eyo karo-karo aago yi, piyaninuk nak o.”

³³Yogo nogogwaarik, o endage it inoone paga, “Nggonggota o,” yogo menggam nogome ari nogogwaarak. Ndi, o ti, nit ninoone paga, Anobak Yelenak o, yogo monggoorak.

³⁴Ndi, time nogo nogogwaarik, anggur amburu inom, ambiki ale mendek inom, nenggelak-kenggelak agago punuk noorak nduk, wogoreegwaarak mendek, ombat wakkage nagagerik, noorak eebi mbareegerak.

³⁵ It nen Yetut eebe nogo eyo karo-karo aago paga nabembunuk, “Ambogoyum ta koloorak kaamun?” yinuk, yugum anggen nggween paga mbo wuppegak eeko logonet, ayum nogo ambi kolagak eeko nogogwaarak.

³⁶Eeko nogogwaarik, taati kwi'na'nuk logonet, Yetut arum wonogogwaarak.

³⁷Wonogo logonet, “Aap Yakuri inowe endagembogut Yetut yi aret o,” yinuk, oba lenggeneegwaarak wone nogo liiru mbanogo Yetut anobak irimbaga eyo nogo paga nabembereegwaarak.

³⁸Ndi, aap yogoot iyagalo mbere Yetut eebe peenok-peenok eyo alik paga nabenogo piyareegwaarak.

³⁹ Nabembiigo mbareegwa, it aakumi ando nogwe-wogwe nogo inuut walok yogo logonet, “Keyik!

⁴⁰ An Ala awi wurik minogo punuk, obaane'me wuke neegak, nogo mbere yigin, yagandak nogo, kat Ala aput aret keenok, kagap ndakko'nok wambi mok ubi.”

⁴¹Yogo mbareegwa, it Ala unde inoweewi inom, it Ala wone liiru mbanak unde inom, it aap inanggok inom, Yetut miyuk-meya eerogo pogo logonet,

⁴²“At nen aakumi inagap ndaganake nagaarak kwe, at eebe agap ndakkoloorak meek yi kogop a? Aap Iterali inowe endagembogut aret me, yogondak eyo paga nen wambi wage kenok perak, nit abet ombarugun o.

⁴³ Iniki Ala oba panggonak logonet, An Ala aput aret o, ari nagaarak me, Ala nen inikilom ombake kenok, agap ndaruwak o,” yinuk, yereegwaarak.

⁴⁴Ndi, it aap yogoot iyagalo Yetut inom eyo karo-karo aago paga nabembiyareegwaarak nogo kunduk, Yetut enggali wappogo logonet, togop aret yoreegwaarak.

⁴⁵Yogo mbareegwa, o liingge oonegen 12 kuli paga nen nok, oonegen 3 kuli ari nage kagak, o time apit aago aret wonagagerak.

⁴⁶ Ndi, oonegen 3 negen ari nage mbareegi, at Yetut oone nggwok paga ari logonet, “Eloyi, Eloyi, lama tabatani!” yoreegerak. Yoreegerak nogo ti, nit ninoone paga, “Nogoba Ala o. Nogoba Ala o. Nonggop nduk an teppanegen o?” yinuk, yoreegerak.

⁴⁷Yoge mbareegi, it time wonogogwaarak ando nen Yetut oone ari inaruk konembogo nogogwaarik, “Aap yi, Eliya wiige agaarik o,” yinuk,

⁴⁸ yogo mbareegwa, aap it mendek ambi puu'nuk nage nagagerik, ta'mbit tiroguk leenogo anggur amburu aleegwi mendek tamombunuk, nawak nduk, yigirok paga kunogo wogoge mbareegi,

⁴⁹it ando nen, “Eliya nen agap ndari wage kaawam me, puk o.”

⁵⁰Yogo mbareegwa, at Yetut nen ambinom kwa ari logonet, iniki woronggo'nok kambeegerak.

⁵¹ Iniki woronggo'nok abu kangge mbareegi, yum Ala awi wurik me akenggwe tugunik wonagagerak nogo, agi nen oolo muundak nggoguk yi wambi wage, nggween nuk ari, yugum puut-puut abok langgu-langgu wambi wage, eeke logonet,

⁵²it aakumi kanggaatak ineebe mambiigo menggam nogome tu kuu'narit nage mbareegi, Ala apuri kambeegwaarak nogo ambik ineenik a'nuk, mi'narit nogo nogogwaarik,

⁵³ndoome nen wundit wogogwaarak. Ndi, at Yetut eenik a'nuk, mi'nage mbareegi, it nogo o kota Ala ake leenak menggim nogome unggwogo mbareegwa, aakumi ambik nen inigen iyareegwaarak.

⁵⁴Ndi, at yigin unde inowe inom, it Yetut arum wonogogwaarak inom, nogo nen mi nuk ari, ndi, yi eekak ndi eekak eeke, eeke nogo inigen kogo nogogwaarik, inagabiti ambik age mbareegi, “At yi, Ala aput abet aret kogo o,” yinuk, yereegwaarak.

⁵⁵ Ndi, it kumi ambik o Nggalileya nen Yetut ake eerit inom wogogwaarak nogo nen Yetut eyo paga nabenak wonage nda nen inigen nakkogogwaarak.

⁵⁶Inigen nakkogogwaarak nogo ti, at Mariya Magaralena inom, it Yakobut Yutup imbirak inagalo Mariya inom, at Tebereyut apuri inagalo inom, kumi ando inom, ti nen aret inigen nakkogogwaarak.

⁵⁷O kiip age mbareegi, aap eenggi warak Arimateya mendek ambi endage Yutup, Yetut oone wagangge nagagerak me,

⁵⁸Pilatut owagam wage nagagerik, “Yetut warak eebe wo'niru o,” yinuk, ngginooge mbareegi, at Pilatut nen wogoruwak nduk, yoragagerak.

⁵⁹Wogogo mbareegwa, at Yutup nogo nen Yetut eebe wagangge nagagerik, mbogoyum yawenak abu koorak tabak paga perenogo,

⁶⁰ndoome yugum eno nendaarogo pateegim mambege nagagerik, yugum tabak nggwok laganogo tungga nappunuk, nagagerak.

⁶¹Ndi, at Mariya Magaralena, kwe Mariya ambi nogo imbirak aap warak pereegwam nogome engga lolo kwi'ndak wonogogwaarak.

⁶²It aap Yakuri tamban eeriyak nduk, pipuk eeppogo nogogwaarik, nogo yippunuk, ko'lu ti paga it aap Ala unde inoweewi inom, aap Pariti inom, kuwak eeppunuk, Pilatut owagam wogo nogogwaarik, at yogo logonet,

⁶³ “Ninogoba wae. At aakumi nomoninake menggerak nogo nen awo eenik logonet, Nogo mbere yippunuk, mi'narigin o, yereegerak nogo nineenu me,

⁶⁴at oone waganggwi nogo nen wogo logomenggaarik, eebe kote woppunuk, aakumi yorogo logonet, Kambunuk nogo menggam nen eenik a'nuk mi'nagaarak o, yinuk, yorogwe iinok, at Yetut aa'nduk aakumi iniki nomoninabeegerak ti, mbuuluk negen, ndi, it at oone waganggwi nogo nen nggwok togon nomoninakwi iyo, kat nen Yetut warak eebe pegam nogome ne kenagan kuli paga tum wako logowak nduk, kawuri yoret o.”

⁶⁵Yogo mbareegwa, at Pilatut nen, “Kinake tum wako logorak ineebe yi aret me, it nen tum wako logorak nogo kinobaalombok koombunuk, yoraanip o.”

⁶⁶Yorage mbareegi, nogo nogogwaarik, “Yugum narak worekkagaarak kaamun ilik?” yinuk, wa'mbok punuk, it yigin unde nogo nen aap warak pereegwam nogome tum wako logowak nduk, piinok, nogogwaarak.