Read Western Dani Matiyut 7 Bible Online

Matiyut 7 - Western Dani bible

Matiyut 7

¹Yorage nagagerik, ambinom yorage logonet, “Ala nen perak togon, Kit maluk eekotak o, yinuk, yokkirage kero, kit nen aap ambi eeremenggerak paga, Kat maluk eekendak o, yinuk, kinoone omaawi paga perak togon yoriyak mage o.

²3 Kit maluk eekotak o, yinuk, kinoone omaawi paga perak togon yorogwe kiinok, Ala nen kit togop aret yokkirage kaamunggup o. Wakkagak nogo paga wakkaanuk aakumi wogorogo monggotak nogo ndak-ndak wakkaanuk wokkirage kaamunggup o.

³Eyo obate mbanak kinigen me milinik wonage maloppega'lek logonet, kit kinore enegen anggup nonggop nduk maloppogo ogotik?

⁴Ndi, eyo obate mbanak kit kinigen me worekkaga'lek logonet, kinore nogo, Kenegen anggup worekkeya o, yinuk, nonggop togon yoriyak mbakop?

⁵Aap pilit pugungga kit aret o. Eyo obate mbanak kinigen me milinik wonage nogo, aa'nduk mbo nappunuk, kinore enegen anggup worekkoorak tena'me kaamunggup o.

⁶Nggeewo nen melak togon ineyak mbangginakwi iyo, Ala ake leenak abe mendek nogo wogoraagup o. Ndi, wam iniyok aan lebenogo pit nogwe iyo, wu kirin negen wam wonogwe me, inenggela'me mbo nappugup o,” yinuk, yoragagerak.

⁷ Yorage nagagerik, ambinom yorage logonet, “It aakumi nggino yorogwe iinok, wogorogwe, kwaakwi iinok, kwaakkologwe, Tu paa'niyet, yorogwe iinok, paariigwi, eeko menggaarak me, nggino yogwi kiinok, wokkirage, kwaakwi kiinok, kwaakkirage, Tu paa'niyet o, yogwi kiinok, paakkiige, eeke kaabagip nduk, kit nen nggino yogwi, kwaarit nugwi, Tu paa'niyet, yogwi, eeko logonip o.

⁹Kinapuluk ambi nen, Mbi wo'niru o, yokkirage kenok, yugum aret wogoriyak mbakop?

¹⁰Ndi, Ikan ambi wo'niru o, yokkirage kenok, waalo aret wogoriyak mbakop?

¹¹Lek o. Kit aap maluk mendek kwe, kinapurilogwe nen yokkirogwe iinok, obeelom mendek wogorogo monggotak nogo ndak-ndak, kit kinogoba mbogut paga mendek nogo nggino yogwi kiinok, at togop aret obeelom mendek mondok iya negen wokkirage kaamunggup o.

¹² Kit nen, Ndogop eeppinanuwak lak ao, mbako monggotak nogo ndak-ndak aret eeppiigo logonip o. Ala wone yugu Muta nen liiru mbaneegerak inom, it Ala nen yorage kagak yoraga inoone yugu inom, eebe ti aret me, eeko logonip o,” yinuk, yoragagerak.

¹³ Yorage nagagerik, “It aakumi kobak ari nogo menggam unggwi noorak tunggambe nggwok mbanak, ndi, tu nogo menggam kunduk mbelak aago yarak kenok, aakumi ambik tu ti paga nogo menggaarak kwe, kit perak, tunggambe mbuuluk mbanak nogo paga unggwi nogo logonip o.

¹⁴Ineenik ogo menggam unggwi noorak ti, tunggambe mbuuluk mbanak, ndi, tu nogo menggam kunduk kunik me, aakumi mbereeluk mban kwaakkologo nagaatik, unggwi nogo menggaarak o,” yinuk, yoragagerak.

¹⁵ Yorage nagagerik, ambinom yorage logonet, “It aap Ala wone pilit pugunogo yokkirogo menggaarak nogo nen kinambokan laganggwi iyo, tum wako logonip o. It aap ti, inetenggen ndomba enete negen kunggo'nok kinowagam wogwe kwe, iniki ti, mba'ngge anini warak pogom wonogwe o.

¹⁶It aap ti, eerit nogo logonet, anggen yi'nage paga kineenu arumunggup o. Kit anggur anggen nogo eyo poondo alokwi paga yugu me, waganggwi mbakop? Ndi, eyo wuli anggen nogo iri'ngga alokwi paga yugu me, mbanggwi mbakop?

¹⁷Lek o. Eyo obeelom mendek kenok ti, anggen obeelom mendek aret yege menggerak. Ndi, eyo maluk mendek kenok ti, anggen maluk mendek aret yege menggerak.

¹⁸Eyo obeelom mendek ti, anggen maluk mendek yegeelik o. Ndi, eyo maluk mendek ti, anggen obeelom mendek yegeelik mban.

¹⁹ Eyo anggen obeelom mendek yege lek kenok ti, muurogo kani kunik me mambogo menggaarak o.

²⁰ Togop aret me, it aap nogo eerit nogo logonet, anggen yi'nage paga kineenu arubagip nduk, yokkiragi o,” yinuk, yoragagerak.

²¹ Yorage nagagerik, wone ambinom yorage logonet, “It aakumi inoone paga nen mban, Ai, ninogoba. Ai, ninogoba. Yo'nogo menggaarak nogo abok tigitogon at mbogut paga mendek abu'me piyaagin mondok lek o. An nogoba mbogut paga mendek iniki mbake nogo ndak-ndak eeko menggaarak kenok mban at abu'me piyaagin o.

²²O ti eyom paga aakumi apit aret, Ai, ninogoba. Kat kendage paga Ala wone yorogo nogogurak nogo o. Ai, ninogoba. Kat kendage paga kugi nggiginogo wumbiigo nogogurak nogo o. Ai, ninogoba. Kat kendage paga eerubok mendek apit aret eeko nogogurak nogo o.

²³ Yo'niremenggaarak kwe, an nen it yorage logonet, Kit maluk eeko monggotak yi, an mondok neenggo'lek me, an wonage me nen mbaganinip o, yinuk, yoraagin o,” yoragagerak.

²⁴Yorage nagagerik, ambinom yorage logonet, “Yi aap ndi aap an noone inaruk konembunuk, liirogon eeko menggaarak ti, aap iniki warak nen awi yugum paga wureegerak nogo pogom it aret.

²⁵Wuppunuk wonage me, o mayu wage, niyo nggwok wu'nuk wage, o wiya wake, eeke logonet, o wurik panggonggagak eereegerak mendek o nogo yugum paga wurik me, langgongga'lek aret wonagagerak.

²⁶Ndi, it yi aap ndi aap an noone inaruk konembunuk, liirogon eekulik kenok perak, aap iniki lek nen awi mbini paga wureegerak nogo pogom it aret o.

²⁷Wuppunuk wonage me, o mayu wage, niyo nggwok wu'nuk wage, o wiya wake, eeke logonet, o wurik nogo panggonggagak eeke logonet, langgonogo yigirik-noonom mondok iya tit eerit nagagerak o,” yinuk, yoragagerak.

²⁸ At Yetut nen wone yi nogo abok aret yorage mbareegi, it aakumi kuwak aago nogo at oone mamunirage inaruk konenggo nogogwaarik, “Ie! Aap yi, it Ala wone liiru mbanak unde nen yo'nirogo mengga kwak yo'nirage lek o. Wone ti, at unde nen aret ari me, wi!” yinuk, pi wareegwaarak.