Read Western Dani Matiyut 8 Bible Online

Matiyut 8 - Western Dani bible

Matiyut 8

¹At Yetut puurom paga nen wambi wage mbareegi, it aakumi ambik at mugurok wogwe iigak,

²aap ambi awin aaga'ne kunik Yetut owagam nage nagagerik, abu'me tebe yinuk, “Ai, nogoba. Kat nen obeelom ee'naburak mbake keenok, obeelom ee'naburak op aret o.”

³Yoge mbareegi, at Yetut eenggi nderogon aap nogo pigagangge logonet, “Obeelom eekkaburak mbakirak me, obeelom agago pagagi o,” yinuk, awo yoge kagak, at awin aaga'ne kunik nogo lek aret a'nuk, obeelom agagerak.

⁴ Lek aret age mbareegi, Yetut nen at yoge logonet, “Aakumi abu yoraagun o. At Ala unde nogo nen keebe pekkeyaawak nduk, owagam nak o. An obeelom eekkakirak me, Muta nen, Ala ake ndogop puurak o, yereegerak nogo ti, pege keyaawak nduk, pi nak o,” yinuk, yoreegerak.

⁵Ti'nuk, at Yetut o Kaperenawum unggwi wagagerak wonage me, it aap yigin unde inowe ambi Yetut owagam wage nagagerik, nggino yoge logonet,

⁶“Ai, nogoba. An nayeloman eenggi-iyok abu nggunanak oome windak logonet, andi nggwok yagan wake agaarik o.”

⁷Yoge mbareegi, at Yetut nen, “An nen obeelom eeri nagin o.”

⁸Yoge mbareegi, at aap yigin unde inowe nogo nen, “Ai, nogoba. An aap mbuuluk me, kat nen an name unggwi noorak meek o. Ata, koone mban yemenggendak keenok, nayeloman obeelom aret arigin o.

⁹An kunduk, noweewi inabu'me logonet, inoone konengge, ndi, an nawuri yigin unde an nabu'me logonet, an noone konenggwi, eeko monggoorak me, an nen nawuri ambi, Nak o, yoge neenok ti, nage, ambi, Mok o, yoge neenok ti, wage, ndi, an nayeloman, Ti eeru o, yoge neenok ti, eeke, eeko menggaarak o.”

¹⁰Yoreegerak nogo at Yetut aruk konengge nagagerik, “Wi!” yinuk, pi wake logonet, at inom wogwe nogo yorage logonet, “It Iterali mendek inenggela'me nen aap iniki mondok iya lombok abet nombake yogop ambi an kaga'lek aret agarik o, yinuk, abet aret yokkiragi o.

¹¹ Aakumi ambik agi-ogu nen wogo logomenggaarik, Abarakam kunduk, Itak kunduk, Yakup kunduk, inom at mbogut paga mendek abu'me piige menggim laago larak noorak nduk, kuwak ari nagun kwe,

¹² it ando, Ala abu'me pinaniyak nit aret, mbakwi nogo perak, ineebe o apit me endekem time mbo nappiyamenggerak logonet, leenggu maakwi, ineyak nggilik maakwi, eeko logogun o, yinuk, yokkiragi o,” yoragagerak.

¹³Yorage nagagerik, Yetut nen aap yigin unde inowe nogo yoge logonet, “At nen, Ndogop eerigin o, yinuk, abet nombakendak nogo ndak-ndak eeppagagin me, kame nak o,” yoge mbareegi, ayeloman nogo ne ti eyom paga aret obeelom agagerak.

¹⁴At Yetut nogo Peterut ame unggwage nagagerik, owanggelo inikime kani pereegerak andi nen windak wonage enegen kage nagagerik,

¹⁵eenggi pigagangge mbareegi, andi nogo lek a'nuk, kwe nogo mi'nage nagagerik, at ake eeke nagagerak.

¹⁶Ti'nuk, o kiyoma age kagak, it kugi inikime lik yereegerak ineebe ambik aakumi nen wogoret, at owagam piya wogo mbareegwa, Yetut oone paga it kugi nggiginogo wumbiige, it andi kunik mendek abok aret obeelom eeginake, eereegerak.

¹⁷ Ti eereegerak nogo ti, at Ala nen yoge kagak yoraga Yetaya nen ari logonet, “At nen andi-pandi ee'ninake nogo wagangge, Ndi, kugi andi lombok ee'ninake nogo lek eerogo pinanege, Eereegerak o,” yinuk, yoragagerak nogo, a'me lik yuwak nduk, aakumi obeelom aganake nagagerak.

¹⁸At Yetut nen it aakumi ambik at owagam ninggirik wonogwe nogo enegen iige nagagerik, it at oone waganggwi nogo yorage logonet, “Yi yenggenak enebagan wunda nawok o,” yinuk, yorage mbareegi, wunda woraawok nduk eekwi me,

¹⁹aap Ala wone liiru mbanak unde menggerak ambi Yetut owagam wage nagagerik, yoge logonet, “Nogoba Ngguru wae. Kat nggeeme noorak mbake keenok, an nimbirak aret nugu logowok o.”

²⁰Yoge mbareegi, Yetut nen, “Pagi ti, enoona wonogwe, ndi, towe mbogut paga nugu menggaarak nogo, inawiina wonogwe, eeko menggaarak kwe, an aap aret nda'nagagirak yi perak, nogo yege minggim abu lek aret o,” yinuk, yoreegerak.

²¹Yoge mbareegi, aap at oone wagangge menggerak alik ambi nen Yetut yoge logonet, “Ai, nogoba. An nogoba aa'nduk nggween taambunuk, nimbirak nawok nen, E, yo'niru o.”

²²Yoge mbareegi, Yetut nen, “It aakumi kambeegwaarak mendek nen inowe-inawot kanggwi nogo nggween taambiigo logowak nduk, teppiinok, an nimbirak nugu logowok o,” yinuk, yoreegerak.

²³Yoge nagagerik, Yetut yiiro paga unggwi nage mbareegi, at oone waganggwi nogo inom unggwi nogo nogogwaarik, wunda wogwe me,

²⁴abera'lek me o wiya nggwok yi yenggenak paga nabuninuk warit wage logonet, yi nogo kilaarak-mogonik eerogo yiiro nogo taaniyak eeke kagak, at Yetut nogo, nogo yege wonagagerak.

²⁵Nogo yege wonage me, at oone waganggwi nogo, nogo nogogwaarik, eenik eeppogo logonet, “Ninogoba! Yi ndonggonninaburak eeke me, mbet-mbet ninagap ndaru o.”

²⁶Yogo mbareegwa, Yetut nen, “Kit kiniki liirogon abet nombaka'lek monggotak yi, nonggop nduk kinagabiti yogo ogotik?” yorage nagagerik, mi'na'nuk, o wiya inom, yi kilaarak-mogonik eeke inom, mberege mbareegi, abolok abu lek puk aret agagerak.

²⁷Puk age mbareegi, it at oone waganggwi nogo nen, “Wi!” yinuk, pi wako logonet, “Wologwe. O wiya inom, yi kilaarak-mogonik eeke inom, at oone konengge menggerak yi, aap nano mendek mbakop?” yinuk, yereegwaarak.

²⁸O Nggerata time aap mbere kugi inikime unggwagagerak inanini inagaket yogwe me, aakumi inagabiti nen tu ti paga nogolik me, Yetut yi yenggenak enebagan nen wunda wage nagagerik, o time unggwage mbareegi, aap mbere nogo ndoome aakumi kanggwi iinok, piigo menggam nen Yetut ka wundi wogo nogogwaarik,

²⁹ inoone nggwok paga at yogo logonet, “Ala aput wae. Kat nonggop ee'ninabikit nduk wagan? Ninooriyak eyom awo kagak, ninoorikit nduk wagandak ya?” yoreegwaarak.

³⁰O nda time wam ambik inogobak eerit ambit me nugwi me,

³¹it kugi nogo nen Yetut yogo logonet, “Kat nen nggiginogo wumbinaniyak mbake keenok, wam ambik inikime time unggwi nawok nduk, nappinanu o.”

³²Inoone nabek togon Yetut yogo mbareegwa, Yetut nen, “Nanip o,” yorage mbareegi, kugi nogo aap inikime nen wundi nogo nogogwaarik, wam inikime unggwi nogo mbareegwa, wam nogo abok aret elan me nogome nen yuulu agan yiime tabu-tabu unggwit nogo mbareegwa, niyo nogo nen ndonggoninabeegerak.

³³Yi ndonggoninake mbareegi, it wam ndegeninako nogogwaarak nogo, kole mbaganit o kota time unggwi wogo nogogwaarik, it aap kugi inikime lik yereegwaarak obeelom eeginabeegerak inigen kogogwaarak nogo, abok aret mbininogo yorogogwaarak.

³⁴Yorogo mbareegwa, it aap o kota time menggaarak abok aret Yetut ka nogo nogogwaarik, it iname time nen wundi nawak nduk, inoone nabek togon yoreegwaarak.