Read Western Dani Marakut 15 Bible Online

Marakut 15 - Western Dani bible

Marakut 15

¹Kuubondendok it Ala unde inoweewi inom, inanggok inom, Ala wone liiru mbanak unde inom, it aap wone amburu mbanggo menggaarak mendek abok inom, kuwak eeko nogogwaarik, “Ndogop eeppuwok o,” yinuk, wone mbaneegwaarak. Mbanggo nogogwaarik, Yetut nogo keele maa'nuk, wonok, at Pilatut owagam pi nogo mbareegwa,

²at Pilatut nogo nen, “It Yakuri inowe endagembogut kat aret ilik?” Yoge mbareegi, at nogo nen, “Yagandak ti aret o.”

³Yoge mbareegi, it aap Ala unde inoweewi nogo nen yi wone ndi wone oba lenggeneegwaarak.

⁴Oba lenggenggo mbareegwa, at Pilatut nen ambinom yoge logonet, “Yi wone ndi wone kat koba lenggenggwi yi, iyet o. Kat wone onggo yoroorak ambi mbaka'lek agandik?”

⁵Yoreegerak kwe, at Yetut onggo yoraga'lek puk wonage mbareegi, at Pilatut nogo, “Aap yi, iya!” yinuk, pi wareegerak.

⁶Ndi, it Yakuri nen laago Obaga Mbo Nagagerak lako logonet mban, “Aap keele maarak ambi piinogo wo'niret o,” yogwe iinok, at Pilatut nen piinogo wogoragak eeke nagagerak me,

⁷ne ti paga it ando, “Ninalik aruwok o,” yinuk, wim eeko logonet, aap wako mbareegwa, keele maarogo oome mambiyareegwaarak nogo ambi endage Mbarabat inom wonagagerak.

⁸At Mbarabat keele maarak wonage me, it aap kuwak aago nogo Pilatut owagam kuwak ari wogo nogogwaarik, at yogwi, “Laago nggwok lako logonet, aap keele piinnirage menggendak kwak, yogondak ambi piinniret o.”

⁹Yogo mbareegwa, at Pilatut nen, “Kit aap Yakuri mendek kinowe endagembogut piinogo wokkiroorak mba'nuk, yogo ogotik ilik?”

¹⁰Ti yoragagerak nogo ti, it aap Ala unde inoweewi nogo nen “Nit eeruwok lak at mban eerit nege yi, nineebi o,” yinuk, at Yetut wonok wogwe yelok iige nagagerik, it togop aret yoragagerak kwe,

¹¹ it aap Ala unde inoweewi nogo nen, “Yetut obaane'me at Mbarabat keele piinogo wo'niraawak nduk yo'nip o,” yinuk, it aakumi kuwak aago wonogwe nogo inikime manako mbareegwa,

¹²at Pilatut nen ambinom yorage logonet, “Ti kenok, Aap Yakuri ninowe endagembogut, yogo monggotak yi, an nonggop eerogo pigin o?”

¹³Yorage mbareegi, it nogo nen, “Eyo karo-karo paga nabenogo puurak aret o.” Yinuk, inoone nggwok paga yogo mbareegwa,

¹⁴at Pilatut nogo nen, “At maluk ngge eekerak paga yogo ogotik o?” Yorage mbareegi, ya-mba ogo logonet, “Eyo paga nabenogo puurak o,” yinuk, abunuk inoone nggwok paga yoreegwaarak.

¹⁵ Inoone nggwok paga yogo mbareegwa, at Pilatut nogo nen it aakumi kuwak aago nogo iniki yanggo yuwak nduk, Mbarabat nogo keele piinogo teppege nagagerik, at Yetut ti, ya'mbiran nggora eerogo wappunuk, eyo paga nabenogo puwak nduk wogoragagerak.

¹⁶Wogorage mbareegi, it aap yigin unde nogo nen it inowe nggwok wonage menggim wone owak loonggo menggam nogome wonok unggwi nogo nogogwaarik, it aap yigin unde abok aret kuwak ari woraawak nduk, inayonggo pereegwaarak kuwak ari wogo nogogwaarik,

¹⁷at Yetut nogo mbogoyum maa'ngga warak yippugwi, alok komaarogo anobak paga yippugwi, eeppogo nogogwaarik,

¹⁸iniki laakot paga keyage wappogo logonet, “Wa! It aap Yakuri inowe kendagembogut kat aret me, wa,” yinuk,

¹⁹mbim obate mbanak paga anobak telanggogwe, inowoori oba lenggenggogwe, eeppogo nogogwaarik, inendobanggun yindumbunuk, inuut wutik logonet, ayuk wureegwaarak.

²⁰ Togop aret miyuk-meya eerogo pogo nogogwaarik, mbogoyum maa'ngga warak nogo nggoorogo punuk, obaane'me at ambogoyum yirippogo nogogwaarik, eebe eyo karo-karo paga nabenogo puwok nduk wonok nogogwaarak.

²¹Wonok nogwe me, it aap Alekandet Uruput imbirak inogoba awi Kirene mendek endage Timon o endekem nen kota nggwok nogome inikiigun unggwi wage me, inom lambunggo nogogwaarik, “Eyo karo-karo aago yi, piyaninuk nak o,” yinuk, inoone omaawi paga yogo nogogwaarik,

²²Yetut wonok, o endage it inoone paga, Nggonggota pi nogogwaarak. O Nggonggota ti, nit ninoone paga Anobak Yelenak o, yogo monggoorak.

²³ Nogome wonok pi nogo nogogwaarik, anggur amburu inom, nggami inom, nenggelak-kenggelak agago punuk, nawak nduk wogoreegwaarak mendek, teppereegerak.

²⁴Teppege mbareegi, it nogo nen eyo karo-karo paga nabenogo pereegwaarak. Nabenogo pogo nogogwaarik, “Ambogoyum nogo, ta kolage kaamun?” yinuk, yugum anggen nggween paga mbo wuppegak eeko logonet, tumbukkologogwaarak.

²⁵At Yetut eyo paga nabenogo pereegwaarak nogo ti, kuuben wundit nogwe oonegen 9 paga aret nabenogo pereegwaarak.

²⁶Nabenogo pogo nogogwaarik, “Yakuri inowe endagembogut yi aret o,” yinuk, oba lenggeneegwaarak wone nogo, liiru mbanogo eyo irip me nabembereegwaarak.

²⁷Nabembogo nogogwaarik, aap yogoot iyagalo mbere Yetut eebe peenok-peenok inalitak eyo paga nabenogo piyareegwaarak. (

²⁸It aap eyo paga nabenogo piyareegwaarak ti, at Ala nen, “It aap maluk eeka inom wonage ineenggi lingginiyak o,” yinuk, yereegerak liiru mbanak nogo a'me lik yereegerak o.)

²⁹ Peenok-peenok piigo mbareegwa, it aakumi ando nogwe-wogwe nogo inuut walok yogo logonet, “Keyik! An Ala awi wurik minogo punuk, obaane'me wuke neegak, nogo mbere yigin, yagandak nogo, keebe eyo paga nabenogo pagagaarak ti, kagap ndakko'nok wambi mok ubi,” yinuk, miyuk-meya eerogo pereegwaarak.

³⁰

³¹Pogo mbareegwa, it Ala unde inoweewi inom, it Ala wone liiru mbanak unde inom, it nogo nen inom aret Yetut miyuk-meya eerogo pogo logonet, “At nen it aakumi inagap ndake nagaarak kwe, at eebe agap ndakkoloorak perak, meek kogo o.

³²Wambi wage ninigen kogo logomonggoorik, at abet mbaruwok nduk it Iterali inowe endagembogut Keritut yi, yogondak aret eyo paga nen wambi woraayok nda!” yinuk, agi'ndok kanggo mbareegwa, it aap mbere at inom eyo paga nabenogo piyareegwaarak nogo kunduk, Yetut enggali wappereegwaarak.

³³ Enggali wappogo mbareegwa, o liingge oonegen 12 kuli paga nen nok, oonegen 3 kuli ari nage kagak, yi awi ndi awi time o apit aago wonagagerak.

³⁴ Ndi, o kiyoma age kagak, oonegen 3 paga at Yetut nogo kwa ari logonet, “Eloyi, Eloyi, lama tabatani!” yoreegerak. Ti, nit ninoone paga, “Nogoba Ala o! Nogoba Ala o! Nonggop nduk an teppanegen o?” yoreegerak.

³⁵Togop yoge mbareegi, it ando we inikiigun wonogwe nogo nen oone ari inaruk konembogo nogogwaarik, “Wologo wae. At Eliya wiige agaarik o.”

³⁶Yogo mbareegwa, aap ambi nen puu'nuk nage nagagerik, ta'mbit tiroguk paga anggur amburu aleegwi mendek tamombunuk, nawak nduk, yigirok kunogo wogoge nagagerik, “Eliya nen piinogo wurabi wage kaawam me, puk o,” yereegerak.

³⁷Ari mbareegi, at Yetut nogo nen kwa ari logonet, iniki worok togon kambeegerak.

³⁸Iniki worok togon kangge mbareegi, yum Ala awi wurik me aken nggwe tugunik wonagagerak nogo, agi nen oolo muundak nggoguk yi wambeegerak.

³⁹Ndi, it aap yigin unde inowe nogo ena koonogo nikkage logonet, Yetut togop ari logonet, iniki worongge kage nagagerik, “Aap yi, Ala aput abet aret kagak wakkoorak kagi o,” yereegerak.

⁴⁰Ndi, at kwe Mariya awi Magaralena mendek inom, wulaga Yakobut awo tawe Yotet imbirak inagalo Mariya inom, kwe Talome inom, at Yetut Nggalileya wonage kagak, inaagaluk negen eeppunuk, wonogogwaarak nogo inom, it kumi weelek ambik at inom o Yerutalem unggwi wogogwaarak nogo inom, it abok aret tayorogon taati nen Yetut eyo paga nabenak wonage ina nakkogogwaarak.

⁴¹

⁴²At Yetut nogo kangge mbareegi, ko'lu it Yakuri tamban eeriyak nduk pipuk agago pugwi paga o kiip arikit nduk eeke kagak,

⁴³ it aap wone amburu mbanggo menggaarak nogo aap ambi endage Yutup, awi o Arimateya mendek ayuk warak lombok me, “Ala abu'me panuwak o,” yinuk, tokkage wonage me, agabiti lek a'nuk, at Pilatut owagam nage nagagerik, “Yetut eebe warak wo'niru o,” yinuk, ngginooreegerak.

⁴⁴Ngginooge mbareegi, at Pilatut nogo nen, “Abu kanggerak o,” yogwe aruk konembege nagagerik, “Ie!” yinuk, it aap yigin unde inowe nogo yonggo nappereegerak wage mbareegi, “At Yetut abu kanggerak a, lek a?” yinuk, kin wokkagagerak.

⁴⁵Kin wokkage kenok, “Abu kanggerak o,” yoge mbareegi, eebe warak nogo wa nawak nduk, at Pilatut nen “Op aret o,” yinuk, Yutup yoreegerak.

⁴⁶Yoge mbareegi, mbogoyum yawenak tabak ambi onggo punuk, wonok, eebe warak nogo piinogo wuppi wage nagagerik, mbogoyum yawenak tabak nogo paga nggerenogo yugum ndo nendaarak me mambunuk, yugum laganogo tungga nappereegerak.

⁴⁷Eebe mambereegerak nogo, at kwe Mariya awi Magaralena mendek inom, Yotet agalo Mariya inom, inigen kogogwaarak.