Read Western Dani Marakut 3 Bible Online

Marakut 3 - Western Dani bible

Marakut 3

¹Ti'nuk, at Yetut nogo it Yakuri tamban eeko menggam unggwi nage nagagerik, aap eenggi peenok kambak negen wonage kagagerak.

²Kage kagak, it aakumi nogome nen, “Tamban eekwi paga aap yi obeelom eeke kaamun a, lek a?” yinuk, inoone at oba puwok nduk, inigen pippak ugo nogogwaarak.

³Inigen pippak ugwi iigak, at Yetut nogo nen aap eenggi kambak nogo yoge logonet, “Mi'nage logomenggendik, oolo yayi mok o.”

⁴Yoge nagagerik, it nogo yorage logonet, “Tamban eekwi paga obeelom eeginaburak ti, op ilik, maluk eeginaburak ti, op a? Aakumi ineebe inili yuurak ti, op ilik, inooriyak ti, op a? Wone yugu liiru mbanak nogo nonggop mbanak o?” yoragagerak kwe, inoone lek aret puk ogogwaarak.

⁵“Inogogun laakot yi, ai!” yinuk, at enegen abi inoorit nage nagagerik, aap eenggi kambak nogo yoge logonet, “Keenggi nggingget o,” yoge mbareegi, ngginggage nagagerik, eenggi obeelom aret agagerak.

⁶Obeelom age mbareegi, it Pariti mendek nogo wundi nogo nogogwaarik, it Keroriyan mendek inom kuwak eeppunuk, “Nonggop eerogo waruwi o?” yinuk, wone mbaneegwaarak.

⁷ It aakumi ambik obeelom eegi nabit nage me, it kugi andi kunik nogo nen Yetut ineenggi pigaawok nduk, panggo agan owagam wogwe iinok, obeelom eeginake, ndi, kugi inikime unggwagagerak wonogwe nogo nen Yetut inigen kogo nogogwaarik, “Ala aput kat aret o,” yinuk, kwa yogo logonet, tebe-tebe nogo nagaatik, wundi nogo mbareegwa, at Yetut nen it kugi nogo yorage logonet, “Kinigen yelok neegotak me, aakumi yoraagup o,” yinuk, oone omaawi paga inaruk wake, eerit nagagerak. Eerit nage yogwe nogo inaruk konembogo nogogwaarik, aakumi ambik o Nggalileya nen, Yureya nen, o Yerutalem nen, Irumeya nen, niyo Yoraran ene paga nen, o Tirut Tiron yi awi ndi awi time nen, abok aret at ambokan mugurok nogwe iinok, at Yetut oone waganggwi nogo inom yi yenggenak aa'nggi paga nogogwaarak kwe, kagak, muguren nogo mbareegwa, at Yetut nen, “It aakumi ambik yagabit ee'nakwi me, yiiro pipuk eerogo panggoppi woraanip o,” yinuk, at oone waganggwi nogo yoragagerak.

¹³At Yetut nogo puurom lagangge nagagerik, nogome logonet, at inom nege logorak iniki koonogo pereegerak nogo woraawak nduk wiirage mbareegi, owagam kuwak ari wogogwaarak.

¹⁴Kuwak ari wogo mbareegwa, it aap ineebe 12 leenogo piige nagagerik, inendage Nappiigak toonogo piinok, wone yorage logonet, “Ninom nugu logowok nduk leenogo pinagagirak me, kit nen obeelom wone yoranet nugwi,

¹⁵nawone kilikkiraminggirak paga kugi inikime lik yemenggerak kenok nggiginogo wumbiigwi, eeko logobagip nduk nappinagagin o,” yinuk, leenogo mippiyareegerak.

¹⁶Ineebe 12 leenogo mippiyareegerak nogo yi aret. At Timon endage peebi toonak Peterut nogo inom,

¹⁷Tebereyut apuri Yakobut awuluk Yaya imbirak inendage it inoone paga Mbowanereget, ndi, nit ninoone paga Aap Oone Ngguurubu yogo monggoorak nogo inom,

¹⁸Andereyat inom, Piliput inom, Mbarotolomeyut inom, Matiyut inom, Tomat inom, Alepeyut aput Yakobut inom, Tareyut inom, “Ninalik aruwok,” yaga mendek ambi endage Timon inom,

¹⁹ndi, Yetut onggo mbaneegerak at Yurat Ikariyot nogo inom, nogo aret leenogo mippiyareegerak.

²⁰Ti'nuk, at Yetut nogo oome unggwi nanuk, time wonage me, aakumi ambik at owagam kuwak ari wogo mbareegwa, at oone waganggwi nogo inom mbi noorak meek agagerak,

²¹“Aakumi ambik me, mbi noorak meek o,” yogwe at owe-awot inaruk konembogo nogogwaarik, “Aap yi kumili-kumili negen agan nege yi, piga nawok o,” yinuk, piga nawok nduk eereegwaarak.

²² Piga nawok nduk eekwi me, it aap wone yugu liiru mbanak unde nogo o Yerutalem nen nogogwaarak nogo nen yogo logonet, “Aap yi, kugi Mbeletebut inikime unggwagagerak. Kugi iyagalo endage nogo paga it aakumi kugi inikime wonage nogo nggiginogo wumbiige menggerak o,” yinuk, yereegwaarak.

²³Yogo mbareegwa, at Yetut nen it aap ti, woraawak nduk wiirage nagagerik, at owagam kuwak ari wogo mbareegwa, wone eegu laarogo yorage logonet, “At Ibilit nen Ibilit aret nonggop togon nggiginogo wumbuurak mbakop?

²⁴It aap inabu'me menggaarak it-it ogooppunuk ma'nogwe kenok ti, it inabu'me piigo menggam nogo omaawi logogun lek o.

²⁵Ndi, it kunu ambit wonogwe nogo, it-it ogooppunuk mbaganggwi iinok ti, inawi ti, wuum lu agan nage logogin o.

²⁶Ndi, Ibilit at abu'me menggaarak inom wim nggagambunuk ogoorak wonage kenok ti, at abu'me piige menggim omaawi logogin lek, lek aret arigin me, kit yogwe ti, meek aret kiigi o.

²⁷Aap anini warak ambi awo keele maaka'lek kagak, ame unggunuk amendek ndinggo'nok wundi noorak ti meek o. Ata, keele aa'nduk maappunuk perak, amendek ndinggola ungguurak op o.

²⁸Aakumi yi maluk ndi maluk eekwi inom, miyuk-meya eerogo piigwi inom, inomaluk ti, at Ala nen mbo punuk lek eerogo piyoorak op kwe,

²⁹ kit Aberiniki miyuk-meya eerogo pugwi kiinok perak, at Ala nen lek eerogo pinagagin abu lek o. Ti maluk kinoba lenggenak mondok aret logogin o, yinuk, an wone yi, abet aret yokkirage agarik o,” yinuk, yoragagerak.

³⁰Ti yoragagerak nogo ti, it nen, “Kugi inikime unggwegerak o,” yinuk, yogwi iinok, togop aret yoragagerak.

³¹Togop yorage wonage me, Yetut agalo inom, awurilogwe inom, wogo nogogwaarik, endekem taati mi'ndak logonet, “Yetut wundi woraawak nduk yo'nip o,” yorogogwaarak.

³²Yorogo mbareegwa, it aakumi ambik at owagam kuwak aago kwi'ndak wonogwe nogo nen, “Yetut wae. Kagalo inom, kawurilogwe inom, endekem logonet, Omok o, yokkogo agaarik o.”

³³Yogo mbareegwa, at Yetut nogo nen, “An nagalo, nawurilogwe ti, taani mbakop?”

³⁴Yorage nagagerik, at owagam kwi'ndak wonogwe nogo enegen pegiige logonet, “Lek o. An nagalo inom, nawurilogwe inom, it yi aret o.

³⁵At Ala iniki mbake nogo ndak-ndak eeko menggaarak kenok ti, an nagalo inom, nawuri wologwe-komologwe inom, nogo it aret o,” yoragagerak.