Read Western Dani Marakut 7 Bible Online

Marakut 7 - Western Dani bible

Marakut 7

¹It Yerutalem nen nogogwaarak aap Pariti mendek inom, it Ala wone liiru mbanak unde ando inom, Yetut owagam kuwak ogo nogogwaarik,

²Yetut oone waganggwi nogo wone yugu ndak-ndak eeka'lek logonet, ineenggi kooka'lek we ugun aret mbi nunggwi iyareegwaarak.

³It Pariti mendek inom, it Yakuri mendek nogo inom, it abok aret inombomini nen eeko nogogwaarak wandek eeko logonet, ineenggi kooka'lek mbi nunggwi, mbi kunggo menggam nogome nen wogo nagaatik, mili lenggek ari kenok, kooka'lek logonet, mbi nunggwi, eeko logolik o. Ti mendek abok aret inombomini wandek eeko logonet, yiiwak mbuulogwe inom, yo'nggok inom, mbutiiwak inom, kooko nogogwaarak.

⁵Togop eeko nogogwaarak me, it Pariti mendek inom, it Ala wone liiru mbanak unde inom, nen Yetut yogo logonet, “Kat koone waganggwi yi, ninombomini eeko nogogwaarak wandek eeka'lek logonet, nonggop nduk ineenggi kooka'lek ugun aret mbi nonggo agaarik o?”

⁶ Yogo mbareegwa, at Yetut nen yorage logonet, “It aakumi yi, inambe paga an wogoppanugwi kwe, Iniki perak, ninom ogoorak aret wonogwe o.

⁷It mamunirogo menggaarak ti, aakumi inoone yugu kagak, mamunirogo menggaarak me, Aanom warogo aret nalut ee'nako agarik o, yinuk, Ala yoge kagak at Yetaya nen yoragagerak liiru mbaneegerak nogo ti, kit kiniki laakot logonet eekwi kiinok, abet aret liiru mbaneegerak o.

⁸At Ala nen, Yogop ee'nu, ndogop ee'nu, wone yugu nogo tebenogo punuk, kinombomini eeko nogogwaarak wandek me eeko monggotak kiigi o,” yinuk, yoragagerak.

⁹Yorage nagagerik, ambinom yorage logonet, “Kit kinombomini eeko nogogwaarak wandek me eeko logorak mba'nuk, at Ala nen, Yogop ee'nu, ndogop ee'nu, yereegerak wone mbo pugwi yi, kit obeelom aret kiigi o.

¹⁰ At Muta nen, Kinagalo-kinogoba inayuk wuko logonet, inoone liirogon konenggo logomunggup o. Ndi, aap ambi nen agalo-ogoba kugi pulunogo piige kenok, aap ti, kambuwak nduk, mondok warogo puwak o, yinuk, yereegerak kwe,

¹¹ kit nen, Aap ambit ambi at agalo-ogoba yorage logonet, Namendek wokkiroorak mbakirak kwe, Korban, yagarak o. Ti, Ala ake wogogirak o, yinuk, yorage kenok,

¹²at agalo-ogoba wogoroorak lek o, yinuk, yogo monggotak kiigi o.

¹³Ti yogo monggotak nogo paga kinombomini nen eeko nogogwaarak wandek me eerit nogwe paga, Ala wone ti, taganogo mbo pogo monggotak o. Ti eeko nogogwaarak kwak, kit togop ambik aret eerit nogo monggotak kiigi o,” yinuk, yoragagerak.

¹⁴Yorage nagagerik, it aakumi ambik wiiragagerak nogo, wogo mbareegwa, yorage logonet, “Kit abok aret an wone yokkirage yi, kinaruk liirogon konembunuk, waganggo logonip o.

¹⁵Nonggo monggotak ti paga maluk eekkinakeelik o. Ata, wone kinikime nen wunggetak ti paga maluk eekkinake menggerak o,” yinuk, yoragagerak. (

¹⁶Kinaruk wonage kenok, liirogon aret konenggo logonip o.)

¹⁷Yorage nagagerik, aakumi nogo teppiinok, oome unggwage mbareegi, at oone waganggwi nogo nen, “Kat wone eegu laarogo negen yo'niragandak nogo ti, liirogon yo'niret o.”

¹⁸Yogo mbareegwa, at nogo nen, “Kit kunduk, kiniki liippega'lek logonet, yogo ogotik? Yi mendek ndi mendek nonggo monggotak nogo ti, kinikime unggwageelik o. We, kinaanogum me wangge nagaatik, mbo pi nogo monggotak me, yi mendek ndi mendek nonggo monggotak paga maluk eekkinakeelik yi kogo ogotik?” yoragagerak. Wone yoragagerak nogo ti, nonggo menggaarak mendek abok aret mage lek op nonggo logorak nduk yoragagerak.

²⁰Yorage nagagerik, ambinom yorage logonet, “Kinikime nen wunggetak paga maluk aret eekkinake menggerak.

²¹Kinikime nen maluk eeriyak koonggwi, komologwe tawe ugun eeginabit nugwi, yogoot waganggwi, aap wakwi,

²² mbabi eekwi, aap inamendek uugwe-uugwe agan nugwi, maluk mban eekwi, inambokan laganggwi, iniki kumi paga mban lunik logonet kumili negen ugun-ugun eerit nugwi, kiniki aagi wungge, inabok mbanggwi, wogoppatit nugwi, kiniki mbanak negen eerit nugwi,

²³eerit nugu monggotak ti abok aret kinikime nen aret wunggetak paga mban maluk eekkinake menggerak o,” yoragagerak.

²⁴At Yetut nogo o time mbo punuk, o Tirut unggwi nagagerak. Unggwi nage nagagerik, o ambi wurik me unggwagagerak wonage logonet, “It aakumi an neegwi iyo, kumaarak logokit,” mbareegerak kwe, meek agagerak.

²⁵Meek age mbareegi, kwe ambi eebe Yunani mendek kwe, nda'nagagim awi alom o Penitiya Tiriya mendek me, aagaluk kolaga kugi maluk mendek inikime unggwagagerak agalo nogo, Yetut wage aruk konembunuk, ne ti paga aret at owagam nage nagagerik, abu'me tebe yinuk, abuwa warak nggo-nggo logonet, “Ai, nogoba! An naagaluk kugi inikime unggwagagerak me, nggiginogo nappenok nduk, yokkigi o,” yoreegerak.

²⁷Yoge mbareegi, at Yetut nen, “It elege-aabologwe inambi ndonggorogon nawak o. Nengga'lek iigak, inake aago ndinogo nggeewo wogoriyak ti, mage o.”

²⁸Yoge mbareegi, at kwe nogo nen, “Aret kwe, nogoba o. Elege-aabologwe inambi nunggwi iigak, anggen yumbu-yumbu eyo ndoonak mbi nonggo menggam abu'me wanggetak ti, nggeewo aret nonggo menggaarak nogo o.”

²⁹Yoge mbareegi, Yetut nen, “Kat wone yagandak ti paga kugi kaagaluk inikime unggwagagerak nogo muk nggigik togon wunggerak me, kame nak o.”

³⁰Yoge mbareegi, ame nage nagagerik, aagaluk nogo kugi inikime wungge nagaarik, obeelom agaarak windak menggim ugun windak wonage me ka nagagerak.

³¹Ti eeke nagagerik, at Yetut nogo o Tirut teppunuk, o Tiron unggwagak niyo Nggalileya yenggenak aa'nggi paga ari woraanuk, o Ndekapolit unggwi wagagerak.

³²Unggwi wagagerak wonage me, it aakumi time mendek nen aap aruk logu oone lek me wonok, at Yetut owagam pi nogo nogogwaarik, Yetut nen eenggi oba pigaawak nduk, inabuwa warak nggo-nggo logonet, yoreegwaarak.

³³Yogo mbareegwa, it aakumi ambik aago nogo teppiinok, at aruk logu nogo mban, “Omok o,” yo'nuk, imbirak inalik nomorogon nanuk, aruk me eenggi mambege logonet, awoori waganogo amili paga nabembege nagagerik,

³⁴ena mbogut paga ni'nage logonet, “Ai!” mbake nagagerik, “Epata o,” yoreegerak. Ti yoreegerak ti, nit ninoone paga, “Paa'naru o,” yoreegerak.

³⁵ Yoge mbareegi, aruk paa'nage, oone lek nogo oone warak age, eeke nagagerik, oone abe aret yereegerak.

³⁶Oone abe ari mbareegi, at Yetut nen aakumi time wonogwe nogo inaruk wake logonet, “Aakumi abu yoraagup o,” yoragaatak kwe, kagak, oone tagambunuk, yoranet negak mban eeko nogogwaarak.

³⁷Yoranet nugwi nogo inaruk konenggo nogogwaarik, yogo logonet, “Inaruk logu nogo inaruk paarogo piige, inoone lek nogo inoone warak agago piige, eeginabit nege logonet, yi eekak ndi eekak obeelom mban eerit nege yi, Wi!” yinuk, inagabiti ogo nagaatik, pi wako nogogwaarak.