Read Western Dani Lukat 10 Bible Online

Lukat 10 - Western Dani bible

Lukat 10

¹Ti'nuk, peebi ninogoba Yetut nen aap alik 70 leenogo mippiige nagagerik, yi awi ndi awi o kota lombok noorak mbareegim nogome it inaa'nduk mbere'ndak lombok mban nappiyareegerak.

² Nappiige logonet, “Eebe yugu ka'let agaarak kwe, mbanggo menggaarak ineebe mbereeluk me, at anggen yugu unde nogo nen anggen yugu nogo mbaniyak nappiyaawak nduk, yogo logonip o.

³ Ndi, kit perak, nanip o. Kit ndomba kwak yi, aakumi mba'ngge pogom wonogwe me, inenggela'me nappinagage agarik o.

⁴ Nappinagage me, kinawu nggerenak inom, wokkirogwe yonggoliyak yum nogo inom, kiniyogogut nggerenak inom, ti wonok nagup o. Ndi, tu paga nogo logonet, it aakumi iinok, keyage wappiinet nagup mban.

⁵Aakumi iname ambime unggwogo logomonggotik, aa'nduk keyage wappiigo logonet, Wa! Kinale'nggen o, yinuk, yoranu o.

⁶Yorogo logomonggotik, it aakumi time nen kinale'nggen inoba piyamonggotak nogo paga, Yi nit ninoreewi aret o, yinuk, wokkinakwi iinok, kinale'nggen inoba aret logogin o. Ndi, wokkinaburak ineebi mbakwi iinok ti, kinale'nggen inoba piyamonggotak nogo, lek eerogo piinok, wundi namunggup o.

⁷ It aakumi nen kit wokkinaburak mbakwi iinok, iname kinom time aret logonu o. It aap yabu eeko menggaarak yabu onggo woorak op aret me, kinom logonet, kinambi yi mendek ndi mendek makkirogwe iinok, ti aret nonggo logonu o. Ya nogo yegak nda nogo yegak eerit nugu logobok o.

⁸ Kit o kota ambime unggwi namonggotak me, keyage warogo wokkinakwi iinok, inambi makkirogwe ti aret nonggo logonu o.

⁹ Ndi, aakumi time kugi andi wonogwe iinok, obeelom eeginako logonet, Ala abu'me pinagarak muk kinowagam panggo yi wagaarak o, yinuk, yorogo logonu o.

¹⁰ Ndi, o kota ambime unggwi namonggotak me, it aakumi nen keyage warogo wokkinakwi lek iinok perak, endekem tu nggwok paga wundi nogo logomonggotik, yorogo logonet,

¹¹Kinoba arigin nogo ti, Kinobaalombok, kineenu arubagip nduk, nit kiname logonet, liirubu niniyok paga lenggenggerak nogo yumbunogo pinagago ogoorik o. Ala abu'me pinagarak muk kinowagam panggo yi wagaarak, abet aret mbako logonip o, yinuk, yoranu o.

¹² Peebi age yobok paga it aakumi Torom mendek ti, mbuuluk inoorigin kwe, it aap o kota time mendek nogo ti, mondok nggwok aret inoorigin o, yinuk, yokkirage agarik o,” yoragagerak.

¹³ Wone ambinom yorage logonet, “It aakumi Koratim mendek ti, inabuwa o! It aakumi Mbetayira mendek ti, inabuwa o! Eerubok mendek iname eeke kagaarak nogo, o Tirut Tiron time eeke logonetak en, it aakumi time mendek nen kwi'na'nuk inayum maluk yikkologwe, purok inagabolo paga yikut eerogo pakwi, eeko logonet, inomaluk maan mbo penetak o.

¹⁴Peebi inowak looniyak eyom paga aakumi Tirut Tiron mendek ti, aaninggin we mbuuluk eeppiyaagin kwe, it ti perak, aaninggin mondok nggwok aret eeppiyaagin o.

¹⁵ Ndi, it aakumi Kaperenawum mendek ti, Nit mbogut paga nagawan me tiyappinanigin, mba'nuk, yogo agaarik ya? Mondok lek o. It kambunuk nogo menggam ogu time aret, Wuppinanigin, mbako logowak o,” yinuk, yegerak, yoraanu o.

¹⁶ Yorage nagagerik, at oone waganggwi mendek ambinom yorage logonet, “It aakumi kit kinoone konenggwi kenok ti, an noone aret konenggwi, kit mbo pinagagwi kenok ti, an aret mbo panugwi, ndi, it nen an mbo panugwi kenok ti, at nappani wagagerak nogo aret mbo pugwi, eeko menggaarak aret o,” yinuk, yorage nagagerik, nappiyareegerak.

¹⁷Ti'nuk, it aap 70 nappiyareegerak nogo inale'nggen mbakak iniyok paga wogo logonet, “Ninogoba o! Kugi kunduk kat kendage kunogo yorogwe niinok, konenggwi iigoorak o.”

¹⁸Yogo mbareegwa, at Yetut nen, “At Ibilit o yabok eeke nogo pogom mbogut paga nen wangge kagagirak o.

¹⁹ Waalo aakumi inooka inom, nggitamuru inom, kiniyok paga aan mbelenogo pugwi, at kinom wim mbanak nogo omaawi lek eerogo tebenogo pugwi, eeko logobagip nduk, an nawone kilikkiragarak. Nawone kilikkiragarak me, maluk ambi kinoba arigin mondok lek aret o.

²⁰Togop aret kwe, it kugi kinoone konenggo menggaarak nogo paga kiniki ale'nggen mbarugup o. Ata, kinendage agi mbogut paga liiru mbanak wonage nogo paga kiniki ale'nggen mbako logonip o,” yinuk, yoragagerak.

²¹Ne ti eyom paga Aberiniki Yetut inikime mondok lik ari mbareegi, ale'nggen nen keyage wake logonet, “Mbogut nggween unde kat nogoba wa yokkege agarik o. Kat eeriyak yi nogo, it aap iniki warak inom, iniki ngget inom, ineenu ogwe iyo, nobappunuk, mbuulogwe ngget ndarak pogom paganogo yoragagindak me wa. Kinikilom mba'nuk eereegindak me, nogoba wa, yokkigi o.”

²² Yoge nagagerik, “An nogoba nen yi mendek ndi mendek abok aret an unde logokit nduk, wo'nereegerak. Ala aput ti ta o? It aakumi ineenggo'lek nogoba alik mban eenu menggerak. Ndi, nogoba ti ta o? Ti, at aput an nalik mban neenu minggirak. Ndi, aput an nen it aakumi nogoba ineenu aruwak nduk, paganogo yoroorak mbake neenok, it kunduk, ineenu ogo menggaarak o,” yinuk, yoragagerak.

²³Yorage nagagerik, at oone waganggwi enegen pegiige nagagerik, inaligiluk yorage logonet, “Kit kinigen kogwe nogo, it aakumi kogwe kenok, iniki ale'nggen aret kogo logogun o.

²⁴Kit kinigen kogwe nogo, it Ala nen yorage kagak yoraga mendek inom, it aap inendagembogut inom, it apit nen, Kaawok lak ao, mbako nogogwaarak kwe, kaga'lek aret wonogogwaarak. Ndi, kit konenggwi nogo, it nen, Konenuwok lak ao, mbako nogogwaarak kwe, konengga'lek aret wonogogwaarak o, yinuk, yokkiragi o,” yoragagerak.

²⁵ Ti'nuk, peebi ne ambi paga aap Ala wone liiru mbanak unde ambi Yetut abut mbanikit nduk, wage nagagerik, yoge logonet, “Ngguru wae. An mondok-mondok neenik logokit nduk, nonggop eeri o?”

²⁶Yoge mbareegi, at Yetut nen, “Ala wone yugu liiru mbanak ti, nonggop mbanak o? Kat nonggop pekkage menggendak?”

²⁷ Yoge mbareegi, aap nogo nen, “Kiniki inom, kineebe inom, kinomaawi inom, abok aret kinogoba Ala mban kiniki kunik eeko logonip o,” ndi, ambi, “It ineebe iniki kunik eekkologo menggaarak ti kwak, it aakumi inom menggaarak ti, togop aret iniki kunik aganako logowak o,” yinuk, yoreegerak.

²⁸ Yoge mbareegi, at Yetut nen, “Op yagan o. Yagandak nogo ndak-ndak eeke keenok, keenik aret logomunggun o.”

²⁹Yoge mbareegi, aap nogo, “An op aret,” nombaruwak nduk, Yetut yoge logonet, “Ndi, niniki kunik eeginabikit nen it ninom wonogwe ta o?”

³⁰Yoge mbareegi, at Yetut nen onggo yoge logonet, “Aap ambi o Yerutalem nen o Yeriko nagagerak. Nage me, aap yogoot wagangga nogo nen pilak togon wunggo logonet, ayum ageerok apit ndinggo logonet, eebe wappogo nogogwaarik, taati kambuwak nduk, mbo punuk, mbaganeegwaarak.

³¹Mbaganggwi iigak, peebi aap Ala unde ambi we ugun tu ti paga wage logonet, aap warak nogo kage nagagerik, kagak wagagerak.

³²Wage kagak, peebi aap Lewi mendek ambi togop aret tu ti paga ugun wage me, aap wareegwam wok yi wage logonet, eebe warak kage nagagerik, kagak mban wagagerak.

³³Wage kagak, peebi aap Tamariya mendek ambi tu ti paga wage logonet, aap warak nogo enegen kagagerak. Enegen kage nagagerik, abuwa mba'nuk,

³⁴owagam wage nagagerik, agabolo nibinik-ndelenak aago nogo anggur amburu inom, amburu alik mendek inom, labunogo nggerembege nagagerik, eebe waganogo at ageledai nogo paga kwippunuk aakumi nogo yugu menggam ambime pi unggwagagerak. Pi unggwage nagagerik, time arum aret wonagagerak.

³⁵Ndi, ko'lu at awu mbuti perak mbere waganogo aap nogo yugu menggam unde nogo wogoge logonet, Aap yi arum logot o. Arum logonet, wokkigirak yi nogo lek age kenok, kat kamendek ambinom nabenogo kungge logomenggendak kenok, an wage logominggirik, obaane'me wokkirigin, yoreegerak o,” yinuk, Yetut nen aap Ala wone liiru mbanak unde nogo yoreegerak.

³⁶Yoge nagagerik, “Aap kenagan nogo it aakumi inom logonet, iniki kunik mbakwi pogom aap ambi ta nen aap yogoot wagangga nen wareegwaarak nogo iniki kunik mbareegerak mbaken o?”

³⁷Yoge mbareegi, at aap Ala wone liiru mbanak unde nogo nen, “Aap at abuwa nen obeelom eeppereegerak nogo aret o.” Yoge mbareegi, at Yetut nen, “Kat ti, ndak-ndak aret eeri nak o,” yinuk, yoreegerak.

³⁸ Yetut at oone waganggwi inom nogo logonet, o yaga'lelo ambime unggwi nogo mbareegwa, kwe ambi endage Marata nen Yetut at ame unggwi woraawak nduk, yoreegerak.

³⁹Yoge mbareegi, unggwi nagagerak wonage me, kwe Marata awuluk endage Mariya nogo, Yetut abu'me kwi'ndak logonet, oone konengge kagak kwe,

⁴⁰Marata perak, Yetut ake yi wa nagak, ndi wa nagak ta'liila eerit nage nagagerak. Eerit nage logonet, Yetut owagam wage nagagerik, yoge logonet, “Nogoba wae. Nalik mban kat kake eeke logokit nduk, nawuluk teppanegerak kat neega'lek agandik a? Yeenggwaaniruwak nduk, yoru ubi!”

⁴¹Yoge mbareegi, Yetut nen, “Marata, Marata. Kat yi eeriyak ndi eeriyak mban kiniki piirik logonet, anggon-panggon eerit nege keegi o.

⁴²Ambiret mban miippunuk, eeriyak perak op o. Ndi, kat kawuluk Mariya nen ti aret miikerak me, an, Mage, yorigin mondok lek o,” yinuk, yoreegerak.