Read Western Dani Lukat 11 Bible Online

Lukat 11 - Western Dani bible

Lukat 11

¹Peebi ne ambi paga at Yetut ambime tamban eeke nagagerak. Eeke mbareegi, at oone waganggwi mendek ambi nen Yetut yoge logonet, “Nogoba o. Aap Yaya nen at oone waganggwi tamban eeruwak nduk, mamuniragagerak nogo pogom nit tamban eeruwok nduk, kat mamunniret o.”

²Yoge mbareegi, at Yetut nen, “Kit tamban yogobi eeko logonip o. Ninogoba o! Kat kendage abu abe alik leenak menggendak me, tiyappagago ogoorik o. Nit kat kabu'me logowok nduk, eeppinani mok o.

³Ninambi ko'lu-kii'me nonggo logorak wo'nirage logot o.

⁴ It aap nit maluk eerogo pinanugwi nogo mi eerogo pogo monggoorak me, Kat nen nit ninomaluk lek eerogo pinanege logot o. Ndi, ninabut mbangge kero, ninarum logot o, yinuk, togop aret yogo logonip o,” yoragagerak.

⁵Yorage nagagerik, at oone waganggwi nogo ambinom yorage logonet, “Aap kit mendek ambi nen nogo iniki mbere eeke paga at ore ambi owagam nage logomenggerik, yoge logonet,

⁶Nore wae. An nore ambi o ambime nage logonet, pe'neegak wagaarak kwe, mbi wogoriyak abu lek me, kat roti kenagan wo'niru o, yoge kenok,

⁷at ore oome wonage nogo nen ari logonet, Nogo abu ninikilom agaarak me, piya'nake mage o. Tu ti, abu narak. Ndi, napuri ninom nogo yugwi me, mi'na'nuk wokkiriyak ti meek o, yinuk, togop yorigin mbakop?

⁸Lek o! At ore aret me wogoriyak op kwe, nogo inikilom agaarak me, wogoriyak eebi mbake kagak kwe, agabiti mbaka'lek oone nabenak mban yoge paga at mi'na'nuk, Wo'niru o, yoge nogo aret wogorigin lek mbakop? Wogorigin aret o, yinuk, yokkirage agarik o.

⁹Togop me, it aakumi nen nggino yorogwe iinok, aret wogorogwe, kwaakwi iinok, kwaakkologwe, Tu paa'niyet o, yorogwe iinok, paariigwi, eeko menggaarak me, nggino yogwi kiinok, wokkirage, kwaakwi kiinok, kwaakkirage, Tu paa'niyet o, yogwi kiinok, paakkiige, eeke kaamunggup nduk, kit nen nggino yogwi, kwaarit nugwi, Tu paa'niyet, yogwi, eeko logonip o.

¹⁰

¹¹Kit kinaput ambi nen, Mbi wo'niru o, yokkirage kenok, yugum aret wogoriyak mbakop? Ikan ambi wo'niru o, yokkirage kenok, waalo wogoriyak mbakop?

¹²Towe ako wo'niru o, yokkirage kenok, nggitamuru wogoriyak mbakop?

¹³Lek me, kit aap maluk mendek kwe, kinapurilogwe nen yokkirogwe iinok, obeelom mendek wogorogo monggotak nogo ndak-ndak, kit kinogoba mbogut paga mendek, Aberiniki wo'niru o, yogwi kiinok, wokkiraagin lek mbakop? Wokkiraagin aret o,” yinuk, yoragagerak.

¹⁴Peebi ne ambi paga Yetut nen kugi ambi oone lek mendek aap inikime nen nggiginogo wumbege mbareegi, wundi nage kagak, aap oone lek nogo oone warak agagerak. Oone warak age mbareegi, it aakumi nen, “Wi!” yinuk, pi wareegwaarak.

¹⁵ Pi wareegwaarak kwe, it ando nen yogo logonet, “At Yetut ti, kugi iyagalo Mbeletebut nen yoreegerak paga kugi nggiginogo wumbiige menggerak o,” yogwe,

¹⁶ ndi, it ando nen at iniki abut mbanuwok, mbako logonet, “Mbogut paga nineenu ariyak ninagabiti warak mendek ambi eeru o,” yinuk, at yogwi, eereegwaarak.

¹⁷It iniki mbakwi at Yetut yelok iige nagagerik, it yorage logonet, “Aap inowe ambi at abu'me menggaarak inom it-it ogookko'nok ma'nogwe iinok, at abu'me piige menggim omaawi lek aret arigin o. Ndi, kunu ambi it-it aret ogookko'nok mbaganggwi iinok, inawi ti wuum lu agan nage logogin o.

¹⁸Kit nen yogo logonet, At kugi iyagalo Mbeletebut nen yoge paga kugi nggiginogo wumbiige menggerak o, yogwe me, at Ibilit nen at aret ogookkolage kenok, at abu'me piige menggim ti, nonggop togon omaawi logorak.

¹⁹Ndi, an nen kugi Mbeletebut yo'nege paga kugi nggiginogo wumbiige neenok, ta nen kit kinapuri yorage paga kugi nggiginogo wumbiigo menggaarak mbakop? Kinapuri nen eeko menggaarak kagak kit yogwe me, it nen aret kinenggali wappinagagun o.

²⁰An nen Ala eenggi omaawi paga kugi nggiginogo wumbiige neenok perak, Ala abu'me pinagarak muk kinowagam wagaarak aret mbako logonip o.

²¹Aap anini warak ambi tin yippunuk, wooluwak nutik awi lombok arum wonage kenok, at amendek ugun time op aret logogin kwe,

²²aap alik ambi anini ambik lombok nen aap nogo awi paga kwi'nari unggwage logonet, at eebe tebenogo pege kenok perak, eegin-omaale nogo paga iniki panggombunuk, logomenggerak nogo ndinogo punuk, agugun waganogo tumbuke menggerak o.

²³ It an ninom lambunik wonogwe lek iinok ti, ninom ogoorak aret wonogwe o. Ndi, an ninom kuwak eekulik nogo nen it ninom kuwak eeke minggirak nogo mappiigo menggaarak aret o,” yinuk yoragagerak.

²⁴Yorage nagagerik, ambinom yorage logonet, “Kugi ogole warak mendek aap inikime nen wungge nagaatik, Nggeeme yonggonggola o, yinuk, niyo ero lek me kwaarit nirimenggi-nirimenggi yonggonggolaawam lek kenok, Name wundi wagagim nogome niyok paga yungguninuk unggwi naakit o, yinuk,

²⁵unggwi wage nagaatik, wundi nagagim nogome liirubu koorak ndigik-ndegek aago kenok,

²⁶ti'nuk, wundi nage nagaatik, at maluk aret kwe, kugi mondok maluk lombok ineebe 7 kuwak eeppiinok, wogoret iyok paga unggwi wage nagaatik, nogome inom aret menggerak me, aap nogo aa'nduk kugi ambiret iniki me wonage me mbuuluk op wonagagerak kwe, peebi apit yagabit ari unggwogwe iinok, aap nogo abu maluk aret logogin o,” yinuk, yoragagerak.

²⁷Wone ti yorage mbareegi, aakumi apit kuwak aago inenggela'me nen kwe ambi oone tiyarogon ari logonet, “Kwe ndakkake nagagerik, elak kunggake nagagerak nogo, iniki ale'nggen kombake logogin o.”

²⁸Yoge mbareegi, at Yetut nen, “At nogo mban lek o. It Ala wone liirogon konembunuk, eerit nugu menggaarak iinok perak, iniki ale'nggen aret mbako logogun o,” yinuk, yoragagerak.

²⁹ Ti yorage nagagerik, it aakumi apit aret kuwak eeri wagak eekwi iigak, Yetut nen it yorage logonet, “Kit aakumi o yogondak wonogwe yi, kit maluk lombok eerit nugwi kiigi o. Nineenu ariyak mendek ambi eeke keyaawi o, yinuk, yo'nugwi kwe, an nen alik ambi eeke neyaamunggup lek o. Ata, aap Yunut nogo nen ineenu ariyak mendek eereegerak nogo ti mban aret eeke neyaamunggup o.

³⁰ At Yunut nogo aakumi o Niniwe ineenu agak wonagagerak nogo pogom, an aap aret nda'nagagirak nogo kit aakumi o yogondak wonogwe yi, kineenu agak aret agarik o.

³¹ Kwe nggwok ambi o ame pa'nggwe nen at Talomo iniki warak logonet, wone koongge menggerak nogo aruk konenikit nduk wagagerak kwe, at Talomo ti, aap mbuuluk negen, ndi, at ambi yime wonage yi perak, abu nggwok aret kagak, kit at oone konengga'lek wonogwe me, peebi aakumi inowak looniyak eyom paga at kwe nggwok nogo nen mi'na'nuk, kit yogondak wonogwe yi, Kinenggali a'nip o, yinuk, yokkirage kaamunggup o.

³² At Yunut ti, aap mbuuluk negen logonet, aakumi o Niniwe mendek Ala wone yorage mbareegi, it abok aret iniki koombunuk, inomaluk mbo pereegwaarak kwe, at ambi yime wonage yi perak, aap abu nggwok aret me, wone yokkirage nogo konembunuk, kinomaluk mbo puurak op aret kagak, kinogogumbuk wonogwe me, peebi aakumi inowak looniyak eyom paga it aap o Niniwe mendek nogo nen mi'na'nuk, kit yogondak wonogwe yi, Kinenggali a'nip o, yinuk, yokkirogwe iyaamunggup o,” yinuk, yoragagerak.

³³ Yorage nagagerik, ambinom yorage logonet, “Aakumi nen ndi wuninogo punuk, ndik abu'me a, togolowak abu'me a, kiraappugulik o. Ata, wuninogo punuk, aakumi unggwi wogwe nogo eya kaawak nduk, tena'me tiyarogon pogo menggaarak.

³⁴ Kit kineebe ndi wuninik pogom eya nogo ti, kinigen aret. Kit kinigen obeelom wonage kenok, kineebe abok aret eya aago logomunggup o. Ndi, kit kinigen maluk wonage kenok perak, kineebe abok aret o apit aago pogom logomunggup o.

³⁵Ti kenok, eya kinikime wonage nogo lek age logonet, o apit pogom age kero, liippogo logonip o.

³⁶Kit kineebe ando o apit pogom lek abok eya mban wonage kenok, ndi eya pindanggage logonet, kineebe eya agago pinagage menggi kwak, kineebe abok aret eya aago logomunggup o,” yinuk, yoragagerak.

³⁷Wone ti yorage mbareegi, aap Pariti mendek ambi nen, “Nimbirak mbi nawok nduk, omok o,” yinuk, Yetut yoreegerak. Yoge mbareegi, at Yetut aap nogo ame unggwi nage nagagerik, mbi naakit nduk, kwi'nagagerak.

³⁸Mbi naakit nduk, at eenggi kooka'lek logonet, we aret kwi'nage aap Pariti nogo enegen kage nagagerik, “Aap yi nonggop eeke iya!” mbareegerak.

³⁹Mbake mbareegi, at ninogoba Yetut nogo nen, “Kit Pariti mendek nen aakumi inamendek yumbu-lambu agago kologwe inom, yi maluk ndi maluk eekwi inom, kinikime apit yagabit aago kagak, kinagiiwak-kinarenggap agabolo endekem mban kooko monggotak.

⁴⁰Kit wi negen aret eeko ogotik. At agabolo endekem ogobakkigireegerak nogo nen inikime inom ogobakkigireegerak lek nduk yogo ogotik?

⁴¹Lek o. Kinikime aken yonggolak ti, it aap ineenggi lek wogorogwe kiinok perak, yi mendek ndi mendek abok koorak aret kaamunggup o.

⁴² Kit Pariti mendek yi, wone a'me mban koonggwi, Ala kinom kiniki kunik eekwi, ti eeka'lek logonet, we liboongga logwe, numbuk engga logwe, mbiingga logwe, nogo mban nibinogo Ala ake pugwi me, kinabuwa! Wone alom nggwok ti, eeko logonet, mbuulogwe-mbaalogwe ti inom nabenogo eeriyak me eeko monggotak o.

⁴³Kit Pariti mendek yi, it Yakuri tamban eeko menggam oolo kwi'nogwe, yi mendek ndi mendek onggo kunggo menggam taati, Nit mban keyage wappinanuwak, mbakwi, eeko logorak kinikilom mbako monggotak me, kinabuwa!

⁴⁴It aakumi kanggaatak inowak paga mbaka'lek iniyok ugun aan lebenogo pit nogo mengga kwak, kit aret me, kinabuwa!”

⁴⁵Yoge mbareegi, aap Ala wone liiru mbanak unde ambi nen onggo Yetut yoge logonet, “Ngguru wae. Yagandak nogo ti, nit ninom aret ninenggali wappinanege keego o.”

⁴⁶Yoge mbareegi, Yetut nen, “Kit aap Ala wone liiru mbanak unde kunduk, aaninggin woorak meek nogo mendek kagak, aakumi inuum paga nggimbunuk, luwi aago nugwi iigak, yeenggwaaroorak mbaka'lek, kinigen pengge agan mbaganggo monggotak me, kinabuwa o!

⁴⁷Kinombomini nen aap Ala nen yorage kagak yorogo nogogwaarak inoorogo piyareegwaarak nogo, kit inombowologwe nen aret inabiriiwak yimbiigwi me, kinabuwa!

⁴⁸Kit kinombomini nen it aap Ala yorage kagak yoraga inooreegwaarak nogo, inobaane'me kit aret inabiriiwak yimbiigwi ti paga, kinombomini eereegwaarak nogo ti, Op aret eereegwaarak o, mba'nuk, yogwe kiigi o.

⁴⁹ O nggween yi wakkagagerak paga nen, it aap Ala yorage kagak yoraga aap Kaben amiya wambeegerak kuli nen nok, Ala ake warogo kani kunggo menggam Ala awi wurik me oolo muundak aap Takariya amiya wambeegerak kuli, it abok inamiya wambeegerak nogo inane'me kit aakumi yogondak wonogwe yi aret kinoorikit nduk, at yi mendek ndi mendek abok eenu menggerak Ala nen ari logonet, An noone yorage neegak yoraga inom, yonggo nappiya wage minggirak inom, nappiya wage neenok, ando inookwi, ando piginabuwak nduk, muguret nugwi, eekwi, kiyaagin o, yinuk, yereegerak nogo ti, it aap aa'nduk inamiya wambit nagagerak nogo inane'me kit aakumi o yogondak wonogwe yi aret kinoorikit nduk, yereegerak me, yokkiragi o.

⁵⁰

⁵¹

⁵²Kit Ala wone liiru mbanak unde yi, yi wone ndi wone aakumi ineenu ogwe iyo, tu kunci kit aret kumaapporogo wonogwe me, kinabuwa! Nit aret wone nineenu aruwok, mbaka'lek logonet, it ando ineenu ariyak mbakwi nogo ineenu ogwe iyo, non mbambiigo ogotik o,” yinuk, yoragagerak.

⁵³Yorage nagagerik, o time mbo punuk, endekem wundi nage mbareegi, it Ala wone liiru mbanak unde inom, aap Pariti mendek inom, at oone ninggin yemenggerak paga yilunogo punuk, waruwok nduk, inanini nen eegwa'me liirit-laarit waganggo nogogwaarak.