Read Western Dani Lukat 12 Bible Online

Lukat 12 - Western Dani bible

Lukat 12

¹ Wone ti yorage wonage kagak, it aakumi ineenggi lingginiyak abu meek ribu-ribu aret kuwak eeppunuk, inobogom nen taga'mbit eerogo piigwi iigak, at Yetut nen at oone waganggwi mendek inaa'nduk yorage logonet, “It aap Pariti nogo nen iniki laakot logonet, yokkirogo menggaarak me, roti piike menggi kwak inoone agan nugwi nogo waganggwi kiyo, tum wakkologo logonip o.

² Yi eekwi ndi eekwi nobarak wonage kenok, tena'me aret age, ndi, kiraarak wonage kenok ti, pagak ari, eerigin o.

³Togop me, kit o apit me logonet, yogo nogogutak nogo o eya paga yogwe konenggwi, ndi, oome aken time logonet, yagakop wone yogo nogogutak nogo, o kirin paga nen kuum-keek paga pagak ari, eeke kaamunggup o,” yinuk, yoragagerak.

⁴Yorage nagagerik, ambinom yorage logonet, “Noreewi o. An wone ambi yokkira o. Aakumi nen kinagabolo mban kinooko menggaarak nogo ti, kinagabiti mbarugup o. Kinooppunuk, nonggop eeppinagarak mbakop? Lek aret o.

⁵Kit kinagabiti mbarumunggup nduk, an kurumbi yokkira o. At kinagabolo mondok kinooppunuk, kani omoonuk wunuk mban ari menggim nappinagarak unde menggerak ti perak, kinagabiti mbako logonip o. At mondok kinagabiti mbako logonip o, yinuk, yokkirage agarik o.

⁶Wu mbuulogwe mbere paga towe yiluwe ineebe 5 lambuk togon kunggo menggaarak nogo lek a? Togop aret kunggo menggaarak kwe, at Ala nen towe ambiriluk ambi kobak eerogo pege menggerak abu lek o.

⁷Kineeruwak kunduk abok aret at Ala eenggi lingginik menggerak o. Togop me, towe mbuulogwe ineebe apit lambuk togon at iniki kundugu lek negen kwe, kit perak, at iniki kundugu nggwok lombok kinombake menggerak me, kinagabiti mbako logogup o,” yoragagerak.

⁸Wone yorage nagagerik, ambinom yorage logonet, “Kit aakumi inenggaanom, Yetut ti ninowe aret o, yinuk, paganggwi kiinok, an aap aret nda'nagagirak nogo nen it Ala yonggo nappiya wage menggerak malayikat nogo inenggaanom paga, It aap yi, an nawuri aret o, yinuk, paganiraagin o.

⁹Ndi, kit aakumi inenggaanom paga, Yetut ti, nineenggo'lek o, yogwe kiinok perak, an kunduk, it Ala yonggo nappiya wage menggerak malayikat nogo inenggaanom paga, It aakumi ti, an neenggo'lek o, yinuk, ari neyaamunggup o, yinuk, yokkiragi o.

¹⁰ An aap aret nda'nagagirak nogo kinoone miyuk-meya eerogo panugwi kiinok, kinomaluk ti, Ala nen lek eerogo pinagarak op aret kwe, Aberiniki miyuk-meya eerogo pugwi kiinok perak, kinomaluk ti, Ala nen lek eerogo pinagagin mondok lek aret o. Mondok itok kunik aret logogin o.

¹¹ It aakumi Yakuri tamban eeko menggam kuwak aago inom, it aap inendagembogut inom, it aap yo'nggok inom, inowagam wokkiret pinagi nogwe iinok, kiniki piirik logonet, Ninaana'le mbanggoloorak nduk, wone ngge yoraamun? yinuk, koonubok o.

¹²Ti eyom paga wone yoroorak nduk, Aberiniki nen, Ndogop yoret o, yinuk, yokkirage kaamunggup o,” yoragagerak.

¹³Yorage mbareegi, it aakumi ambik kuwak aago nogo ambi nen Yetut yoge logonet, “Ngguru wae. An noweeluk nen nogoba eyate ando mogonniruwak nduk, yoru o.”

¹⁴Yoge mbareegi, at Yetut nen, “Wulaga! Kinowak loonogo kineyate tumbukkiragak yuwak nduk, an aret mippaneegerak mbaken?”

¹⁵Yoge nagagerik, Yetut nen aakumi yorage logonet, “Kinamendek apit wonage nogo paga kineenik eeko logorak lek me, uugwe-uugwe mbakwi kiyo, kiniki tum wako logonet, liippogo logonip o,” yoragagerak.

¹⁶Yorage nagagerik, wone eegu laarogo yorage logonet, “Aap eenggi warak ambi nen iri'ngga awi nggween mili paga yareegerak me, anggen yugu ka'let agagerak.

¹⁷Anggen yugu ka'let age mbareegi, iniki koongge logonet, Yakirak anggen yugu mbanak puurak o lek me, nonggop eeri?

¹⁸Mbake nagagerik, Yogobi eerikit o. An o yi, mingge logominggirik, nggwok lombok wuppunuk, namendek inom, yakirak anggen yugu nogo inom, time aret pi unggwage logokit o.

¹⁹Pi unggwage logominggirik, Namendek apit kuwak eerak wonage nogo tiginit unggwage neegak yi tahun ndi tahun eeriyak me, yogondak yonggonggolage logonet, mbi nenet nage, amburu nenet nage, i'ndok mban agan nage, eeke logokit o, yinuk, niniki wone yo'nuk eerigin o, yereegerak.

²⁰Yereegerak kwe, at Ala nen, at aap nogo yoge logonet, Kat aap wi yi, wae! Yogondak oonikiya yi paga aret kat kiniki an wa wage me, kat pipuk eerogo pakendak nogo peebi ta nen unde logogin mbaken o?

²¹Yinuk, yorigin me, Ala nen it aakumi agi mendek paga ineenggi lek logonet, ogu mendek paga mban ineenggi warak eekkologwe iinok, at aap ti ndak-ndak aret o,” yinuk, yoragagerak.

²²Yorage nagagerik, Yetut nen at oone waganggwi nogo yorage logonet, “Nineenik logorak nduk, ninambi nano namun? Ndi, nineebe paga ninayum nano yikkolamun? yinuk, kiniki koonggo logonet, kiniki piirik logogup o, yinuk, yokkiragi o.

²³Nonggo monggotak ti, meek negen kwe, kineenik logorak ti, iya o. Ndi, yikkologo monggotak ti, meek negen kwe, kineebe nogo ti, iya o.

²⁴Towe ya'ngge-ya'ngge eeko menggaarak nogo liippinip o. Awi yakkologwe, anggen mbanggologwe, ti eekulik o. Ndi, anggen mbanogo pi unggwogo menggam o kunduk, lek mban kwe, at Ala nen inambi wogorage menggerak. Towe ti, at iniki kundugu mbuuluk negen kagak, Ala nen inambi wogorage menggerak kwe, kit perak, at iniki kundugu lombok me, wokkiraagin lek mbako ogotik? Wokkiraagin aret o.

²⁵Kit ambi kambuurak eyom panggoni wagaarak kagak, Neenik ambinom logonuk, kambikit, mba'nuk, kiniki koonit nugwi paga ndak-ndak eekkinake kaamunggup mbakop?

²⁶Togop eekkinabigin lek me, abu mbuuluk eeriyak mendek ti, eeriyak meek kogotak kenok, iya eeriyak mendek ti, Nonggop eeri? yinuk, kiniki piirik ogotik?

²⁷ Waambi anggen lagangge menggerak nogo liippinip o. Aap Talomo aap nggwok abu abe mban kenok, aakumi nen, Wi, ugo nogogwaarak nogo kwe, at meek negen o. Waambi anggen ti perak, yabu wagangge, ligi laangge, eekeelik kwe, Ala nen unde wake kagak, anggen mondok abe kigirikwe yege menggerak me nduk, yokkiragi o.

²⁸Iri'ngga-kale'ngga endekem yogondak ki lagangge, ndi, ko'lu tekkani pugwi iinok, nengge, eeke menggerak kwe, at Ala nen enete abe eerogo pege menggerak me, at nen iri'ngga nogo mbuuluk eeppege, ndi, kit aap kiniki at Ala oba panggombunuk, liirogon abet mbaka'lek mendek yi, kit mondok iya lombok eeppinagage, eerigin lek mbakop?

²⁹Togop me, Ninambi-ninagi nano namun? yinuk, kiniki koonit nugwi ti, mage o. Kiniki piirik logogup o.

³⁰It aakumi endekem mendek nogo nen ti mendek abok aret kwaarit nugu menggaarak kwe, kit perak, Nit ti mendek lek o, yinuk, uugwe mbakwi nogo at kinogoba eenu menggerak o.

³¹Kit aa'nduk Ala abu'me pinagarak, Ao, mba'nuk, mugurok nogwe kiinok, ti mendek abok aret oba lunogo wokkirage kaamunggup o,” yinuk, yoragagerak.

³²Yorage nagagerik, at Yetut nen, “Nandombalogwe wae! Ala nen kit at abu'me pinagarak inikilom mbareegerak me, kinagabiti mbarugup o.

³³Kinamendek paga wu kunggo logomonggotik, aap ineenggi lek kenok, wogoraanip o. It aap yogoot iyagalo kiraari unggwage, yininuwo nibini unggwage, eekeelik menggim mbogut paga time kinamendek abe, lek ariyak lek nogo mendek yonggolak logowak nduk, yumunggok awi nibik yuurak lek nogo mendek yirikkologo logonip o.

³⁴Kinamendek kuwak eerak wonage me, kiniki kunduk, time aret logogin o,” yinuk, yoragagerak.

³⁵ Wone ambinom yorage logonet, “Kinayum-kinagabee'le nggirik-nggerok yirik logonet, kineenggi me ndi wuninik mondok li'luk aago logonip o.

³⁶ Aap kwe kolage me laago lakome nogome nen ame tu puk-puk eeri wage kero, ayeloman mini nen mbet-mbet tu paakkoorak nduk, tokkogo mengga kwak logonip o.

³⁷Inogoba nen ayeloman mini nogo ineenik logonet, tum wakwi me iya wage kenok, inale'nggen inombarigin o. Tum wakwi wonogwe me iya wage kenok, ogoba nen ayumunggok nggooppunuk, at ayeloman mini inanoniya larak nawak nduk, ambime kwippiinok, inake eeke logogin o, yinuk, abet aret yokkirage agarik o.

³⁸Nogo iniki mbere eeke paga ilik, o weege paga a, wage logomenggerik, ayeloman togop wonogwe iinok, inale'nggen inombarigin o.

³⁹ At aap awi unde nen, Yogoot iyagalo oonegen ndi paga woraagin, ee'nu a'netak en, Tu paappunuk, namendek kiraari unggwi wage kero, yinuk, nogo yega'lek mondok-mondok tum wake logonetak, mbako logonip o.

⁴⁰An aap aret nda'nagagirak nogo oonegen ndi paga woroorak nombaka'lek kiigak, woraagin aret me, kit kunduk mondok li'luk eeppunuk, logonip o,” yinuk, yoragagerak.

⁴¹Yorage mbareegi, Peterut nen Yetut yoge logonet, “Nogoba o. Wone eegu laarogo yo'niragandak yi ti, nit mban yo'niragan ilik, it aakumi abok aret yoragan a?”

⁴²Yoge mbareegi, at ninogoba Yetut nen, “Ti kenok, aap nggwok ayeloman ambi nen oreewi at ogoba ayeloman mini ando nogo inarum logonet, inambi noorak wogorage logowak nduk, mippuurak iniki warak yabu li'lak eeke menggerak ambi ta o?

⁴³Ogoba nen ayeloman ambi togop eeke me ka wage kenok, ayeloman nogo iniki ale'nggen arigin o.

⁴⁴Ogoba nen ayeloman nogo togop eeke me ka wage kenok, amendek abok aret at unde logowak nduk, mippigin o, yinuk, abet aret yokkirage agarik o.

⁴⁵Ndi, ayeloman nogo nen iniki mbake logonet, An nogoba elaambirik logonuk woraagin mbaki o, yinuk, at ogoba ayeloman mini at oreewi ando nogo kumi aap inom yawi inooke, yi mendek ndi mendek ugun lagap mban nenet nage, amburu kumili aganakwi mendek nengge logonet, kumili kunit nage, eerit nage kenok perak, nonggop o? Lek o.

⁴⁶Ayeloman nogo nen, Nogoba ne ndi eyom paga woraagin o, ndi, Oonegen ndi paga woraagin o, mbaka'lek ugun kobak kagak wage logomenggerik, ayeloman nogo eebe nibik-nobak eerogo it aap iniki at oba panggombunuk, abet mbaka'lek piige menggim nogome aret nappigin o.

⁴⁷Aap ayeloman ambi ogoba eeriyak mbake nogo eenu kwe, li'luk eeppunuk, eeka'lek kenok, yawi paga nggwiirit wake kaamunggup o.

⁴⁸Ndi, ayeloman ambi ogoba eeriyak mbake nogo eenggo'lek logonet, alik eeremenggerak paga onggo yawi wariyak aret kwe, mbuuluk wake kaamunggup o. Nggwok aret wokkirogo logomenggaarik, peebi, Nggwok aret, wo'niraanip o, yinuk, yokkirogwe, ndi, unde logobagip nduk, nggwok aret wokkirogo logomenggaarik, peebi abunuk, Iya negen wo'niraanip o, yinuk, yokkirogwe, eekwi iyaamunggup o,” yinuk, yoragagerak.

⁴⁹Yorage nagagerik, ambinom yorage logonet, “An nen o nggween paga yime abok kani pikit nduk wagagirak me, mbet-mbet kani pigibok eekirak me, ao mbake agarik o.

⁵⁰ Aakumi yiime wuppiigwi kwak an ambi eeppaniyak nduk wonage kwe, yobok togon eeppaniyak awo me, niniki abu meek lombok ee'nake o.

⁵¹It aakumi o nggween paga yime iniki ugun lambunik logorak eeppiyaakit nduk, wambi wagagirak mbakop? Lek o. Ogoorogo piyaakit nduk, aret wambi wagagirak o, yinuk, yokkirage agarik o.

⁵²Yogondak nen aap ambi apuri 5 kenok, inom ogoorak logonet, kenagan nen mbere inom ogoorak, ndi, mbere nen kenagan inom ogoorak, iyaamunggup o.

⁵³ Inom ogoorak logonet, ogoba nen aput wake, aput nen ogoba wake, agalo nen aagaluk wake, aagaluk nen agalo wake, enggelo nen enggelo wake, atuuluk nen atuuluk wake, eekwi iyaamunggup o,” yoragagerak.

⁵⁴ Yorage nagagerik, it aakumi apit yorage logonet, “Ndugwi oonegen kilu yi nage menggim pa'nggwe nen lagi wage kenok, E! Ti mayu woraakit nduk, eeke kagi, yogootak me, mayu aret wage menggerak.

⁵⁵Ndi, wiya o ame pa'nggwe nen warit wage kenok, E! Ko'lu o kibi arigin kagi, yogootak me, ko'lu kibi aret age menggerak.

⁵⁶Kit kiniki laakot logonet, yogo monggotak yi wae! Mbogut-nggween enete liippunuk, Ti togop aret arigin kagi o, yinuk, yogo monggotak kwe, yogondak yi eyom paga ariyak nogo kit nonggop nduk liippunuk, E! Ti togop aret arigin kagi, yinuk, yaga'lek aret ogotik?” yinuk, yoragagerak.

⁵⁷ Yorage nagagerik, ambinom yorage logonet, “Obeelom eeriyak yi aret kagi, yinuk, kinalitak lombok liippuurak op aret kwe, nano nduk liippega'lek aret ogotik?

⁵⁸Aap kinom ogoorak nogo kinom aret aap inowak loongga ka nogwe kenok, at kinom ogoorak nen nikkiret aap owak loongga owagam pinagi nage, ti'nuk, aap inowak loongga nen aap eegin warak owagam pinagi nage, ti'nuk, aap eegin warak nogo nen aap keele maarogo mambiigo menggam mambinagage, eekwi iyo, tu paga awo kinom nogo logonet, mbet-mbet paganogo kinom kiniki lambunenu o.

⁵⁹Keele maarogo mambiigo menggam mambinagagwi iinok, at kinom ogoorak wonage nogo nen, Onggo ndogop puurak o, yinuk, yokkiramenggerak nogo abu tigitogon pega'lek kagak, time nen wumbinagagin mondok lek aret o, yinuk, yokkiragi o,” yoragagerak.