Read Western Dani Lukat 13 Bible Online

Lukat 13 - Western Dani bible

Lukat 13

¹Nogo ti eyom paga aakumi ando nen, “Aakumi Nggalileya mendek nen Ala ake warogo kani kunggwi me, aap Pilatut nen inookerak o,” yinuk, Yetut yori nogogwaarak.

²Yori nogo mbareegwa, at Yetut nen, “It aap Nggalileya mendek ando maluk eeka'lek kenok, teppiige, ndi, it inookerak ti, maluk nggwok eeko nagaarak me, inooke, eekerak mbakop?

³Lek o. Kit maluk eeko monggotak nogo kiniki koombunuk, mbo pugwi lek kiinok, kit kunduk, togop aret eeppinagage kaamunggup o, yinuk, yokkirage agarik o.

⁴O Tilowam o nggorek wurik ngginnage logonet, it aap 18 aambeleninabeegerak nogo ti, it aakumi ugun Yerutalem wonogwe ti, maluk eekwi lek negen, ndi, it aambeleninabeegerak nogo ti, maluk nggwok eereegwaarak me, aambeleninabeegerak mbakop?

⁵Lek o. Kit maluk eeko monggotak nogo kiniki koombunuk, mbo pugwi lek kiinok, kit kunduk, abok togop aret eeppinagage kaamunggup o, yinuk, yokkiragi o,” yoragagerak.

⁶Yorage nagagerik, wone eegu laarogo yi, yorage logonet, “Aap ambi eyabu eerak me, eyo wuli ambi yarak wonagagerak. Wonagagerak me, anggen yugu mbanikit nduk, wondekka nagaatak kwe, anggen yugu lek mban kage nagagerak.

⁷Yugu lek mban ka nage nagagerik, at ayeloman eyabu unde nogo yoge logonet, Eyo wuli yi nogo anggen yugu mbanikit nduk, pekka waga'mban eeke neegak, tahun kenagan eereegerak kwe, anggen yugu lek mban me, nggween aanom warogo logokwak, muurogo nappu o.

⁸Yoge mbareegi, at ayeloman nogo nen, Nogoba! Tahun yi paga an nen wola yege, alom mogut mbangge, eeriyak mbakirak me, teppuurak o.

⁹Ndi, tahun yi eeppunuk, ambi age paga anggen yege kenok ti op o. Ndi, anggen yege lek kenok perak, muurogo nappenok o, yinuk, yoreegerak o,” yoragagerak.

¹⁰Ti'nuk, peebi at Yetut it Yakuri tamban eekwi paga it tamban eeko menggam ambi wone mamunirage me,

¹¹kwe ambi kugi andi kagak, tahun 18 eereegerak me, amborowak kalenak mi'nariyak abu meek aret wonagagerak.

¹²Meek aret wonage me, at Yetut nen kwe nogo enegen kage nagagerik, wiireegerak wage mbareegi, yoge logonet, “Kwe yi wae! Andi nogo abu lek eekkaki o,” yinuk,

¹³eenggi awo pigagangge kagak, kwe nogo amborowak koonnage mbareegi, Ala wogoppereegerak.

¹⁴ Ti eeke mbareegi, aap Yakuri tamban eeko menggam unde nogo it tamban eekwi paga Yetut nen kwe nogo obeelom eekerak kage nagagerik, anini nen aakumi apit yorage logonet, “Yabu eeriyak nduk nogo 6 kuli yuurak wonage me, nogo 6 kuli yuurak ti paga ugun andi obeelom eekkinabuwak nduk, wogo logomunggup o. Nit tamban eekwi yi paga wagak yuurak lek o.”

¹⁵Yorage mbareegi, ninogoba Yetut nogo nen at yoge, “Kit aakumi kiniki laakot logonet, yorogo monggotak yi wae! Kit abok tamban eekwi paga kinerapi a, kinageledai a, ngga'nggo'na narak me, yi na nawak nduk, tu paarogo punuk wogoret nogo monggotak nogo lek a?

¹⁶Ndi, ti kenok, Abarakam ombooluk kwe yi, Ibilit nen keele maarogo porogo wonage kagak, tahun 18 eereegerak me, kit tamban eekwi paga piinogo teppuurak ti, mage me nduk, yogo ogotik?”

¹⁷Ti yoragagerak paga at inom ogoorak wonogwe nogo inenggali agago piyareegerak kwe, it aakumi abok at Yetut iya tit eerit nege nagagerak nogo paga inale'nggen mbako nogogwaarak.

¹⁸Ti'nuk, at Yetut nen, “Ala abu'me piyoorak ti, nano kokwak o? Ndi, nano paga wakka o?

¹⁹Lek o. Ala abu'me piyoorak nogo ti, kulok anggen kokwak aret me, aap ambi kulok anggen nogo waganogo eyabu me yumbuneegerak me, laganeegerak. Lagangge logonet, eyo ambi nggwok lombok wiganeegerak me, eno'mbak paga yi towe ndi towe mbogut paga nugu menggaarak mendek inawi mbani unggwogo nogogwaarak o,” yoragagerak.

²⁰Ti yorage nagagerik, ambinom yorage logonet, “Ala abu'me piyoorak nano paga wakka o?

²¹Ala abu'me piyoorak ti, roti piike menggerak pogom aret me, kwe ambi nen roti piike menggerak nogo mendek mbato yigirik togolowa'na ne 40 paga kilirogo wuppunuk, roti piike menggerak nogo mendek inom nombongge kenok, abok aret piike menggerak o,” yinuk, yoragagerak.

²²Ti yorage nagagerik, ti'nuk, at Yetut nogo o Yerutalem wage logonet, o kota-kota inom, yaga'lelo-yaga'lelo inom, ambime unggwagak eerit wage logonet, wone mamuniranet wage nagagerak.

²³Wage me, aap ambi nen, “Nogoba wae! Aakumi apit inagap ndaremenggi ilik, ambitak mban inagap ndaremenggi a?”

²⁴ Yoge mbareegi, Yetut nen, it yorage logonet, “Tu mbuuluk paga unggwi noorak nduk, lin wako logonip o. It aakumi apit aret unggwi noorak nduk, eeremenggaarak kwe, meek tit kaagun o, yinuk, yokkege agarik o.

²⁵At o unde nen mi'na'nuk, tu nake mbaremenggi, kit endekem tu puk-puk eeko logonet, Nogoba! Tu paa'niyet o, yorumonggotak kwe, at nen, Kit aap nggeeme nen wogop? Kit an neenggo'lek o, yokkirage kenok,

²⁶ kit nen at yogo logonet, Lek o. Laago ninom nonggo nogoorak nogo o. Lek o. Ninawoore'nggam wone mamunnirage nagandak nogo o, at yorumonggotak kwe,

²⁷ at nen, Kit nggeeme nen wogop? Kit an neenggo'lek o. Kit maluk eeko monggotak yi, mbet mbaganinip o, yinuk

²⁸ endekem wumbinagamenggerak logonet, aap Abarakam kunduk, Itak kunduk, Yakup kunduk, ndi, it aap Ala nen yorage kagak yoraga abok aret Ala abu'me wonogwe iigo logomonggotik, leenggu maakwi, kineyak nggilik maakwi, eeko logomunggup o.

²⁹It aakumi o iru-ogwe nen, agi-ogu nen, Ala abu'me piige menggim laago noorak nduk, kuwak ari woraagun o.

³⁰ Kuwak ari wogo logomenggaarik, it aap peebi wonogwe nogo ti, inaa'nduk ogwe, ndi, inaa'nduk wonogwe nogo ti, peebi ogwe, eekwi iyaamunggup o,” yoragagerak.

³¹Ti awo yorage kagak, it aap Pariti mendek ando nen Yetut owagam nogo nogogwaarik, at yogo logonet, “Aap Keroret kooriyak ari me, yime nen mbet mbaganu o.”

³²Yogo mbareegwa, Yetut nen, “At aap nggeewo pogom ti, wone yi mbet yori nanip o. An yogondak inom, ko'lu inom, kugi aap inikime wonage kenok, nggiginogo wumbiige, andi kenok obeelom aganake, eeke logominggirik, nogo mbere yinuk, ko'lu an eerikit nduk wagagirak nogo ti, abu worok togon aret eerigin o.

³³Togop eeriminggirak kwe, it aap Ala yorage kagak yoraga mendek ambi o Yerutalem kagak, o alik me kambuurak meek me, yogondak inom, ko'lu inom, ko'lu kwak inom, an time nage logogin aret o.

³⁴Ai! Yerutalem, Yerutalem! Ala nen yorage kagak yokkega nogo inooke, aap Ala nen yonggo kowagam nappiya wage menggerak ti, yugum paga toguurit-tagaarit inooke, eeke menggendak me ao! Towe ayam iyagalo nen oo'nuwe a'naabit abu'me tebembiirogo menggi kwak, an nen kat kaagalogwe togop aret kuwak eerogo piyoorak mbake minggirak kwe, kat nen, Neebi o, mbake menggendak me, ao!

³⁵ Kat kawi yime teppiminggirak o wogo aret logogin o. Kat nen, Nogoba endage paga wage yi, wogoppuwok o, yuurak eyom panggoni waga'lek kagak, kenegen abu neega'lek aret logomunggun o, yinuk, yokkigi o,” yoreegerak.