Read Western Dani Lukat 14 Bible Online

Lukat 14 - Western Dani bible

Lukat 14

¹Peebi ne ambi paga at Yetut nen it Yakuri tamban eekwi paga mbi noorak nduk, aap Pariti inowe ambi ame unggwagagerak me, aakumi nen at inigen wonok nugu nogogwaarak.

²Inigen wonok nugwi iigak, aap ambi andi eenggi-iyok piirik-konik eerak Yetut abu'me wonage me,

³at Yetut nen aap Ala wone liiru mbanak unde inom, it Pariti mendek inom, yorage logonet, “Yakuri tamban eekwi paga aakumi obeelom eeginaburak ti, op ilik, mage a?”

⁴Yorage mbareegi, it apit inoone abu lek puk ogogwaarak. Puk ogo mbareegwa, at Yetut nen aap nogo eenggi pigogo obeelom eeppege nagagerik, nappereegerak.

⁵ Nappereegerak nage kagak, at Yetut nen it yorage logonet, “Kit tamban eekwi paga kit ambi kinaput a, kinerapi a, nggween kabunik yi yenggenak me yigeebu wangge kenok, kit pigogo nippi woroorak op ilik, lek a?”

⁶Yorage mbareegi, inoone onggo yoriyak meek me, puk aret ogogwaarak.

⁷Puk ogo mbareegwa, at Yetut nen it aakumi mbi noorak inayonggo pereegerak nogo, aap nggwok kwi'nogo menggam mban kwi'nari wogwe iige nagagerik, wone eegu laarogo yorage logonet,

⁸ “Aap kwe kolage logonet, laago larak noorak nduk, kinayonggo pege kenok, nogo logomonggotik, aap nggwok kwi'nogo menggam time kwi'narugup o. Kit mbuulogwe me, ndi, aap ambi abu nggwok ayonggo pemenggerak wage kenok,

⁹at kinom kinayonggo pemenggerak nogo nen kit yokkira wage logonet, Wologwe! Aap yi, kit kinobaane'me kwi'naruwam kit tayo yinip o, yokkirage kenok, kinenggali mbakak aap ugun kwi'nogo menggam kwi'nari noorak age kero, aap nggwok kwi'nogo menggam kwi'narugup o.

¹⁰Kinayonggo pege kenok, nogo logomonggotik, aap ugun kwi'nogo menggam time aret kwi'narumunggup o. Kwi'ndak wonogwe me, at kinayonggo pemenggerak nogo nen kit yokkira wage logonet, Noreewi o. Kit aap nggwok kwi'nogo menggam yime kwi'nari wa'nip o, yokkirage kenok, it aakumi apit mbi noorak kinom wonogwe nogo inenggaanom paga kit tiyanak aret kiyoorak me, aap ugun kwi'nogo menggam time aret kwi'nogo logomunggup o.

¹¹ Kit kiniki tiyappakwi kiinok, tebembinagage, ndi, kiniki tebeppakwi kiinok, tiyappinagage, eeke kaamunggup o,” yinuk, yoragagerak.

¹²Yorage nagagerik, Yetut nen aap at ayonggo pereegerak nogo yoge logonet, “Kat laago lake logonet kenok, kinom kiniki kunik menggendak inom, koreewi inom, kowe-kawot inom, ineenggi warak kat kinom menggendak inom, it mban inayonggo pege kenok, peebi it togop lako logonet, onggo kat kayonggo pugwi iyo, it mban inayonggo pege logobok o.

¹³Ata, laago lake logonet, ineenggi lek kenok, aawi-obaak peenok warak peenok lek kenok, endop maluk kenok, inigen mbuk kenok, inayonggo pege kenok perak,

¹⁴kiniki ale'nggen ambik kaamunggun o. Ndi, it nen onggo wokkiriyak meek me, aakumi iniki abe koonak nogo ineenik a'nuk, mippiyoorak eyom nogo paga aret onggo wokkege kaamunggun o,” yinuk, yoreegerak.

¹⁵Aap mbi noorak inom kwi'ndak wonagagerak nogo ambi nen Yetut yoreegerak nogo aruk konengge nagagerik, Yetut yoge logonet, “It Ala abu'me piige menggim logonet, mbi namenggaarak nogo inale'nggen mbako logogun o.”

¹⁶Yoge mbareegi, Yetut nen, “Aap ambi laago nggwok lariyak koongge nagagerik, aakumi apit inayonggo pereegerak.

¹⁷Inayonggo pege nagagerik, lappunuk, ayeloman ambi yoge logonet, Laago larak yi, abu pelaariyak eeke me, noorak aap inayonggo pigirak nogo woraawak nduk, yoranet nak o, yinuk, nappereegerak.

¹⁸Nappereegerak nogo nen yoranet nagagerak kwe, it ambugwi aret ineebi-ineeba yogo logonet, at ambi nen, An yabu yarak ambi onggo pigirak pekka noorak me, laago larak na noorak ti, meek o, nogoba, yoge,

¹⁹ndi, ambi nen, An tapi ineengge ndak-ndak 5 aret onggo kunggirak wondegiya noorak me, laago larak na noorak ti, meek o, nogoba, yoge,

²⁰ndi, ambi nen, An nakwe awo kolagarak me, na noorak meek o, yoge, eereegwaarak.

²¹Eereegwaarak nogo ayeloman nen ogoba mbininogo yori wage mbareegi, ogoba anini nen ayeloman yoge logonet, O kota yime tu andogon-andogon apit aret nage logomenggendik, aap ineenggi lek kenok, ineenggi-iniyok peenok warak peenok lek kenok, inigen mbuk kenok, endop maluk kenok, mbet-mbet wogoret wa'nu o.

²²Yoge mbareegi, wogoret wage nagagerik, ogoba yoge logonet, Nogoba o. Yo'negendak nogo wogoret wagarak kwe, kwi'nariyak tenak apit wonage o.

²³Yoge mbareegi, ogoba nogo nen ayeloman yoge logonet, Ndi, ti kenok, aakumi endekem tu andogon-andogon ugun wonogwe nogo an name yagabit eeri unggwi woraawak nduk, koone omaawi paga waganogo piya wage logot o.

²⁴Laago noorak nduk, aa'nduk inayonggo pigirak nogo abok aret an nelaago larak na unggwi woroorak mondok lek aret, yoreegerak o,” yinuk, yoragagerak.

²⁵Aakumi ambik Yetut inom nugwi me, Yetut nen ena ambokan na'nage nagagerik, it yorage logonet,

²⁶ “Kit kinogobamini-kinagalomini inom, kinakuwi-kinapurilogwe inom, kinowelogwe-kinawurilogwe kumi-aap inom, ndi, kit kineebe lombok inom, Yi neebi o, mbaka'lek kagak an nowagam wogwe kiinok, an noone waganggwi mendek arumunggup lek o.

²⁷ Kinageyo karo-karo nabenogo pinagarak nogo, ko'nok an ninom noorak mbaka'lek kiinok, an noone waganggwi mendek arumunggup lek o.

²⁸Kit o nggorek wurik lagarak koonggwi kenok, wuriyak onggo puurak endak wonage ilik, lek a? yinuk, kineenggi linggingga'lek kagak, wuko monggotak mbakop?

²⁹Wu kineenggi linggingga'lek kagak wukwi kiinok, nggween kabunogo kobat yimbunuk, oo'ngget awo maaka'lek kagak wu lek age kenok, kakunik mbo pumonggotak nogo aap ando nen inigen kogo logomenggaarik, Aap yi, o wuriyak nduk eekaarak kwe, eegu yobok ari kenok, mbo pegaarak yi, kaanip o, yinuk, kinagi'ndok kambugun nogo lek a?

³¹Ndi, aap ndugure ambi nen wim namburi noorak nduk, wone lengganiyak mbake kenok, awuri aa'nduk liippiinok, An nawuri ineebe sepuluh ribu nen it ninom wim mbanak ineebe dua puluh ribu wonogwe me, endak inoori noorak ilik, meek a, yinuk, wakkaga'lek kagak, namburi nage menggerak mbakop?

³²Wakkaanuk meek age kenok, it inom wim mbanak nogo awo wogwe iigak, Wim muk mage agago eyo yinggoorak o, yinuk, yonggo nappiige menggerak nogo lek a?

³³Ti eeko mengga kwak, kit ambi kinamindik-kinamendek apit aret mbo pega'lek kagak an noone waganggwi mendek arumunggup lek o,” yoragagerak.

³⁴ Wone ambinom yorage logonet, “Mayu ti, ambi eeriyak ake aret wurik menggerak kwe, andi lek wurik kenok, nonggop agago andi warak eeriyak?

³⁵Mayu andi lek wurik nogo ti, nggween obeelom aruwak nduk yabu yarak me ilik, nggween maluk me a, pemenggaarak kwe, nggween nogo abe arigin lek me, abu mbo nappogo menggaarak o. Kinaruk koneniyak kenok, liirogon aret konenggo logonip o,” yinuk, yoragagerak.