Read Western Dani Lukat 15 Bible Online

Lukat 15 - Western Dani bible

Lukat 15

¹ It aap o unde inake wu kuwak eeka inom, maluk eeka inom, abok aret Yetut oone konenuwok nduk, at owagam nagak eeko nogogwaarak.

²Owagam nagak eeko mbareegwa, it Pariti mendek inom, it Ala wone liiru mbanak unde inom, nen Yetut it aap ti inom wonogwe iigo nogogwaarik, ineebi-ineeba yogo logonet, “Aap yi, aakumi maluk eeka wogonake nagaatik, inom mbi nengge menggerak kiraap!” yogogwaarak.

³Yogo mbareegwa, at Yetut wone eegu laarogo it yorage logonet,

⁴“Kit ambi kinandomba ineebe 100 wonogwe me, ambiret kobak age kenok, 99 mban iri'ngga nenet nugu menggam nenet nugwi iigak, ambiret kobak agaarak nogo mbo pega'lek ni'nagak-wu'nagak kwaarit nugu nogootik, kwaakkogo monggotak nogo lek a?

⁵Ndi, kwaappunuk, kinuum paga ya'ngge lu'nuk, keyage warit

⁶kiname wonok wogo nogootik, kinorewologwe inom, kinowe-kinawot inom, kuwak eeppiinok, Nandomba kobak agaarak nogo kwaakirak me, kit ninom ale'nggen eeruwok o, yinuk, yorogo monggotak nogo lek a?

⁷Ti ndak-ndak aap 99 iniki nen, Nit niniki abe koonak me, nit maluk nano mbo puurak o? yinuk, iniki koombunuk, inomaluk mbo pega'lek iinok, it mbogut paga menggaarak iniki ale'nggen mbuuluk mbarugun kwe, it aap maluk eeko menggaarak ambiriluk ambi nen maluk eeke nagagerak nogo, iniki koombunuk, mbo pege kenok perak, it mbogut paga menggaarak malayikat nogo iniki ale'nggen nggwok lombok mbako logogun o, yinuk, yokkiragi,” yoragagerak.

⁸Ti yorage nagagerik, ambinom yorage logonet, “Kwe ambi wu 10 porogo wonage me, ambiret kobak age kenok, ndi wunimbunuk, liirubu koorogo nagake logonet, puk aga'lek kwaarit-mberaarit eeke nagaatik, kwaakkage menggerak nogo lek?

⁹Ndi, kwaappunuk, orewologwe inom, at inom menggaarak inom, kuwak eeppiinok, Nawu kobak agaarak nogo kwaakirak me, ninom ale'nggen eeruwok o, yorage menggerak nogo lek a?

¹⁰Nogo ti ndak-ndak aap maluk eeko menggaarak ambiriluk ambi nen maluk eeke nagagerak nogo iniki koombunuk, mbo pege kenok, it Ala yonggo nappiya wage menggerak malayikat nogo nen iniki ale'nggen aret mbako logogun o, yinuk, yokkirage agarik o,” yoragagerak.

¹¹Yorage nagagerik, wone ambi ari logonet, “Aap ambi apuri mbere wonagagerak.

¹²Ambokan mendek nogo nen ogoba yoge logonet, Nogoba o. Keyate an wo'niriyak mbakendak nogo mbet wo'niru o, yoge mbareegi, ogoba nen amendek eyate nogo mogonogo imbirak wogoragagerak.

¹³Wogorage mbareegi, nogo mbereeret yinuk, aput ambokan ndarak nogo nen ageerok ogoba wogoreegerak nogo abok kuwak eerogo onggo mbanggolage nagagerik, awu ko'nok o nda time nagagerak. Nagagerak time logonet, iniki liippega'lek ugun eerit nege logonet, awu nogo tigippateegerak.

¹⁴Awu nogo tigippake nagagerik, wonage me, o nogome mbi noogelo nggwok age mbareegi, at mbi abu ambik eereegerak.

¹⁵Mbi abu eeke mbareegi, aap awoorak ambi awi time mendek ake yabu eerikit nduk, ka nagagerak. Ka nage mbareegi, at aap ti nen aanggumi o endekem time arum a nawak nduk, nappereegerak.

¹⁶Nappereegerak nage nagagerik, arum wonage logonet, Naanogum pale yuwak nduk, mbi agabolo yibirik wam nengge yi, an nengge logokit lak ao, mbareegerak kwe, aanggo unde nogo nen mbi agabolo at wogoga'lek aret wonagagerak.

¹⁷Ti'nuk, ne ambi paga iniki liippege nagagerik, A puk! An nogoba ayeloman mini yabu eekwi onggo kologwe nogo, ineebe apit logonet, mbi ndiinogo pegak nonggo menggaarak kwe, an perak, mbi abu nen kambigin kagi.

¹⁸An yime nen nogoba ka nage logominggirik, Nogoba o. At mbogut paga mendek inom, kat inom, maluk eeppinagareegirak o.

¹⁹Maluk eeppinagareegirak me, Yi an naput, yo'niriyak ti meek o. Ata, kayeloman mini yabu eekwi onggo kologwe nogo pogom ee'nabu, yori naakit, mbareegerak.

²⁰Mbake nagagerik, o time mbo punuk, ogoba ka wagagerak. Ka wage nagagerik, awo wok yi wage me, ogoba nogo enegen nakkage nagagerik, abuwa nen nggare agan nanuk, linggik-kambuk eeppunuk, aleenggu maareegerak.

²¹Aleenggu maake kagak, aput nen ogoba yoge logonet, Nogoba o. At mbogut paga mendek inom, kat inom, maluk eeppinagareegirak o. Maluk eeppinagareegirak me, Yi an naput, yo'niriyak ti mage o, yoreegerak.

²²Yoreegerak kwe, ogoba nen ayeloman mini yorage logonet, Yum abu kigirikwe lombok waganogo yippugwi, tenggen at eenggi paga yippugwi, sepatu yippugwi, mbet-mbet togon ee'nip o.

²³Ndi, ti eeppunuk, tapi aagaluk amok warak ambi wa nogo logomonggotik, warogo anooniya lako logonet, ale'nggen eeruwok o.

²⁴An naput yi, kambeegerak negen kwe, eenik agaarak o. Ndi, kobak agagerak kwe, kwaakkogo o, yinuk, ale'nggen eereegwaarak.

²⁵Ale'nggen eekwi iigak, oweeluk nogo yabu yarak me wonagagerik, ame wok yi wage logonet, ndawi lubuk wakwi aruk koneneegerak.

²⁶Konengge nagagerik, ayeloman ambi wiireegerak wage mbareegi, yoge logonet, Yi nano eeko agaarik o? yinuk,

²⁷kin wagangge mbareegi, ayeloman nogo nen, Lek o. Kawuluk nogo muk wagaarak o. Ndi, eebe obeelom aret wagaarak me, kogoba nogo nen tapi aagaluk amok warak ambi warogo lako logonet, ale'nggen eeko agaarik o.

²⁸Yoge mbareegi, oweeluk nogo anini age nagagerik, ame ungguurak eebi a'nuk, wonage me, ogoba wundi nage nagagerik, oone nabek togon, Unggwi mok ubi, yoreegerak kwe,

²⁹oweeluk nogo nen ogoba yoge logonet, Karuk logot o. An yi tahun ndi tahun kake yabu eeke minggirak o. Ndi, eeke logonet, Yogop ee'nu, ndogop ee'nu, yo'nege nogo neebi yaga'lek mondok eerit mban nege minggirak kwe, kambin aagaluk ambiriluk ambi an noreewi ninom niniki ale'nggen logonet, larogo noorak nduk, abu wo'nega'lek aret menggendak kwe,

³⁰kaput yi perak, kumi ugun wurinabit nege logonet, kawu wogoreegindak nogo tigippagit nege nagaarak nogo wage mbaki, tapi aagaluk amok warak lombok warogo lagagendak o.

³¹Yoge mbareegi, ogoba nen, Naput o. Kat mondok-mondok nimbirak menggendak me, namindik-namendek apit ti, kat kamendek aret o.

³²Ndi, kat kawot yi perak, kambeegerak negen kwe, eenik agaarak o. Ndi, kobak agagerak kwe, kwaakkogoorak me, niniki ale'nggen logonet, laago yi op aret lako, yoreegerak o,” yinuk, Yetut nen it aakumi yoragagerak.