Read Western Dani Lukat 17 Bible Online

Lukat 17 - Western Dani bible

Lukat 17

¹ Yorage nagagerik, Yetut nen at oone waganggwi nogo yorage logonet, “Kit maluk eerubagip nduk, kinikime mambinagi woramenggerak kwe, at kinikime mambinagi wage nogo perak, abuwa o.

²Aap ambi nen elege-aabologwe yi, maluk eeruwak nduk, inikime manabi wagaatak paga maluk eekwi iinok, yugum nggwok gandum yigika waganogo aap ti, enggaanok me, keele yilinogo yi yenggenak laut inikime mbo mambuurak op o.

³ Togop me, kiniki tum wakkologo logonip o. Kit kinore ambi maluk eeke kenok, aruk wariyak o. Aruk wappunuk, maluk eekerak nogo iniki koombunuk, mbo pege kenok, at omaluk ti, mi eerogo mbo pogo logomunggup o.

⁴ Ndi, aap ambi nen ne ambi paga ne 7 maluk eeppinagage logomenggerik, iniki koombunuk, An maluk eeppinagagirak o, yinuk, eekerak ndak-ndak ne 7 paga yokkira wage kenok, kit nen ne 7 paga aret omaluk mi eerogo mbo pogo logonu o,” yinuk, yoragagerak.

⁵Yorage mbareegi, it nappiyareegerak nogo nen, “Ninogoba o. Niniki koba panggombunuk, abet kombakwi nogo ambinom kole aruwak nduk, ee'ninabu o.”

⁶Yogo mbareegwa, at ninogoba Yetut nen it yorage logonet, “Kit kiniki noba panggombunuk, abet nombakwi nogo mbuuluk kulok anggen pogom kinikime logonetak en, eyo kilu nggwok yi, Kalom kinggo'nok yi inikime ya'nari nage keyaagin o, yogwi kiinok, ya'nari nage aret ka'netak o,” yinuk, yoragagerak.

⁷Yorage nagagerik, ambinom yorage logonet, “Kit kinayeloman ambi nen yabu wagangge ilik, kinandomba ndegeninake a, eerit nege logomenggerik, endekem nen awo kiname unggwi wage kenok, kit nen, Kambi mbet-mbet na mok o, yinuk, yoriyak mbakop?

⁸Lek mbaki o! Kit nen kinayeloman nogo yogo logonet, Nit ninambi larogo pinaninuk, kayum yikkolage logomenggendik, nit nunggwi niigak, kat nit ninake yi wa nagak ndi wa nagak eeke logot o. Ndi, nit abu nunggwi niinok perak, kat mbi na wa'nu o, yinuk, togop yoriyak nogo lek a?

⁹Ogoba nen ayeloman wone, Yogop ee'nu, ndogop ee'nu, yogetak mban eeke kenok, ogoba nen, Wa! yoriyak mbakop? Lek aret o.

¹⁰Ndi, ti kenok, ti ndak-ndak kit wone, Yogop ee'nu, ndogop ee'nu, yokkirage nogo abu eeppogo logomonggotik, Lek o. Nit aap inayeloman mban ogoorik o. Ninaburen eerulik o. Ata, yo'niragaarak kenok mban eekoorak yogo logorak op o,” yinuk, yoragagerak.

¹¹Peebi ne ambi paga at Yetut o Yerutalem wage logonet, o Tamariya wukkagak, o Nggalileya nikkagak, tu oolo paga wagagerak.

¹²Wage logonet, aakumi iname ambime unggwage kagak, aap ineebe 10 inawin aaga'ne kunik nogo mendek nen Yetut wage inigen kogo nogogwaarik, tayorogon taati nen

¹³inoone nggwok paga at yogo logonet, “Ninogoba Yetut wae! Ninabuwa mbaru o.”

¹⁴ Yogo mbareegwa, Yetut enegen pegiige nagagerik, “It aap Ala unde nen inigen kiyaawak nduk, kineebe nigiya nanip o.” Yorage mbareegi, it nogo, nogwe iigak, inawin obeelom agagerak.

¹⁵Inawin obeelom age mbareegi, it nogo ambi awin obeelom agaarak nogo kage nagagerik, yungguninuk, iyok paga wage logonet, oone nggwok paga Ala endage wogoppit wagagerak.

¹⁶Ala endage wogoppit Yetut abu'me tebe yi wage nagagerik, ale'nggen nen, “Wa!” mban yoreegerak. Aap ti, o Tamariya mendek aret o.

¹⁷Aap nogo Yetut, “Wa!” mban yoge mbareegi, at Yetut nen, “Aap ineebe 10 obeelom agaarak nogo lek a? Ineebe 9 nogo nggeeme naga o?

¹⁸It ando nogo lek aap nggiru yi mban Ala endage wogoppuurak nduk, iyok paga yungguninuk wagaarak ya?”

¹⁹Yinuk, Yetut nen aap nogo yoge logonet, “Kiniki noba panggombunuk, abet nombakendak paga obeelom agandak me, mi'na'nuk kame nak o,” yinuk, nappereegerak.

²⁰Ti'nuk, peebi it Pariti nen Yetut yogo logonet, “At Ala nen nit mandenom abu'me pinani woraagin o?” yinuk, Yetut eegwa'me waganggo mbareegwa, Yetut nen it yorage logonet, “At Ala abu'me pinagi woroorak nogo ti, aakumi yelok kaawak nduk, eeka'lek kagak woraagin aret o.

²¹It aakumi nen kunduk, Yime wonage yi kaanip o. Time wonage ti kaanip o, yokkiraga'lek kagak aret woraagin o. Ala abu'me pinagarak ti, muk kit kinenggela'me wonage mbako logonip o,” yoragagerak.

²²Ti yorage nagagerik, at oone waganggwi nogo yorage logonet, “An aap aret nda'nagagirak yi, An woroorak eyom paga, Ne ambiriluk ambi eebe kaawok lak, ao, nombarumonggotak kwe, kinigen neyoorak lek eyom aret panggoni woraagin o.

²³It aakumi nen, Eebe yime wonage me, pekka woraanip o. Time wonage me, pekka nanip o, yokkirogwe iinok, muguret noobok o.

²⁴O yabok mbogut paga nen pindanggage kenok, o irip-irip abok aret eya eeke menggi kwak, an aap aret nda'nagagirak woroorak nogo eyom paga togop aret eerigin o.

²⁵Togop aret eerigin kwe, aa'nduk, aakumi nen mondok noba aaninggin-paaninggin agago panugwi, aakumi yogondak wonogwe nogo nen an mbo panugwi, eerugun aret o.

²⁶ Aap Nu wonage kagak, eerit nugu nogogwaarak nogo pogom, an aap aret nda'nagagirak woroorak eyom paga it aakumi togop aret eerit nugu logogun o.

²⁷ It aakumi nen mbi nunggwi, amburu nunggwi, aap nen kumi kologwe, kumi nen aap kologwe, eerit nugwi iigak, aap Nu yiiro wurik me unggwage mbareegi, yi yenggenit lagangge logonet, it ineebe abok aret niyo ndonggoninabeegerak nogo o.

²⁸ At Lot wonage kagak, eereegerak nogo ndak-ndak aakumi nen mbi nunggwi, amburu nunggwi, inamendek kunggologwe, inageerok onggo mbanggologwe, yabu waganggwi, o wukwi, ugun eerit nugwi iigak,

²⁹aap Lot o Torom nen wundi nage mbareegi, Ala mbogut paga nen yugum anggen kani inom wuppit wage logonet, it ineebe abok aret pup eerogo piyareegerak nogo o.

³⁰It maluk ugun eerit nugwi me, pup eerogo piyareegerak nogo ndak-ndak, an aap aret nda'nagagirak nogo tena'me ari woroorak eyom paga togop aret eerit nugwi me, woraagin o.

³¹ Kinamendek tilaabaga wonage kagak, kineebe nggween paga wonogwe me, an wage neenok, kinamendek tilaabaga wonage nogo kola laganggwi, ndi, kit ando yabume wonogwe nogo kiniyok paga yungguninuk, kiname nogwe, eeriyak ti mage o.

³² At Lot akwe eereegerak nogo abe'nip o.

³³ Kit kineebe kinili yikkolamonggotak kenok, kobak aret arumunggup o. Ndi, kineebe wondet agago patumonggotak kenok, kinili aago aret logomunggup o.

³⁴Ne ti eyom paga oonikiya aap mbere tilaabaga nogo yugwi me, ambi wagangge, ambi teppege,

³⁵kumi mbere mbi worakwi me, ambi wagangge, ambi teppege, (

³⁶ndi, aap mbere yabume wonogwe me, ambi wagangge, ambi teppege,) eeke kaamunggup o, yinuk, yokkiragi o,” yoragagerak.

³⁷Yorage mbareegi, at oone waganggwi nen, “Ninogoba o. Ti nggeeme eeriyak yagan o?” Yogo mbareegwa, at Yetut nen, “Wam pili agaatak wonage me nogome aret towe enggaanggum nengga ninggiko menggaarak o,” yinuk, yoragagerak.