Read Western Dani Lukat 18 Bible Online

Lukat 18 - Western Dani bible

Lukat 18

¹Ti yorage nagagerik, aakumi anggon-panggon eeginaka'lek tamban mban eeko logowak nduk, Yetut wone yi, eegu laarogo at oone waganggwi nogo yorage logonet,

²“O kota ambime aap wone owak loongga mendek ambi wonagagerak. Aap ti nen Ala agabiti mbake, ndi, aakumi inayuk wuke, eeka'lek aret wonagagerak.

³Ndi, kwe togwe ambi o kota time wonagagerak mban. Kwe ti nen nabenak mban aap wone owak loongga nogo yori nagak eeke logonet, At nimbirak ogoorak nogo nen non mbanogo panege me, an ugun eerit nege logokit nduk, nawone koonogo panu o, yoge nagagerak.

⁴Yoge nagagerak nogo aap owak loongga nogo nen aa'nduk eebi mbareegerak kwe, peebi iniki koongge logonet, An Ala nagabiti mbake, ndi, aakumi inayuk wuke, eekeelik kwe,

⁵kwe togwe yi, nabenik-nabenak mban yo'niri wage me, piya'nabi wage logokwak, nggaruk togon awone koonogo pikit, mbareegerak o,” yinuk, yoragagerak.

⁶Yorage nagagerik, at ninogoba Yetut nogo nen, “Aap wone owak loongga nen wone abe owak loongge logolik kwe, yereegerak nogo koneninip o.

⁷ Togop ndak-ndak Ala nen at apuri miirinabeegerak nogo inoone ko'lu-kii'me at yogwi iinok, inowak loonogo inawone abe amburu mbanigin lek mbakop? Logonuk negen inawone mbaniyak mbakop?

⁸Lek o. Mbet-mbet aret inowak loonogo inawone amburu mbanigin o, yinuk, yokkiragi. Togop aret eeginaburak kwe, an aap aret nda'nagagirak wage neenok, it aakumi nggween paga yime iniki noba panggombunuk, abet nombakwi iyaamun ilik, lek a?” yinuk, yoragagerak.

⁹Yorage nagagerik, it aakumi ando iniki nen, “Aakumi ando ti, abu meek o, ndi, nit perak, niniki abe koonak aret o,” mbako nogogwaarak me, Yetut nen wone yi eegu laarogo yorage logonet,

¹⁰“Aap mbere tamban eeruwok nduk, Ala awi wurik me unggwi nogogwaarak. Ambi ti, Pariti mendek, ndi, ambi ti, aap o unde inake wu kuwak eeka mendek aret wonogogwaarak.

¹¹Imbirak Ala awi wurik me unggwi nogo nogogwaarik, aap Pariti nogo nen mi'na'nuk, tamban eekkolage logonet, Ai, nogoba Ala! It aakumi yogoot wagangga inom, maluk eeka inom, mbabi eeka inom, ndi, aap o unde inake wu kuwak eeka yi nogo inom, an togop kwak lek me, wa yokkege agarik o.

¹² An tamban ambi eerak paga ne mbere mbi nengga'lek nambe mage negen aret minggirak nogo o. Ndi, namendek wonage kenok, ando mogonogo kat Ala kake pege minggirak nogo o, yinuk, yoreegerak kwe,

¹³ aap o unde inake wu kuwak eeka nogo nen perak, tayorogon mi'nage nagagerik, ena mbogut paga ni'naga'lek eebe wakkolage logonet, Ai, nogoba Ala! An maluk eeke minggirak me, nabuwa mbaru o, yinuk, yoreegerak.

¹⁴ Imbirak tamban togop aret eereegwaarak kwe, at tamban aa'nduk eereegerak nogo lek o. Ata, peebi eereegerak nogo mban Ala nen, Aap ti, iniki obeelom aret kagi o, mbake kagak, ame aret nagagerak. Aap ambi iniki tiyappake kenok, tebembege, ndi, iniki tebeppake kenok perak, tiyappege, eeke menggerak o, yinuk, yokkiragi o,” yoragagerak.

¹⁵Ti'nuk, peebi aakumi nen elege-aabologwe nogo Yetut eenggi piginabuwak nduk, at owagam wogoret wogo nogogwaarak. Wogoret wogwe nogo, at oone waganggwi nen iigo nogogwaarik, mberirogogwaarak.

¹⁶Mberirogo mbareegwa, at Yetut nen elege-aabologwe nogo woraawak nduk, wiirage nagagerik, wogwe iigak, at oone waganggwi mendek nogo yorage logonet, “Ala abu'me logorak ti, it elege-aabologwe yogop yi kwak aret me, an nowagam woraawam non mbambiigwi ti, mage o. Op aret, yoraanip o.

¹⁷It elege-aabologwe Ala abu'me logorak nduk, unggwi nogo mengga kwak, kit togop aret unggwi naga'lek kiinok ti, unggwi namunggup lek aret o, yinuk, abet aret yokkiragi o,” yoragagerak.

¹⁸It aap Yakuri inowe ambi nen Yetut yoge logonet, “Ngguru wae! Kat obeelom mban menggendak me, an mondok-mondok neenik logokit nduk, nonggop eeri o?”

¹⁹Yoge mbareegi, at Yetut nen, “Yi aap ndi aap obeelom ambi abu lek o. Ata, at Ala alik aret obeelom mban menggerak me, nonggop nduk, Kat obeelom mban menggendak o, yo'negen?”

²⁰ Yoge nagagerik, “Wone yogop ee'nu, ndogop ee'nu, yereegerak wone yugu ti, Kumi ugun wurinaburak mage o. Aap wariyak mage o. Yi mendek ndi mendek yogoot kiraariyak mage o. Pilit wone aakumi inoba piyoorak mage o. Kinagalo-kinogoba inayuk wuko logonet, inoone liirogon konenggo logonip o, yinuk, yereegerak wone nogo kat keenu aret o.”

²¹Yoge mbareegi, aap nogo nen, “An wone ti, abok aret wulaga mbuuluk paga nen liirogon aret eeke minggirak o.”

²²Yoge nogo at Yetut konengge nagagerik, “Wone ti abok aret eeke menggendak kwe, ambiriluk perak, eeka'lek keegirak nogo yokkiri o. Kat kamendek abok aret onggo mbanogo it aap inamendek lek nogo tumburira nak o. Tumburira nage keenok, kamendek abe mendek mbogut paga wonage kaamunggun o. Ti eeke logomenggendik, nimbirak nugu logowok nduk, wa'nu o,” yinuk, yoreegerak.

²³Yetut nen yoreegerak aap nogo aruk konengge nagagerik, eenggi warak lombok me, iniki abu wakkolagagerak.

²⁴Iniki wakkolage kagak, at Yetut nen pekkage nagagerik, at yoge logonet, “It aap ineenggi warak iinok, at Ala abu'me piige menggim unggwi noorak meek negen kagi o.

²⁵ Unta eeruwak paga keeleluwi laanak nggwok kagak liiru eno mbuuluk pelenak me unggwi noorak op negen kwe, aap ineenggi warak nogo perak, Ala abu'me piige menggim unggwi noorak ti, meek negen aret kagi o,” yoragagerak.

²⁶Yoragagerak it koneneegwaarak nogo nen Yetut yogo logonet, “Ndi, ti kenok, taani inagap ndariyak o?”

²⁷Yogo mbareegwa, at Yetut nen, “It aakumi nen eeriyak meek kogwe nogo, Ala nen eeriyak op aret kage menggerak o,” yinuk, yoragagerak.

²⁸Yorage mbareegi, at Peterut nen at yoge logonet, “Nit ninamindik-ninamendek abok aret mbo punuk, ninom nugu logowok nduk, wogoorak nogora?”

²⁹Yoge mbareegi, at Yetut nen, “Aap ambi Ala abu'me logokit nduk, agalo-ogoba inom, owe-awot inom, akwe inom, apuri inom, awi wurik inom, abok aret mbo piige kenok perak,

³⁰o yogondak aret obaane'me apit aret wogorigin o. Ndi, peebi age yobok eyom nogo paga at mondok-mondok eenik aret logogin o, yinuk, abet aret yokkiragi o,” yoragagerak.

³¹Yorage nagagerik, ti'nuk, aap 12 nogo wogoret tayo yi nanuk, it yorage logonet, “Wologwe wae! Nit o Yerutalem wambi nogo ogoorik o. Wambi namonggoorak wonogwe me, it aap Ala yorage kagak yoraga nen an aap aret nda'nagagirak eeppaniyak liiru mbaneegwaarak nogo abok aret time nen a'me nggelok ari kaamunggup o.

³²An aap aret nda'nagagirak nogo nooruwak nduk, aakumi endekem mendek wogoraagin o. Wogorage mbaremenggi, an nenggali wakwi, miyuk-meya eerogo panugwi, inowoori noba lenggenogo panugwi, eeppaninuk,

³³yawi paga nooko logomenggaarik, neebe mondok aret noorugun o. Nooko mbaremengga, nogo mbere yinuk, ko'lu neenik age logomenggerik, mi'narigin o,” yinuk, yoragagerak.

³⁴Wone alom nobarak negen yoragagerak me, wone nogo abok aret it yelok kaga'lek kobak aret wonogogwaarak.

³⁵At Yetut o Yeriko wok yi wage kagak, aap ambi enegen mbuk me, tu nggwok ambet paga kwi'ndak ambe nggino ari nagagerak.

³⁶At aap nogo it aakumi apit inoone agan wogwe aruk konengge nagagerik, “Yi nano agan wogwe agaarik ubi?”

³⁷Yorage mbareegi, it aakumi nen, “Lek o! Yetut awi Nataret mendek nogo, tu yi paga wage kenok, agan wogo agaarik o.”

³⁸Yogo mbareegwa, aap nogo oone nggwok paga ari logonet, “Yetut wae. Kat Ndawut ombooluk yi, nabuwa mbaru o!”

³⁹Yoge mbareegi, it inaa'nduk wogwe nogo nen aap nogo oone puk logowak nduk, mberereegwaarak kwe, kagak, abunuk oone nggwok nabenak mban ari logonet, “Ndawut ombooluk yi, nabuwa mbaru o.”

⁴⁰Yogak mban ari mbareegi, at Yetut puk age nagagerik, aap nogo at owagam wonok woraawak nduk, yorage mbareegi, wonok at owagam pi wogo mbareegwa, Yetut nen aap nogo yoge logonet,

⁴¹“Kat an nonggop eekkaburak mba'nuk, ari agandik?” Yoge mbareegi, aap nogo nen, “Nogoba o. Nenegen obeelom ee'naburak nduk, yokkigi o.”

⁴²Yoge mbareegi, Yetut nen, “Kat kiniki noba panggombunuk, abet nombakendak paga kenegen obeelom agaarak me, kenegen pagak yu o.”

⁴³Nogo awo yoge kagak, at enegen pagak yereegerak. Enegen pagak ari mbareegi, Yetut imbirak wage logonet, Ala endage wogoppit wagagerak. Ndi, Yetut eereegerak nogo it aakumi abok aret kogo nogogwaarik, Ala alut eereegwaarak.