Read Western Dani Lukat 20 Bible Online

Lukat 20 - Western Dani bible

Lukat 20

¹Peebi ne ambi paga at Yetut Ala awi wurik me logonet, wone mamunirage, wone obeelom wone yorage, eeke me, aap Ala unde inoweewi inom, it Ala wone liiru mbanak unde inom, aap inanggok inom, at owagam wogogwaarak.

²Owagam wogo nogogwaarik, at yogo logonet, “Kat yi eekak ndi eekak eeke menggendak nogo, ta oone paga eeke menggendak? Ta nen yokkereegerak paga eeke menggendak? Yo'niret o.”

³Yogo mbareegwa, at Yetut nen, “An kunduk, wone ambi kin wokkiya o.

⁴At Yaya yiime wuppiige nagagerak nogo ti, mbogut paga nen yoreegerak paga wuppiige nagagerak a, aakumi nen yoreegwaarak paga wuppiige nagagerak a? Yo'ninip nda!”

⁵Yorage mbareegi, it-it wone mbanggo logonet, “Nit nen, Mbogut paga nen yoreegerak paga yiime wuppiige nagagerak o, yogwi niinok, at nen, Ndi, ti kenok, kit kiniki at oba panggombunuk, abet mbaka'lek nonggop nduk, wonogotak? yo'niraagin o.

⁶Ndi, nit nen, Aakumi nen yoreegwaarak paga yiime wuppiige nagagerak o, yogwi niinok, Ia! It aakumi abok aret, At Yaya ti, Ala nen yoge kagak yoraga mendek mbakwi me, yugum paga ninoorugun o,”

⁷yinuk, yogo nogogwaarik, at yogo logonet, “Ta yoreegerak paga yiime wuppiige nagagerak nit nineenggo'lek o.”

⁸Yogo mbareegwa, at Yetut nen, “Ndi, ti kenok, an kunduk, ta nen yo'nereegerak paga eeke minggirak yi, yokkiraagin lek o,” yinuk, yoragagerak.

⁹ Ti yorage nagagerik, wone eegu laarogo it aakumi apit yoragagerak nogo yi aret o. “Aap ambi nen anggur awi yake nagagerik, anggen mbanogo ando it kologwe, ando at wogogwi, eeko logowak nduk, at eyabu yarak me arum piinok, o nda time logonuk, woraakit nduk, nagagerak.

¹⁰Nagagerak time wonage kagak, anggur anggen yugu nogo kole age mbareegi, it at eyabu yarak arum piinok nagagerak nogo nen anggen yugu mbanogo wogoruwak nduk, ayeloman ambi inowagam nappi wagagerak. Nappi wagagerak wage mbareegi, it at eyabu yarak me arum wonogwe nogo nen ayeloman wagagerak nogo eebe yawi wappogo nogogwaarik, anggen mbanogo wogorulik we aret nappereegwaarak.

¹¹We nappereegwaarak ame nage mbareegi, ayeloman alik ambi nappi wagagerak. Nappi wagagerak wage mbareegi, at kunduk, eebe yawi wappogo nogogwaarik, enggali warogo anggen mbanogo wogorulik we aret nappereegwaarak.

¹²Nappereegwaarak ame nage mbareegi, ayeloman alik ambi nappi wagagerak. Nappi wagagerak wage mbareegi, at nogo kunduk, yawi warogo wumbereegwaarak.

¹³Aap nappiya wagagerak nogo togop mban aret eeppiigo mbareegwa, aap yabu yarak unde nogo nen ari logonet, An nonggop eeri o? An naput niniki kunik yi, nappikit o. Nappege neenok, at ayuk wurogo waganggwi iyaamun ilik, lek a? yinuk, nappi wagagerak.

¹⁴Nappi wagagerak wage mbareegi, it aap at eyabu yarak arum wonogwe nogo nen aput wage inigen kogo nogogwaarik, it-it wone mbanggo logonet, Aput eyate koloorak yi aret me, eyate nit aret kolaawam, aput yi mondok waruwok o, yinuk,

¹⁵wulaga nogo wage mbareegi, eebe yabu yarak me nen mugogo endekem wumbunuk, mondok wareegwaarak. Ti eereegwaarak nogo at yabu yarak unde nen it aap ti, nonggop eeginabigin mbakop?

¹⁶Lek o. Wage logomenggerik, it eyabu arum wonogwe nogo inoorogo piinok, inobaane'me it aap alik arum logowak nduk, mippiya woraagin o,” yinuk, yoragagerak. Yorage nogo it aakumi konenggo nogogwaarik, “Togop eeriyak mage o, ninogoba.”

¹⁷ Yogo mbareegwa, at Yetut nen it pegiige nagagerik, wone yorage logonet, “It yugum o wuko menggaarak nogo nen, O wuko logonet, yugum ambi mbo pereegwaarak nogo, Yugum ogowa ndoonnaga o, yinuk, yereegerak Ala wone liiru mbanak nogo ti, ngge nduk mbaneegerak mbakop?

¹⁸It aakumi yugum ti paga ngginnari wogwe iinok, ineebe kalenak-pugunik eerogo wambugun o. Ndi, yugum ti nen abut loguk togon aakumi inoba ngginnari wage kenok perak, ineebe mondok yigirik-noonom eerogo piyaagin o,” yinuk, yoragagerak.

¹⁹It Ala wone liiru mbanak unde inom, it aap Ala unde inoweewi inom, nen, “Wone eegu laarogo yegerak ti, nit niinok yigi o,” yinuk, yelok kogo nogogwaarik, ne ti eyom lombok Yetut pigaawok nduk, eereegwaarak kwe, aakumi inagabiti nen puk ogogwaarak.

²⁰ It Ala wone liiru mbanak unde inom, it aap Ala unde inoweewi inom, nogo nen Yetut inigen wonok nugu logowak nduk, inawuri nappiyareegwaarak. Inawuri nappiyareegwaarak nogo nen, “Yetut oone ninggin yemenggerak paga yilumbunuk, eebe pigogo aakumi inarum menggerak gubernur nogo nen awone mbaniyak at obaalombok aret me, awone mbanuwak nduk, pi nawok o,” yinuk, “Nit aap abet ninombaruwak,” mba'nuk, inoone abet ndom-ndom agan nugu nogogwaarak.

²¹ Agan Yetut owagam nogo nogogwaarik, kin wokkogo logonet, “Ngguru wae! Kat wone ari menggendak inom, mamunirage menggendak inom, ti abet mban ari logonet, aap ambi iya, ndi, ambi meek, ti mbaka'lek nit eekwi paga Ala ari menggerak wone pagak togon mamunnirage menggendak nineenu me,

²²aap endagembogut Kayitat ake wu puurak ti, op a, mage a?”

²³Yogo mbareegwa, at Yetut nen it at ambokan laganggwi yelok iige nagagerik, yorage logonet,

²⁴“Mbuti wu ambi titi'ninip o,” yorage nagagerik, wogogo mbareegwa, it yorage logonet, “Ta enete ogobakkigirik endage liiru mbanak mbakop?”

²⁵ Yorage mbareegi, it nen, “Lek o. Ti Kayitat aret o.” Yogo mbareegwa, at Yetut nen, “Ndi, ti kenok, Kayitat amendek ti, Kayitat aret wogogwi, ndi, Ala amendek ti, Ala aret wogogwi, eeko logonip o,” yinuk, yoragagerak.

²⁶At wone yoragagerak nogo paga aakumi inenggaanom wone ambi yilinogo oba puurak meek kenok, we, “Wi!” yinuk, puk ogogwaarak.

²⁷ Ti'nuk, aakumi kambunuk, ineenik a'nuk mi'narugun lek yogo menggaarak it aap Taruki mendek ando nen Yetut owagam wogo nogogwaarik,

²⁸ at kin wokkogo logonet, “Ngguru wae. At Muta nen, Aap ambi kwe woppunuk, apuluk ndaka'lek kagak kangge kenok, owe obaane'me apuri ndagaruwak nduk, awot nen at owe nanu nogo kolaawak o, yinuk, liiru mbanniragagerak me,

²⁹aap ambi apuri ineebe 7 aret ndaganabeegerak. At manggu ndarak nogo nen kwe wagangge nagagerik, aput ndaka'lek kagak kambeegerak.

³⁰Kangge mbareegi, awot manggu ambo'me mendek inom,

³¹ti'nuk, at awot ambokan mendek inom, ti'nuk, it ineebe 7 ndarak apit togop mban kwe nogo waganggwi, inapuri ndaganaka'lek iigak, kanggwi, mban eerit nogogwaarak.

³²Ndi, peebi, irip paga kwe nogo kunduk kambeegerak.

³³It aap ineebe 7 nogo nen kwe nogo waganggwi-kanggwi eeko nogogwaarak me, peebi aakumi kanggwi ineenik agago mippiyoorak eyom nogo paga kwe ti, aap ta akwe arigin mbaken o?” yinuk, yoreegwaarak.

³⁴Yogo mbareegwa, at Yetut nen, “It aakumi yogondak wonogwe yi, aap nen kumi wogonakwi, kumi nen aap wogonakwi, eeko menggaarak kwe,

³⁵at Ala nen, It aap yi obeelom aret me, ninom logowok nduk, kambunuk nogo menggam nen ineenik agago mippiyaakit, mbake nogo perak, Ala nen mippiige mbaremenggi inom logonet, aap nen kumi wogonakwi, kumi nen aap wogonakwi, eeko logogun lek aret o.

³⁶Ala nen it aap nogo ineenik agago mippiyamenggerak Ala apuri lombok logonet, malayikat nogo pogom arumenggaarak me, peebi kambugun mondok lek o.

³⁷ It aakumi kambeegwaarak ineenik agago mippiyaagin nogo ti, at Muta eyo ku'mbanak me kani wunuk ari kagak ari koneneegerak wone nogo mbininogo liiru mbangge logonet, Nogoba Ala ti, aap Abarakam inom, Itak inom, Yakup inom, inogoba Ala aret o, yinuk, liiru mbaneegerak ti paga it kambeegwaarak nogo Ala nen abet aret ineenik agago mippiige menggerak kogo o.

³⁸At Ala nen it aakumi kambeegwaarak kwe abok ineenik wonogwe iige menggerak me, at ti, it aakumi kambunuk lek agaatak inogoba Ala lek o. Ata, ineenik menggaarak inogoba Ala aret o,” yinuk, yoragagerak.

³⁹Yorage mbareegi, it Ala wone liiru mbanak unde nogo inagabiti nen wone ambinom kin wokkoolik we, “E o, Ngguru. Op yagan o,” yinuk, yoreegwaarak.

⁴⁰

⁴¹At ambinom kin wokkoorak inagabiti mbako mbareegwa, at Yetut nen it yorage logonet, “At Ala nen leenogo mippereegerak Mesias nogo ti, Ndawut ombooluk o, yogwe ti, nonggop togon yogo menggaarak mbakop?

⁴² At Ndawut lombok nen mbuku Ndawi paga wone liiru mbangge logonet, At Aliku Ala nen an nogoba Ala yoge logonet,

⁴³Nogoba o. It kinom wim mbanak mendek nogo, aan lebenogo kabu'me piiga'lek neegak, Neenggi abe'nggan kwi'nari mok, yoreegerak o, yinuk, liiru mbaneegerak nogo ti,

⁴⁴at Ndawut nen, Nogoba Ala o, yoreegerak nogo kwe, nonggop togon at ombooluk aret logorak mbakop? Kit yinip nda!” yinuk, yoragagerak.

⁴⁵Yorage nagagerik, aakumi apit konenggwi iigak, Yetut nen at oone waganggwi nogo yorage logonet,

⁴⁶ “It Ala wone liiru mbanak unde nogo nen kinambokan laganggwi iyo, kiniki tum wakkologo logonip o. Inambogoyum yo'mot langgumbunuk nugwi, yi mendek ndi mendek kunggo menggam time, Nit mban keyage wappinanuwak, mbakwi, eeko logonet, it Yakuri tamban eeko menggam aap nggwok kwi'nogo menggam kwi'nogwe, laago nggwok lako logonet, aap yo'nggok kwi'nogo menggam mban kwi'nogwe, eeriyak inikilom mbako menggaarak.

⁴⁷It aap ti, kumi togwe inamendek tigippugwi, aakumi iya inombaruwak nduk, tamban nggorek aret eekwi, eeko menggaarak ti paga, it aakumi ando maluk onggo mbuuluk inoba piige logonet, it aap ti perak, inomaluk onggo nggwok aret inoba piyaagin o,” yinuk, yoragagerak.