Read Western Dani Lukat 21 Bible Online

Lukat 21 - Western Dani bible

Lukat 21

¹Ti yorage nagagerik, ena na'nage logonet, aap ineenggi warak nen inamendek Ala awi wurik me wu pogo menggam inawu pi wogwe iyareegerak.

²Pi wogwe me, kwe togwe eenggilek ambi wage nagagerik, mbuti wu abu mbuulogwe mbere'ndak pege kagagerak.

³Pege kage nagagerik, it aakumi yorage logonet, “It aakumi abok inawu pegaarak yi, inamendek apit enaani kagak pegaarak me, mbuuluk aret pegaarak o. Ndi, kwe togwe yi nogo perak, amendek abu lek kagak, ambi onggo patiyak mendek tigitogon pegerak me, at nggwok aret pegerak o, yinuk, abet aret yokkiragi o,” yoragagerak.

⁵Yorage nagagerik, it aakumi ando nen yogo logonet, “Ala awi wurik ti, yugum kigirikwe inom, yi mendek ndi mendek abe Ala ake pugu inom, nogo paga, abu kigirikwe wurik o,” yinuk, agan nugwi me,

⁶Yetut nen it yorage logonet, “Kit kinigen kogwe yi nogo ti, yugum ambi obaga lu'luk aago logogin lek o. Abok tigitogon langgunogo nappuurak eyom panggoni woraagin o,” yinuk, yoragagerak.

⁷Yorage mbareegi, at kin wokkogo logonet, “Ngguru wae. Kat yo'niragandak nogo mandenom arigin o? Ndi, Togop arigin, yo'niragandak nogo a'me lik yuurak eyom koorok panggoni wage kenok, nano eeke paga nineenu ariyak?”

⁸Yogo mbareegwa, at Yetut nen yorage logonet, “Aakumi nomongginakwi iyo, kiniki tum wakkologo logonip o. It aakumi apit an nendage kunit wogo logonet, at ambi nen, At woroorak nogo ti, an aret wagi o, ari, ndi, at ambi nen, At woroorak eyom muk panggo yi wagaarak o, ari, agan woraagun me, inoone konembunuk, muguren noobok o.

⁹Lek o. Wim nambukwi o. Lek o. Mugogo wumbiyaawak nduk, wim nggaganggwi o, yogwe kinaruk konenggwi kenok, kiniki ma'narubok o. Ti eeriyak nogo ti, aa'nduk arit woramenggerak kwe, Age yobok eeriyak eyom muk panggoni wage logonet, eeke o, yinuk, mbarubok o,” yoragagerak.

¹⁰Yorage nagagerik, “Aakumi inanebunu ndegek wim nambukwi, aap endagembogut ambi awuri nen aap endagembogut ambi awuri inom wim nggwok nambukwi, eekwi iigak,

¹¹o mi mondok iya tit nuk ari, yi awi ndi awi mbi noogelo age, o yime-ndime kugilengga iyak wu'nage, ndi, kit kiniki ma'naruwak nduk, mbogut paga ineenu ariyak inagabiti warak mendek mondok alik negen eeke, eeke kamonggotak kwe,

¹²eeka'lek kagak, aakumi nen pippinaganuk, kinookwi, it aap Yakuri tamban eeko menggam pinagi nogwe, keele maarogo mambiigo menggam mambinagagwi, ndi, an noone waganeegutak paga it aap inendagembogut inom, it aap yo'nggok inom, inowagam wokkiret nogwe, eerugun o.

¹³Togop eekkinakwi iinok, eeke neego nogootak nogo, Yoroorak nanonggwan aga o, yinuk, yorogo logomunggup o.

¹⁴ Kit kiniki warak logonet, it aap kinom ogoorak nogo wone obeelom kenaarogo yoramonggotak paga it inoone onggo yokkirogwe, kinoone taganggwi, eeriyak meek wone nogo mendek yokkiraminggirak me, Naana'le mbanogo ndogop yoraakit o, yinuk, wone kinikime koongga'lek we ugun logomunggup nduk, eekkolaanip o.

¹⁶Kinagalomini-kinogobamini inom, kinowe-kinawot inom, kinoreewi inom, kinom kunik monggotak inom, it nogo nen aret wokkiret aap inowak loonggo menggam pinagi nogwe, kit ando kinookwi, eerugun o.

¹⁷Ndi, an noone waganeegutak paga aakumi abok aret ineebi lombok kinombarugun kwe,

¹⁸kineeruwak ambiriluk ambi kobak arigin abu lek me,

¹⁹kinogogumbuk logomonggotak paga kinagap ndakkolaamunggup o,” yinuk, yoragagerak.

²⁰“It aakumi ineegin warak apit aago o Yerutalem wanggerak wonogwe iigo logomonggotik, O Yerutalem pup eerogo puurak eyom abu panggoni wagaarak kagi, mbarumunggup o.

²¹ Ti eyom panggoni wage kenok, Ala wone yi eeriyak ndi eeriyak liiru mbanak abok aret a'me lik yuwak nduk, aakumi maluk eekwi onggo wogoroorak eyom ti aret me, it o Yureya wonogwe nogo, puut paga time kumaa'nari nogwe, o kota wonogwe nogo, o time mbo punuk, mbaganggwi, eeruwak o. Ndi, o kota endekem wonogwe nogo oome unggwi woroobok o.

²³Ti eyom paga Ala nen o nggween paga yime aaninggin-paaninggin abu alik lombok eeppege logonet, it aakumi yi, anini eeppiyaagin me, kumi inabila wonogwe inom, inaagalogwe inelak kuninakwi inom, inabuwa o.

²⁴Ando tege wooluwak paga inookwi iinok kanggwi, ando keele maarogo yi aakumi ndi aakumi inawi lombok time piya nogwe, eerugun o. Ndi, at Ala nen, It aakumi endekem mendek unde iigak, Tahun ndogop eeko logogun o, mbareegerak nogo a'me lik yega'lek kagak, it aakumi endekem mendek nen o Yerutalem iniyok aan lebenogo pit nogo logogun o,” yinuk, yoragagerak.

²⁵ Yorage nagagerik, ambinom yorage logonet, “Kineenu arubagip nduk, oonegen inom, tut inom, laaluguragan inom, ti abu alik tam warak negen eeke kaamunggup o. Ndi, o nggween paga yime yi yenggenak oonebu ari logonet, mondok kilaarak-mogonik eeke kenok, it aakumi inanebunu lombok abok aret, Yi nonggop eerit wage iya! yinuk, iniki abu ma'narugun o.

²⁶It mbogut oolo yime inomaawi menggaarak nogo inaganak nugirage kenok, it aap abok nen yi mendek ndi mendek o nggween paga arit woroorak nogo, Yi aret arit wage kogo, yinuk, inagabiti nen iniki abu lek arigin o.

²⁷ Ti eeke kenok, an aap aret nda'nagagirak nogo nobanggi-nobangge li'luk eekko'nok nayuk warak logonet, ndugwi enggela'me wage neyaamunggup o.

²⁸Eeriyak ti nogo warengge kenok, Ninagap ndaka wok yi wage kogo o, yinuk, kinenggaanok tiya yinuk, kinigen nigagik logonu o,” yoragagerak.

²⁹Yorage nagagerik, wone yi, eegu laarogo yorage logonet, “Yi eyo ndi eyo inom, eyo wuli inom, eeke menggerak nogo liippinip o.

³⁰Eyo anggup larikit nduk, eeke kinigen kogo nogootik, O abu kinikit nduk eeke kagi o, yinuk, yogo monggotak

³¹nogo ndak-ndak, Togop eerigin o, yinuk, yokkiragarak yi, eeke kinigen kogo logomonggotik, At Ala abu'me pinaniyak nogo muk panggo yegerak kagi, yinuk, mbako logomunggup o.

³²Kit yogondak wonogwe yi, awo lek aga'lek kiigak, eeriyak abok yokkiragarak nogo tigitogon a'me lik ari kaamunggup o, yinuk, abet aret yokkirage agarik o.

³³Mbogut-nggween yi, lek arigin aret kwe, an noone ti perak, lek arigin lek mondok aret logogin o,” yinuk, yoragagerak.

³⁴Wone ambinom yorage logonet, “Ta'na pugu ne ambit paga pagi aan mbelek togon wake menggi kwak, Ne ti paga ndogop eekkinabigin o, yinuk, wone yokkiragarak nogo, kit aakumi o nggween paga abok aret ne ambit perak togon eekkinabi woraagin me, yi mendek ndi mendek kinaanoguma'le ndenok yogoorak nenet nugwi, amburu kumili eeginake mendek nenet nugwi, Namendek nonggop kolaakit o, yinuk, kiniki koonit nugwi, eeko logonet, kiniki ugun kobak arumonggotak wonogwe kiyo, kiniki tum wakkologo logonip o.

³⁶Ti eekkinaburak nogo kinomaawi togon kinogogumbuk logonet, waganggo logomonggotik, an aap aret nda'nagagirak nenggaanom paga mi'narubagip nduk, tamban mban eeko logonet, kiniki tum wakkologo logonip o,” yinuk, yoragagerak.

³⁷ At Yetut nen o liingge paga Ala awi wurik me wone mamunirage, ndi, o kiip age kenok, wundi nanuk, puut endage Tayitun nogome nogo yi nage, eeke nagagerak me,

³⁸o kuubondendok lombok aakumi abok at oone konenuwok nduk, at owagam Ala awi wurik me kuwak ari wogo nogogwaarak.