Read Western Dani Lukat 23 Bible Online

Lukat 23 - Western Dani bible

Lukat 23

¹Yogo nogogwaarik, aakumi kuwak aago nogo abok aret mi'na'nuk, Yetut piganok Pilatut owagam wonok nogogwaarak.

²Wonok nogo nogogwaarik, inoone pilit at oba pogo logonet, “Aap yi, nit aakumi abok ninabut wurit nege logonet, aap endagembogut Kayitat o unde wonage onggo wu wogoriyak mage o. Kinowe endagembogut Keritut an aret o, agan nege me, kwaakkogoorak o.”

³Yogo mbareegwa, at Pilatut nen Yetut yoge logonet, “Aap Yakuri inowe endagembogut kat aret ilik?” Yoge mbareegi, at Yetut nen, “Yagandak ti aret o.”

⁴Yoge mbareegi, at Pilatut nen it aap Ala unde inoweewi inom, aakumi apit kuwak aago nogo inom, yorage logonet, “Aap yi, maluk eekerak paga wariyak kwe, at eekerak ambi an abu koolik o.”

⁵Yoragagerak kwe, it inoone panggok togon nabenak mban yogo logonet, “Lek o. Aap yi, wone mamuninabit nege logonet, aakumi o Yureya mendek abok aret o Nggalileya nen nok, o yi kuli aret inabut wurit nege menggerak o,” yinuk, yoreegwaarak.

⁶Yogwi nogo at Pilatut aruk konengge nagagerik, “At aap yi, Nggalileya mendek abet aret ilik?” yinuk, aakumi yorage nagagerik,

⁷aap Keroret inarum menggim nogome mendek aret aruk konengge nagagerik, ti eyom paga at Keroret o Yerutalem wagagerak wonage me, at owagam nappereegerak.

⁸Nappereegerak nage mbareegi, aap Keroret nogo nen Yetut eeke aruk konengge nagaatik, “Ineenu ariyak inagabiti warak mendek ambi eeke kaakit lak ao,” mbake nagagerak me, Yetut enegen kage nagagerik, iniki ale'nggen mbareegerak.

⁹Iniki ale'nggen mbake nagagerik, yi wone ndi wone apit Yetut kin wokkagagerak kwe, Yetut wone onggo yoga'lek puk aret wonagagerak.

¹⁰Puk aret wonage mbareegi, it Ala unde inoweewi inom, it aap Ala wone liiru mbanak unde inom, ta logonet, inoone mondok maluk at oba pogo nogogwaarak.

¹¹Ndi, at Keroret awuri yigin unde inom Yetut miyuk-meya eerogo pogo logonet, agi'ndok kambeegwaarak. Ti abok aret eeppogo nogogwaarik, yum abu kigirikwe yippunuk, iyok paga Pilatut owagam nappi wagagerak.

¹²At Keroret Pilatut aa'nduk imbirak ogoorak wonogogwaarak kwe, ti eyom paga imbirak lambuneegwaarak.

¹³Yetut iyok paga nappi wagagerak wage mbareegi, at Pilatut nen it aap Ala unde inoweewi inom, Yakuri inanggok inom, aakumi ugun inom, wiirage nagagerik, wogo mbareegwa,

¹⁴yorage logonet, “Aap yi, aakumi inabut wurit nage me nduk, nowagam pi wogotak kwe, kinoone at oba pogotak nogo, kiigak aret owak loonggirak me, maluk eekerak paga wariyak kwe, at maluk eekerak ambi an abu koolik o.

¹⁵Ndi, Keroret kunduk, at maluk ambi eerulik kage nagaarik, iyok paga nappi wagaarak me, maluk eekwi iinok, inooko menggaarak mendek at abu eerulik o, yinuk, yokkirage agarik o.

¹⁶Togop me, iniki koonnaruwak nduk, yawi mban warogo teppikit o,” yinuk, yoragagerak. (

¹⁷Laago Obaga Mbo Nagagerak lakwi iinok, aap keele maarak ambi piinogo teppegak eeke nagagerak me.)

¹⁸Wone nogo yorage mbareegi, it abok ambugwi aret, “Mba!” yogo logonet, “Aap yi nogo lek o. Aap Mbarabat aret piinogo teppinanu o,” yoreegwaarak.

¹⁹Aap Mbarabat nogo aakumi ando inom nen, “Ninalik aruwok o,” yinuk, o kota time wim eeko logonet, aap ambi wake mbareegi, keele maarogo mambiigo menggam mambereegerak wonage me, yoreegwaarak.

²⁰Yogo mbareegwa, at Pilatut nen Yetut teppuurak mbake logonet, ne ambinom it yoragagerak kwe,

²¹inoone ya-mba yogo logonet, “Eyo karo-karo paga nabenogo puurak o. Eyo karo-karo nabenogo puurak o.”

²²Yogo mbareegwa, at Pilatut nen ne mbere yoragagerak me, ambinom yorage logonet, “Nonggop nduk? At maluk ngge eekerak paga yogop o? Maluk eekaatak kenok mban inooko menggaarak kwe, maluk eebe ngge eekerak kenok, Wariyak, yogo ogotik? At maluk eekerak ambi, an koolik me, we iniki koonnaruwak nduk yawi mban warogo teppigin o.”

²³Yoragagerak kwe, eyo karo-karo paga nabenogo puwak nduk, inoone nabenak mban ya-mba yogo logonet, Pilatut oone nogo taganogo pogo mbareegwa,

²⁴at eeppuurak yoreegwaarak nogo Pilatut nen eebi mbake logonet kwe, “Op aret o,” yinuk, yoragagerak.

²⁵Yorage mbareegi, at aap, “Ninalik aruwok o,” yinuk, wim eeke logonet, aap wake mbareegi, keele maarogo mambiigo menggam mambereegwaarak, “Piinogo teppinanu o,” yoreegwaarak nogo aret piinogo wumbereegerak kwe, Yetut perak, it mbareegwaarak nogo ndak-ndak eeppuwak nduk, wogoragagerak.

²⁶Wogorage mbareegi, piganok nogo logonet, aap ambi endage Timon awi Kirene mendek me, endekem nen inikiigun o kota nogome unggwi wage me, pigogo eyo karo-karo aago nogo Yetut ambokan wonok nawak nduk, uum paga nggimbereegwaarak.

²⁷It aakumi apit at mugurok nogo logonet, kumi ando nen aleenggu maakwi, ineebe wakkologwe, eerit inom nogogwaarak.

²⁸Eerit nogwe me, at Yetut ena logurogon pegiige nagagerik, it yorage logonet, “O Yerutalem aagalogwe kit kumi yi, an nale yugup o. Ata, kit kinaagalogwe kinom kinale yikkolaanip o.

²⁹It aakumi nen, Kumi wubili inom, inaagalogwe ndaganakulik inom, inelak kuninakwi ineenggo'lek inom, inale'nggen mbarugun o, yinuk, yogo logorak eyom woraagin, yokkirage agarik o.

³⁰ Ti eyom paga it aakumi nen puut nggwok yogo logonet, Nineebe aan lebenogo pinanu o, yinuk, yogwi, ndi, puut mbuuluk yogo logonet, Nineebe taanogo pinanu o, yinuk, yogwi,

³¹eeremenggaarak me, aakumi nen eyo ki kagak togop yogwe iinok, mbuk age kenok, nonggop yogo logorak mbakop? Lek o. Ti abunuk aret yogo logogun o,” yinuk yoragagerak.

³²Yetut piganok nogo logonet, it aap maluk eeka lombok ineebe mbere Yetut inom inooruwok nduk, pigiren nogogwaarak.

³³Pigiren o endage Anobak Yelenak nogome nogo nogogwaarik, at Yetut it aap maluk eeka nogo inom eyo karo-karo aago paga nabenogo piigo nogogwaarik, ambi eenggi abe'nggan pa'nggwe mippugwi, ambi eenggi kwaare'nggan pa'nggwe mippugwi, eerogo piyareegwaarak.

³⁴ Nabenogo piigo mbareegwa, at Yetut nen, “Nogoba o. It ineenggo'lek logonet, eeppanugwi me, it maluk eekwi yi, lek eerogo pu o,” yoreegerak. Ndi, it aakumi nogo nen yugum anggen nggween paga mbo wuppegak eeko logonet, ambogoyum nogo tumbukkologogwaarak.

³⁵It aakumi nogo taati inigen loogwi iigak, it aap Yakuri inoweewi nogo nen at miyuk-meya agago pogo logonet, “At aakumi inagap ndake nagaarak me, at Ala nen leenogo mippereegerak Mesias nogo abet aret kenok, agap ndakkolaayok ubi,” yinuk, yereegwaarak.

³⁶Ndi, it aap yigin unde nogo kunduk, at agi'ndok kanggo logonet, anggur amburu ale mendek at wogoreegwaarak.

³⁷Wogogo logonet, “Kat aap Yakuri inowe kendagembogut kenok, kagap ndakkolet ubi!” yinuk, yogo nogogwaarak.

³⁸Ndi, wone ambi, “Yakuri inowe endagembogut yi aret o,” yinuk, liiru mbanogo anobak irimbaga nabembereegwaarak.

³⁹Nabembunuk wonogwe me, aap mbere inom nabenogo piyareegwaarak nogo ambi nen at Yetut miyuk-meya eerogo pege logonet, “Ala nen leenogo mippereegerak Mesias kat aret nogo lek a? Kat aret kenok, kat kagap ndakkolage, ndi, nit ninagap ndake, eeru ubi.”

⁴⁰Yoreegerak kwe, ore nogo nen at mberege logonet, “At oba lenggenogo puurak koonggaarak ndak-ndak kat koba lenggenogo pagage me, kat Ala kagabiti mbaka'lek ya?

⁴¹Nit eeppinanugwi nogo ti, eekoorak onggo ndak-ndak eeppinanugwi me, op aret kwe, at yi perak, maluk abu eerulik o.”

⁴²Yoge nagagerik, Yetut yoge logonet, “Ai, nogoba Yetut. Kendagembogut a'nuk wage kenok, an noba abeke logomunggun o.”

⁴³Yoge mbareegi, at Yetut nen at yoge logonet, “Yogondak aret kambunuk, nogo menggam o obeelom nogome nimbirak wonage keyaagin o, yinuk, abet aret yokkigi o,” yoreegerak.

⁴⁴ Ndi, o liingge oonegen 12 negen wonagagerak kwe, oonegen eya abu lek age mbareegi, o time apit agagerak kagak, o kiyoma oonegen 3 ari nagagerak. Oonegen abu 3 ari nage mbareegi, Ala awi wurik me yum tabak oolo tugunik menggerak nogo, oolo muundak nggoguk yereegerak.

⁴⁵

⁴⁶ Nggoguk ari mbareegi, at Yetut oone nggwok paga ari logonet, “Nogoba o. Niniki kat unde logonok nduk, wokkigi o,” yinuk, iniki woronggolage nagagerik, kambeegerak.

⁴⁷At yigin unde inowe nogo nen eeke kage nagagerik, at Ala endage wogoppege logonet, “Aap yi, oone lek yeendo kagak eekoorak abet aret kagi o,” yinuk, yereegerak.

⁴⁸Ndi, it aakumi abok inigen kaawok nduk, kuwak eeri nogogwaarak nogo eeke kogo nogogwaarik, ineebe wakko'net iniyok paga yungguninuk iname wogogwaarak.

⁴⁹ Ndi, at Yetut inom kunik nogo inom, it kumi o Nggalileya nen at inom wogogwaarak nogo inom, tayorogon taati mi'ndak logonet, eeke nogo abok aret inigen kogogwaarak.

⁵⁰O Yureya kota ambi endage Arimateya time aap ambi endage Yutup wonagagerak. At aap abe iniki abu koonak it Yakuri inawone amburu mbangga nogo mendek aret wonagagerak me, oreewi wone amburu mbangga nogo nen, “Yetut eeppuurak,” koombunuk eereegwaarak nogo at oone inom abu nabenulik o. “Ala abu'me panuwak o,” yinuk, tokkage nagagerak.

⁵¹

⁵²At aap nogo nen Pilatut owagam nage nagagerik, “Yetut warak eebe wo'niru o,” yinuk, ngginooreegerak, “E o,” yoge mbareegi,

⁵³eebe warak nogo piinogo wuppi wage nagagerik, mbogoyum laambu tabak paga perenogo yugum ndo ngget nendaarak aakumi awo mambiiga'lek iyaalok nogome mambi nagagerak.

⁵⁴Ko'lu it Yakuri tamban eeriyak nduk, pipuk agago pugwi nogo paga aret eereegerak.

⁵⁵Ndi, it kumi Yetut inom o Nggalileya nen wogogwaarak nogo Yutup mugurok nogo nogogwaarik, ndo nenaarak inom, Yetut eebe wanenogo pereegwaarak inom, inigen kogogwaarak.

⁵⁶ Inigen kenok, iniyok paga iname wogo nogogwaarik, eyoonggen amburu inom, amburu obari abe alik mendek inom, pipuk eerogo pereegwaarak. Pipuk eeppogo nogogwaarik, Ala nen, “Yogop ee'nu, ndogop ee'nu,” yereegerak liiru mbanak nogo ndak-ndak it Yakuri tamban eekwi paga tat yonggonggologogwaarak.