Read Western Dani Lukat 3 Bible Online

Lukat 3 - Western Dani bible

Lukat 3

¹Aap Kayitat Tiberiyut endagembogut a'nuk, wone lengganogo yorage kagak, tahun 15 eeke eyom paga aap Pondiyut Pilatut o Yureya gubernur aret wonage, ndi, aap Keroret o Nggalileya unde wonage, ndi, aap Keroret awuluk Piliput o Itureya Terakonitit imbirak unde wonage, ndi, aap Litaniyat o Abilene unde wonage, eeko nogogwaarak.

²Ti unde wonogwe iigak, it aap Kanat Kayapat imbirak Ala unde inoweewi yo'nggok wonogwe iigak, Takariya aput Yaya nogo karume aakumi lek me wonage me, Ala nen wone ambi at inikime manabi wagagerak.

³Manabi wage kagak, at Yaya nen aakumi yorage logonet, “Kinomaluk lek eerogo pinagawak nduk, maluk eeko monggotak nogo kiniki koombunuk, mbo pinip o. Mbo pugwi kiinok, yiime wuppinagarak o,” yinuk, wone ti, niyo Yoraran ene-yi yoranet nege nagagerak.

⁴ Aap Ala yoge kagak yoraga Yetaya nogo nen, “Aap ambi karume aakumi lek me kuum ari logonet, Ninogoba Ala woroorak tu ogobakkigirogo yakwi, Ndi, at nage logorak tu koonogo yakwi, ko logonip o.

⁵Alu'me kenok, kagakwi, Puurom nggwok inom, mbuuluk inom, ndenenggwi, Tu yelok-nggolok kenok, koonggwi, Tiyak-tebek kenok, ndak-ndak aret eekwi, Eeko logonip o.

⁶Ala nen kinagap ndaka nappinagi woramenggerak nogo, kit abok aret kinigen kaamunggup o, yinuk, agan woraagin o,” yoragagerak liiru mbaneegerak nogo ndak-ndak at Yaya nen aret yoranet nege nagagerak.

⁷ Yoranet nage me, it aakumi ambik nen, “Nit yiime wuppinanuwak o,” yinuk, at owagam kuwak eeri nogogwaarak nogo yorage logonet, “Waalo aakumi inooka kuwak eerak pogom kit aret o. Ala anini eeppinani wage nogo eeppinagage kero, mbaganubagip nduk, ta nen kurumbi yokkiragaarak?

⁸ Kit maluk eeko monggotak nogo, kiniki koombunuk mbo pogotak kenok, eyo anggen abe yi'nage menggi kwak, ndak-ndak aret eeko logonip o. Kit kinikime nen mbako logonet, Ninombo ti, Abarakam aret me, nit obeelom aret o, mban mbakwi ti mage o. At Ala nen, Yugum yi, at Abarakam ombowologwe aret a'nip o, yinuk, yorage kenok, ariyak op aret iigak, kit mban iya lek me, nonggop nduk yogo ogotik?

⁹ Ye eyo alom muk kundugu agaarak me, yi eyo ndi eyo anggen abe mendek yege lek kenok, muurogo kani kunik me mambigin o,” yinuk, yoragagerak.

¹⁰Yorage mbareegi, aakumi apit nen, “Togop kenok, nit nonggop eeruwi o?”

¹¹Yogo mbareegwa, at Yaya nen, “Kit kinayum agi yirika mbere wonage kenok, aap ambi ayum lek wonage nogo ambi wogogwi, ndi, kinambi wonage kenok ti, togop aret wogorogwe, eeko logonip o,” yoragagerak.

¹² Yorage nagagerik, wonage me, it o unde inake wu kuwak eeka nogo nen kunduk, “Yiime wuppinanuwak o,” yinuk, at owagam nogo nogogwaarik, “Ngguru wae. Nit nonggop eeruwi o?”

¹³Yogo mbareegwa, at Yaya nen it yorage logonet, “Kinogobamini nen, Wu ndogop aret kuwak eeko logonip o, yokkirogwe nogo mban aret kuwak eeko logonip o.”

¹⁴Yorage mbareegi, it aap yigin unde nogo nen at yogo logonet, “Ndi, nit kunduk, nonggop eeruwi o?” yogo mbareegwa, at Yaya nen, “Aakumi inageerok wokkiraawak nduk, kinoone omaawi paga yoroorak ti mage o. Ndi, pilit wone aakumi inoba piyoorak ti mage mban. Ata, yabu eekwi onggo wokkirogwe iinok, Yi ndak-ndak aret wo'niraga, yinuk, waganggo logonip o,” yoragagerak.

¹⁵Ti yoragagerak nogo, it aakumi apit iniki ale'nggen mbako logonet, “Wologwe! At Ala nen leenogo mippigin, yereegerak nogo at Yaya yi aret kulik?” ombakwi me,

¹⁶at Yaya nen it apit yorage logonet, “An we yiime mban wuppinagage minggirak o. At ambi woraagin nogo perak, Aberiniki inom, kani inom, kinoba pinagi woraagin me, at nggwok aret o. An we mbuuluk me, at iyogogut nggerenak piiniyak meek o.

¹⁷Gandum ndegengge menggim abu ndegembunuk, eebe kenok, kuwak eerogo tilaabaga pege, ndi, ameneno kenok, kani noguk ariilik kunik mban menggim nappege, eeruwak nduk, tenggap at eenggime porogo wonage o,” yinuk, yoragagerak.

¹⁸Obeelom wone it aakumi apit yorage logonet, togop aret inaruk wake nagagerak.

¹⁹ Inaruk warit nage logonet, aap endagembogut Keroret nogo nen at awot akweeluk Keroriyat ndingge, ndi, yi maluk ndi maluk apit eerit nage, eeke mbareegi, at Yaya nen at kunduk mberereegerak me,

²⁰Keroret nen Yaya eebe pigogo keele maarogo mambiigo menggam mambereegerak ti, yi maluk ndi maluk eerit nage logonet, maluk nggwok lombok eereegerak nogo ti aret.

²¹At Yaya nen aakumi abok yiime wuppiige nagagerik, Yetut inom wuppege mbareegi, Yetut tamban awo eeke kagak, mbogut keyaake mbareegi,

²² Aberiniki eebe towe puume pogom wiga agan at Yetut oba nabi wagagerak. Oba nabi wage mbareegi, mbogut paga nen oone ari logonet, “Napuluk niniki kunik lombok kat aret me, niniki ale'nggen ee'nake keegi o,” yinuk, yoge kagagerak.

²³At Yetut eerikit nduk wagagerak nogo tahun 30 eeppunuk aret wareneegerak. It aakumi nen Yetut ti, Yutup aput mbareegwaarak. Ndi, Yutup ti, Eli aput.

²⁴Eli ti, Matat aput. Matat ti, Lewi aput. Lewi ti, Maliki aput. Maliki ti, Yanayi aput. Yanayi ti, Yutup aput.

²⁵Yutup ti, Matitiya aput. Matitiya ti, Amot aput. Amot ti, Nakum aput. Nakum ti, Ketili aput. Ketili ti, Nagayi aput.

²⁶Nagayi ti, Maat aput. Maat ti, Matitiya aput. Matitiya ti, Timeyi aput. Timeyi ti, Yotek aput. Yotek ti, Yora aput.

²⁷Yora ti, Yokanan aput. Yokanan ti, Teta aput. Teta ti, Terubaben aput. Terubaben ti, Teyalitiyen aput. Teyalitiyen ti, Neri aput.

²⁸Neri ti, Maliki aput. Maliki ti, Ari aput. Ari ti, Kotam aput. Kotam ti, Elemaram aput. Elemaram ti, Et aput.

²⁹Et ti, Yetuwa aput. Yetuwa ti, Eliyetet aput. Eliyetet ti, Yorim aput. Yorim ti, Matat aput. Matat ti, Lewi aput.

³⁰Lewi ti, Timeyon aput. Timeyon ti, Yekura aput. Yekura ti, Yutup aput. Yutup ti, Yonam aput. Yonam ti, Eliyakim aput.

³¹Eliyakim ti, Meleya aput. Meleya ti, Mina aput. Mina ti, Matata aput. Matata ti, Natan aput. Natan ti, Ndawut aput. Ndawut ti, Itayi aput.

³² Itayi ti, Obet aput. Obet ti, Mbowat aput. Mbowat ti, Talomon aput. Talomon ti, Nakaton aput.

³³Nakaton ti, Aminarap aput. Aminarap ti, Arimin aput. Arimin ti, Arini aput. Arini ti, Ketoron aput. Ketoron ti, Peret aput. Peret ti, Yekura aput.

³⁴Yekura ti, Yakup aput. Yakup ti, Itak aput. Itak ti, Abarakam aput. Abarakam ti, Tera aput. Tera ti, Nakot aput.

³⁵Nakot ti, Teruk aput. Teruk ti, Ereku aput. Ereku ti, Pelek aput. Pelek ti, Ebet aput. Ebet ti, Tela aput. Tela ti,

³⁶(Kenan aput. Kenan ti,) Arapakatat aput. Arapakatat ti, Tem aput. Tem ti, Nu aput. Nu ti, Lamek aput.

³⁷Lamek ti, Metutala aput. Metutala ti, Kenok aput. Kenok ti, Yaret aput. Yaret ti, Makalaten aput. Makalaten ti, Kenan aput.

³⁸Kenan ti, Enot aput. Enot ti, Tet aput. Tet ti, Aram aput. Ndi, Aram ti, Ala aput aret.