Read Western Dani Lukat 4 Bible Online

Lukat 4 - Western Dani bible

Lukat 4

¹At Aberiniki nogo Yetut inikime mondok liinik kagak, yi Yoraran aa'nggi paga nen wage me, Aberiniki nen wonok karume aakumi lek me time nagagerak.

²Wonok nagagerak time wonage me, Ibilit nen at abut mbanit nage kagak, nogo 40 yereegerak. Abut mbanit nage kagak, Yetut mbi mondok nengga'lek aret nogo 40 yereegerak me, mbi abu eereegerak.

³Mbi abu eereegerak wonage me, Ibilit nogo wage nagagerik, at yoge logonet, “Kat Ala aput aret keenok, yugum yi, mbi aruwak nduk, yoru nda!”

⁴ Yoge mbareegi, at Yetut nen, “Ala nen ari logonet, Aakumi mbi mban nunggwi kenok, ineenik logogun lek o, yinuk, yereegerak liiru mbanak wonage o.”

⁵Yoge mbareegi, at Ibilit nogo nen Yetut wonok puut paga lagangge nagagerik, time nen nggween paga yime yi aap ndi aap inendagembogut inabu'me piigo menggam abok aret ne ambit mbigak togon aago nikkagagerak.

⁶Nikkage nagagerik, “It aap inendagembogut inabu'me piigo menggam abu obeelom kenok, aakumi nen, Wi, ugwi yi nogo, an unde logokit nduk, wo'nereegerak me, ndi, an niniki koombunuk en wogorage minggirak me,

⁷kat nabu'me tebe yinuk, nayuk wuke keenok, kenegen kagandak nogo abok aret kat unde logonok nduk, wokkirigin o.”

⁸ Yoge mbareegi, at Yetut nen, “Ala nen ari logonet, Kinogoba Ala mban ayuk wuko logonet, at mban alut eekwi, at ari kenok mban liippunuk eerit nogwe, eeko logonip o, yinuk, yereegerak liiru mbanak wonage o.”

⁹ Yoge mbareegi, Ibilit nen Yetut wonok o Yerutalem Ala awi wurik kirin paga lombok pi lagangge nagagerik, yoge logonet, “At Ala yonggo nappiya wage menggerak malayikat nogo, Karum logowak nduk, wone lengganogo yoramenggerak wogo logomenggaarik, Yugum paga kowak kalok yi wangge keyo, Ineenggi ndoonak paga enaani wambi namunggun o, yinuk, Ala yereegerak liiru mbanak wonage me, kat Ala aput abet aret keenok, yime nen wu'mbo wambu nda!”

¹⁰

¹¹

¹² Yoge mbareegi, at Yetut nen, “Ala nen ari logonet, Kinogoba Ala an nabut mbanggwi mage, yereegerak o,” yinuk, yoreegerak.

¹³Yoge mbareegi, at Ibilit nen Yetut abut mbanikit nduk eereegerak nogo abok aret eeppege nagagerik, “Peebi yoriminggirak ambi op age kaamun ilik?” yinuk, teppunuk, mbaganeegerak.

¹⁴Mbagangge mbareegi, at Yetut nogo Aberiniki omaawi paga iyok paga o Nggalileya lagi nagagerak. Lagi nage nagagerik, wonage me, at abok nogo o time abok aret wigak yereegerak.

¹⁵O Nggalileya time logonet, it Yakuri tamban eeko menggam wone mamuniranet nage nogo paga aakumi abok at endage wogoppogo nogogwaarak.

¹⁶Ti'nuk, peebi at Yetut tawe age nagagim o Nataret nogome nage nagagerik, Yakuri tamban eekwi paga it tamban eeko menggam nogome unggwi nage nagagerak me, unggwi nage nagagerik, Ala wone liiru mbanak paga pekkagak yoraakit nduk, mi'nagagerak.

¹⁷Mi'nage mbareegi, aap Ala yoge kagak yoraga Yetaya nen Ala wone liiru mbaneegerak mbuku pirik-perek aago wonage nogo, Yetut wogoreegerak. Wogoge mbareegi, mbuku nogo mbiganogo punuk, yorage logonet,

¹⁸ “It aakumi tebenogo piinok wonogwe nogo wone obeelom wone yorage logokit nduk, amburu eerogo mippaneegerak me, Nogoba Ala Aberiniki noba panegerak wonage agaarik o. It aakumi keele maarak wonogwe nogo, Muk wondet eerogo pinagagerak o, yinuk, yorage, Inigen mbuk nogo, Kinigen obeelom eekkinaburak op aret o, yinuk, yoranet nage, It aakumi tebembiirogo wonogwe nogo wondet eerogo piige,

¹⁹Ndi, Ninogoba Ala nen obeelom eeppinaniyak tahun nogo, yi aret aga o, yinuk, agan nage, Eeke logokit nduk, nappani wagaarak o,” yinuk, yereegerak liiru mbaneegerak nogo kwaakkage nagagerik, pekkagak yoragagerak.

²⁰Wone nogo abu yorage nagagerik, mbuku nogo perenogo aap unde nogo wogo'nuk kwi'nagagerak. Kwi'nage mbareegi, it aakumi aap Yakuri tamban eeko menggam wonogogwaarak nogo, abok aret inigen at mban loogo nogogwaarak.

²¹Inigen loogwi me, Yetut nen it yorage logonet, “Ala wone liiru mbanak pekkagak yokkiragarak nogo, o yogondak yi aret kinaruk konenggwi kiigak, a'me lik yigi o,” yoragagerak.

²²Yorage mbareegi, it aakumi abok aret, “Wone ti abet aret yigi o,” yinuk, at wone abe kigirikwe ari me, “Wi!” yinuk, pi wako logonet, “Yi aap Yutup aput nogo lek a?” yinuk, yogogwaarak.

²³Yogo mbareegwa, at Yetut nen yorage logonet, “It aakumi nen, Ndotet wae. Kat keebe obeelom eekkolet o. Ndi, ambi, O Kaperenawum eeke nagandak, konenggoorak nogo, kat kame nda'nagaginom yime togop aret eeke logot o, yogo menggaarak nogo, an yo'niriyak nduk, eekwi kiigi o.”

²⁴ Yorage nagagerik, “It aap inawi alom paga logonet, Ala yoge kagak yorogwe iinok, inowe-inawot inaruk liirogon konenggulik o, yinuk, abet aret yokkiragi o.

²⁵ Aap Eliya wonage eyom paga mayu waga'lek me, yi awi ndi awi apit mbi noogelo aganabeegerak kagak, tahun kenagan eeppunuk, ambi eeke oolo paga Iterali iname time kumi togwe ineebe ambik wonogogwaarak kwe,

²⁶Ala nen aap Eliya nogo kumi togwe Iterali iname wonogwe nogo ambi ka nawak nduk, nappulik o. Ata, kwe togwe alik ambi o Tiron tini Tarapat wonage me, owagam nappereegerak.

²⁷ Ndi, Ala yoge kagak yoraga Elita wonage eyom paga aakumi Iterali iname time apit aret inawin aaga'ne kunik wonogogwaarak kwe, it ambi inawin obeelom aganabulik aret o. Aap Naman o Tiriya mendek nogo, alik mban awin obeelom eereegerak o, yinuk, abet aret yokkiragi o.”

²⁸Yoragagerak nogo it aap Yakuri tamban eeko menggam wonogogwaarak nogo abok aret inaruk konenggo nogogwaarik, inanini ambik ogogwaarak.

²⁹Inanini ambik eeginake mbareegi, mi'na'nuk, at eebe iname nen pigogo endekem wumbogo nogogwaarik, inawi puurom yigeebu me wurik me, pelenogo wuppi nawok nduk, wonok nogwe me,

³⁰it abok taati iigak inenggela'me nen aret nagagerak.

³¹Nage nagagerik, ti'nuk, o Nggalileya tini ambi Kaperenawum nagagerak. Nage nagagerik, it Yakuri tamban eekwi paga wone mamunirage nagagerak.

³² Wone mamunirage logonet, at oone omaawi paga yorage me, aakumi nen, “Ia!” yinuk, inagabiti ogogwaarak.

³³Ne ambi paga aap ambi kugi ogole warak mendek inikime unggwagagerak me, it Yakuri tamban eeko menggam wonagagerak. At aap nogo oone kwa kunik ari logonet,

³⁴“Yetut wae. Kat aap Nataret mendek me, nit nonggop ee'ninabikit nduk wagan o? Nit lek ee'ninaburak nduk wagan ilik? Kat Ala aput maluk eekeelik mondok obeelom alik leenak menggendak nogo, keebe an neenu aret o.”

³⁵Yoge mbareegi, at Yetut nen mberege logonet, “Koone puk a'nuk wundi nak o.” Yoge mbareegi, kugi nogo nen aap eebe aakumi inenggela'me nggween paga mbo nggimbege nagagerik, eebe andi yagan waka'lek kagak, kugi nggigik togon wundeegerak.

³⁶Nggigik togon wungge mbareegi, aakumi abok inagabiti nen, “Wi!” yinuk, at ambi nen at ambi yogak eeko logonet, “Wologwe! Aap yi, oone nonggop ari mbakop? Kugi wumbiyoorak at unde me, oone omaawi paga kugi ogole warak mendek, Wundi nanip o, yorage kenok, wunggo menggaarak ia!” yinuk, yogogwaarak.

³⁷Ndi, Yetut eereegerak wone nogo o time abok aret wigak yereegerak.

³⁸At Yetut it Yakuri tamban eeko menggam nen wundi nage nagagerik, Timon ame aret unggwi nagagerak. Unggwi nage nagagerik, Timon owanggelo inikime kani nggwok pereegerak wonage me, Yetut nen obeelom eeruwak nduk, yoreegwaarak.

³⁹Yogo mbareegwa, at eebe wonage me nage nagagerik, eraaninu mi'ndak logonet, “Andi lek aru o,” awo yoge kagak, aret lek agagerak. Lek age mbareegi, kwe nogo mi'na'nuk, it inake eeke nagagerak.

⁴⁰Ti'nuk, oonegen kilu yi nage kagak, aakumi nen inoreewi kugi andi alitik-alitak kunik wonogogwaarak kenok, wogoret Yetut owagam piya wogogwaarak. Piya wogo mbareegwa, it abok aret at eenggi piginake logonet, obeelom eeginabeegerak.

⁴¹Ndi, it aakumi apit kugi inikime unggwagagerak nogo kunduk, obeelom aganake logonet, “Wundi nanip o,” yinuk, kugi nogo yorage mbareegi, inoone kwa kunik yogo logonet, “Ala aput kat aret o,” yinuk, wundit nogogwaarak. Ala nen leenogo mippereegerak Keritut nogo ineenu me, inoone yogwe iigak kwe, at Yetut nen, “Kinoone ambi yuurak mondok lek o,” yinuk, mberiragagerak.

⁴²Ti'nuk, o weege mbareegi, Yetut o time nen wundi nage nagagerik, aakumi ineebe lek me nagagerak. Nagagerak kwe, it aakumi abok aret at kwaarit nugu logonet, kwaakkogo nogogwaarik, inom logowok nduk, tebeniyak eereegwaarak mendek,

⁴³at Yetut nen it yorage logonet, “Obeelom wone Ala abu'me piyoorak wone nogo, o kota ando inom yoranet nege logokit nduk, nappani wagagerak me, mondok yoranet nege agarik o,” yinuk, yoragagerak.

⁴⁴Yorage nagagerik, o Yureya it Yakuri tamban eeko menggam lombok nogome aret yoranet nege nagagerak.