Read Western Dani Lukat 6 Bible Online

Lukat 6 - Western Dani bible

Lukat 6

¹ Ne ambi it aap Yakuri tamban eekwi paga at Yetut oone waganggwi inom gandum yarak me tu paga nogo logonet, at oone waganggwi mendek nen gandum wa'nuk, ineenggi paga arinon mondenogo mbo pegak nenet nogo nogogwaarak.

²Nenet nogwe iigak, it Pariti mendek ando nogo nen, “Tamban eekwi paga togop eeriyak mage yugu kagak, kit nonggop nduk eerit nogo ogotik?”

³ Yorogo mbareegwa, at Yetut nen, “At Ndawut inom, at inom nogogwaarak inom, mbi abu mbareegi, Ala awi wurik me unggwage nagagerik, roti Ala ake pugu nogo it weelek noorak lek Ala unde kenok mban nonggo logorak yugu kagak, waganogo nengge nagagerik, ando at inom nogwe wogoragagerak nogo, liiru mbanak kit pekkaga'lek ogotik?”

⁴

⁵Yorage nagagerik, “It aap Yakuri tamban eekwi paga eerit nogo logorak unde nogo ti, aap aret nda'nagagirak an aret o,” yinuk, yoragagerak.

⁶Ti'nuk, ne ambi it aap Yakuri tamban eekwi paga Yetut nogo it tamban eeko menggam unggwi nage nagagerik, wone mamuniragagerak. Wone mamunirage me, aap eenggi abe'nggan kambak negen taati wonagagerak me,

⁷Yetut mamunirage kagak, it aap Ala wone liiru mbanak unde inom, it aap Pariti mendek inom, nen, inoone at oba puwok nduk, “Yetut tamban eekwi paga aap obeelom eeke kaamun ilik?” yinuk, inigen pippak agago pogo nogogwaarak.

⁸Inigen pippak agago pugwi iigak, it mbakwi nogo at Yetut yelok iige nagagerik, aap eenggi kambak negen nogo yoge logonet, “Mi'nage logomenggendik, oolo yayi mok o,” yoge mbareegi, aap nogo mi'na'nuk, oolo aret mi'nari nagagerak.

⁹Mi'nari nage mbareegi, Yetut nen it yorage logonet, “Tamban eekwi paga obeelom eeginaburak ti, op ilik, maluk eeginaburak ti, op a? Aakumi ineebe inili yuurak ti, op ilik, inooriyak ti, op a? Kit yinip nda!” yinuk,

¹⁰at enegen pegiinet nage nagagerik, aap nogo yoge logonet, “Keenggi nggingget o.” Yoge mbareegi, ngginggage nagagerik, eenggi abu obeelom aret agagerak.

¹¹Eenggi abu obeelom aret agagerak kwe, it perak, iniki inanini arit unggwage logonet, “Yetut nonggop eerogo puwi o?” yinuk, wone mbaneegwaarak.

¹²Ti eyom paga Yetut tamban eerikit nduk, puurom lagi nagagerak. Lagi nage nagagerik, oonikiya Ala yoge tit kagak, o weereegerak.

¹³O weege mbareegi, at oone waganggwi nogo woraawak nduk, wiiragagerak wogo mbareegwa, aap ineebe 12 miirogo leeninake nagagerik, inendage, “Nappiigak,” aret tooninabeegerak.

¹⁴Leenogo piyareegerak nogo ti, Timon endage ambi Peterut tooneegerak nogo inom, at Timon awuluk Andereyat inom, Yakobut inom, Yaya inom, Piliput inom, Mbarotolomeyut inom,

¹⁵Matiyut inom, Tomat inom, Alepeyut aput Yakobut inom, “Ninalik aruwok,” yaga mendek ambi endage Timon inom,

¹⁶Yakobut aput Yurat inom, ndi, Yetut onggo mbaneegerak Yurat Ikariyot nogo inom, leenogo piyareegerak.

¹⁷At Yetut leenogo piyareegerak inom puurom paga nen wambi wogo nogogwaarik, kobappaga time puk ogogwaarak. Puk ogo mbareegwa, at oone waganggwi ando apit inom, aakumi ambik o Yureya nen, o kota Yerutalem nen, o Tirut Tiron yi yenggenak laut aa'nggi paga nogome nen, at Yetut oone konenggwi, kugi andi kunik obeelom eeginake, eeruwak nduk, at owagam kuwak ari wogogwaarak nogo inom, Yetut inom kobappaga taati aret wonogogwaarak. It aakumi kugi ogole warak mendek inikime unggwagak mban eeko nogogwaarak nogo obeelom eeginabeegerak.

¹⁸

¹⁹At Yetut omaawi inikime liinik wonage nogo wundi nage logonet, aakumi obeelom eeginabit nege me, it aakumi abok aret Yetut pigaawok nduk, eereegwaarak.

²⁰Togop eekwi me, Yetut nen at oone waganggwi nogo enegen pegiige nagagerik, yorage logonet, “Kit aap kinamendek lek yi, Ala abu'me pinagarak me, kiniki ale'nggen mbako logonip o.

²¹Kit yogondak abu wonogwe yi, ndonggoppinagarak me, kiniki ale'nggen mbako logonip o. Kit yogondak le yogwe yi, i'ndok kambuurak eekkinabigin me, kiniki ale'nggen mbako logonip o.

²² It aakumi yi, inombomini nen Ala yorage kagak yoraga eeppiigo nogogwaarak pogom, an aap aret nda'nagagirak nogo noone waganggotak paga ineebi lombok kinombako logonet, Kit nit mendek lek o, yinuk, mbo pinagagwi, miyuk-meya eerogo pinagagwi, Aap yi maluk o, yinuk, kinendage tebembinagagwi, eekwi iinok, kiniki ale'nggen mbako logonu o. Kinake aago mbogut paga ambik wonage me, ti eeppinagagwi eyom paga keyage wako logonet, kiniki ale'nggen nen ndawi lubuk yogo logonu o.

²³

²⁴Ndi, kit kineenggi warak wonogwe yi perak, kiniki muk ugun tayenak wonogwe me, kinabuwa o.

²⁵Kit yogondak mbi ndonggoppinagagerak wonogwe yi, peebi abu eekkinabigin me, kinabuwa o. Kit yogondak i'ndok kanggwi yi, peebi kiniki puru ari logonet, le yumunggup me, kinabuwa o.

²⁶It aakumi yi, inombomini nen aap pilit wone yorogwe iigak kwe, tiyappiigo nogogwaarak nogo ndak-ndak, it aap abok nen kinendage tiyappinagagwi iinok, kinabuwa o,” yinuk, yoragagerak.

²⁷Yorage nagagerik, at Yetut nen ambinom yorage logonet, “Kit an noone konenggwi yi, wone ambi yokkira o. It kinom ogoorak monggotak ti, kiniki kunik eeginakwi, ineebi kinombakwi nogo obeelom eeppiigwi,

²⁸it inanini nen kugi pulunogo pinagagwi nogo, kiniki ale'nggen inoba piigwi, it maluk eeppinagago menggaarak nogo, inake tamban eekwi, eeko logonip o.

²⁹Ndi, kinagandin peenok paga kinookwi iinok, peenok aret wogorogwe, kinayum togwi yum waganggwi iinok, kinayum agi yirika ili yugup o. Ata, inom aret wogorogwe,

³⁰nggino yokkirogwe iinok, aret wogorogwe, eeko logonip o. Kinamendek waganggwi iinok, Wo'ninip o, yoroorak ti mage o.

³¹ Aakumi nen, Ndogop eeppinaniyak ao, mbako monggotak nogo ndak-ndak eeppiinet nogo logonip o.

³²It aap maluk eeka nogo nen it iniki kunik eeginakwi iinok mban iniki kunik eeginako menggaarak me, it iniki kunik eekkinakwi ti mban kiniki kunik eeginakwi kiinok, onggo koloorak mbakop?

³³Ndi, it aap maluk eeka nogo nen it obeelom eeppiigwi iinok mban obeelom eeppiigo menggaarak me, obeelom eeppinagagwi nogo mban obeelom eeppiigwi kiinok, ambi koloorak mbakop?

³⁴It aap maluk eeka nogo nen, Peebi ndak-ndak wo'niraagun o, yinuk, inoreewi wogorogo menggaarak me, kit nen, Peebi wo'niraagun o, mbako logonet, wogorogwe kiinok, ti paga nonggop eekkoloorak mbakop? Mondok lek o, noreewi.

³⁵Kit perak, at Tiyanak Lombok Menggerak nen it aap maluk mendek iniki lambek-nggoonak menggaarak nogo iniki kunik aganake menggerak me, kit togon, it kinom ogoorak monggotak nogo kiniki kunik eeginako logonet, obeelom eeppiigwi, Peebi wo'niraagun, mbaka'lek logonet, ugun wogorogwe, eekwi kiinok, kit an napuri aret o, yinuk, onggo mondok iya tit wokkirage kaamunggup o.

³⁶ Kinogoba nen aakumi inabuwa mbake logonet, obeelom eeppiige menggi kwak, kit ndak-ndak aakumi inabuwa mbako logonet, obeelom eeppiinet nogo logonip o,” yinuk, yoragagerak.

³⁷Yorage nagagerik, ambinom yorage logonet, “Kit kinoone omaawi paga perak togon aakumi yorogo logonet, Kit maluk o, yinuk, yoraagup o. Kinoone omaawi paga perak togon yorogwe lek kiinok, Ala nen perak togon, Kit maluk o, yinuk, yokkiraagin lek o. Kit nen aakumi inenggali wappiyaagup o. Inenggali wappiiga'lek kiinok, Ala nen kit kinenggali wappinagagin lek o. Kit nen it aakumi maluk eeppinagagwi nogo kinami eerogo pogo logonip o. Kinami eerogo pugwi kiinok, Ala nen kit kinomaluk lek eerogo pinagagin o.

³⁸ Ugun wogorogwe kiinok, ugun wokkirogwe kaamunggup o. Togolowa'na eno korok togon yonggoppunuk, nggwik-nggwik eeke, tebenogo wuppege, eeppunuk, a'nggan ngginu-ngginu wangge kagak, kinabu'me ngginggirogo mengga kwak, ndak-ndak wokkirage kaamunggup o. Wakkagak nogo paga wakkaanuk aakumi wogorogo monggotak nogo ti, ndak-ndak wakkaanuk wokkirage kaamunggup o,” yoragagerak.

³⁹ Yorage nagagerik, wone ambi eegu laarogo yorage logonet, “It aap inigen mbuk mban-mban ineenggi pit-pit noorak op mbakop? Imbirak yigeebu wambuurak lek mbakop?

⁴⁰ It wone mamuniraga nogo tebenak iigak, wone mamunggolaga nogo tiyanak wonogolik o. It mamunggolaga nogo abu mamunggologo logomenggaarik perak, it mamuniraga ndak-ndak aret logogun o.

⁴¹Eyo obate mbanak kinigen me milinik wonage nogo maloppega'lek logonet, kit kinore enegen anggup nonggop togon maloppogo ogotik?

⁴²Ndi, eyo obate mbanak kit kinigen me worekkaga'lek logonet, Nore. Kenegen anggup worekkeya, ti nonggop togon yoriyak mbakop? Aap pilit pugungga kit aret! Eyo obate mbanak kit kinigen me milinik wonage nogo aa'nduk mbo nappunuk, kinore enegen anggup worekkoorak perak, op kaamunggup o,” yinuk, yoragagerak.

⁴³Wone ambinom yorage logonet, “Eyo obeelom mendek nen anggen maluk mendek yegeelik o. Ndi, eyo maluk mendek nen anggen obeelom mendek yegeelik mban.

⁴⁴ Yi eyo ndi eyo eebe anggen yege paga ineenu ogo menggaarak. Kit eyo wuli anggen nogo eyo poondo alokwi paga yugu me mbanggulik o. Ndi, anggur anggen nogo keele togona'le paga yugu me waganggulik mban.

⁴⁵Aap abe mendek inikime yugu abe mendek nogo paga obeelom mban eeke menggerak. Ndi, aap maluk mendek inikime yugu maluk mendek nogo paga maluk mban eeke menggerak. Inikime uum kilu-kilu wungge logonet, ambe paga nen ari menggerak o,” yoragagerak.

⁴⁶ Yorage nagagerik, ambinom yorage logonet, “Kit an yokkirage minggirak nogo eeka'lek logonet, nonggop nduk, Ai, nogoba! Ai, nogoba! mban yo'nogo ogotik?

⁴⁷It aakumi an nowagam wogo nagaatik, an noone konembunuk, eerit nugu menggaarak pogom yokkira o.

⁴⁸Aap o wukwi nogo pogom it aret o. Aap ambi nggween teberogon lombok kabungge nagagerik, yugum abena ndoonak paga lombok o eyak kwippi wambeegerak. Kwippi wambeegerak me, peebi yi wu'nuk wage logonet, o wurik langgonikit nduk eereegerak mendek omaawi ambik wurik me, nu'lek wonagagerak.

⁴⁹Ti nu'lek wonagagerak kwe, it aap an noone konembunuk, eekulik nogo perak, aap ambi o eyak nggween teberogon wurabulik we obaga aret kwippunuk, o wureegerak me, yi wu'nuk wage logonet, langgok togon ee'nuk wungge logonet, yigirik-noonom mondok iya tit eerogo pit nagagerak nogo pogom it aret o,” yinuk, yoragagerak.