Read Western Dani Lukat 7 Bible Online

Lukat 7 - Western Dani bible

Lukat 7

¹At Yetut aakumi inenggaanom wone abu yorage nagagerik, o Kaperenawum unggwi wagagerak.

²Unggwi wage nagagerik, wonage me, it aap yigin unde inowe ambi ayeloman iniki kunik me, andi warak abu kambuurak eeke wonagagerak.

³Aap yigin unde inowe nogo Yetut eerit nage konengge nagagerik, ayeloman obeelom eeri woroorak yori nawak nduk, aap Yakuri inoweewi ando yonggo nappiyareegerak.

⁴Nappiyareegerak Yetut owagam nogo nogogwaarik, inoone nabek togon yogo logonet, “At aap ti, aakumi nit mendek ninom niniki kunik ee'ninake, ndi, at lombok nen nit tamban eeko monggom o wuppinanege, eeke nagagerak me, ayeloman obeelom eeri noorak ti op o.”

⁵

⁶Yogo mbareegwa, Yetut inom wogogwaarak. Aap nogo ame awo wok yi wogwe iigak, aap yigin unde inowe nogo nen oreewi yonggo nappiyareegerak Yetut owagam nogo nogogwaarik, “Ai, ninogoba! Aap ninore yigin unde nen, Iyok aanom warogo woraagurik o. An aap mbuuluk me, at nen an name unggwi woroorak meek o.

⁷ Ndi, at owagam noorak kunduk, an mbarulik mban o. Oone mban yemenggerak paga nayeloman obeelom arigin o.

⁸An kunduk, noweewi inabu'me logonet, inoone konengge, ndi, an nawuri yigin unde nogo nabu'me logonet, an noone konenggwi, eeko monggoorak me, nawuri ambi, Nak o, yoge neenok ti, nage, ambi, Mok o, yoge neenok ti, wage, ndi, nayeloman, Yi eeru o, yoge neenok ti, eeke, eeko menggaarak me, yori nanip o, yinuk, nappinani wagaarak me yokkogo o,” yinuk, yoreegwaarak.

⁹Yoreegwaarak Yetut aruk konengge nagagerik, “Wi!” yinuk, pi wake nagagerik, aakumi at mugurok wogwe nogo ena logurogon pegiige logonet, “It aakumi Iterali mendek kunduk, at iniki noba panggombunuk, mondok iya lombok abet nombake yogobi ambi an kaga'lek aret agarik o, yinuk, yokkiragi o.”

¹⁰Yorage mbareegi, yonggo nogogwaarak nogo iname iniyok paga wogo nogogwaarik, ayeloman andi warak nogo muk obeelom agagerak me, ka wogogwaarak.

¹¹Ti'nuk, peebi Yetut o kota ambi endage Nayin wage me, at oone waganggwi inom, aakumi apit inom, wogogwaarak.

¹²O kota tu pak ambe mbanak me wok yi wogwe me, kwe togwe ambi aagaluk aap ambolom ndarak me kangge mbareegi, eewu'nuk wogwe iigak, it aakumi apit o kota time menggaarak inom, agalo inom, wogwe iyareegerak.

¹³Ninogoba Yetut nen kwe nogo enegen kage nagagerik, abuwa ambik ombake logonet, “Le ari mage o,” yoreegerak.

¹⁴Yoge nagagerik, aap eewurik wonok wogwe me panggo yi nage nagagerik, eenggi pigaganeegerak. Eenggi pigagangge mbareegi, aakumi eewurik wonok wogwe nogo puk ogo mbareegwa, at Yetut nen, “Wulaga! Mi'na'nok nduk, yokkege agarik o.”

¹⁵Yoge mbareegi, wulaga kambeegerak nogo mi'nage nagagerik, oone aret yereegerak. Oone ari mbareegi, Yetut nen wulaga nogo agalo wogoreegerak.

¹⁶Agalo nogo wogoge mbareegi, it aakumi apit inagabiti ambik a'nuk, Ala wogoppogo logonet, “Aap Ala nen yorage kagak yoraga mendek nggwok ambi ninenggela'me nen mi'naga o,” yogo nogogwaarik, “At Ala nen at apuri wonde'niya wagaarak kogo o,” yinuk, yereegwaarak.

¹⁷Ndi, Yetut eereegerak wone nogo o Yureya enaagan-ambokan abok aret wigak yereegerak.

¹⁸Agan nugwi nogo at Yaya oone waganggwi nen Yaya yoreegwaarak.

¹⁹Yogo mbareegwa, Yaya nen at oone waganggwi mendek mbere wiirage nagagerik, wogo mbareegwa, it yorage logonet, “At woroorak nogo kat aret wagandak ilik, alik ambi woraagin nduk tokkogo logomun a? At ninogoba Yetut nogo yori nanip o,” yinuk, nappiyareegerak.

²⁰Nappiyareegerak nogo Yetut owagam nogo nogogwaarik, at yogwi, “Aap Yiime Wuppiiga Yaya nen yo'nirage logonet, Woroorak nogo at aret wagaarak ilik, alik ambi woraagin nduk, tokkogo logomun a? yinuk, yori nanip o, yo'nirage mbaki, yokkiri wogo o,” yinuk, yoreegwaarak.

²¹Ti eyom paga at Yetut nen aakumi apit kugi andi kunik inom, kugi andi yagan warit nugwi inom, kugi ogole warak mendek inikime unggwagagerak inom, obeelom eeginake, inigen mbuk nogo apit aret obeelom eeppiige, eeke me, nogogwaarak.

²² Nogogwaarak nogo nen wone nogo Yetut yogo mbareegwa, at Yetut nen, “Eeke kinigen kogotak inom, agan nugwi kinaruk konenggotak inom, ti, kiniyokan Yaya yori nanip o. Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggaatak ineenik agago mippiige, ndi, aap inamendek lek nogo obeelom wone yorage, eeke nogo yori nanip o.

²³Ndi, kit an eeke minggirak paga kineebi nombakulik kiinok ti, kinale'nggen aret logomunggup o,” yinuk, yoragagerak.

²⁴Yorage mbareegi, it Yaya yonggo nappiyareegerak nogo iname wogwe iigak, Yetut nen Yaya eeke abok aakumi yorage logonet, “Kit nano mendek kaawok nduk, karume aakumi lek me nogotak? Piinde nogo o wiya nen nage-wage eeke kaawok nduk, nogotak ya?

²⁵Nano mendek kaawok nduk nogotak? Aap ambi yum kigirikwe yirik kaawok nduk, nogotak? Wologwe! Yum kigirikwe yikwi, obeelom mban wonogwe, eekwi nogo ti, aap inendagembogut iname nogome mban menggaarak o.

²⁶Nonggop nduk, nogotak? Aap Ala nen yorage kagak yoraga mendek ambi kaawok nduk, nogotak? Wologwe! Kit kogotak nogo ti, Ala nen yorage kagak yoraga mendek aret kwe, it ti, tebenak iigak, at ti perak, mondok tiyanak lombok aret kogotak o, yinuk, yokkirage agarik o.

²⁷ At Ala nen ari logonet, Kat noorak tu yarogo pagawak nduk, an nen nayonggo aa'nduk nappege neyaamunggun o, yinuk, an yo'nereegerak liiru mbanak nogo ti, at Yaya aret nduk, yereegerak o.

²⁸At Yaya endage warak lombok nda'nagagerak kokwak it kumi inaagalogwe togop ti, ambi ndaganakulik kwe, Ala abu'me piige menggim inendage lek tebenak wonogwe nogo ti, Yaya tiyanak kagak at irimbaga lombok aret logogun o, yinuk, yokkiragi o.”

²⁹ At Yetut yoragagerak nogo ti, it aakumi abok aret aap o unde inake wu kuwak eeka inom konenggo nogogwaarik, at Yaya nen it yiime wuppiyareegerak me, “Ala ti, abu obeelom eeke menggerak o,” yinuk, yereegwaarak.

³⁰Togop kwe, it aap Pariti mendek inom, Ala wone liiru mbanak unde inom, nogo perak, Yaya nen it yiime wuppiiyoolik me, Ala nen it eeko logorak inombareegerak wone nogo mbo pereegwaarak.

³¹At Yetut nen wone ambinom yorage logonet, “It aakumi o yogondak wonogwe yi, nano pogom wakka o? It ngge ndak-ndak eeko menggaarak?

³²Lek o. Wologwe mbuulogwe aakumi kuwak eeko menggam yine kunit it mban-mban wone onggo-onggo agan nugu logonet, Nit ndawi tiyanggirogoorak kwe, kit eebe wakwi lek. Ndi, leendawi tiyanggirogoorak kwe, kit le yogwe lek, agan nugwi nogo pogom kit togop aret agan nugwi kiigi o.

³³At Yiime Wuppiiga Yaya nogo mbi inom, anggur amburu inom, nengga'lek aret wagagerak kwe, kit nen, Kugi inikime unggwegerak o, yogo monggotak.

³⁴Ndi, an aap aret nda'nagagirak nogo mbi inom, amburu inom, ugun nenet wagagirak me, kit nen yogo logonet, Mbi inom, anggur amburu inom, lagap mban agan nenet nege logonet, it aap o unde inake wu kuwak eeka inom, aap maluk eeka abok inom, inom kunggo'net nage yi, kaanip o, yinuk,

³⁵yogo monggotak kwe, Ala iniki warak nen koonit nage nogo ti, it eeko menggaarak abok aret eekwi paga obeelom aret kogo logogun o,” yinuk, yoragagerak.

³⁶Ti'nuk, aap Pariti mendek ambi nen Yetut imbirak mbi nawok nduk, “Mok o,” yoge mbareegi, at ame unggwage nagagerik, mbi naakit nduk, kwi'nagagerak.

³⁷ Kwi'nage mbareegi, o kota time kwe maluk eeka ambi nen Yetut aap Pariti ame kwi'ndak mbi nengge konengge nagagerik, amburu obari abe mendek yugum yiiwak mendaarak me, toolak wonok wagagerak.

³⁸Wonok wage nagagerik, Yetut iyok unggu'me ambokan taati mi'nari wage nagagerik, le ari logonet, ale amburu paga Yetut iyok miin eeke, ti'nuk, eeruwak paga wolombege, eeppege nagagerik, aganak paga pirik-perek ari logonet, amburu nogo iyok paga kilippereegerak.

³⁹“Aap Pariti, Yetut nimbirak mbi noorak,” yoreegerak nogo nen kwe nogo eeke kage nagagerik, iniki mbake logonet, “Kwe yi, maluk eeke menggerak me, aap yi nogo Ala nen yoge kagak yoraga mendek abet aret logonetak en, Kwe yi maluk eeke menggerak nen aret pi'nake kagi, yinuk, ti maan yelok kaanetak,” mbareegerak.

⁴⁰Mbake kagak, at Yetut nen, “Timon wae. An wone ambi yokkirikit mbakirak me, yokkiri o.” Yoge mbareegi, at nogo nen, “Yo'niru o, nogoba.”

⁴¹Yoge mbareegi, at Yetut nen, “Aap mbere nen aap ambi anomat mbanak wonogogwaarak. Ambi wu 500 mbanak, ndi, ambi wu 50 mbanak wonogogwaarak.

⁴²Imbirak anomat mbanak onggo wogoriyak meek me, inabuwa nen, Onggo lek we aret kolaanip o, yoragagerak. At onggo lek we wogoragagerak nogo ti, ineebe mbere aret me, ta nen iniki kunik nggwok mbareegerak mbaken?”

⁴³Yoge mbareegi, Timon nen, “Lek o. Aap wu nggwok wogoreegerak nogo nen iniki kunik nggwok mbareegerak mbaki o,” yoge mbareegi, Yetut nen, “Yagandak ti aret o.”

⁴⁴ Yoge nagagerik, Yetut nen kwe nogo ena logurogon pekkage logonet, “Timon wae. Kwe yi, kagan ilik, lek a? An nen kame unggwi wage mbaki, niyok koorikit nduk, kat nen yi wo'nirulik kwe, at yi perak, ale amburu paga niyok miin eeke, eeruwak paga wolonnake, eekerak o.

⁴⁵Kat nen an kambu'nirulik kwe, at perak, an unggwi wagarak kuli nen yogondak kuli puk aga'lek naganak paga pirik-perek mban ari agaarik o.

⁴⁶ Kat nen amburu nanobak paga kilirogo panulik kwe, at perak, amburu obari abe mendek niyok paga kilippanegerak.

⁴⁷Ti paga nen kwe yi, maluk iya tit eeke nagagerak kwe, omaluk lek eerogo pigirak me, iniki kunik nggwok lombok ee'nakerak o. Nit maluk mbuuluk eeko nogogurak nogo Ala nen lek eerogo pinanggerak o, mbakwi iinok ti, we mbuuluk Ala iniki kunik eeko menggaarak o.”

⁴⁸Yoge nagagerik, kwe nogo yoge logonet, “Komaluk lek eerogo pagagi o,” yoreegerak.

⁴⁹Yoreegerak nogo, it mbi noorak nduk inom kwi'ndak wonogogwaarak nogo it-it yogo logonet, “It aakumi inomaluk lek eerogo piige nogo yi ta mbakop?”

⁵⁰Yogwe iigak, at Yetut nen kwe nogo yoge, “Kiniki noba panggombunuk abet nombakendak paga kagap ndakkolagandak me, kinikiigun kame nak o,” yinuk, yoreegerak.