Read Western Dani Lukat 9 Bible Online

Lukat 9 - Western Dani bible

Lukat 9

¹Yorage nagagerik, at Yetut nen it aap 12 nogo kuwak ari woraawak nduk, wiirage nagagerik, wogo mbareegwa, at omaawi paga yi kugi ndi kugi abok aret aakumi inikime nen nggiginogo wumbiigwi, yi kugi ndi kugi andi kunik kenok, obeelom eeginakwi, eeginabit nugu logowak nduk, awone kiliriragagerak.

²Awone kilirirage nagagerik, Ala abu'me piyoorak wone yoranet nugwi, aakumi obeelom eeginabit nugwi, eerit nugu logowak nduk, nappiige logonet,

³ “Kit nogo logonet, yi mendek ndi mendek abok aret kinowaanggun inom, wokkirogwe iinok yonggoliyak yum inom, kinambi inom, kinawu inom, kinambogoyum mbere inom, wonok nagup o.

⁴Kit o ambime namonggotak me, wokkinakwi iinok, kinom o kota time aret logomonggotik, o alik me noorak kenok, namunggup o.

⁵ Yi awi ndi awi namonggotak me, keyage warogo wokkinakwi lek iinok perak, iname o kota nen wundi nogo logonet, Kinobaalombok o! yinuk, kiniyok paga liirubu aa'ngga agago piinok, time nen wundi nanu o.”

⁶Yorage nagagerik, nappiyareegerak nogo nogogwaarik, yi yaga'lelo ndi yaga'lelo unggwit nogo logonet, obeelom wone yoranet nugwi, aakumi obeelom eeginabit nugwi, eerit nugu nogogwaarak.

⁷ Eerit nugwi nogo it aakumi nen iigo nogogwaarik, it ando nen, “At Yaya kanggo menggam nen eenik a'nuk, mi'nagaarak o,” yogwe, ndi, ando nen, “Aap Eliya tena'me agaarak o,” yogwe, ndi, ando nen, “Aap maan Ala nen yorage kagak yorogo nogogwaarak nogo mendek ambi eenik a'nuk, mi'nagaarak o,” yogwe, agan nugwi nogo aap endagembogut Keroret nogo aruk konengge nagagerik, iniki piirik agagerak.

⁸

⁹Iniki piirik logonet, “An lombok nen Yaya enggaanok mbaneegirak kwe, eerit nage konenggirak yi, ta nen eerit nege agaarik o?” yinuk, Yetut pekkaakit nduk, eeke nagagerak.

¹⁰It aap nappiyareegerak nogo iniyok paga wogo nogogwaarik, eerit nugu nogogwaarak nogo Yetut mbininogo yoreegwaarak. Yogo mbareegwa, at Yetut nen inalik wogoret o kota ambi endage Mbetayira tayo yi nogogwaarak.

¹¹Tayo yi nogogwaarak mendek, aakumi ambik, “Yetut time nagaarak,” konenggo nogogwaarik, amugurok nogogwaarak. Amugurok nogo mbareegwa, Yetut nen keyage wappiige nagagerik, Ala abu'me piyoorak wone nogo yorage, ndi, ineebe kugi andi kenok, obeelom eeginake, eereegerak.

¹²Eeginake kagak, oonegen kilu yi naakit nduk eeke mbareegi, it aap 12 nogo at owagam wogo nogogwaarik, at yogo logonet, “Aakumi inawi wurik yime abu lek me, it aakumi apit kuwak ari wagaarak yi, o yaga'lelo inom, o ilin-ilin inom, time inambi onggo mbanogo nunggwi nogo yuwak nduk, nappiyet o.”

¹³Yogo mbareegwa, at Yetut nen, “Inambi nawak nduk, kit nen aret wogoraanip o.” Yorage mbareegi, it nen, “Nit roti 5, ndi, ikan mbere mban wonage me, aakumi ambik yi, inambi kuninumba noorak op me nduk ari agandik ilik?” yinuk, yoreegwaarak. (

¹⁴Yoreegwaarak ti, aap ineebe lima ribu wonogwe me nduk, yoreegwaarak.) Yogo mbareegwa, Yetut nen at oone waganggwi nogo yorage logonet, “It aakumi 50 lombok kunu wurogo kwi'narit nawak nduk, yoraanip o.”

¹⁵Yorage mbareegi, togop aret kwippiyareegwaarak.

¹⁶Kwippiigo mbareegwa, at Yetut nen roti 5 inom, ikan mbere inom, woppunuk, ena mbogut paga ni'nage nagagerik, “Nogoba Ala wa!” yinuk, karereegerak. Karerogo at oone waganggwi nen aakumi kuwak aago nogo tumburiraawak nduk, wogoragagerak.

¹⁷Wogoragagerak tumburirogo mbareegwa, it abok aret nonggo nogogwaarik, ndonggoppiyareegerak. Ndonggoppiige mbareegi, ando ndiinogo pereegwaarak nogo mbirim yum 12 eno korok togon aret yonggologo pereegwaarak.

¹⁸Ti'nuk, peebi ne ambi paga at Yetut alik tamban eeke me, at oone waganggwi nogo owagam nogo mbareegwa, Yetut nen ineegwa'me wogiige logonet, “It aakumi abok en an ta nomba'nuk, yogo agaarik?”

¹⁹ Yorage mbareegi, it nen, “Aap ando nen, at Yiime Wuppiiga Yaya nogo aret yogwe, ando nen, Eliya aret yogwe, ndi, ando nen, Aap maan Ala nen yorage kagak yorogo nogogwaarak nogo mendek ambi eenik a'nuk, mi'nagaarak, yogwe, eeko agaarik o.”

²⁰ Yogo mbareegwa, at nen, “Ndi, kit perak, an ta nomba'nuk, yogo ogotik?” Yorage mbareegi, at Peterut nen, “Ala nen leenogo mippagareegerak Mesias nogo kat aret o.”

²¹Yoge mbareegi, at Yetut nen, “An nabok yegerak ti, wonok wundugup o,” yinuk, inaruk wareegerak.

²²Inaruk wappunuk, yorage logonet, “An aap aret nda'nagagirak nogo mondok noba aaninggin-paaninggin agago panugun o. It aap inanggok inom, Ala unde inoweewi inom, Ala wone liiru mbanak unde inom, ineebi nen mbo panugo logonet, nooko mbaremengga, nogo mbere yinuk, ko'lu Ala nen neenik agago mippanigin o.”

²³ Yorage nagagerik, it apit aret yorage logonet, “An ninom nugu logorak mbakwi kenok, kit yi eekak ndi eekak eeriyak mbakwi nogo mbo punuk, ko'lu-kii'me eyo karo-karo paga nabembinagarak nogo, ko'nok an ninom aret nugu logowok o.

²⁴ Kineebe kinili yikkolamonggotak kenok, kineebe kobak aret arumunggup o. Ndi, an nendage nggwok aruwak nduk, kineebe wondet eerogo patit namonggotak kenok, kineebe kinili aago aret logomunggup o.

²⁵Kit yi awi ndi awi abok aret unde eekkologo logomonggotik, kineebe kobak arumonggotak kenok, ti paga nano eekkoloorak nduk, agan nugu logomunggup mbakop?

²⁶Aakumi inayuk wuppunuk, kinagabiti nen an neebe inom, an noone inom, mbo punuk naana'le mbangga'lek logomonggotak kenok, peebi an inom, nogoba inom, it Ala ake eeko logorak leenak menggaarak malayikat inom, ninamendek li'luk ee'nuk wogo logomonggoorik, an aap aret nda'nagagirak yi, aakumi inayuk wuppunuk, nagabiti nen kinaana'le mbanigin lek o.

²⁷Kit ando yime wonogwe nogo, aakumi Ala abu'me piya wage kinigen kaga'lek kiigak, kambumunggup mondok lek o, yinuk, abet aret yokkiragi o,” yoragagerak.

²⁸ Wone ti yorage nagagerik, nogo 8 negen yinuk, Yetut nen Peterut kunduk, Yaya kunduk, Yakobut kunduk, wogoret tamban eeruwok nduk, puurom lagi nogogwaarak.

²⁹Nogo nogogwaarik, Yetut tamban eeke me, at enete alik lombok age nagagerik, ambogoyum abinak mondok yanggwi negen lan ari kagak,

³⁰eya pindanak paga aap mbere Muta Eliya imbirak ineebe tena'me ari wa'nuk, Yetut o Yerutalem kambuurak a'me lik yuurak agagerak wone nogo, Yetut inom mbaneegwaarak.

³¹

³²Mbanggwi iigak, aap Peterut oreewi inom abu nogo yuurak eeginabeegerak kwe, ineenik ogo nogogwaarik, Yetut abinak pindanggage kagak aap mbere Yetut inom wonogwe iyareegwaarak.

³³Iigo mbareegwa, it aap mbere nogo Yetut mbo punuk, lagi noorak nduk eekwi iigak, Peterut nen Yetut yoge, “Nogoba wae. Nit yime obeelom aret wonogwe me, kit logobagip nduk, ooliya kenagan, ambi kat, ambi Muta, ndi, ambi Eliya, wurogo pinagarak op aret o,” yinuk, yoreegerak. (Ti yoreegerak nogo we ugun eenggo'lek me, yoreegerak.)

³⁴Nogo awo yoge kagak, ameraakot wage logonet, nobarogo piyareegerak. Ameraakot inoba nobappiya wage mbareegi, inagabiti nggwok mbakwi iigak,

³⁵ ameraakot enggela'me nen oone ari logonet, “An naput miirogo mippereegirak nogo yi aret me, at oone liirogon konenggo logonip o.”

³⁶Ari mbareegi, pekkogo nogogwaarik, Yetut alik mban wonage kogogwaarak. Kogo nogogwaarik, eeke kogogwaarak nogo, ti eyom paga aakumi abu yoroolik puk aret wonogogwaarak.

³⁷Ko'lu at Yetut oone waganggwi inom puurom nogome nen wambi wogo mbareegwa, aakumi apit at ka nogogwaarak.

³⁸Ka nogo nogogwaarik, aakumi apit kuwak ari nogogwaarak nogo ambi nen perak togon Yetut yoge logonet, “Ngguru wae. Naput wulaga ambolom ambit ndarak me pekkaanok nduk, yokkigi o, nogoba!

³⁹Kugi nen wulaga nogo piga wagak mban eeke kenok, kwa ari kagak, piyanogo nggween paga anek-nggwik nggimbege nagaatik, eenggi-iyok puk-puk yuwak nduk eeppege, awoori lagap-lagap eeruwak nduk, eeppege, eeke nagaatik, wake menggerak. Mbo punuk, mbaganikit ti, mbakeelik aret o.

⁴⁰An nen kat koone waganggwi nogo kugi nggiginogo wumbuwak nduk, yoragarak kwe, it nen nggiginogo wumbuurak meek o.”

⁴¹Yoge mbareegi, at Yetut nen, “Kit aakumi yogondak wonogwe yi, kiniki noba panggombunuk, abet mbaka'lek lambek nugu monggotak yi, wologwe! An ne mande ninom logonuk name nagin kwe? Ne mande niniki yanggo yinuk, kit ninom logogin kwe?” yinuk, yorage nagagerik, aap aput andi nogo yoge logonet, “Kaput wonok omok o.”

⁴²Yoge mbareegi, awo wonok wage kagak, kugi nogo nen wulaga eebe piyanogo nggween paga anek-nggwik nggimbege nagagerik, eenggi-iyok puk-puk yuwak nduk eeppereegerak. Eeppege kagak, at Yetut nen kugi ogole warak nogo mberege nagagerik, wulaga nogo obeelom eerogo ogoba wogoreegerak.

⁴³Wogoge mbareegi, it aakumi nen Ala omaawi ambik kogo nogogwaarik, “Ia!” yinuk, pi wareegwaarak. Yetut yi eekak ndi eekak abok eerit nege paga, it aakumi abok nen, “Ia!” yinuk, pi wakwi iigak, Yetut nen at oone waganggwi nogo yorage logonet,

⁴⁴“An wone yokkirage yi, liirogon konenggo logonip o. An aap aret nda'nagagirak yi, nooruwak nduk neebe pigogo aakumi wogorage kaamunggup o.”

⁴⁵Yoragagerak kwe, it kobak mban wonogogwaarak. Ndi, wone ti, yelok kogwe iyo, nobarak negen yoragagerak kwe, “Yo'niragandak nogo ti, nonggop yo'niragan o?” yinuk, inagabiti nen kin wokkoolik puk ogogwaarak.

⁴⁶ Ti'nuk, peebi Yetut oone waganggwi nen, “An iya kat iya,” yogo logonet, wone wako nogogwaarak.

⁴⁷It iniki mbako logonet, wone wakwi nogo at Yetut yelok iige nagagerik, wulaga mbuuluk ambi waganogo eraaninu mippunuk,

⁴⁸ it nogo yorage logonet, “At kinenggela'me abu tebenak wonage nogo ti, at aap nggwok lombok aret wonage me, aap ambit-ambi, An Yetut oone wagangge minggirak me, yinuk, at wulaga yi, wagangge kenok ti, an aret wo'nake, ndi, an wo'nake kenok, at nappani wagagerak nogo aret wagangge, eeke menggerak o,” yinuk, yoragagerak.

⁴⁹Yorage mbareegi, Yaya nen, “Nogoba wae. Aap ambi kugi inikime unggwagagerak wonage me, aap ambi nen kat kendage kumbunuk nggiginogo wumbiige kogo nogoorik, at ninom nugulik me, Mage, yogoorak o.”

⁵⁰Yoge mbareegi, at Yetut nen, “Mage, yoriyak ti, mage o. It kinom ogoorak lek kenok ti, kit mendek aret o,” yoragagerak.

⁵¹ Ti'nuk, peebi at Yetut mbogut paga lagi noorak eyom panggoni wage mbareegi, Yetut o Yerutalem noorak nduk, iniki mondok ogogumbuk eekkolage nagagerik,

⁵² yonggo aa'nduk aret nappiya wagagerak wogo nogogwaarik, at wage me ake pipuk eerogo puwak nduk, aakumi Tamariya mendek iname ambime unggwogogwaarak.

⁵³Unggwogo mbareegwa, aakumi o Tamariya mendek nen, Yetut o Yerutalem mondok noorak mbake yelok kogo nogogwaarik, “Noorak mbakerak me, nawak o,” mbareegwaarak.

⁵⁴ It togop mbakwi at oone waganggwi Yakobut Yaya imbirak iigo nogogwaarik, “Ninogoba wae! Kani mbogut paga nen kuninabi wambi woraawak nduk, yoruwi ilik?”

⁵⁵Yogo mbareegwa, ena koonogo pegiige logonet, mberiragagerak.

⁵⁶Mberirage nagagerik, o alik ambime nogogwaarak.

⁵⁷Nogwe me, aap ambi nen Yetut yoge logonet, “Kat nege logorak mbake keenok, an nimbirak aret nugu logowok o.”

⁵⁸Yoge mbareegi, at Yetut nen, “Pagi ti, enoona wonogwe, ndi, towe mbogut paga nugu menggaarak nogo, inawiina wonogwe, eeko menggaarak kwe, an aap aret nda'nagagirak yi perak, nogo yege minggim abu lek aret o,” yinuk, yoreegerak.

⁵⁹Yoge nagagerik, aap alik ambi yoge logonet, “Nimbirak nugu logowok o,” yoreegerak kwe, aap nogo nen, “Ai, nogoba! Aa'nduk nogoba nggween taambunuk, nimbirak nawok nen, E, yo'niru o.”

⁶⁰Yoge mbareegi, at Yetut nen, “It aakumi kambeegwaarak mendek nen inowe-inawot kanggwi iinok, nggween taambiigo logowak nduk, teppiyet o. Kat perak, Ala abu'me piyoorak wone nogo, yi awi ndi awi yoranet nege logot o,” yoreegerak.

⁶¹ Yoge mbareegi, alik ambi nen Yetut yoge logonet, “Nogoba o. Kat nimbirak nege logokit mbakirak kwe, naakit nduk, aa'nduk nowe-nawot yora nawam yo'niru o.”

⁶²Yoge mbareegi, at Yetut nen, “It aakumi yabu woorak nduk, tuguwa wonok nogwe kwe, yabu wagangga'lek we aret pi wogwe iinok, Ala abu'me piige menggim ungguurak meek o,” yinuk, yoragagerak.