Read Western Dani Pelaareegerak 1 Bible Online

Pelaareegerak 1 - Western Dani bible

Pelaareegerak 1

¹PELAAREEGERAK WONE O Paran aru pa'nggwe nakkagak, o Topen, Laban, Katerot, Nditakap ogwe pa'nggwe nakkagak, o Tup agi pa'nggwe nikkagak, it aakumi Iterali nogo niyo Yoraran oonegen lagi wage menggim pa'nggwe o Araba kobak nabunogo pereegim karume nogome ari wogogwaarak wonogo logonet, at Muta nen it Iterali abok aret wone yoragagerak nogo yi aret.

²Puut Korep nen o Kareti-Mbareneya noorak kenok, tu puut Teyit paga unggwagak nogo logonet, nogo 11 yit nogo menggaarak o.

³ At Muta nogo nen aakumi Amori mendek inowe endagembogut Tikon inarum menggim o Ketibon nogome tebenogo pege, ndi, aakumi o Mbatan mendek inowe endagembogut Ok inarum menggim o Atitarot o Erereyi korotok nogome tebenogo pege, eeke nagagerik, aakumi Iterali wogoren o Mowap niyo Yoraran oonegen lagi wage menggim pa'nggwe piya wagagerak. Piya wage nagagerik, wonage kagak, tahun 39 eeppunuk, ambi eeke paga tut 10 penembunuk, ambi penenak tanggal 1 paga at Aliku ALA nen it Iterali mendek eeko logowak nduk, “Yogop ee'nu ndogop ee'nu,” yinuk, Muta yoreegerak nogo at Muta nen it aakumi Iterali wone lengganogo yoragagerak nogo yi aret.

⁴

⁵

⁶“Nit puut Korep paga wonogwe me, at Aliku ninogoba Ala nen yo'nirage logonet, Puut yi paga maan togon wonogogutak me,

⁷o yogondak yi paga aret kinawooliya wurik minogo kologo logomonggotik, aap Amori mendek inanggween puut nggelok-nggobok time unggwogwe, it aakumi korotok menggaarak o Araba kobak nabunogo pereegim nggelok-nggobok wonogwe me unggwogwe, puut lunik me wonogwe me unggwogwe, o Kanan o ame pa'nggwe karume wonogwe me unggwogwe, niyo nggwok yenggenak aa'nggi paga wonogwe me unggwogwe, it aakumi o Kanan time wonogwe me unggwogwe, ndi, o Libanon niyo nggwok Eparat kuli time aret unggwogwe, eerit nanip o.

⁸Nggween kamonggotak nogo abok aret Naliku an ALA nen kinombomini Abarakam inom, Itak inom, Yakup inom, inapuri-inombowologwe ndaganabit namenggaarak inom, Wokkiraagin o, yinuk, wone kumbuk mbanogo yoragagirak nogo, kit muk wokkiragagirak me, time aret unggwi nogo logomonggotik, unde arumunggup, yo'niragagerak nogo o,” yinuk, Iterali yoragagerak.

⁹Yorage nagagerik, ambinom yorage logonet, “Ne ti eyom paga an nen kit yokkirage logonet, At Aliku kinogoba Ala nen laaluguragan mbogut paga menggerak nogo kokwak, yogondak kit kineebe ambik eerogo pinagareegerak wonage me, kit kinawone amburu mbangge logorak ti, aaninggin ambik me, nalik nen eeke logorak meek o, yinuk, yokkiragagirak nogo.

¹⁰

¹¹At Aliku kinombomini inogoba Ala nen wone abuk nggaruk togon yokkiragagerak nogo ndak-ndak, yogondak kineebe ambinom nda'narit namunggup-namunggup aap ineenggi lingginiyak meek aret eerogo pinagage, at ale'nggen kinoba pinagage, eeke logowak o.

¹²Togop eeko logorak op kwe, kit nen aaninggin kinoba age, yi wone ndi wone kinoba age, wone wat-wat yogwe, eekwi kiinok, an nalik nen aaninggin nonggop togon piyangge logorak?

¹³Meek me, kit nen aap kinanebunu lombok yi wone ndi wone abok ineenu iniki warak at oone konengga kero, leenogo wo'nugwi kiinok, kinarum logonet, kinawone mbanggo logowak nduk, mippiyaakit o.

¹⁴Yokkirage mbareegi, kit nen onggo yo'nogo logonet, Wone yo'niragandak ti, op aret me eeruwok o, yinuk, yo'nogo mbareegup,

¹⁵ an nen kinoweewi kinawone amburu mbanggo logorak kinanebunu lombok, iniki warak at oone konengga kero, wogonake nagagirik, ineebe seribu wonage kenok unde logowak nduk ambi mippege, ineebe 100 wonage kenok unde logowak nduk ambi mippege, ineebe 50 wonage kenok unde logowak nduk ambi mippege, ineebe 10 wonage kenok unde logowak nduk ambi mippege, eerogo piinet nage nagagirik, kinanebunu lombok kinawone amburu mbanggo logowak nduk, inom mippiyareegirak nogo o.

¹⁶Ti mippiige nagagirik, ne ti eyom paga aret kinoweewi kinowak loongga nogo yorage logonet, Kit nen kinowe-kinawot Iterali mendek it mban-mban maluk eekwi kenok a, it aap nggiru kinenggela'me wonogwe nogo kit Iterali kinom maluk eekwi kenok a, inawone amburu mbanggo logonet, Yi endage warak, yi endage lek, yinuk, inete yomboombunuk, inawone amburu mbanggo logorak ti mage o. Ata, aakumi inawone amburu mbanggwi ti, Ala unde aret me, it aap ineebe paga kinagabiti mbaka'lek, it inoone yogwe mban kinaruk konembunuk, eeremenggaarak ndak-ndak inawone amburu li'lak aret mbanggo logomunggup o. Ndi, wone aaninggin negen eekkinake kenok ti, an nen inoone konembunuk, inawone amburu mbanikit nduk, wogoren nowagam piya wogo logomunggup o, yinuk, yoragagirak.

¹⁷

¹⁸Yorage nagagirik, ne ti eyom paga yi wone ndi wone kit eeko logorak abok aret li'luk eerogo yokkiragagirak nogo o,” yinuk, yoragagerak.

¹⁹Yorage nagagerik, ti'nuk, ambi yorage logonet, “At Aliku ninogoba Ala nen wone yo'niragagerak nogo ndak-ndak nit o puut Korep nen tu o karu nggwok nonggologo pereegim mondok iya tit kagak o puut nggelok-nggobok aap Amori menggam pa'nggwe nen nok, o Kareti-Mbareneya aret ari wogogurak kineenu nogo o.

²⁰Wogo nogogurik, an nen kit yokkirage logonet, At Aliku ninogoba Ala nen aap Amori inanggween puut nggelok-nggobok nit wo'niraawam nogome muk ari wogoorak me,

²¹at Aliku kinombomini inogoba Ala nen yokkiragagerak nogo ndak-ndak, at Aliku ninogoba Ala nen ninanggween muk wo'niragaarak kagi, yinuk, unde eeppatinuk logomunggup nduk, noorak me, kinagabiti mbakwi, kiniki yungguppegak eekwi, eeriyak ti mage o.

²²Yokkirage mbareegi, kit apit aret an nowagam neya wogo nogogutik, yo'nogo logonet, O nit unggwi nanuk logowam inom, tu nawam inom, o kota nit ari nawam inom, nonggop wonage kaamun? yinuk, inigen yombooni nanuk, yo'nira woraawak nen aap ineebe inaa'nduk nappiyaawok o, yinuk, yo'nireegutak nogo o.

²³Ti yo'nireegutak nogo an abu op lombok aret mbake nagagirik, kit kinanebunu 12 wonogwe nogo kinanebunu ndegek ambitak nggigik eerogo leeninake mbareegi,

²⁴time nen it tu o puut nggelok-nggobok kagak o kobappaga Etokon ari wogo nogogwaarik, o yime inigen yombooneegwaarak o.

²⁵Yomboonggo nogogwaarik, eyo anggen o yime mendek mbaninuk, wo'niri nogo logonet, At Aliku ninogoba Ala nen nggween wo'nirage nogo ti, abu obeelom lombok kogoorak o, yinuk, yo'nira nogogwaarak.

²⁶ Yo'nira nogogwaarak kwe, at Aliku kinogoba Ala nen eeriyak lengganogo yokkiragagerak nogo mbo punuk, o yime woroorak, Nineebi, mbareegutak nogo o.

²⁷Nineebi, mba'nuk, kit kinawooliyana akem time nen kiniki neebi-keebi yogo logonet, At Aliku ALA yi, nit, Eebi, ninomba'nuk, it aap Amori mendek nen nineebe lek eerogo pinanuwak nduk, o Metit nen wo'niren wundi wage nagaarik, it ineenggime pinani wagaarak kogo o,

²⁸yinuk, it ninoreewi nogo nen wone ninikime yagabit tibik-tobok eerogo pinanogo logonet, Lek o. O time aap nit ndak-ndak lek ineebe mondok yo'nggok yerek-nggorek mban wonogwe, o kota time yugum pak mondok mbogut imbirak kunik negen wuppunuk wonogwe, ndi, it aap Enak mendek kunduk time inom aret wonogwe, eekwi iigoorak o, yinuk, yo'nirogogwaarak.

²⁹Yo'nirogo mbareegwa, an nen kit yokkirage logonet, It ineebe paga kiniki lek ogwe, kinagabiti mbakwi, eeriyak ti mage o.

³⁰Kit o Metit paga kinigen lombok kiigak, at Ala nen kit kinake eeke kogogutak nogo kwak, at Aliku kinogoba Ala aa'nduk a'nuk, kinake wim eerigin o.

³¹ Ndi, aap ambi aput mbo pegeelik yarugu wonok nege menggi kwak, at Aliku kinogoba Ala nen kit o karume tu paga wogwe kiigak, kineebe kuurik me aret yarukkiren o yime aret pinagi wagagerak nogo kineenu aret o.

³² Pinagi wage logonet, kinake nen at aa'nduk a'nuk, kinawooliya wuriyak nogo yokkirage, tu woroorak kineenu eeppinagage, eeruwak nduk, o liingge kenok, ndugwi enggela'me a'nuk, wokkiren wage, oonikiya kenok, kani omoonuk negen a'nuk, wokkiren wage, eerit kuurik me aret ndegenggiren wage kagak kwe, kit nen at Aliku kinogoba Ala nogo abet mba'nuk, kiniki at oba panggombulik aret wonogogutak nogo o,” yoragagerak.

³³

³⁴ Yorage nagagirik, ambi yorage logonet, “Kit neebi-neeba yogwe ti eyom paga at Aliku ALA aruk konengge nagagerik, anini nen kumbuk mbangge logonet,

³⁵Kit aap o yogondak maluk lombok ndarak yi, O nggween mili anggiinu lombok wokkiraagin o, yinuk, kinombomini ninom wone abuk nggaruk togon kumbuk mbanogo yoragagim nogome, kit ambiriluk ambi kinigen kaamunggup lek o.

³⁶At Yepune aput Kalep alik mban enegen ka nagin o. Naliku an ALA niniki mbake mban at liirogon iniki-eebe mondok nggaruk togon aret mu'neren nage menggerak me, at iyok pit nagam nogome at inom, apuri inom, it inalik mban wogoraagin, yereegerak nogo o.

³⁷Alom kit kinobaabut paga at Aliku ALA nogo nen anini noba pege logonet, Kat kunduk o time kiyok pi namunggun lek o, yinuk, yo'nereegerak kwe,

³⁸at yeenggwa kege menggerak Nun aput Yotuwa nogo nen perak, aakumi Iterali o time unde eeppatinuk logowak nduk, wogoren unggwi nagin me, kini wuppege logot o.

³⁹Kit kinapuri mbuulogwe-mbaalogwe maluk-obeelom ineenggo'lek ninawim nen kugun ndiniren nagun o, yogotak nogo, it mban o time wogoramenggerak unde eeppatinuk logowak nduk, unggwi nagun o.

⁴⁰Ndi, kit perak, nomoninuk tu o karume niyo Laut Merah nogo menggam pa'nggwe time aret nanip o.

⁴¹Yokkirage mbareegi, kit nen an yo'nogo logonet, Nit at Aliku ALA maluk eeppogoorak kwe, kagak aret at Aliku ninogoba Ala nen wone yo'niragagerak nogo ndak-ndak wim eeri nawok o, yogo nogogutik, O puut nggelok-nggobok time wim eeri noorak ti, iya lek o, mba'nuk, kinalitak lombok kineegin li'luk ee'nuk nawok nduk, eekwi kiigak,

⁴²at Aliku ALA nen an yo'nege logonet, An it inenggela'me logogin lek mbo piige neenok, it inawim nen wundi wogo logonet, tebenogo piyaagun me, it wim eeri nogwe iyo, mage yoret o.

⁴³Yo'nege mbareegi, yokkiragagirak kwe, kinaruk konenulik at Aliku ALA nen eeriyak yokkiragagerak nogo kineebi mbako logonet, kiniki worokot aret puut nggelok-nggobok time wim eeri wogwe me,

⁴⁴it aakumi Amori mendek o puut nggelok-nggobok time wonogwe nogo nen nggiin negen kombogorak ninggikkiren wundi nogo logonet, tebembinagit o Teyit nen mukkiren o Koroma kuli aret pinagi nogogwaarak nogo o.

⁴⁵Pinagi nogwe iinok, kiname kiniyokan nogo nogogutik, at Aliku ALA enggaanom paga yinggu-leenggu yereegutak kwe, at Aliku ALA nen kit kinale yogwe nogo liippunuk, aruk konengga'lek nomonak aret wonagagerak.

⁴⁶Nomonak aret kagak, kit o Kareti mondok elaambirik aret wonogogutak nogo o,” yinuk, yoragagerak.