Read Western Dani Pelaareegerak 12 Bible Online

Pelaareegerak 12 - Western Dani bible

Pelaareegerak 12

¹Yorage nagagerik, ambi yorage logonet, “At Aliku kinombomini inogoba Ala o nggween kit unde a'nuk logomunggup nduk, wokkiraawam nogome ari nogo logomonggotik, kangga'lek awo kineenik wonogo logonet, wone lengganak inom, eeko logorak wone inom, mondok liirogon eerit nogo logorak nogo yi aret o.

²Kit o unde a'nuk logowam time it aakumi inagugi eeko menggam puut-puut tiyarogon paga inom, puut-puut teberogon paga inom, yi eyo ndi eyo engga yiganak-wiganak aago alome inom, wonage nogo abok aret mondok-mondok lek eerogo piinet nogwe,

³ it inagugi eeko menggam lek eerogo pugwi, inagugiwak yebibit yigirik-noonom eerogo pugwi, inagugi eyo arelen yinik nogo kani kunggwi, inagugi ogut ogobakkigirik nogo kalenak-pugunik eerogo piigwi, eeko logomonggotik, inagugi inendage mbanak o time wonage nogo abok aret kagaarogo piyaamunggup o.

⁴Kit nen at Aliku kinogoba Ala oba panggombunuk, alut eeko logonet, it inagugi eeko mengga kwak wakkagak eerugup o.

⁵Ata, at Aliku kinogoba Ala nen kit aakumi Iterali kinanebunu abok aret kinenggela'me kinanggween ambi, An wonage me yime nen mban nendage tiyappogo logowak o, yinuk, leenogo patemenggerak kineenu a'nuk, ambit me time mban nogo logonet,

⁶At Aliku ALA ake kani kuniyak mendek pi nogwe, warogo wogoriyak mendek pi nogwe, kinamendek 10 ambi yendenogo puurak mendek wonok nogwe, Ala wa, yinuk, wogoriyak mendek pi nogwe, wone kumbuk mbanggo logonet, puurak mendek pi nogwe, onggo lek we wogoriyak mendek pi nogwe, lembu-tapi kambin-ndomba inaagalogwe aa'nduk ndarak mendek piya nogwe, eeko logomunggup o.

⁷At Aliku kinogoba Ala ale'nggen kinoba pinagage kagak, yi mendek ndi mendek kineenggi paga nen eerumonggotak nogo obeelom eerigin me, at Aliku kinogoba Ala enggaanom paga time nen kinakuwi-kinapurilogwe kinom kiniki ale'nggen paga nonggo logomunggup o.

⁸At Aliku kinogoba Ala nen yate kokwak kinanggween wokkirage kenok, tat yonggonggologo logowam nogome awo unggwi naga'lek me, kinalitak lombok kiniki koombunuk eekwi kwe, unggwi nogo logomonggotik perak, yogondak eekwi yogobi kokwak eeko logobok o.

⁹

¹⁰Ata, niyo Yoraran mbanogo pegak wunda nogo logomonggotik, at Aliku kinogoba Ala nen kineyate kokwak kinanggween wokkiramenggerak nogome unde eeppatinuk wonogwe kiigak, kiniki ugun tayenak aret logomunggup nduk, kinawim kinaagan-kinambokan nen maluk eeppinagukwak, Aliku ALA nen liirogon kinarum wonage kagak,

¹¹at ake kani kuniyak mendek inom, warogo wogoriyak mendek inom, kinamendek ambi 10 wonage kenok, ambi yendenogo Ala ake puurak mendek inom, Ala wa, yinuk, wogoriyak nogo mendek inom, kinamendek abe, Kat Ala kake pi o, yinuk, kumbuk mbanogo puurak inom, wonok at Aliku kinogoba Ala nen, An wonage me yime nen mban nendage tiyappogo logowak o, yinuk, leenogo patemenggim nogome mban pi nogo logomunggup o.

¹²Pi nogo logonet, kit inom, kinapuri wologwe-komologwe inom, kinayeloman kumi-aap inom, aap Lewi mendek yate kokwak nggween mbanak ambi unde arugun lek kinenggela'me kinom logomunggup nogo inom, abok aret at Aliku kinogoba Ala enggaanom kiniki ale'nggen paga aret eeko logomunggup o.

¹³Ala ake warogo kani kunggak yuurak nduk, kit kiniki mba'nuk nggween alik ambi miirogo pukwak liippogo logomunggup o.

¹⁴Ata, kit kinanebunu ambi anggween at Aliku ALA nen leenogo patemenggim time nen mban Ala ake warogo kani kunggwi, ndi, an nen, Yogop eeko logorak o, yinuk, wone lengganogo yokkiragarak nogo abok aret time nen eekwi, eeko logonu o.

¹⁵Togop eeko logorak kwe, at Aliku kinogoba Ala ale'nggen kinoba pinagage logonet, kinaanggumi ambik lombok wokkiraagin kenok, rusa ilik, at kwak kijang a, ndonggok togon nonggo monggotak nogo ndak-ndak aret kiniki nen uugwe mbakwi nogo mugurok mban kiname lombok wokkiraawam time logonet, aap inoba maluk lenggenak inom, maluk inoba lenggenak lek inom, kinom ugun aret warogo nonggo logorak op aret o.

¹⁶ Nonggo logonet, amiya perak, noorak mondok mage o. Ata, niyo negen kilirogo nggween paga time aret nappogo logomunggup o.

¹⁷Ndi, at Aliku ALA ake pugu gandum inom, eyo anggur amburu ngget toolak inom, eyo tayitun amburu toolak inom, kinaanggumi lembu-tapi kambin-ndomba inaagalogwe aa'nduk ndarak inom, Ala togop wogorikit o, yinuk, kumbuk mbanogo puurak inom, onggo lek we aret Ala wogoriyak mendek inom, Ala wa, yinuk, wogoriyak inom, abok aret kiname time nen nonggo logorak perak, mondok mage o.

¹⁸Ata, kit inom, kinapuri wologwe-komologwe inom, kinayeloman kumi-aap inom, it aakumi Lewi mendek kit kiname kinom logowam inom, abok aret at Aliku kinogoba Ala nen, An wonage me yime mban nendage tiyappogo logowak o, yinuk, o leenogo patemenggim time nen mban, Yi mendek ndi mendek nineenggi paga eekwi niigak, at Aliku ninogoba Ala nen obeelom eeppinanegerak me, yinuk, at Aliku ALA enggaanom paga kiniki ale'nggen paga nonggo logomunggup o.

¹⁹Ndi, o kit unde eeppatinuk logowam time ari nogo logomonggotik, kangga'lek awo kineenik wonogo logonet, it aap inanebunu Lewi mendek ti, we eraanggi teppiyoorak mage o. Ata, liirogon aret kinigen wogonako logomunggup o.

²⁰O peebi at Aliku kinogoba Ala nen wone abuk nggaruk togon yokkiragagerak nogo ndak-ndak aret kinanggween nggwok lombok eerogo pinagage kenok, kit nen mbako logonet, An enggaanggum ambi noorak uugwe ee'nake me, naanggo ambi warogo na, mbakwi kenok, kiniki uugwe mbakwi nogo ndak-ndak aret warogo nonggo logorak ti op aret o.

²¹Ndi, at Aliku kinogoba Ala nen, An wonage me yime nen mban nendage tiyappogo logowak o, yinuk, o leenogo patemenggim time kit kiname nen time noorak abu nda lombok ari nage kenok, an nen, Yogop eeko logorak, yokkirage yi nogo ndak-ndak aret kinaanggumi lembu-tapi kambin-ndomba at Aliku ALA nen wokkiramenggerak nogo kiname time nen kiniki uugwe mba'nuk, ugun aret warogo nenet nogo logomunggup o.

²²Kit rusa ilik, at kwak kijang a, nonggo monggotak ndak-ndak aret aap maluk inoba lenggenak inom, maluk inoba lenggenak lek inom, ugun aret enggaanggum ti nonggo logomunggup o.

²³ Togop aret kwe, ineebe ineenik aganake alom ti, amiya aret me, eebe nonggo logonet, ineenik aganaka amiya nogo inom nonggo logokwak, liippunuk, nonggo logomunggup o.

²⁴Togop aret me, amiya inom nenggak yuurak mondok mage o. Amiya ti, niyo negen nggween paga aret kilirogo nappogo logomunggup o.

²⁵At Aliku ALA nen obeelom mban eerit nogwe kiige logomenggerik, kit kineebe inom, kinapuri peebi ndaganabit namonggotak ineebe inom, obeelom eeppinagage logowak nduk, amiya ti mendek nonggo logorak mondok mage.

²⁶Togop kenok, kinamendek ake leenogo pugu inom, Ala togop wogorikit o, yinuk, kumbuk mbanogo pugu inom, apit aret wonok, o at Aliku ALA nen leenogo patemenggim time mban pi nogo logomunggup o.

²⁷Pi nogo logomonggotik, eebe warogo kani kuniyak nogo warogo eebe inom, amiya inom, apit aret waganogo at Aliku kinogoba Ala ake kani kunggo menggam nogome ake pugwi, ndi, warogo noorak amiya nogo at Aliku kinogoba Ala ake kani kunggo menggam nogome eraanu kilirogo punuk, eebe nogo kit nunggwi, eeko logomunggup o.

²⁸At Aliku kinogoba Ala ari ndak-ndak abu obeelom mban eerit nugwi kiige logomenggerik, kit kineebe inom, kinapuri peebi ndaganabit namonggotak ineebe inom, yi wone ndi wone ambi kinoba aga'lek obeelom mban logorak eeppinagage logowak, an wone lengganogo yokkirage yi, abok aret liippunuk, eerit nogo logomunggup o,” yinuk, yoragagerak.

²⁹Yorage nagagerik, ambi yorage logonet, “At Aliku kinogoba Ala nen aa'nduk a'nuk o kit unggwi nanuk, inanggween ndinggo logomonggotik, ye mbambatinuk logowam aakumi ti, at Aliku ALA nen lek eerogo piige kenok, it inanggween paga ye mbanggologo logomonggotik, wonogo logonet, kit nen yi aakumi ndi aakumi ti, kin wogonako logonet, Kit kinagugi ti, ninom eerit nogo logowok nduk, nonggop eerogo eeko monggotak o? yinuk, kinom eerit nogwe kiinok, pagi keele pugu enggaanok nggerok ari menggi kwak, kit togop aret eekkinabukwak, kiniki liippogo logonu o.

³⁰

³¹It aakumi ti nen inagugi eeko logonet, ogole warak lombok Aliku ALA eebi mbake menggerak nogo mendek eeko logonet, inapuri wologwe-komologwe ineenik iigak waganogo inagugi ake kani kunggo menggaarak me, at Aliku kinogoba Ala alut eeko logonet, it eeko mengga kwak kit ndak-ndak eeko logorak mondok mage o.

³² Ndi, an wone lengganogo yokkirage yi abok aret eerit nogo logonet, wone alik ambi nabenogo pugwi, ambi mbo pugwi, eeriyak mondok mage o,” yinuk, yoragagerak.