Read Western Dani Pelaareegerak 13 Bible Online

Pelaareegerak 13 - Western Dani bible

Pelaareegerak 13

¹Yorage nagagerik, ambi yorage logonet, “Ne ambi paga aap ambi kit kinenggela'me nen mi'nage logomenggerik, Ala nen yo'nege kagak yoraga an aret o, yinuk, ari ilik, Nabi paga peebi eeriyak wone yo'nege kenok yoraga an aret o, yinuk, ari a, nogo mendek agan wage logonet, ineenu agak mendek a, tam warak mendek a, Eeke neyaamunggup o, yinuk,

²yemenggerak nogo abet aret eeke logomenggerik, yokkirage logonet, Wologo wae! Kugiwak alik kineenggo'lek nogo mendek eeri nawok o, yinuk, yokkirage kenok,

³it yogwe nogo kit kinaruk koneniyak mage o. At Aliku kinogoba Ala nen, Iniki inom, ineebe inom, abok aret inogoba Ala an mban iniki kunik ee'nakwi iyaamun ilik, lek a, yinuk, it aap agan wogwe nogo paga kinabut mbanikit nduk, eeppinagage me, it yogwe nogo kinaruk koneniyak mage o.

⁴It aap agan woraagun ti nen kit o Metit aakumi inayeloman tebembinagago wonogwe me, kinagap ndarogo wokkiren wagagerak at Aliku kinogoba Ala nogo oone, Nineebi o, yinuk, taganogo pumunggup nduk, yokkiramenggaarak paga at Aliku kinogoba Ala nen, Yogop eeko logomunggup o, yinuk, wone lengganogo yokkiragagerak nogo mbo punuk, alik mendek paga nomonggiren nawak nduk, eerugun nogo ti, mondok maluk aret me, kinenggela'me nen mi'narugun ti, kambuwak nduk, nggiginogo inenggaawak lek eerogo piigo logomunggup o. Ndi, kit perak, at Aliku kinogoba Ala mban mugurok nogo logonet, at abu'me tebe yinuk, ayuk wukwi, at wone, Yogop ee'nu ndogop ee'nu, yinuk, yokkirage nogo nggirik-nggerok porogo logonet, liirogon aret eekwi, kiniki at paga mban panggonak logonet mugurok nogwe, eeko logomunggup o.

⁶Ndi, ne ambi paga kinore ambi ilik, kinapuri wologwe-komologwe a, kinakuwi kiniki kunik ilik, kinore kimbirak kiniki kunik a, it nen inoone mbawok paga kinikime manako logonet, Kit inom, kinombomini inom, ineenggo'lek mendek

⁷aakumi inanebunu koorok kit logowam yendok-wandok wonogwe ilik, nggween irip-irip nda wonogwe mendek a, Inagugi ninom eeri nawok o, yinuk, yokkirogwe iinok,

⁸it inoone yogwe iigak teppiigwi, it inoone yogwe nogo konenggwi, inabuwa nen inili eerogo teppiigwi, eeriyak mage o.

⁹It togop eerugun nogo ti, kit aap o Metit mendek nen inayeloman eeppinagago wonogwe me, wokkiren wagagerak at Aliku kinogoba Ala nogo kinom tayenogo pinagawok nduk, eekkinabugun ti, kambuwak nduk, inoorogo piyoorak me, inooko logonet, aap ambi nen aap ambi togop agan wage enegen kamenggerak nogo nen aa'nduk yugum waganogo wake kenok, kit Iterali apit aret yugum paga warogo pumunggup o.

¹¹Warogo pugwi kiinok, it aakumi Iterali abok aret konenggo logomenggaarak inagabiti nen aap maluk eeremenggerak togop nogo ambi it inenggela'me nen eerugun mondok lek o.

¹²Ndi, at Aliku kinogoba Ala nen kit kinawi kota ambi wokkiramenggerak time wonogwe me,

¹³it aap maluk mendek kinenggela'me nen mi'nogo logomenggaarik, it ando yorogo logonet, Ala obaane'me kugi kineenggo'lek mendek ninom eeri nawok o, yorogo logonet, it aakumi ti nomoniren naga o, yogwe nogo kinaruk konenggwi kiinok,

¹⁴kit nen wone onggo kin wonok mben wonok yorogwe, wone ti etenggen liirogon maloppugwi, eeko logomonggotik, maluk Ala eebi mbake menggerak mendek ti, kinenggela'me time abet aret eeremenggerak kin age kenok,

¹⁵wooluwak paga aakumi o kota time wonogwe nogo abok aret inoorogo piigwi, inaanggumi inoorogo piigwi, yi mendek ndi mendek nggarenak-pugunik eerogo pugwi, eeko logonet, o nogo mondok pup eerogo pogo logomunggup o.

¹⁶Eerogo piigo logomonggotik, yi mendek ndi mendek inagugun wamonggotak nogo apit aret inawi tinime oolo taati kuwak eerogo punuk, at Ala ake warogo apit aret kani kunggo mengga kwak, inawi wurik inom, inagugun wogo nogo inom, apit aret at Aliku kinogoba Ala iniki yonggo yuwak nduk kani kunumunggup o. Ndi, o nogome obaane'me wuka'lek yi mendek ndi mendek yigirik-noonom aago mban mondok-mondok logonak aret logowak o.

¹⁷At Aliku kinogoba Ala nen wone, Yogop ee'nu ndogop ee'nu, yereegerak an yogondak mamunggirage yi, kinaruk liirogon konembunuk, nggirik-nggerok porogo logonet, obeelom mban eerit nogwe enegen kiinok, at Aliku ALA anini kani omoonuk negen wungge ti, lek age logomenggerik, kinombomini inom wone abuk nggaruk togon kumbuk mbanogo yoragagerak nogo ndak-ndak aret kit kinabuwa mba'nuk teppinagage, iniki kunik eekkinake, kineebe ambik lombok eerogo pinagage, eerigin me, yi mendek ndi mendek maluk kenok, kani kuniyak nduk, leenogo pugu nogo kineenggime wonage kwaakkiyookwak, ambiriluk ambi woorak abu mage o,” yinuk, yoragagerak.