Read Western Dani Pelaareegerak 14 Bible Online

Pelaareegerak 14 - Western Dani bible

Pelaareegerak 14

¹ Yorage nagagerik, ambi yorage logonet, “It yi aakumi ndi aakumi o nggween paga yime menggaarak abok aret inenggela'me nen kit at apuri iniki kundugu logobagip nduk, Aliku ALA nen miirogo pinagage nagagerik, kit at ake leenak Aliku kinogoba Ala apuri aret me, aakumi kanggwi iinok, kinagabolo paga nggawi penek eerogo pakwi, kinenggaawak paga kineeruwak puluk ko eerogo mbanggwi, eeriyak mage o,” yinuk, yoragagerak.

³Yorage nagagerik, ambi yorage logonet, “Kit yi mendek ndi mendek ogole warak mendek nonggo logorak mage o.

⁴Ndi, yi mendek ndi mendek kit ugun nunggo logorak nogo yi o. Lembu, ndomba, kambin,

⁵rusa nggwok, rusa mbuuluk, at kwak kijang, kambin nggwiya, tapi nggwiya, ndomba nggwiya, ti aret nunggo logorak o.

⁶Yi mendek ndi mendek iniyok abe nggaganak iri'ngga lunggunogo wurako nagaatik, kilirogo lagangga kenok, ugun nunggo logorak op aret o.

⁷Ti mendek nunggo logorak op kwe, iri'ngga lunggunogo wurako nagaatik, kilirogo laganggo menggaarak ilik, iniyok abe nggaganak a, nogo perak ti, nunggo logorak mage o. Unta inom, pagi kelinci inom, pagi pelanduk inom, ti, iri'ngga lunggunogo wurako nagaatik, kilirogo laganggwi kwe, iniyok abe nggaganak lek kenok, noorak mage yugu me, nonggo logorak mage o.

⁸Ndi, wam nogo ti, iniyok abe nggaganak aret kwe, iri'ngga lunggunogo wurako nagaatik, kilirogo laganggulik kenok, kit noorak mage yugu me, enggaanggum nunggwi, warak kenok mbaanggogwe, eeriyak mage o.

⁹Niyoome mendek kit ugun nonggo logorak nogo ti, yi yikwe ndi yikwe agabolo omaawi obaga nabenak mondonogo nappugwi nogo mendek inom, amborowak anggege paga niyo kilaarit nega nogo mendek inom, nunggo logorak op aret kwe,

¹⁰niyoome mendek agabolo omaawi obaga nabenak lek agabolo eraabin kwi kenok a, amborowak anggege paga niyo kilaarit nega lek kenok a, ti nonggo logorak mage yugu me, nonggo logorak mage o.

¹¹Yirowe-ndirowe ti, mage lek abok aret ugun nonggo logorak op kwe,

¹²towe nonggo logorak mage nogo ti, towe wu inom, pen ware inom, muruwe inom,

¹³pen ware eeruwak tari inom, mili inom, ya'ngge-ya'ngge ti mendek abok aret inom,

¹⁴towe nggindooni anebunu mendek inom,

¹⁵towe ndindim inom,nggogugi inom, pibit ndagayo inom, towe pili nengga ti mendek abok aret inom,

¹⁶tiyu inom, kani ka'luk mbangga inom, ndindim eeruwak yanggwi inom,

¹⁷towe muumayo inom, mbiliya inom, nggin inom

¹⁸lu mendek inom, ti wagangga anebunu ti mendek inom, ngguundi nogo mendek inom, ti abok aret kit nonggo logorak mage o.

¹⁹Yi mendek ndi mendek ina'naabit warak kwe, iniyok paga nugut tiyak agan nugu menggaarak abok ti, nonggo logorak mage yugu me, nonggo logorak mage kwe,

²⁰yi mendek ndi mendek ina'naabit warak nonggo logorak mage yugu lek kenok perak, ti abok aret kit nonggo logorak op aret o.

²¹ Kit ti, at Aliku kinogoba Ala apuri abu leenak aret me, yi mendek ndi mendek kambemenggaarak kwaakkogwe kiinok, kit nonggo logorak mage kwe, aap nggiru kinawi kota ambime kinom wonage nogo nawak nduk, wogorogwe ilik, aap nggiru kenok inoona kunggologwe a, eeriyak perak op o. Kambin-ndomba aagalogwe warogo lariyak kenok, inagalo elak amburu paga lariyak mage o,” yinuk, yoragagerak.

²² Yorage nagagerik, ambi yorage logonet, “Kit yi tahun ndi tahun paga kineyabume yi mendek ndi mendek awi yappogo logomonggotik, anggen mbanogo punuk, 10 wonage kenok, ambi yendok, ambi yendok, eerogo ake pogo logomunggup o.

²³Pogo logomonggotik, at Aliku kinogoba Ala mondok-mondok ayuk wuko logorak mamunggolaamunggup nduk, gandum inom, anggur amburu ngget toolak inom, eyo tayitun amburu inom, kinaanggumi lembu-tapi kambin-ndomba inaagalogwe iyaalok ndarak inom, 10 wonage kenok ambi yendenogo pumonggotak ti, at Aliku kinogoba Ala nen, An wonage me yime nen mban nendage tiyappogo logowak o, yinuk, leenogo patemenggim at enggaanom paga taati nen nonggo logomunggup o.

²⁴Ndi, at Aliku ALA nen, An wonage me yime nen mban nendage tiyappogo logowak o, yinuk, leenogo patemenggim nogome nda lombok me, ndi, at Aliku kinogoba Ala nen ale'nggen kinoba pinagage logonet, kinamendek ambik wokkiramenggerak 10 wonage kenok, ambi yendenogo pugu nogo wonok tu nda noorak meek kenok,

²⁵kinamendek yendenogo pugu nogo wu perak mban kunggo logomonggotik, wu ti mban keele maa'nuk wonok at Aliku kinogoba Ala nen o leenogo patemenggim time nogo logomonggotik,

²⁶wu ti paga lembu-tapi a, kambin-ndomba a, anggur amburu a, niyo amburu omaawi mendek a, kit kiniki uugwe mbakwi kenok mugurok mban kunggo logomonggotik, kit inom, kinoreewi kinom wonogwe ti inom, apit aret at Aliku kinogoba Ala enggaanom paga taati nen aret kiniki ale'nggen paga nonggo logomunggup o.

²⁷Ndi, it aap Lewi mendek kit kinom logowam time yate kokwak nggween mbanak ambi kit unde arumunggup nogo ndak-ndak it unde arugun lek me, it we eraanggi mbo piyoorak mage o. Ata, liirogon aret kinigen wogonako logomunggup o.

²⁸It aap Lewi yate kokwak nggween mbanak unde arugun lek nogo inom, aakumi nggiru inom, elege moono inom, kumi nanu inom, o kit kinom wonogwe ti, mbi ndonggok togon nonggo logowak nen, kola wogo logowak nduk, tahun mbere abu eeppunuk ambi eerak irip yubuni nage paga mban anggen mbanak 10 wonage kenok, ambi yendenogo ake pogo logomonggotik, wonok kinawi kota time pi wogo logomunggup o. Togop eekwi kiinok, at Aliku kinogoba Ala nen ale'nggen kinoba pinagage kagak, kit kineenggi paga yabu eekwi nogo obeelom mban arit nage kaamunggup o,” yinuk, yoragagerak.