Read Western Dani Pelaareegerak 15 Bible Online

Pelaareegerak 15 - Western Dani bible

Pelaareegerak 15

¹Yorage nagagerik, ambi yorage logonet, “Tahun 6 eeppunuk, ambi yubuni nage paga nomat mbanak nogo lek eerogo piigo logorak aret me,

²lek eerogo piigo logorak nogo ti, yogobi aret. Kit Iterali mendek ambi nen ore ambi amendek anomat mbanak wonage kenok, Aliku ALA nen nomat mbanak lek eerogo piigo logorak eyom yi aret o, yinuk, yereegerak me, kinowe-kinawot ilik, kinore ambi a, Nanomat mbanak koba wonage nogo onggo wo'niriyak, yoriyak mage o.

³Aap nggiru kenok ti, Namendek awi ya'neyet, yoriyak op aret kwe, kit mendek kinore ambi kinanomat oba wonage kenok, We aret kolagandak o, yinuk, oona mari eerogo pogo logomunggup o.

⁴At Aliku kinogoba Ala wone yokkirage nogo abok aret konembunuk eerit nogwe, ndi, an nen o yogondak yi paga wone, Yogop ee'nu ndogop ee'nu, yokkirage yi, abok aret liirogon mugurok nogwe, eekwi kiinok, at Aliku ALA nen eyate kwak kinanggween wokkirage nogome wonogwe kiigak, Aliku ALA nen ale'nggen mondok alik lombok kinoba pinagamenggerak me, aap ineenggi lek ambi kinenggela'me logogun lek aret o.

⁶At Aliku kinogoba Ala nen wone koonogo yokkiragagerak ndak-ndak ale'nggen kinoba pinagamenggerak me, Luulu wo'niraanip o, yinuk, yi aakumi ndi aakumi nggino yoraamunggup lek o. Ata, it yi aakumi ndi aakumi nggino yokkira wogwe iinok perak, wogorogo logomunggup o. Kit nen yi aakumi ndi aakumi inarum wonogo logonet, wone lengganogo yorogo logomunggup kwe, it nen kit kinarum logonet, wone lengganogo yokkirogo logogun lek o.

⁷ At Aliku kinogoba Ala nen kinanggween wokkiramenggim kinawi kota time kinoreewi inenggela'me aap ambi eenggi lek kenok, kinogogumbuk kiniki nggilimi eeriyak mage o.

⁸Ata, Kinamendek ndogop aret we luulu wo'ninip o, yokkirogwe iinok, it lek kenok yokkirogwe nogo ti ndak-ndak aret kiniki ndoobu paga perak togon wogorogo logomunggup o.

⁹Kit kiniki maluk koonggo logonet, Tahun we kolaanip, yuurak eyom tahun 7 nogo abu aret panggoni wagaarak me, yinuk, wogoroorak kineebi mba'nuk, Wo'niraanip, yemenggaarak nogo wogoraga'lek mbo piigo mbarumunggup, it nen kit eerumonggotak paga Aliku ALA yogwi iinok, Kit maluk eekotak, kiyookwak, liippogo logomunggup o.

¹⁰Kineebi mbakak wogorogo logorak mage o. Ata, kiniki ndoobu paga aret wogorogwe kiinok, kit yi yabu ndi yabu eekwi, yi mendek ndi mendek eeriyak mba'nuk eekwi, eekwi kiigak, Aliku kinogoba Ala nen ale'nggen kinoba pinagage logogin o.

¹¹ O kit logowam time aap ineenggi lek, ti mendek lek arugun lek mondok aret wonogo logogun aret me, it aap kinoreewi ineenggi lek logonet, Nit ndi mendek lek me, yeenggwa niraanip o, yokkirogwe iinok, kiniki ndoobu paga aret wogorogo logonu o, yinuk, eeko logorak wone lengganogo yokkirage ti aret o,” yinuk, yoragagerak.

¹² Yorage nagagerik, ambi yorage logonet, “Kit Iberani mendek ambi nen kit mendek kumi ambi ilik, aap ambi a, aap ambi oona kuni wage kenok, kunemenggerak ame yabu eeppiige kagak, tahun 6 abu eeppunuk, ambi paga wondet eerogo teppogo logomunggup o.

¹³Ndi, wondet eerogo teppugwi ti eyom paga at eenggime lek we aret teppuurak mage o.

¹⁴Ata, at Aliku kinogoba Ala ale'nggen nen obeelom eeppinagage nagagerak nogo kokwak, it aap kinayeloman mini wondet eerogo piigwi ti, kinaanggumi kambin-ndomba inom, gandum anggen yigiko monggo'nom wonage nogo inom, anggur aambiranggo monggo'nom wonage nogo inom, mondok nggwik eerogo aret wogorogo logomunggup o.

¹⁵Kit aa'nduk o Metit aakumi inayeloman eeppinagago wonogwe me, Aliku kinogoba Ala nen kit wondet eerogo pinaganuk, wokkiren wundi wagagerak nogo abeko logonip o. Alom ti paga o yogondak an nen wone yi lengganogo yokkirage agarik o.

¹⁶Ndi, aap kinayeloman ambi eebe obeelom logonet, aap kunemenggerak nogo inom, akwe-apuri inom, inabuwa mba'nuk, ari logonet, Kit mbo pinaganuk wundi noorak neebi o, ari kenok,

¹⁷aap nogo ayeloman aago mondok-mondok logonet, kambi noorak kuli ari nawak nduk, eyo nggabonak ambi wagangge logomenggerik, arungga'nggi paga taati nen ayeloman nogo aruk pelenogo puwak o. Ndi, kumi inayeloman logomenggaarak kenok ti, togop mban eerogo piigo logowak o.

¹⁸Kit kinayeloman wondet eerogo piyoorak nogo ti, aakumi onggo kolaawok nduk yabu eeppinagagwi iinok ti, kinayeloman mini kinake yabu eekwi iinok, wogorogo monggotak ti kokwak, ne mbere paga wogoorak kwak aret me, kinayeloman wondet eerogo piyoorak ti paga kiniki wakkoloorak mage o. Tahun 6 paga it kinake yabu eekwi iigak, onggo mbuuluk kologo nagaarak me, kiniki abe paga wondet eerogo piigwi kiinok, kit yi mendek ndi mendek eerit nogwe kiigak, Aliku ALA nen ale'nggen kinoba pinagage logogin o,” yinuk, yoragagerak.

¹⁹ Yorage nagagerik, ambi yorage logonet, “Kinaanggo tapi aagaluk iyaalok nda'nage kenok, yabu eekak yuurak nduk, punogo pugwi, ndomba aagaluk iyaalok nda'nage kenok, eeruwak mbanogo pugwi, eeriyak mage o. Ata, kinaanggumi lembu-tapi inom, kambin-ndomba inom, inenggela'me ndugum nen aagaluk iyaalok ngguunok ndake kenok, Aliku kinogoba Ala ake leenogo pogo logomunggup o.

²⁰Pogo logomonggotik, yi tahun ndi tahun paga Aliku kinogoba Ala leenogo pemenggim enggaanom paga taati nen kit inom, kinaaganapuri inom, pugu ti warogo punuk, larogo nonggo logomunggup o.

²¹Ndi, kinaanggumi inawinde-inobaande eerak, aawi maluk, enegen mbuk, eebe maluk ti mendek abok aret warogo Aliku kinogoba Ala ake puurak mage o.

²²Ndi, maluk kinoba lenggenna'lek inom, kinoba lenggenak inom, abok aret kiname lombok logonet, rusa ilik, at kwak kijang a, ugun nonggo monggotak ti kokwak, pugu nogo warogo ugun nonggo logomunggup o.

²³ Nonggo logonet kwe, amiya perak, nonggo logorak mondok mage o. Ata, niyo negen nggween paga kilirogo nappogo logomunggup o,” yinuk, yoragagerak.