Read Western Dani Pelaareegerak 17 Bible Online

Pelaareegerak 17 - Western Dani bible

Pelaareegerak 17

¹Yorage nagagerik, ambi yorage logonet, “Ndi, lembu ilik, ndomba a, awinde-obaande eerak ilik, eebe maluk eerak a, at Aliku kinogoba Ala nen, Ogole o, yinuk, eebi mbake menggerak me, kit nen togop eerak kenok, Aliku ALA ake pogo logorak mage o.

²At Aliku ALA nen kinanggween wokkiraagin o yaga'lelo kinenggela'me time aap ambi nen ilik, kwe ambi nen a, Ala nen wone abuk nggaruk togon koonogo yokkiragagerak nogo taganogo punuk, at Aliku kinogoba Ala enegen kagak maluk lombok eeke logonet,

³ Ala obaane'me kugi ogut eerogo mippunuk, abu'me tebe yinuk, alut eeri nage ilik, tut inom, oonegen inom, laaluguragan mbogut paga wonage inom, alut eeke a, an, Eeriyak mage o, yagarak kagak ti mendek abok aret eeremenggerak nogo

⁴aakumi nen yokkira wogwe iinok ilik, kit kinalik nen konenggwi kenok a, alom liirogon kwaako logomunggup o. Alom liirogon kwaako logomonggotik, aap maluk ogole warak lombok eeremenggerak ti, aakumi Iterali inenggela'me nen, Abet aret eekerak, kin age kenok,

⁵aap ilik, kwe a, maluk lombok eeremenggerak ti, o kota kinaru unggwi wogo logowam taati wonok wundi nogo logomonggotik, kambuwak nduk, yugum paga iniki togu eerogo warogo pumunggup o.

⁶ Aap mbere ilik, kenagan nen a, Abet aret eekerak ninigen kogoorak o, yogwe iinok, warogo pogo logorak op aret kwe, aap ambit nen mban ari kenok perak, kambuwak nduk, warogo pogo logorak mage o.

⁷ Ndi, warogo puurak kenok perak, aap inigen liirogon kagaarak nogo nen kambuwak nduk, inaa'nduk wakwi iinok, peebi it aakumi abok aret ineenggi wonggok yugum paga warogo puwak o. Aap maluk togoti eekwi iinok, kinenggela'me nen nggiginogo enggaawak lek eerogo piigo logomunggup o,” yoragagerak.

⁸Yorage nagagerik, ambi yorage logonet, “Aap mbere nen at wake at wake eeremenggaarak kenok, aap ambi imbirak nen, Kat onggo pu, kat onggo pu, yogwe iinok, aap imbirak inamiya wun-wun eerak kenok, wone ti mendek kit monggo'nom nen inowak looniyak meek kenok, at Aliku kinogoba Ala nen o leenogo patemenggim nogome piya nogo logomunggup o.

⁹Piya nanuk, aap Ala unde Lewi mendek inom, aap wone inowak loongga ne ti eyom paga time inowak loongge wonage nogo inom, it nen wone amburu mbanogo yokkiraawak nduk, it yoraamunggup o.

¹⁰Yorogwe kiinok, o Aliku ALA nen leenogo patemenggim time nen wone owak loonggo logomenggaarik, Yogop aret ee'nip o, yinuk, yokkirogwe nogo liippunuk, ndak-ndak aret eeko logomunggup o.

¹¹Ndi, Yogop aret eeko logorak o, yinuk, wone yokkirogwe nogo mugurok nogo logonet, kina agigan agak, ogugan agak, eeriyak mage o. Ata, aap wone owak loongga nen, Yogop aret eeko logonip o, yinuk, wone koonogo yokkirogwe iinok, it yagaarak ti, ndak-ndak aret eerit nogo logomunggup o.

¹²Aap ambi at Aliku kinogoba Ala unde logonet, at ake eeke nogo nen yemenggerak ilik, aap wone inowak loongga nogo nen wone yemenggerak a, Meek, mba'nuk, iniki mi'nage logomenggerik, wone yugu nogo taganogo pege kenok, aap ti kambuwak nduk warogo pogo logomunggup o. Aap maluk togoti eekwi kiinok, Iterali inenggela'me nen nggiginogo enggaawak lek eerogo piigo logomunggup o.

¹³Togop eerumonggotak nogo aakumi abok aret inaruk konenggo logomenggaarik, inagabiti nen wone ambi meek mba'nuk, taganogo pugun lek aret o,” yoragagerak.

¹⁴ Yorage nagagerik, ambi yorage logonet, “At Aliku kinogoba Ala nen kinanggween wokkiraawam nogome unggwi nogo logomonggotik, time ye mbambatinuk wonogo logonet, kit nen, Yi aakumi ndi aakumi ninaagan-ambokan inarum wonogwe yi ndak-ndak ninarum logowak nduk, ninowe endagembogut ambi mippatuwok o, yinuk, yogo logomonggotik kenok,

¹⁵at Aliku kinogoba Ala nen aap endagembogut logowak nduk, miiremenggerak kenok mban kinarum logowak nen mippogo logomunggup o. Ndi, mippogo logonet, aap nggiru kenok ti, kit Iterali mendek lek me, mippuurak mage o. Ata, kit kinanebunu Iterali mendek kenok mban mippogo logomunggup o.

¹⁶ Aap ti, mippugwi kiinok, at nen kuda ambik unde wakkolage, ndi, Aliku ALA nen, Ne ambi paga kit o Metit yime kiniyokan woroorak mage o, yinuk, yokkiragagerak kagak, at nen kit yokkirage logonet, O Metit paga kuda kuni nanip o, yinuk, yokkirage, eeke logorak mage o.

¹⁷ Akuwi paga iniki nomoninuk nookwak, kumi ambik wogonake, ndi, eenggi warak logowak nduk, mbuti emas inom, perak inom, ambik lombok kuwak eekkolage, eeriyak mage o.

¹⁸Aap ti, aakumi inarum mi'ndak logonet, eeke logorak ti, eeko logorak wone yugu yi inom, wone lengganogo an yokkirage yi inom, ambokan punuk, ena agigan age, ogugan age, eeke logonet, oreewi meek mba'nuk, iniki tiyappake kero, eeko logorak wone yugu liiru mbanak aap Ala unde porogo wonogwe nogo ndak-ndak mbuku yerek-perek paga liiru mbanggolage logomenggerik, at Aliku ogoba Ala ayuk wukwi eenu age, at inom, apuri ndaganabemenggerak inom, aakumi Iterali inenggela'me inarum abu logonuk aret kwi'nage, eeruwak nduk, mbuku mbanak ti owagam punuk, eebe kangga'lek eenik wonage logonet, kulinik-kalinik liirogon luunggolage logowak o,” yoragagerak.