Read Western Dani Pelaareegerak 2 Bible Online

Pelaareegerak 2 - Western Dani bible

Pelaareegerak 2

¹ Yorage nagagerik, ambi yorage logonet, “Ti'nuk, at Aliku ALA nen an yo'nereegerak ndak-ndak nomoninuk niyo Laut Merah nogo menggam paga o karume nogo nogogurik, o Teyit puut nggelok-nggobok time wanggerit nugwi niigak, o ambik me aret ari nagagerak.

²Wanggerit nugwi niigak, at Aliku ALA nen an yo'nege logonet,

³Kit o maan togon puut nggelok-nggobok time wanggerit nugu nogogutak me, yogondak o omarip paga pa'nggwe time noorak op aret me,

⁴ kat nen it aakumi ti yorage logonet, Awo mbuuluk logonuk negen kinoreewi Etawu ombowologwe o Teyit wonogwe me time keyoppiigak namunggup me, kit kineebe paga it inagabiti mbarukwak, kiniki kwippunuk namunggup o.

⁵An nen o Teyit puut nggelok-nggobok time it inanebunu Etawu mendek unde logowak nduk wogoragagirak me, Inanggween time mbuuluk ambi wo'niraawak, mba'nuk, kiniyok ambi tebenggwi kiinok, wokkiraagin lek me, it kinom wim eerukwak, inanini wunduwak nduk, mbaaniyoorak mage o.

⁶Kit kinambi inom, kinaniyo inom, noorak nduk, kit kinawu paga it inoba onggo mbanogo nanet namunggup o.

⁷Kit yi eekak ndi eekak abok aret eekwi kiigak, at Aliku kinogoba Ala nen ale'nggen kinoba pinagage, tu o karu nggwok nonggologo pereegim yi paga wogwe kiigak, ndegengginake, eerit wage kagak, tahun 40 eereegerak o. Eeke kagak, at Aliku kinogoba Ala kinom logonet, kit kiniki uugwe mbakwi nogo a'me nggilik-nggelok aret eeppinagit wagagerak nogo o.

⁸Ti'nuk, nit nen ninoreewi Etawu ombowologwe o Teyit wonogwe nogo ninambokan piigak, tu o Araba kobak nonggologo pereegim o Elat inom, Etiyon-Nggebet inom, nogo menggam tu ti paga nen melanggogogurak nok, o Mowap karume time aret ari wogogurak o.

⁹ Ari wogo mbareegu, at Aliku ALA nen an yo'nege logonet, O endage At time it aap Lot ombowologwe wiganak unde logowak nduk, an nen wogoragagirak me, Nit ambi unde logorak wo'niraagin, nomba'nuk, it aap Mowap mendek yi, inanini eeppiigwi, kinom wim eerubagip nduk, mbaaniigwi, eeriyak mage o, yinuk, yo'nereegerak nogo o.

¹⁰O endage At nogo ti, o maan nen it aakumi Emim mendek time wonogogwaarak me, it aakumi Emim mendek nogo ti, inomaawi ambik ineebe yerek-nggorek piyaariyo maluk aakumi o Enak mendek inanggup ndak-ndak aret wonogogwaarak o.

¹¹Aakumi nen, Aap Emim mendek ti, aap Enak mendek ndak-ndak aakumi Erepayim mendek aret, mbako nogogwaarak kwe, it aap Mowap mendek nen perak, It aap ti, Emim mendek aret, yogo nogogwaarak.

¹²Ndi, aa'nduk nen aap Kori mendek ti, o Teyit wonogogwaarak kwe, at Aliku ALA nen it Iterali mendek inanggween unde eeppatinuk logowak nduk, eeppiyareegerak nogo ndak-ndak, it Etawu ombowologwe wiganak mendek nen aakumi Kori o Teyit wonogogwaarak nogo ineebe lek eerogo piigo nogogwaarik, inobaane'me it aret unde eeppatinuk wonogogwaarak.

¹³Nogo yo'nege nagagerik, Aliku ALA nen ambinom yo'nege logonet, Yogondak aret kinamendek ko'nok niyo Teret wunda nanip o, yo'nirage mbareegi, nit niyo Teret aret wunda wogogurak o.

¹⁴ Nit tu Kareti-Mbareneya nen ambime unggwagak ambime unggwagak eerit nugu nogogurik, niyo Teret wunda wogogurak kuli ti, tahun 38 aret agagerak. Age kagak, at Aliku ALA nen wone abuk nggaruk togon kumbuk mbanogo yo'niragagerak nogo ndak-ndak, it aap wim eeka ineegin warak inom ndak-ndak ndarak o Metit nen wundi wogogwaarak nogo abok aret aakumi Iterali inenggela'me nen kambit nogogwaarak.

¹⁵It nogo ti, awo unggwi naga'lek iigak, aakumi Iterali inenggela'me nen inenggaawak mbet-mbet lek ogo logowak nduk, at Aliku ALA nen eeppiinet nage nagagerak.

¹⁶Ndi, it aap wim eeka ineegin warak nogo ti, abok aret kambit nogo mbareegwa,

¹⁷at Aliku ALA nen an yo'nege logonet,

¹⁸Kit ne yogondak yi paga aret o Mowap tu o At paga unggwagak nogo logomonggotik,

¹⁹ aakumi inanebunu Amon mendek menggam ari nanuk, inanggween nogo ti, it aap Lot ombowologwe wiganak unde a'nuk logowak nduk, wogoragagirak me, Nit ambi unde logorak wo'niraagin, mba'nuk, inanini eeppiigwi, kinom wim eerubagip nduk, mbaaniigwi, eeriyak mage o, yinuk, yo'nereegerak nogo o.

²⁰O ti kunduk, aa'nduk nen aap Erepayim mendek wonogwe iinok, O ti, aakumi Erepayim mendek aret, mbako nogogwaarak kwe, it Amon mendek nen, O ti aakumi Tamutumim mendek o, yogo nogogwaarak.

²¹It aakumi time menggaarak nogo ti, inomaawi ambik, ineebe yerek-nggorek piyaariyo maluk aakumi o Enak mendek ndak-ndak wonogo menggaarak kwe, at Aliku ALA nen it aakumi Kori mendek inanggween aakumi inanebunu Etawu mendek o Teyit menggaarak nogo wogoraakit nduk, ineebe lek eerogo piige mbareegi, inobaane'me it aap Teyit mendek ye mbanggologo nogogwaarik, yogondak kuli o time wonogwe nogo kokwak, at Aliku ALA nen aakumi inanebunu Tamutumim mendek lek eerogo piige mbareegi, inobaane'me aakumi Amon mendek ye mbanggologo nogogwaarik, wonogwe aret o.

²²

²³Ndi, it aap Awi mendek niyo nggwok yenggenak laut aa'nggi paga nen ogu o Nggata kuli enaagan-ambokan inawi wonogwe nogo ti, it aap Kapotot mendek o Kapotot nen wogo nogogwaarik, it Awi mendek abok aret lek eerogo piinok, it inobaane'me time aap Kapotot mendek nogo aret ye mbambatinuk wonogogwaarak.

²⁴Nogo yo'nege nagagerik, ambi yo'nege logonet, An nen aakumi Amori mendek endagembogut Tikon o Ketibon unde menggerak eebe inom, anggween inom, kit aret wokkiragarak kineenu a'nip o. Muk wokkiragarak me, kit niyo Aronon nggelo'me wunda nogo logomonggotik, o time unde eeppatinuk logomunggup nduk, kinom wim eeri unggwinip o.

²⁵It aakumi yi awi ndi awi menggaarak abok aret kit eeko monggotak kinabok konenggo logomenggaarik, iniki ma'nage, inaganak nuk-nuk irage, kit paga inagabiti lombok mbakwi, kit kiinok inagabolo ne agan nage, eeruwak nduk, eerogo piyaagin o,” yinuk, yo'nireegerak nogo o.

²⁶Yorage nagagerik, ambi yorage logonet, “An nen it aap o karume Keremot nen, Aap o Ketibon inowe endagembogut Tikon wonage me paalungga wariyak wone yori nawak o, yinuk, aap nappiige mbareegi, nogo nogogwaarik, yogo logonet,

²⁷Nit tu kat wonage ti paga wogo logonet, nina agi-ogu yugun lek tu nggwok paga mban nok-nok aret at Aliku ninogoba Ala nen o nit logowam wo'niragagim nogome niyo Yoraran mbaninuk wunda nawok nduk, wogwe me, ndi, wogo logonet, ninambi-ninagi noorak kenok ti, nit ninawu mbuti perak paga kinoba onggo mbanogo nagun me, it aap Etawu ombowologwe o Teyit menggaarak inom, it aakumi Mowap mendek o At menggaarak inom, Tu yi paga woroorak op aret o, yo'nirogogwaarak nogo ndak-ndak, kat togop aret yo'niret o.

²⁸

²⁹

³⁰Yogo mbareegwa, at aap endagembogut Tikon o Ketibon inarum menggerak nogo nen, Kit tu yi paga woroorak mage o, yo'niragagerak nogo o. Ti yo'niragagerak alom ti, at Aliku kinogoba Ala nogo nen at tebenogo punuk, anggween ti, kit kineenggime wokkiraakit nduk, ogogumbuk iniki omaawi eerogo pege nagagerik, anggween wokkiragagerak yogondak wonogwe yi aret o.

³¹Ti'nuk, at Aliku ALA nogo nen an yo'nege logonet, At aap endagembogut Tikon nogo eebe inom, anggween inom, Nineenggime muk wo'niragaarak kagi, yinuk, at anggween kit unde eeppatinuk logomunggup nduk, tebenggo'net nogo logonip o, yinuk, yo'nereegerak o.

³²Ti yo'nege mbareegi, at Tikon awuri ineegin warak inom abok aret o Yakat koorok time ari nanuk, ninom wim namburiyak nduk, eeko mbareegu,

³³at Aliku ALA nen aap Tikon nineenggime wo'nirage mbareegi, nit nen at inom, apuri inom, at awuri ineegin warak inom, abok aret tebenogo piinet wogogurak nogo o.

³⁴Ne ti eyom paga aret yi kota ndi kota at unde menggim tebenogo pugwi, inawi kota lombok menggaarak kumi-aap inom, inapurilogwe inom, ineenik ambi teppiyoolik tigitogon inookwi, eereegurak kwe,

³⁵o kota-kota abok aret tebenogo pereegurak nogo inamindik-inamendek inom, inaanggumi inom, abok aret inagugun waganeegurak nogo o.

³⁶O Arowet niyo Aronon aa'nggi paga wonage kuli nen nok, o kota ambi kobappaga time nen nok, o kota Nggileyat kuli kota-kota abok aret yugum yagat omaawi wurik kagak at Aliku ninogoba Ala nen wo'niragaarak me, tebenogo pereegurak.

³⁷Ti eereegurak kwe, aap inanebunu Amon mendek inanggween niyo Yabok aa'nggi paga inom, o kota-kota puut nggelok-nggobok time inom, at Aliku ninogoba Ala nen nit yo'niragagerak ndak-ndak ambiriluk ambi tebenggoloolik, enaani aret teppereegurak nogo o,” yinuk, yoragagerak.