Read Western Dani Pelaareegerak 20 Bible Online

Pelaareegerak 20 - Western Dani bible

Pelaareegerak 20

¹Yorage nagagerik, ambi yorage logonet, “Ne ambi paga kinawim kinom wim eekwi kiinok, at Aliku kinogoba Ala o Metit nen wokkiren wundi wagagerak nogo nen yeenggwa kiraagin me, it inaguda-inanggweendo inom, aap ineegin warak kit ndak-ndak lek it ineebe ambik lombok aago inom, kinigen iigo logomonggotik, ineebe paga kinagabiti mbariyak ti mage o.

²Kinom wim namburiyak nduk, eekwi kiigak, aap Ala unde ambi aa'nduk ari nanuk, wone yokkirage logonet,

³Kit nowe-nawot Iterali mendek yi wae. Kinaruk logonip o. Kinawim tebenogo piinok, kineegin tiyak yuwak nduk, at Aliku kinogoba Ala lombok kinom nage logonet, yeenggwa kiraagin me, kinawim kinom perenggologo logonet, kiniki lek-lek eekkinake, kinagabiti mbakwi, kinaganak nuk-nuk eekwi, it ineebe paga kiniki a'nggan wo'nage, eeriyak mondok mage o, yinuk, yokkiraawak o.

⁵Yokkirage kenok, it ineegin unde inoweewi nogo nen inawuri wim nambuka nogo wone yogobi yoraawak o. Aap ambi awi ngget wukkolamenggerak kwe, awo nogo yega'lek wonage kagak wim nen wakwi iinok, awi ti, aap alik ambi ye mbanggola unggukwak me, ame noorak op aret o, yinuk, yoge,

⁶aap ambi eyo anggur awi yaremenggerak kwe, anggen awo mbanggolaga'lek kagak wim nen wakwi iinok, aap alik nen anggen mbanogo nengge logokwak me, ame noorak op aret o, yinuk, yoge,

⁷ndi, aap ambi nen, Nakwe kolaakit o, yinuk, miiremenggerak kwe, awo kolaga'lek kagak wakwi iinok, aap alik nen akwe kolookwak me, ame noorak op o, yinuk, yoge, eeruwak o.

⁸Eeke logomenggerik, aap yigin unde inowe ti nen, awuri wim eeka ambinom yorage logonet, Aap ta nen agabiti mbake, iniki lek-lek age, eeke wonage kenok, oreewi iniki togop eeriyak mamunirookwak me, ame noorak o, yinuk, yoraawak o.

⁹Aap yigin unde inoweewi nogo nen inawuri wim nambuka nogo wone abu yorogo logomenggaarik, wim nambuka awuri lombok inom koonogo piigo logowak o.

¹⁰Koonogo piigwi iinok, kit logowam time kinawim kinom wim eeriyak nduk, inawi kota-kota nda wonogwe me, ari nogo logomonggotik, it yorogo logonet, Kit ninom lambunuwok nduk wogo o, yinuk, yorogwe kiinok,

¹¹it aakumi kota time nen, Ninom lambuniyak op aret o, yinuk, inawi pak tu paarogo mambinagagwi iinok, kinayeloman logowak nduk, teppiyaamunggup o. Teppiigo logomonggotik, kinoone omaawi paga yorogwe kiigak, kinake yabu eeppinagago logowak o.

¹²Ndi, Ninom lambuniyak nineebi o, yinuk, kinoba kwi'nogwe iinok perak, inooriyak nduk, inawi paga aret kwi'nari unggumunggup o.

¹³Kwi'nari unggwogwe kiinok, at Aliku kinogoba Ala nen kinawim ti kineenggime wokkirage kenok, kit nen wooluwak paga aap mban tigitogon inoorogo piyaamunggup o.

¹⁴Inoorogo piigo logonet, kumi inom, elege-aabologwe inom, inaanggumi inom, inamindik-inamendek o kota time wonage ti abok aret inom, inagugun kinalitak ko'nok ndi yumunggup o. Kinawim inagugun wogo ti, at Aliku kinogoba Ala nen aret wokkiraagin me, kit aret unde eekkolaamunggup o.

¹⁵Aakumi inawi kota-kota nda lombok wonage ti, togop aret eerogo piyaamunggup kwe, it logowam time yi aakumi ndi aakumi inawi kota-kota wonogwe nogo perak,

¹⁶at Aliku kinogoba Ala nen o kit logowam time yi aakumi ndi aakumi inawi kota-kota ti, kineyate kwak wokkiraagin me, ineenik nogo menggaarak ambiriluk ambi ineenik teppiyoorak mondok mage o.

¹⁷Ata, at Aliku kinogoba Ala nen yokkiragagerak nogo ndak-ndak aret aakumi Ket mendek, Amori mendek, Kanan mendek, Perit mendek, Kewi mendek, Yebut mendek, abok aret ineebe mondok lek eerogo piyaamunggup o.

¹⁸Ala alut eekwi obaane'me inagugi eeko logonet, ogole warak maluk lombok eeko menggaarak nogo, kit mamunggirogwe iinok, kit nen at Aliku kinogoba Ala maluk eerogo pukwak,

¹⁹o kota ambime tebenggolaamunggup nduk, inawi paga kwi'narumonggotak kinom wim eerit nogwe kiigak, elaambirik eerit nogo logonet, eyo-kale ti, anggen yege kenok, kit aret nonggo logorak me, aakumi inooru pogom, eyo ti muurogo puurak op mbakop? Lek aret me, muurogo pugwi, ye mbuti paga eno'mbak pendenogo wurabit wogwe, eeko logorak mage o.

²⁰Ata, eyo anggen nunggulik alik mendek kit kineenu kenok perak, o nogo awo tebenogo pega'lek wim eerit nogo logonet, ambi eeriyak age kenok, muurogo pogo logorak op aret o,” yinuk, yoragagerak.