Read Western Dani Pelaareegerak 21 Bible Online

Pelaareegerak 21 - Western Dani bible

Pelaareegerak 21

¹Yorage nagagerik, ambi yorage logonet, “At Aliku kinogoba Ala nen kinanggween unde arumunggup nduk, wokkiramenggerak nogome wonogo logonet, aakumi ineenggo'lek iigak, aap ambi yabume warak kambemenggerak wonage kwaakkogwe iinok,

²it aap kinoweewi inom, aap wone kinowak loongga inom, it nen aap warak wonage me nen o kota-kota korok-korok enaagan-ambokan taati, Ngge kuli kaamun, yinuk, wakkaawak o.

³Wakkogo logomenggaarik, it aap inoweewi o kota-kota aap warak me koorok wonogwe nogo nen tapi kooli ndugum ti paga yabu eekwi, eyo aaninggin mendek enggaanok paga kwippunuk, wonok nugwi, eeka'lek wonage kero,

⁴wonok niyo porok arilek nage mban menggim kobappaga yabu waganggwi, yi mendek ndi mendek yakwi, eekulik me taati pi nogo logomenggaarik, tapi ndugum nogo enggaanok nggubunogo puwak o.

⁵Ndi, it aap Ala unde inanebunu Lewi mendek nogo ti, at Aliku kinogoba Ala eebe unde logonet ake eekwi, at Aliku ALA endage paga inale'nggen inoba piigwi, wone ambi age kenok koonggwi, aap wat-wat yemenggaarak kenok inawone mbanggwi, eeko logowak nduk, mippiyareegerak me, tapi warak wonage me taa'nogo iigak,

⁶it aap inoweewi o kota-kota aap warak me koorok wonogwe nogo nen tapi enggaanok nggubunik warak nogo obaga ineenggi niyo paga koorogo pogo logonet,

⁷Nit nineenggi paga aap yi amiya wumbugwi, ndi, eebe wakwi kunduk ninigen kogwe, eerulik aret o.

⁸Eerulik aret me, ninogoba Aliku ALA o. Aap ugun kagak warak yi paga amiya it kat kapuri Iterali inoba logokwak, kapuri Iterali inagap ndarogo wogoren wagagindak yi, inom lambunik logowak nduk, nggami aanggo warak yi, wamen o, yinuk, nggwok paga togop yogwe iinok, aap warak amiya nogo aakumi Iterali inoba logogin lek aret o.

⁹Ndi, ti eekwi kiinok, at Aliku ALA enegen kagak wone yugu nogo ndak-ndak aret eerumunggup me, aap ugun kagak warak amiya nogo, Ninoba logogin lek o, yinuk, eyoongga inoba nggoorogo nappogo mengga kwak eerumunggup o,” yoragagerak.

¹⁰Yorage nagagerik, ambi yorage logonet, “Kinawim kinom nambukwi me, at Aliku kinogoba Ala nen kineenggime wokkirage kenok, aakumi ineebe kugun woppiinok piirogo logonet,

¹¹kinenggela'me aap ambi nen kwe kugun wogo ambi abu abe kigirikwe lombok wonage enegen kage logomenggerik, Nakwe aret kolaakit, mbake kenok, kolage logowak o.

¹²Kolage logomenggerik, wonok ame nage kenok, kwe nogo nen at eeruwak mbanogo nappege, eenggabit enegen mbanogo nappege,

¹³kugun wagangga'lek kagak ayum yirik logomenggerak nogo nggoorogo punuk alik yikkolage, eeke logomenggerik, agalo-ogoba inale ari oome wonage kagak, tut ambiret abu penengge kenok, aap nogo nen, Nore aret kola o, yinuk, kolage logomenggerik, imbirak nogo yuurak op aret o.

¹⁴Ndi, imbirak wonage logomenggerik, eebi mbake kenok, kwe ti, eebi mbake kagak imbirak nogo yege logomenggerak me, aap ti nen ayeloman eerogo pege a, eebe paga awu kunggolage a, eeriyak mage o. Ata, kwe nogo iniki nen, Ndime naakit, mbake nogo nawak nen teppuwak o,” yoragagerak.

¹⁵Yorage nagagerik, ambi yorage logonet, “Aap ambi akuwi mbere wogonabemenggerak me, ambi iniki kunik eeke, ambi eebi ombake, eeke wonage kagak, kumi nogo imbirak inaagalogwe aap mban inogoba nogo obaane'me piyamenggerak kwe, apuluk manggu lombok ti, kwe eebi mbake nogo aagaluk aret ndarigin me,

¹⁶inogoba nogo nen eyate wogorage logonet, awone kiliririyak nogo ti, akwe eebi mbake aagaluk ti, manggu ndarak abet aret kagak mbo punuk, akwe iniki kunik aagaluk nogo awone kiliririyak mage o.

¹⁷Manggu ndarak kenok mban ineyate kologo menggaarak me, kwe eebi mbake aagaluk ti, manggu ndarak aret me, eyate nggwok togon at wogoge logonet, awone inom kiliriruwak o. Manggu ndarak kenok ti, ogoba obaane'me li'luk eerogo pako menggaarak me, ogoba eyate inom, awone inom, at obaalombok aret kolage logowak o,” yoragagerak.

¹⁸Yorage nagagerik, ambi yorage logonet, “Aap ambi apuluk wulaga me, agalo-ogoba yogaatak, Eeriyak, eebi mbake, aruk waremenggaarak kwe, inoone liirogon konengge, eeka'lek anobak yugum negen kumbunuk wonage kenok,

¹⁹agalo-ogoba nen wulaga ti, wonok it inawi kota tu unggwi wogo menggam aap inoweewi wone mbangga wonogwe me taati pi nawak o.

²⁰Pi nogo logomenggaarik, it aap inoweewi wone mbangga nogo yorogo logonet, Ninaagaluk-ninapuluk yi, ninoone yogwi nogo, liirogon konengga'lek taganogo punuk, anobak yugum negen kumbunuk iniki nen uugwe mba'nuk ugun-ugun eerit nage, amburu kumili aganaka nogo mendek nengge, eeke menggerak o.

²¹Yorogwe iinok, it aap at awi kota inom wonogwe nogo abok aret nen wulaga nogo kambuwak nduk, yugum paga togu eerogo warogo puwak o. Aap maluk togoti eekwi kenok, kinenggela'me nen nggiginogo enggaawak lek eerogo pugwi nogo, it aakumi Iterali apit aret inaruk konenggo logomenggaarik, inagabiti ambik eerigin o,” yinuk, yoragagerak.

²² Yorage nagagerik, ambi yorage logonet, “Aap ambi warogo eebe eyo paga tugunogo pugwi kenok ti, Ala nen pulunogo pege menggerak me, aap ambi maluk eeremenggerak kenok, kambuwak nduk, Wariyak aret o, yinuk, wako logomenggaarik, eebe warak eyo paga tugunogo pugwi iinok, at Aliku kinogoba Ala nen kineyate kwak nggween wokkirage nogo paga maluk eerogo pukwak, at eebe warak nogo eyo paga tugunik wonage kagak, o kiip ariyak mage o. Ata, warogo punuk, ne ti eyom paga aret eebe warak nogo nggween taanogo pumunggup o,” yoragagerak.