Read Western Dani Pelaareegerak 22 Bible Online

Pelaareegerak 22 - Western Dani bible

Pelaareegerak 22

¹ Yorage nagagerik, ambi yorage logonet, “Ne ambi paga kinore ambi aanggo tapi ilik, ndomba a, kobak aremenggerak kinigen kogo logomonggotik aret kwe, kineenggo'lek mbakak, Koolik o, yinuk, yuurak ti mage o. Ata, ndomba kobak aremenggerak nogo wonok kinore aanggo unde nogo aret wogori nogo logomunggup o.

²Ndi, kinore aanggo unde ti, awi ndaanda wonage kenok ilik, eebe kineenggo'lek kenok a, aanggo nogo waganogo kiname mambunuk wonogwe me, aap ti, kwaakko'net wage kenok, wogogo logomunggup o.

³Kinore ambi aanggo keledai inom, ambogoyum inom, amindik-amendek abok aret kobak aremenggerak kwaakkogo logomonggotik aret kwe, kineenggo'lek mbakak, Koolik o, yuurak ti mage o. Ata, aap aanggo a, amendek a, kage kenok, eeriyak yagarak togop aret eeko logomunggup o.

⁴Ne ambi paga kinore ambi aanggo keledai ilik, tapi a, tu paga ngginnaremenggerak wonage kinigen kogwe kenok, At obaalombok o, yinuk, mbo puurak ti mage o. Ata, kinore aanggo unde nen mippege me, yeenggwaago logorak aret o,” yinuk, yoragagerak.

⁵Yoge nagagerik, ambi yorage logonet, “Aap inayum kagak kumi nen ugun yirikwi, ndi, kumi inayum kagak aap nen ugun yirikwi, eekwi iinok ti, at Aliku kinogoba Ala nen eebi mbake menggerak me, togop eeko logorak mage o.

⁶Ne ambi paga tu paga nogo logonet, towe ambi eyo paga ilik, nggween paga a, awi mbambunuk, ako punuk tebenak wonage ilik, aagalogwe ndappiinok, tebembiinok, wonage a, kinigen iigo logomonggotik, towe iyagalo aagalogwe inom apit aret wogonaburak mage o.

⁷Yi wone ndi wone kinoba aga'lek li a'nuk kanggo logomunggup nduk, towe iyagalo ti, mbo punuk, aagalogwe mban wogonako logorak op aret.

⁸Kit o ngget wuko logonet kenok, kinapuri yigeebu wambemenggaarak paga amiya kinawi ti paga maluk eerogo pukwak, o tiyarogon ndoonogo wurik ti paga yendok-wandok yagat wurogo pogo logomunggup o.

⁹ Eyo anggur eyabu eerak kagak, awi alik mendek anggen inom lambunogo yakwi kiinok, anggen mbanggo logonet, imbirak anggen abe mbanggologo logorak lek me, imbirak lambunogo yako logorak mage o.

¹⁰Ndi, tapi-keledai imbirak lambumbiinok, yabu eeruwak nduk, piyoorak mage o.

¹¹Ligi alik yawenak awut paga ndomba eeruwak laanak imbirak lambunogo yum ambit penggaarogo yiriko logorak mage o.

¹² Kinayum nggorek irip 4 paga ligi laanak pugu'ndalik-pugu'ndalek eerogo punuk, yikkologo logomunggup o,” yoragagerak.

¹³Yorage nagagerik, ambi yorage logonet, “Aap ambi nen kolaga tawe woppunuk, imbirak nogo yege logomenggerik, eebi mba'nuk,

¹⁴kolaga nogo miyuk-meya eerogo endage maluk eeppege logonet, Kwe yi, kolage eyom paga aap ambi imbirak lambunggerak neenggo'lek kagak wagangge nagarik, nimbirak nogo yege logonet, aap imbirak lambunggerak negen kagarak me, nimbirak logorak neebi o.

¹⁵Ari kenok, kolaga agalo-ogoba imbirak nen kolaga nogo awo tawe wonage logonet, aap imbirak nogo yuulik ineenu agak aap inoweewi o kota tu unggwogo menggam wonogwe nogo inigen kaawak nduk, inowagam pi nogo logomenggaarik,

¹⁶kolaga ogoba nogo nen yorage logonet, Napuluk kolaga yi, aap ambi kolaawak nduk, wogogirak kolegerak kwe, eebi mba'nuk,

¹⁷napuluk miyuk-meya eerogo pege logonet, Kwe yi, aap ambi imbirak lambunggerak kagak waganggirak, yegerak kwe, kumi tawe wonagaatik, aap inom nogo yugu logonet, eeko menggaarak nogo, aap ti imbirak nogo yege logonet, amiya wanggerak kayin paga labunik yi, kinigen kaanip o, yinuk, yoraawak o.

¹⁸Yorage kenok, it aap inoweewi nogo nen aap ti wa nogo logomenggaarik, yawi paga warogo punuk,

¹⁹kolaga tawe Iterali mendek endage maluk eerogo pemenggerak onggo wu mbuti perak aaninggin ambiret wakkagak agalo-ogoba wogoranuk, aap nogo akwe aret me, kolaawak o. Kolage logomenggerik, mbo pega'lek imbirak aret kagak kambi noorak kuli aret aruwak o.

²⁰Ndi, kwe nogo tawe wonage logonet, aap inom lambunggerak me, amiya wundulik abet aret yemenggerak kin age kenok perak,

²¹aakumi Iterali mendek inenggali kaawak nduk, ogoba ame wonage logonet, mbabilu ya wukak negen wonagaarak me, kolaga ti, kambuwak nduk, it o kota at wonage me wonogwe nogo apit nen aret yugum paga warogo pogo logowak o. Maluk togoti eekwi kenok, kinenggela'me nen enggaawak lek eerogo pogo logomunggup o.

²²Ndi, aap ambi nen kwe ogonggelo warak ambi imbirak nogo yege kwaakkogo logomonggotik, aap imbirak nogo yemenggerak inom, kwe ti inom, imbirak kambuwak nduk, inoorogo piigo logomunggup o. Maluk togoti eekwi kenok, kit Iterali kinenggela'me nen inenggaawak lek eerogo piigo logomunggup o.

²³Ne ambi paga kolaga ambi awo tawe aap ambi miike wonage me, aap alik ambi nen o kota time imbirak lambungge logomenggerik, nogo yugwi iinok,

²⁴kolaga ti, o kota aret kwe, kwa yuulik aap ti imbirak nogo yege, ndi, aap ti, aap alik akwe miirik wonage mbaka'lek kolaga nogo maluk eerogo pege, eeremenggaarak kenok, kwe-aap imbirak aret kambuwak nduk, o kota tu unggwogo menggam time wogoren wundi nanuk, yugum paga togu eerogo inoorogo piyaamunggup o. Maluk togoti eekwi kenok, kinenggela'me nen inenggaawak lek eerogo piigo logomunggup o.

²⁵Ndi, aap ambi nen kolaga tawe ore miirik wonage me, imbirak endekem lambungge logomenggerik, kolaga ti, neebi-neeba ari kagak, aap nogo nen mban nikkenok imbirak nogo yege kenok perak, aap ti alik aret kambuwak nduk, warogo pumunggup o.

²⁶Ndi, kwe ti perak, maluk eekwi iinok, inooriyak nogo mendek ndak-ndak eerulik me, eebe wariyak lek teppumunggup o. Kolaga ore miirik nogo iniki ugun eyabume nege me, aap ambi nen pippunuk, kwa ari kagak wuke me, aap alik ambi nen yeenggwaari noolik kenok ti, aap ambi ugun wonage me, oreeluk nen kok pippunuk, kambuwak nduk, warogo pege menggi kwak eekerak me, kolaga ti wariyak lek teppumunggup o.

²⁸ Ndi, aap ambi nen kolaga tawe aap ambi miika'lek wonage me, aap ambi nen imbirak lambungge logomenggerik, kolaga nogo eebi mbake kagak aap nogo nen mban nikkenok imbirak nogo yege kwaakkogwe iinok,

²⁹kolaga ti, maluk eeppemenggerak me mbo puurak mage o. Ata, kolaga ti, awu mbuti perak aaninggin ambi oolo wakkagak kolaga ogoba wogo'nuk, akwe aret kolamenggerak imbirak wonage kagak, kambi noorak kuli aret aruwak o.

³⁰ Aap ambi at ogoba akwe kagak wagangge, ogoba enegen taanogo pege, eeriyak mage o,” yoragagerak.