Read Western Dani Pelaareegerak 23 Bible Online

Pelaareegerak 23 - Western Dani bible

Pelaareegerak 23

¹Yorage nagagerik, ambi yorage logonet, “Aap ambi ooli tubunik ilik, ooli wogo a, wonage kenok, at Aliku ALA apuri kuwak eekwi me inom kuwak eeri unggwogo logorak mage o.

²Aap ugun terak ndarak kenok, at inom, apuri ndarak nen nugwa ombowologwe nda'narit namenggaarak 10 kuli inom, abok aret Aliku ALA apuri kuwak eekwi me time inom kuwak eeko logorak ti mage mban.

³ Kit o Metit nen it aakumi Amon mendek inom, Mowap mendek inom, it wonogo menggam tu ti paga wogwe me, mbi inom, niyo inom, wokkira wundi noorak op aret kagak, aap Petot awi Aram-Metopotamiya mendek endage Mbeyot aput Mbileyam nen kugi pulunogo pinagawak nduk, onggo wogogo mbareegwa, eeri wagagerak kwe, at Aliku kinogoba Ala nen kit kinabuwa mba'nuk, at Mbileyam kugi pulunogo pinagareegerak nogo aruk konenulik melak togon ale'nggen kinoba pinagareegerak me, it aap Amon mendek ilik, Mowap mendek a, it ineebe inom, inapuri ndarak nen nugwa inombowologwe nda'narit namenggaarak 10 kuli ari namenggerak nogo inom, abok aret kit Aliku ALA apuri kuwak eekwi me, it kinom kuwak eeri unggwogo logorak mondok mage o.

⁶Kit kineenik wonogo logonet, kinom lambunna'nuk, wone obeelom mbanggwi, inale'nggen mbaruwak nduk, obeelom eeppiigwi, eeka'lek kiigak, kambi noorak kuli ari nawak o.

⁷Ndi, aakumi Erom mendek ti, kit kinoreewi aret me, Inogole o, yinuk, kineebi inombakwi, ndi, aakumi Metit mendek ti, it inanggween paga kit aap nggiru negen wonogogutak me, it kunduk, Inogole o, yinuk, kineebi inombakwi, eeriyak ti mage o.

⁸Inapuri ndarak inom, inombowologwe inom, kit Aliku ALA apuri kuwak eekwi me time kinom kuwak eeko logorak lek kwe, it inombowologwe inapuri kenok perak, kinom kuwak eeko logorak op aret o,” yoragagerak.

⁹Yorage nagagerik, ambi yorage logonet, “Kit kinawim kinom wim nambuko logonet, obari mendek ambi kinoba lenggeniyak ti mage o.

¹⁰Aap ambi kinenggela'me nen oona mendek kiluk togon oba aremenggerak paga eebe maluk aremenggerak kenok, kinawooliya oore'nggam nen endekem wundi nage logomenggerik, wonage logonet,

¹¹o nabu agan nage kagak niyo paga eebe ngguu'mo wakkolage logomenggerik, oonegen abu aret kilu yi nage kenok perak, kinawooliya oore'nggam nogome unggwage logorak op aret o.

¹²Kit kinomayo mboonggo logowam kinawooliya wurik oore'nggam endekem paga nggween ambi leenogo pumunggup o.

¹³Leenogo pogo logomonggotik, nggween kabunogo punuk, kinamayo mboonggo logomonggotik, taambegak yuwak nduk, yi mendek ndi mendek eeka wonage me tegewa ambi inom punogo pogo logomunggup o.

¹⁴At Aliku kinogoba Ala unde wokkinake, kinawim tebenogo piinok, kineegin tiyak ari, eeruwak nduk, kinawooliya wurik enggela'me nege menggerak me, nege logonet, obari warak nogo mendek ambi enegen kage kenok, melak togon mbo pinagukwak, kinoore'nggam abu koorak ndigik-ndegek aago aret logowak o,” yoragagerak.

¹⁵Yorage nagagerik, ambi yorage logonet, “Aap ambi inayeloman logomenggerak kwe, agap ndakko'nok mbaganit kit kiniya wage kenok, at ogoba unde wogori noorak ti mage o.

¹⁶Ata, kinom logowak nduk, o ambi at logorak inikilom mba'nuk miikkolage kenok, time aret logowak o. Ndi, time aret wonage me, kit nen kinayeloman eeppunuk logorak mage o.

¹⁷ Kugi awi wurik me kumi-aap wurinakak yogwe ti mendek kit wologwe-komologwe Iterali mendek togop eeriyak ti mage o.

¹⁸At Aliku kinogoba Ala ti, kumi-aap we ugun wurinakwi ineebe inom, wurinakwi onggo pugu inom, imbirak abu eebi lombok mbake menggerak me, kumi a, aap a, ugun wurinako logonet, onggo wu pugu nogo ti paga, Ala ndogop wogorikit o, yinuk, kumbuk mbanogo punuk, at Aliku kinogoba Ala awooliya wurik me ake pi unggwogo logorak ti mondok mage o.

¹⁹ Ndi, kinawu a, kinambi a, kinamendek nano mendek kinore wogoramonggotak nogo onggo wokkirage kenok, Ambinom oba lunogo wo'niriyak o, yinuk, yoriyak ti mage o.

²⁰O kit unggwi nogo logomonggotik, unde a'nuk logowam time, yi mendek ndi mendek eerumonggotak at Aliku kinogoba Ala nen obeelom mban eerogo pinagage logowak nduk, kinoreewi Iterali mendek ti, kinamendek wogorumonggotak nogo, onggo ambinom nabenogo, Wo'niru o, yoriyak ti mage o. Togop kwe, aap nggiru kinamendek wogorumonggotak kenok perak, onggo ambinom nabenogo, Wo'niriyak o, yinuk, yoriyak op aret o.

²¹ Kinamendek at Aliku kinogoba Ala wogoriyak wone kumbuk mbanogo pogo logomonggotik, mbet-mbet aret wogoga'lek, Peebi wogorikit, mbarit ya pegak nda pegak eerit nogwe ti, wogoga'lek kiinok, at Aliku ALA nen, Wone kumbuk mbanogo pogotak nogo an wo'nega'lek me, Maluk aret eekotak o, yinuk, yokkirookwak, wone kumbuk mbanogo pomonggotak nogo mbet-mbet aret wogogo logomunggup o.

²²Ndi, Ndogop wogorikit o, yinuk, kumbuk mbanogo pega'lek kenok perak, ti maluk lek aret kwe,

²³An ndogop eerikit o, yinuk, kiniki mba'nuk, kinoone paga kumbuk mbanogo at Aliku kinogoba Ala yorumonggotak kenok perak, kinoone paga lombok yumonggotak me, mbet-mbet aret wogogo logonu o.

²⁴Ne ambi paga kinoreeluk ambi ageyo anggur yarak me nogo logonet, anggur anggen noorak eekkinake kenok, ndonggorogon mbanogo nenet noorak op aret kwe, anggen mbanogo kinayuma yonggokko'nok noorak perak, mage o.

²⁵Ndi, ne ambi paga kinoreeluk enggandum yarak me nogo logonet, gandum anggen kineenggi paga nggonenogo nenet nogo logorak op aret kwe, paloowi paga alom mbanogo nagabit noorak perak mage o,” yinuk, yoragagerak.