Read Western Dani Pelaareegerak 24 Bible Online

Pelaareegerak 24 - Western Dani bible

Pelaareegerak 24

¹ Yorage nagagerik, wone ambi aakumi Iterali yorage logonet, “Aap ambi nen kwe ambi wagangge logomenggerik, imbirak logonet, at kwe nogo nen aap nogo enggali aruwak nduk yuurak lek mendek ugun agan nage ogonggelo nogo kage logomenggerik, kwe nogo mbo pikit nduk, liiru mbanogo kwe nogo eenggime punuk, ame nen wumbege kenok,

²oome nogome nen wundi nage logomenggerik, aap alik ambi wamenggerak imbirak logonet,

³aap peebi wamenggerak nogo nen, Kwe kat neebi o, yinuk, mbo pikit nduk, liiru mbanogo kwe nogo eenggime pege logomenggerik, ame nen wumbege kenok ilik, aap nogo kangge kenok a,

⁴aap aa'nduk mbo pemenggerak nogo nen, Nakwe aret me, mok o, yinuk, yoriyak mage o. Aap peebi wamenggerak nogo nen muk yit tarip eerogo pemenggerak kagak wagangge at Aliku ALA nen enegen kage logomenggerik, eebi lombok mbarigin me, maluk togop mendek nikkenok at Aliku kinogoba Ala nen kineyate kwak kinanggween wokkirage nogome unggwi noorak mage o.

⁵Aap ambi akweeluk awo aret wamenggerak kenok, wim eeri nogwe me, Kinom eeri nak o, yogwi, yabu aaninggin warak mendek ambi oba pugwi, eeriyak mage o. Ata, at akwe imbirak ame logonet, yi mendek ndi mendek koongge, akwe iniki ale'nggen mbaruwak nduk, eeppit nage, eeke logowak nduk, tahun ambit paga teppogo logowak o,” yoragagerak.

⁶Yorage nagagerik, ambi yorage logonet, “Aap ambi wu ngginogira wage kenok, wogogo logonet, Nawu obaane'me pegak kamendek kolagak woraanok o, yinuk, gandum anggen aambiranogo menggaarak yugum ti mendek paga at eerogo nengge menggerak me, yugum abena-ogombaga imbirak ilik, ogombaga wonage nogo mban a, woorak mage o.

⁷ Aap Iterali mendek ambi nen at oreeluk kagak kumaappunuk, ayeloman eekkolage, onggo nggerenggolage, eeke kenok, aap ti mondok warogo pogo logowak o. It aap maluk ti mendek eekwi iinok, kinenggela'me inenggaawak lek eerogo piigo logomunggup o.

⁸ Kinagabolo paga kinawin aaga'ne nogo mendek eekkinake kenok, eeko logorak wone an nen it aap Ala unde Lewi mendek yoragagirak mamunggirogogwaarak nogo, mondok liippunuk aret eerit nogo logomunggup o.

⁹ Kit o Metit nen wundi woraanuk, tu paga wogwe kiigak, at Aliku kinogoba Ala nen kwe Miriyam eeppereegerak nogo kiniki abeko logomunggup o.

¹⁰ Kinore ambi nen, Kinamendek ambi we luulu wo'ninip o, ari logonet, Kinamendek wo'nirumonggotak nogo obaane'me wokkiragak namendek kola woraakit o, yokkiramenggerak nogo wokkiraga'lek kenok, kinaburen at ame wa ungguurak mage o.

¹¹Ata, at aap kinamendek wogogwi kiinok, Namendek wokkiraagin o, yemenggerak nogo aret wonok wokkira wundi woraawak nduk, kit endekem taati tokkogo logomunggup o.

¹²Ndi, at nogo eenggi lek aret me, kinamendek obaane'me wokkiramenggerak kagak, at amendek nogo kit porogo tit kiigak, nogo ambi yuurak mage o.

¹³Nogoyum wokkiramenggerak ti paga nogo yege menggerak me, nogo yege logowak nduk, oonegen awo kilu yi naga'lek kagak, anogoyum wogogwi kiinok, aap nogo ti paga nogo yege logonet, ale'nggen kinoba pinagage kagak, at Aliku kinogoba Ala nen, Yi obeelom aret eekwi iigi o, yinuk, kinombarigin o.

¹⁴ It aakumi kit kinowe-kinawot kit mendek nen a, it aakumi nggiru kit kiname kota ambi kinom wonogwe nen a, ineenggi lek me, Nonggop eeruwi? yogwe iigak, yabu eeremenggaarak onggo wogorage logonet, wi-wi aganako logorak mage o.

¹⁵Ata, it ineenggi lek aret me, ndi, yabu eekwi ti eyom aret, Onggo wo'niraagin, mba'nuk, iniki lunik aret wonogwe me, kit nen ne ti eyom paga aret wogoraga'lek kiinok, inoone nggwok paga at Aliku ALA yogwi iinok, at Aliku ALA nen, It eekaarak ti maluk aret eekaarak, kinombarukwak, oonegen kilu yi naga'lek kagak yabu eeremenggaarak ti eyom paga aret onggo wogorogo logomunggup o.

¹⁶ Aap ambi apuluk maluk eeremenggerak paga ogoba kambuwak nduk, warogo pugwi, ogoba maluk eeremenggerak paga apuluk kambuwak nduk, warogo pugwi, eeriyak mage o. Ata, at aap maluk eeremenggerak unde nogo aret obaalombok maluk eekkolamenggerak me, kambuwak nduk, warogo pogo logomunggup o.

¹⁷ Aap nggiru inom, elege moono inom, Meek, mba'nuk inawone ugun-ugun koonogo piigwi, kumi nanu kunduk, Kinamendek wogorogo logonet, ninamendek obaane'me pegak kola woraamunggup o, yinuk, inayum waganggwi, eeriyak mage o.

¹⁸Aakumi Metit mendek nen kit inayeloman eeppinagago wonogwe me, at Aliku kinogoba Ala nen kinagap ndarogo wokkiren wundi wagagerak nogo, kiniki abeko logomunggup o. Alom ti paga wone yi eeko logomunggup nduk, yokkiragi o.

¹⁹ Yi mendek ndi mendek abok aret eerit nogwe kiigak, at Aliku kinogoba Ala ale'nggen kinoba pinagage logowak nduk, kit nen yi mendek ndi mendek yarumonggotak anggen mbanggo logonet, ando teppumonggotak nogo ti'nuk, wa noorak mage o. Ata, aakumi nggiru inom, elege moono inom, kumi togwe inom, kologo logowak nen inake aret teppiigo logomunggup o.

²⁰Kit nen eyo tayitun anggen mbanggo logonet, ando ero paga yugu teppumonggotak nogo ti'nuk, mbani noorak mage o. Ata, aakumi nggiru inom, elege moono inom, kumi togwe inom, it nen mbanggologo logowak nduk, inake aret teppiigo logomunggup o.

²¹Ndi, eyo anggur anggen kunduk, mbanggo logonet, ando ero paga yugu teppumonggotak nogo ti'nuk, mbani noorak mage o. Ata, aakumi nggiru inom, elege moono inom, kumi togwe inom, it nen mbanggologo logowak nduk, inake aret teppiigo logomunggup o.

²²Kit o Metit paga inayeloman a'nuk wonogogutak nogo abeko logomunggup o. Alom ti paga wone yi eeko logomunggup nduk, yokkiragi o,” yinuk, yoragagerak.