Read Western Dani Pelaareegerak 25 Bible Online

Pelaareegerak 25 - Western Dani bible

Pelaareegerak 25

¹Yorage nagagerik, ambi yorage logonet, “Aap ambi imbirak wone wariyak age kenok, aap inowak loonggo menggam time namenggaarak me, it aap inowak loongga nogo nen wone aremenggerak nogo mbeenogo inowak loonggo logonet, at ambi oba abe eerogo pugwi, at ambi oba maluk eerogo pugwi, eeppunuk,

² aap maluk eeremenggerak nogo yawi wariyak aret age kenok, aap inowak loongga nogo nen aap nogo enete wanduk punuk, yawi waruwak nduk, yoramenggerak yawi wako logonet, Aap ninoreeluk yi abu maluk eekerak me, mba'nuk, meek eerogo pogo logonet warukwak, yawi ne 40 agi nggwe negen wariyak ti mage o. Ata, aap inowak loongga inenggaanom paga at maluk eeremenggerak ndak-ndak aret yawi wako logowak o.

⁴ Lembu nen iniyok paga gandum anggen mbelanit nage kagak, ando nunggwi iyo, inambe keele maarogo piigo logorak mage o,” yoragagerak.

⁵ Yorage nagagerik, ambi yorage logonet, “Aap ambi kinoreeluk kinom wonage me, aput wulaga obaane'me pugu lek aret kangge kenok, akwe nanu pemenggerak nogo aap anebunu tayorogon ambi paga wogonabi noorak mage o. Ata, kumi wogonako logonet eeko menggaarak nogo ndak-ndak aret aap kambemenggerak nogo ore liirogon inogoba ambit kenok aret kolage logowak o.

⁶Kolage logomenggerik, kwe nogo aagaluk manggu ndake kenok, aap kambemenggerak nogo Iterali inenggela'me endage ki logowak nduk, aap kambemenggerak nogo aput eerogo pogo logowak o.

⁷ Ndi, aap kambemenggerak ore nogo nen, Kwe nore nanu ti, an woorak neebi o, ari kenok, kwe nogo nen it aap inoweewi kota tu unggwogo menggam wonogwe nogo inowagam nage logomenggerik, yorage logonet, An narogweluk nogo nen aakumi Iterali wonogwe me endage ki logowak nduk, kumi kologo logonet, eeko menggaarak nogo eeriyak neebi, ari kenok, yokkira wagi o.

⁸Yorage kenok, it aap inoweewi o kota wonogwe nogo nen aap nogo wiiremenggaarak wage kenok, eegwa'me wamenggaarak kwe, aap nogo nen, An woorak abu neebi o, yemenggerak togop nogo aret ari kenok,

⁹kwe nanu nogo nen aap inoweewi nogo inenggaanom paga aap arogweluk nogo iyogogut yirik ambi nggoorogo punuk, yoge logonet, Ore endage ki logowak nen obaane'me piyoorak eebi mbake kenok, yogop aret eeriyak me, yinuk, awoori etenggen paga lenggenogo nappuwak o.

¹⁰Ti eeremenggerak paga it aakumi Iterali mendek nen aap nogo owe-awot inabok mbanggo logonet, Iniyok ogut nggoorogo wogoragagerak mendek nogo yi aret o, yinuk, yogo logogun o,” yoragagerak.

¹¹Yorage nagagerik, ambi yorage logonet, “Aap mbere nen ndugwi pugwi me, aap ore nogo akwe wage logomenggerik, ogonggelo nogo ili woorak nduk, eeke logonet, eenggi paga aap ambi nogo ooli nikkage kenok,

¹²kwe ti abuwa mbaka'lek aret eenggi mbanogo nappogo logomunggup o.

¹³ Yi aap ndi aap nen yi mendek ndi mendek aaninggin wakkogo logonet, wi-wi aganako menggaarak nogo ti, at Aliku kinogoba Ala nen eebi mbake menggerak me, at Aliku kinogoba Ala nen kinanggween wokkirage nogome logonet, kineebe li a'nuk kanggo logomunggup nduk, aaninggin wakkagak yugum kole inom, mbuuluk inom, imbirak kinayuma yonggo'nuk nugwi, ndi, yonggologo wakkagak togolowak nggwok inom, mbuuluk inom, imbirak kiname wonage, eeriyak mage o. Ata, aaninggin ari nage menggerak paga ndak-ndak aret wakkagak wogorogwe, ndi, togolowak ambit nogo paga yonggoppunuk, wakkagak wogorogwe, eeko logomunggup o,” yoragagerak.

¹⁷ Yorage nagagerik, ambi yorage logonet, “Kit o Metit nen wundi wogo nogogutik, tu paga wogo logonet, kineebe ndeyak eerogo pinagage, kinowak aagi age, eekkinabeegerak wogwe kiigak, it aakumi Amalek mendek nen Ala inagabiti mbaka'lek wundi nogo logonet, kinoreewi inowak lobak yereegerak kinambokan wogwe inooreegwaarak nogo kiniki abeko logomunggup o.

¹⁹At Aliku kinogoba Ala nen kit unde a'nuk logomunggup nduk, yate negen kinanggween wokkirage nogome kiniki ugun tayenak logomunggup nduk, kinawim kinaagan-ambokan wonogwe nogo tebenogo piinok, time wonogo logonet, aap Amalek nogo inendage ki logokwak, o nggween paga yime inenggaawak lek eerogo piigo logorak nogo mari eerogo puurak mage o,” yinuk, yoragagerak.