Read Western Dani Pelaareegerak 27 Bible Online

Pelaareegerak 27 - Western Dani bible

Pelaareegerak 27

¹Ti'nuk, Muta inom, aap Iterali inoweewi inom, it nen aakumi Iterali yorogo logonet, “Yogop ee'nu ndogop ee'nu, yinuk, wone abok aret nit yogondak yokkirogwe yi, kit nen mondok porogo logonip o.

² Porogo logonet, niyo Yoraran mbanogo pegak enebaga wunda nanuk, at Aliku kinogoba Ala nen kinanggween wokkirage nogome unggwi nogo logomonggotik, yugum yele-kole ambitak waganogo logonogo nggabok mbenak-mbenak eerogo punuk,

³at Aliku kinogobamini inogoba Ala nen wone yokkiragagerak nogo ndak-ndak kinanggween yilak amburu inom, nggiin amburu inom, niyo eneeri negen kila-kila wungge menggim at Aliku kinogoba Ala nen wokkirage nogome unggwi namunggup nduk, niyo nogo wunda nogo logomonggotik kenok, eeko logorak wone yugu yi, tigitogon yugum ti paga liiru mbanogo pumunggup o.

⁴Niyo Yoraran abu aret mbanogo ene paga wunda nanuk, yugum ambitak waganogo logonogo puurak an yogondak yokkirage yi, puut Eban paga logonogo punuk, nggabok mbenak-mbenak eerogo pogo logomonggotik,

⁵ at Aliku kinogoba Ala ake warogo kani kunggak yuurak nduk ogobakkigiko logonet, mbuti tege paga yugum poorogo ogobakkigiriyak mage o.

⁶Ata, yugum itok tumbu paga mban at Aliku kinogoba Ala ake warogo kani kunggak ogobakkigirogo punuk, at Aliku kinogoba Ala ake warogo wogoriyak mendek inom,

⁷Ala inom lambunik logowak nduk, ake puurak mendek inom, kani kunggak obaga punuk, kiniki ale'nggen paga at Aliku kinogoba Ala enggaanom paga taati nen kinambi nonggo logomunggup o.

⁸Ndi, yugum logonogo pugu ti paga eeko logorak wone yugu yi tigitogon kenom lombok liiru mbanogo pumunggup o,” yinuk, yorogogwaarak.

⁹Yorogo nogogwaarik, at Muta inom, it aap Ala unde Lewi mendek inom, it nen aakumi Iterali apit aret yorogo logonet, “Nowe-nawot Iterali yi wae. Kinoone lek kinaruk liirogon konenggo logonip o. Ne yogondak yi paga aret at Aliku kinogoba Ala apuri aret ogotak me,

¹⁰kit nen at Aliku kinogoba Ala oone kinaruk liirogon aret konenggwi, Yogop ee'nu ndogop ee'nu, wone yugu inom, wone lengganak inom, o yogondak yi paga nit yokkirogwe yi, mondok ndak-ndak aret eerit nogwe, eeko logomunggup o,” yinuk, yorogogwaarak.

¹¹Yorogo nogogwaarik, ne ti eyom paga Muta nen wone ambinom lengganogo aakumi Iterali yorage logonet,

¹² “Kit niyo Yoraran abu mbanogo wunda nogo logomonggotik, inanebunu Timeyon, Lewi, Yekura, Itakat, Yutup, Mbeniyamin, it apit nen aakumi yi, inale'nggen inoba piyaawak nduk, puut Nggeritin paga mi'ndak wonogwe,

¹³ndi, inanebunu Uruben, Nggat, Atet, Tebulom, Ndan, Natali, it nen aakumi pulunogo piyaawak nduk, puut Eban paga mi'ndak wonogwe, eekwi iigak,

¹⁴aap Lewi mendek nen inoone nggwok paga aakumi Iterali apit aret yorogo logonet,

¹⁵ At Aliku ALA alut eekwi obaane'me kugi ogut at eebi mbake menggerak nogo mendek it aakumi ineenggi amburu paga yugum mendek a, eyo mendek a, nogo paga ogobakkigirogo pugwi, mbuti mendek paga longgo warogo pugwi, eeppunuk, kote alut eekwi iinok, pulunik aret logowak o, yogwe iinok, It aakumi abok aret nen, Abet aret o, yogwe,

¹⁶ Aap inagalomini-inogobamini inayuk wuka'lek meek eerogo piigwi nogo pulunik aret logowak o, yogwe iinok, It aakumi abok nen, Abet aret o, yogwe,

¹⁷ Aap ambi oreeluk anggween kuli pugu kagak, minogo alik pege kenok, at pulunik aret logowak o, yogwe iinok, It aakumi abok nen, Abet aret o, yogwe,

¹⁸ It aap inigen mbuk tu kobak eerogo piigwi nogo it aap ti pulunik aret logowak o, yogwe iinok, It aakumi abok nen, Abet aret o, yogwe,

¹⁹ It aakumi nggiru inom, elege moono inom, kumi nanu inom, inawone liirogon koonogo piigwi lek ti, pulunik aret logowak o, yogwe iinok, It aakumi abok nen, Abet aret o, yogwe,

²⁰ Aap ambi ogoba enegen taanogo punuk, ogoba akwe imbirak nogo yege kenok, aap ti pulunik aret logowak o, yogwe iinok, It aakumi abok nen, Abet aret o, yogwe,

²¹ Aap ambi nen nggeewo-wam wuke kenok, aap ti pulunik aret logowak o, yogwe iinok, It aakumi abok nen, Abet aret o, yogwe,

²² Aap ambi nen inogoba ambit inagalomini alitak kwe, kolaga ti, iriluk kagak imbirak nogo yege kenok, pulunik aret logowak o, yogwe iinok, It aakumi abok nen, Abet aret o, yogwe,

²³ Aap ambi nen kwe owanggelo kagak imbirak nogo yege kenok, pulunik aret logowak o, yogwe iinok, It aakumi abok nen, Abet aret o, yogwe,

²⁴Aap ambi nen oreeluk kote warogo pege kenok, pulunik aret logowak o, yogwe iinok, It aakumi abok nen, Abet aret o, yogwe,

²⁵Aap ambi maluk eeka'lek kagak aap ambi alik nen waruwak nduk, wu onggo mbanogo nengge kenok, pulunik aret logowak o, yogwe iinok, It aakumi abok nen, Abet aret o, yogwe,

²⁶ Aap ambi eeko logorak wone yugu yi, porogo logonet, liirogon eeka'lek kenok, at pulunik aret logowak o, yogwe iinok, It aakumi abok nen, Abet aret o, yogwe, eeko logowak o,” yinuk, yoragagerak.