Read Western Dani Pelaareegerak 29 Bible Online

Pelaareegerak 29 - Western Dani bible

Pelaareegerak 29

¹Puut Korep paga at Aliku ALA nen eeko logorak wone abuk nggaruk togon Iterali yoragagerak nogo inom lambumbunuk, eeko logorak wone ambi it aakumi Iterali o Mowap wonogwe me, Muta inom koonogo puwak nduk, at Aliku ALA nen yi wone ndi wone Muta yoge mbareegi, yoragagerak yi aret.

²At Muta nen aakumi Iterali abok aret kuwak ari woraawak nduk, wiiragagerak wogo mbareegwa, it yorage logonet, “At Aliku ALA nen o Metit paga aap Pirawun inom, at inom yabu eeko menggaarak inom, aakumi o time menggaarak abok inom, eeppiige nogo kinigen iigwi,

³it inabut mbanikit nduk wakkagak eeke logonet, ineenu agak inagabiti warak mendek inom, eerubok mendek inom, mondok iya lombok eeke nogo kinigen abe nen aret kogwe, eereegutak o.

⁴Kinigen kogogutak kwe, at Aliku ALA nen kit yelok kaamunggup nduk, kiniki ngget wokkirage, kinigen lik togon kaamunggup nduk, kinigen obeelom eeppinagage, liirogon konenggo logomunggup nduk, kinaruk abe eerogo pinagage, eeka'lek o yogondak yi kuli aret wonogo ogotik o.

⁵Ndi, tahun 40 paga an nen tu karume paga wokkiren wage neegak, kinayum yirik nibik ari, kiniyok ogut nggerenak nogo nibinik-ndelenak age,

⁶oroti inom, anggur amburu inom, amburu omaawi mendek inom, namunggup nduk wokkirage, eerulik o. Ata, at Aliku kinogoba Ala at aret kineenu arumunggup nduk, yi mendek ndi mendek lek kenok, at nen aret wokkiranet wage nagagerak nogo o.

⁷ Ndi, nit o yime ari wogo mbareegu, aap o Ketibon mendek endagembogut Tikon inom, o Mbatan mendek aap endagembogut Ok inom, it nen ninooruwak nduk, wundi nogogwaarak kwe, nit nen melak togon it inoorogo piyareegurak nogo o.

⁸ Inoorogo piinok, inanggween waganogo aap Uruben mendek inom, aap Nggat mendek inom, anebunu Manate ando mogonak mendek inom, ineyate negen unde eekkolaawak nduk, wogorogogurak o.

⁹At Aliku kinogoba Ala nen kinombomini Abarakam, Itak, Yakup inom wone abuk nggaruk togon kumbuk mbanogo yorage, kit kunduk wone koonogo yokkirage, eereegerak nogo ndak-ndak, kit at apuri leenogo pinagage, ndi, at kinogoba Ala age, eerubagip nduk, o yogondak aret at Aliku kinogoba Ala kinom wone abuk nggaruk togon koonogo punuk, kumbuk mbanubagip nduk, kinogobamini kinarum menggaarak inom, kinoweewi wone koongga inom, wim wone mbangga kinoweewi inom, kit Iterali aap mban abok aret inom, kinakuwi inom, kinapuri inom, aap nggiru kinom wonogwe kani wuka inom, niyo tooli naga inom, abok aret kuwak eeri wogotak at Aliku kinogoba Ala enggaanom yogondak mi'ndak wonogwe me, yi mendek ndi mendek eerit namonggotak obeelom mban arit nage kaamunggup nduk, eeko logorak yi wone ndi wone abuk nggaruk togon koonak yi, mondok liirogon woppunuk, eerit nogo logomunggup o.

¹⁴Wone abuk nggaruk togon koonogo kumbuk mbanggwi yi, kit kinalik mban kinake eeriyak lek o.

¹⁵Ata, o yogondak kuwak eeri wogotak at Aliku ninogoba Ala enggaanom mi'ndak wonogwe kit yi apit inom, aakumi o yogondak yi paga kinom wonogwe lek peebi nda'narugun nogo inom, abok aret kinake eeriyak o,” yinuk, yoragagerak.

¹⁶Yorage nagagerik, wone ambinom yorage logonet, “Kit o Metit paga nonggop wonogogutak nogo inom, yi aakumi ndi aakumi time wonogwe iigak-iigak nonggop negen wogogutak nogo inom, kit lombok kineenu aret o.

¹⁷Wogo logonet, it inagugi ogut eerak ogole warak mendek inom, Ala alut eekwi obaane'me kugiwak eyo mendek paga, yugum mendek paga, mbuti perak-emas mendek paga, ogobakkigirik nogo inom, kinigen kogogutak o.

¹⁸ Togop aret me, kit kinenggela'me yime aap inom, kumi inom, kinaaganapuri inom, kinanebunu mendek inom, it iniki nen o yogondak yi paga at Aliku kinogoba Ala kinambokan monogo mbo punuk, yi aakumi ndi aakumi inagugi Ala obaane'me alut eekwi me, kinom eeri noorak mage o. Ti eeriyak nogo ti, iri'ngga ale mendek nunggwi iinok kanggwi nogo mendek yarak kokwak aret me, kit eeriyak mage o.

¹⁹Aap ambi nen wone kumbuk mbanggwi yi, aruk konengge logomenggerik, Ala ale'nggen an noba aret logogin, mba'nuk, An nogogumbuk a'nuk, eeriyak koongge nogo mugurok mban naminggirak kwe, kagak, obeelom aret logogin o, ari kenok, at mbaremenggerak ti paga kit maluk eeka'lek mendek inom, it maluk eekwi inom, abok aret lek eerogo pinagagin o.

²⁰Ndi, aap togop eerigin nogo ti, at Aliku ALA nen omaluk lek eerogo pigin mondok lek aret o. Ata, Aliku ALA nen, Aap ti neebi o, yinuk, anini kani omoonuk negen at oba pege logomenggerik, pulunogo piyoorak wone mbuku yi paga liiru mbanak wonage nogo abok aret at oba kwippege logomenggerik, endage o nggween paga yime nen lek eerogo pigin o.

²¹At Aliku ALA nen wone abuk nggaruk togon yo'nirage logonet, pulunogo piyoorak wone nogo, eeko logorak wone mbuku yi paga liiru mbanak nogo ndak-ndak, aap ti inanebunu Iterali mendek abok aret inenggela'me nen leenogo punuk, maluk eeppigin o.

²²Togop eerogo pemenggerak me, kit kinombowologwe peebi nda'narit namenggaarak inom, aakumi nggiru o nda nen kiniya wogwe nogo mendek inom, Aliku ALA nen o yi maluk eerogo pege, andi-pandi inoba piige, eeke nogo inigen kogo logogun o.

²³ Ndi, at Aliku ALA anini kani omoonuk negen mi'nage logonet, o Torom inom, Nggomora inom, Arama inom, Teboyim inom, nggween abut lagak-mbagak eerogo pege logonet, lek eerogo pereegerak nogo ndak-ndak kit kinanggween yi, abok aret kani nen yogu eerogo pege menggi kwak, nggwi-nggwi mban eerogo pege, mut obari nen yogu eerogo pege, eeremenggerak wonage me, yabu waganogo yakwi, yarak anggen mbilangge, yi mendek ndi mendek alik nen wungge, eeka'lek aret logogin o.

²⁴Togop eerak wonage me, yi aakumi ndi aakumi abok nen yogo logonet, Alom nano paga at Aliku ALA anini kani omoonuk negen mi'nage logonet, nggween yi, maluk eerogo pegerak wonage mbakop? Yogwe iinok,

²⁵wone onggo yorogo logonet, Lek o. It aakumi yi, inombomini inogoba at Aliku Ala o Metit nen wogoren wundi wage nagagerik, inom wone abuk nggaruk togon koonogo pereegerak nogo taganogo pugwi iinok, eerogo piyareegerak o.

²⁶At Aliku ALA nen, Kit togop ee'nip o, yinuk, unde eeppiiga'lek iigak, kugi it ineenggo'lek mendek Ala alut eekwi obaane'me ayuk wuko logonet, eeko nogogwaarak me,

²⁷at Aliku ALA anini kani omoonuk negen mi'nage nagagerik, pulunogo piyoorak koonak wone mbuku yi paga liiru mbanak wonage nogo it aakumi ti, inoba kwippiige logonet, inanggween yi paga nen nggiginogo aakumi inambik inanggween paga nappiyareegerak yogondak ineebe lek wonogwe yi aret o, yinuk, yorogo logogun o.

²⁹Yi wone ndi wone ando ti, at Aliku Ala inikime nobarak menggerak kwe, yi wone ndi wone kenom paga yo'nirage nogo ti, mondok-mondok eeko logowak nduk, yo'nirage me, eeko logorak wone yugu yi, nit inom, ninapuri inom, mondok liippunuk, eeko logowok o,” yinuk, yoragagerak.