Read Western Dani Pelaareegerak 9 Bible Online

Pelaareegerak 9 - Western Dani bible

Pelaareegerak 9

¹Yorage nagagerik, ambinom yorage logonet, “Kit nowe-nawot Iterali mendek yi wae. Wone yi liirogon kinaruk logonip o. O yogondak yi paga aret yi aakumi ndi aakumi inanebunu nggwok inomaawi ambik lombok kit kinom ndak ariyak lek logonet, inawi kota-kota nggwok lombok wurogo pugwi, yagat pak mbogut ndak negen wurogo pugwi, eeppunuk wonogwe me, unggwi nanuk, inanggween ndinggologo logomonggotik, ye mbambatinuk logomunggup nduk, niyo Yoraran mbanogo pegak wunda namunggup o.

²Wunda nogo logomonggotik, aap ineebe kunduk yo'nggok yerek-nggorek inomaawi ambik lombok aap Enak mendek wiganak aret me, Aakumi ambi nen aap Enak mendek inom wim eeriyak meek o, yogwe konenggo monggotak nogo aret.

³Togop aret kwe, at Aliku kinogoba Ala aa'nduk age logomenggerik, kani omoonuk nen ne ambit liingge nengge menggi kwak, it togop aret inoorit nage logonet tebenogo piinet nage kagak, at Aliku ALA nen wone koonogo yokkiragagerak nogo ndak-ndak kit nen mbet-mbet aret ineebe lek eerogo piigwi, mugogo wumbiigwi, eerumunggup o.

⁴At Aliku kinogoba Ala aa'nduk age logomenggerik, mugogo wumbiige kenok, kit kiniki mbako logonet, Nit obeelom eeko monggoorak me, o yi unde a'nuk, logowok nduk, pinani wagaarak, mbarubok o. Ata, It aakumi inanebunu abok ti, maluk lombok eeko menggaarak kenok, at Aliku ALA aa'nduk age nagaarik, mugogo wumbiigi, mbarumunggup o.

⁵Kit nen obeelom eekwi, kiniki abu koonak wonogwe, eeko logomonggotak paga aakumi inanggween time unde arumunggup nduk, unggwi namunggup lek o. Ata, at Aliku kinogoba Ala nen wone abuk nggaruk togon kumbuk mbanogo kinombomini Abarakam inom, Itak inom, Yakup inom, yoragagerak nogo a'me lik yuwak nduk, eeke logonet, It aakumi inanebunu abok maluk lombok eekwi me, yinuk, at aa'nduk a'nuk mugogo wumbiyaagin o.

⁶Togop me, kit unde a'nuk logomunggup nduk, at Aliku kinogoba Ala nen o nggween mondok obeelom lombok wokkirage nogo ti, kit obeelom eerit nogwe me, yinuk, wokkiraagin ta lek o. Ata, kinanobak yugum pogom wonogwe kiigak aret kwe, wokkiraagin ti, kineenu a'nip o,” yoragagerak.

⁷Ti'nuk, yorage logonet, “O Metit wundi wogogutak kuli nen yogondak kuli at Aliku kinogoba Ala oone taganogo pit wogwe, o karume time wonogo logonet, anini wunduwak nduk eekwi, eereegutak nogo kobak eerogo puurak ti mage o. Ata, aberak mban logonip o.

⁸Puut Korep paga nen at Aliku ALA anini wunduwak nduk eeko mbareegup, at anini nen mondok kinooriyak nduk eereegerak nogo o.

⁹ Eeke mbareegi, an puut Korep paga laganeegirak nogo ti, kinom eeko logorak wone at Aliku ALA nen abuk nggaruk togon koonogo pereegerak yugum tabak mbere paga liiru mbanak nogo wo'niruwak nduk, lagi nage nagagirik, time wonage logonet, an mbi nengga'lek, yi nengga'lek, o kiip age, o weege, eeke kagak nogo 40 aret yereegirak o.

¹⁰Nogome wonage me, yugum tabak mbere'ndak paga at Aliku ALA eenggi lombok paga nen liiru mbaneegerak nogo an wo'nereegerak. Wone eebe yugum tabak nogo paga mbanak ti, kit kineebe puut abu'me kuwak aago kiigak, kani omoonuk wunuk ari enggela'me time at Aliku ALA nen wone, Yogop ee'nu ndogop ee'nu, yinuk, yokkirage kogogutak nogo aret o.

¹¹O kiip age, o weege, eeke kagak nogo 40 abu aret age mbareegi, eeko logorak wone abuk nggaruk togon koonogo pereegerak yugum tabak mbere paga mbanak nogo, at Aliku ALA nen an wo'nege nagagerik,

¹²yo'nege logonet, Kat kapuri o Metit nen wogoren wundi wagandak nogo nen eeko logorak yoragagirak nogo awo aret kagak taganogo punuk, nobaane'me ambi ogobakkigirogo mippogo nagaarik, alut eeko logonet, abu maluk aret eekwi me, mbet-mbet aret wura nak o, yo'nereegerak.

¹³Yo'nege nagagerik, at Aliku ALA ambinom yo'nege logonet, It aakumi ti, inanobak yugum pogom abet aret iigirak me,

¹⁴inanebunu nggwok iigak kwe, kat paga nen kanebunu abu nggwok age, komaawi mondok ambik age, eeruwak nduk, kat kalik mban teppagage logonet, it aakumi ti, o nggween paga yime inendage toonak ki logokwak, inenggaawak mondok lek eerogo piyoorak mbakirak me, kat nen naru non mbanogo paniyak ti mage o.

¹⁵Yo'nege mbareegi, puut paga kani omoonuk wunuk ari kagak, eeko logorak wone abuk nggaruk togon koonogo pereegerak yugum tabak mbere paga liiru mbanak nogo, neenggi peenok-peenok wonok niyokan puut abu'me taati ari wambi wa'nuk,

¹⁶at Aliku ALA nen wone yokkiragagerak nogo awo aret kagak, mbo punuk, at Aliku kinogoba Ala maluk lombok eeppogo logonet, tu alik nomoninuk, Ala obaane'me mbuti emas paga tapi ogut ogobakkigikkologo nogogutik, mippunuk, alut eekwi kiyareegirak nogo o.

¹⁷Kiige nagagirik, yugum tabak mbere nogo kineraaket nen neenggi omaawi paga mbo wuppi wage mbareegi, yigirik-noonom nage nogo kinigen kogogutak o.

¹⁸Yigi'nage mbareegi, puut paga taati aret at Aliku ALA abu'me nenete wanduk ngginna'nuk, kit kinogogumbuk lombok logonet, at Aliku ALA enggaanom paga yi maluk ndi maluk eerit nogwe kiinok, at anini kinoba pinagukwak, an aa'nduk eereegirak nogo ndak-ndak aret, yi nengga'lek, mbi nengga'lek o kiip age, o weege, eeke kagak nogo 40 aret yereegirak o.

¹⁹ At Aliku ALA iniki aagi a'nuk anini kinoba pinaganuk, kineebe lek eerogo pinagarak ti, nagabiti nen eereegirak o. Ne ti paga kunduk, at Aliku ALA noone yoge neegak, konengge nagagerak.

²⁰Ti'nuk, peebi aap Karun kunduk, at Aliku ALA nen togop aret anini oba pege nagagerik, eebe mondok warikit nduk eeke me, an nen ne ti eyom paga at ake tamban eereegirak o.

²¹Eeke nagagirik, maluk eeko logonet, tapi aagaluk ogut ogobakkigirogo pereegutak nogo waganogo kani paga worarogo wun negen yigirik-noonom eerogo pege nagagirik, niyo eneeri puut paga nen wambi wage me time mbo mambi nagagirak o.

²² Ti'nuk, kit o Tabera inom, Mata inom, Kiborot-Taawa inom, time nen kunduk, at Aliku ALA anini wunduwak nduk eereegutak nogo o.

²³ Ti eeppunuk, at Aliku ALA nen kit yokkirage logonet, O Kareti-Mbareneya yime teppunuk, o kit unde eeppatinuk logomunggup nduk, an wokkiragagim time nanip o, yinuk, yokkiragagerak kwe, kiniki at oba panggombunuk abet mbakwi, oone yokkirage nogo kinaruk liirogon konenggwi, eeka'lek at Aliku kinogoba Ala oone yokkirage nogo taganogo pereegutak nogo o.

²⁴Ndi, an kit ninom iyaalok lombok lambuneegurak eyom paga nen nok yogondak kuli kulinik-kalinik at Aliku ALA oone taganggak mban aret eekwi kiige minggirak o.

²⁵At Aliku ALA nen kineebe abok aret lek eerogo pinagarak ari kenok, an puut paga Aliku ALA enggaanom nenete wanduk ngginna'nuk, o kiip age, o weege, eeke kagak nogo 40 yege logonet, tamban eereegirak.

²⁶Tamban eeke logonet, Kaliku Kitok Menggendak nogoba ALA wae. Kat keenggi omaawi paga iya lombok eeke logonet, yate iniki kunik mengga kwak, kapuri Iterali unde logonok nduk, inagap ndarogo o Metit nen wogoren wundi wagagindak me, it ineebe lek eerogo piyoorak ti mondok mage o.

²⁷Kat kayeloman mini Abarakam inom, Itak inom, Yakup inom, nogo inoba kiniki aberu o. Abeppunuk, it aakumi yi, inobaabut abu maluk lombok inanobak yugum pogom wonogwe inom, it iniki worokot logonet, maluk eekwi inom, kat nen liippiyoorak ti mage o.

²⁸Liippiinok, kapuri yi, lek eerogo piyaamunggun keenok, it aakumi o kat wo'niren wundi wagaginom nogome nen yogo logonet, At Aliku ALA nen aakumi Iterali mendek o wogoroorak koonogo pereegim nogome wogoren piya noorak meek age, ndi, eebi inombake, eeke nagaarik, o karume time inenggaawak lek eerogo inoorogo piyaakit nduk, wogoren wundi nagaarak kogo o, yogo logokwak me, inoorogo piyaagun o, nogoba.

²⁹It aakumi yi, keenggi omaawi lombok paga eeppiige, keenggi titik eeke kenok eeppiige, eeke logonet, wogoren wundi wagagindak keyate kwak kapuri kiniki kunik yi aret o, nogoba, yinuk, tamban mban eeke neegak, nogo 40 yereegirak nogo o,” yinuk, yoragagerak.