Read Western Dani Yaya 11 Bible Online

Yaya 11 - Western Dani bible

Yaya 11

¹ Aap ambi endage Latarut, kwe Mariya oweeluk Marata imbirak inom inawi Mbetaniya ambit me aret wonogogwaarak me, at Latarut nogo andi eereegerak.

² Kwe Mariya nogo ti, ninogoba Yetut iyok paga amburu obari abe mendek mbenambunuk, eeruwak paga woloneegerak nogo aret. At oweeluk Latarut nogo andi eeke mbareegi,

³awurilogwe komologwe nogo nen wone agago nappiigo logonet, “Ninogoba o. Aap kat kiniki kunik nogo andi eekerak wonage o,” yinuk, Yetut yori nawak nduk, nappiyareegwaarak.

⁴Nappiyareegwaarak nogo nogogwaarik, yogo mbareegwa, Yetut konengge nagagerik, yorage logonet, “At Latarut andi eekerak nogo ti, kambuurak nduk eekerak lek o. Ata, Ala aput an ambi eeke neenok tiyappanemenggaarak paga Ala kunduk, tiyanak kin kaawak nduk eekerak o,” yinuk, yoragagerak.

⁵At Yetut nen Marata inom, at awuluk inom, Latarut inom, iniki kunik aret wonagagerak.

⁶Iniki kunik aret wonagagerak kwe, at Latarut andi eekerak nogo konengge nagagerik, iniki nen ne mbere time aret puk wonagagerak.

⁷Puk wonagagerik, at oone waganggwi mendek yorage logonet, “Niniyokan o Yureya nawok o.”

⁸Yorage mbareegi, it nen at yogo logonet, “Ngguru wae! It aap Yakuri mendek nen awo ngget iluk yugum paga kooriyak eekwi iigom nogome kagak noorak mban ari agandik ya?”

⁹Yogo mbareegwa, at Yetut nen, “Wologwe! O ne ambit weegetak paga, oonegen lagi woraanuk, kilu yi nage kagak oonegen 12 ari nage menggerak nogo lek a? Ndi, ti kenok, it aap o liingge paga nogwe iinok, o eya paga nogo menggaarak me, iniyogobit lik togon egiraagin lek o.

¹⁰It aap oonikiya paga nogwe iinok perak, o eya lek apit paga nogwe me, iniyogobit lik togon egirage kagak, nogo logogun o.”

¹¹Ti yorage nagagerik, wone ambi yorage logonet, “Ninoreeluk Latarut nogo, we nogo yege me, an nen eenik eeppi naakit o.”

¹²Yorage mbareegi, it at oone waganggwi nen, “Ninogoba o. At we nogo yege kenok ti, obeelom arigin o,” yinuk, yoreegwaarak.

¹³At Yetut nen Latarut kanggerak me nduk yoragagerak kwe, it nen, “We nogo yege kagak ari,” mbako mbareegwa,

¹⁴Yetut nen pagak togon yorage logonet, “Latarut muk kanggerak o.

¹⁵Ndi, kit kiniki noba panggombunuk abet nombarubagip nduk, an time logolik yime wonagarak nogo kit kinake aret wonagarak me, nale'nggen mbake agarik. Yogondak perak, at wonage me nawok o.”

¹⁶Yorage mbareegi, at Tomat endage ambi Kulu'mbere toonak nogo nen oreewi yorage logonet, “Nit at ninom aret kambuwok nduk, nawok o,” yinuk, yoragagerak.

¹⁷Yorage mbareegi, Yetut wage nagagerik, kanggwi iinok, piigo menggam at Latarut pereegwaarak kagak, nogo kenagan yereegerak koneneegerak.

¹⁸O Mbetaniya ti, kota Yerutalem korotok tu noorak kilometer kenagan negen wonagagerak me,

¹⁹it Yakuri mendek apit nen Marata Mariya imbirak inoweeluk kambeegerak nogo, iniki eyak wappiyaawok nduk, iya nogogwaarak.

²⁰Iya nogogwaarak wonogwe me, at Marata nen Yetut wage konengge nagagerik, Mariya oome kwi'ndak kagak, at endekem ka wundeegerak.

²¹Ka wungge nagagerik, Yetut yoge logonet, “Ai, nogoba o! Kat yime mbet-mbet woraanetak en, an noweeluk kambenetak lek kwe,

²²yogondak kat nen Ala ngginooge keenok, at wokkege menggerak ti, neenu aret o.”

²³Yoge mbareegi, Yetut nen at yoge logonet, “Kat koweeluk nogo eenik a'nuk mi'narigin o.”

²⁴ Yoge mbareegi, at Marata nen, “E o! At peebi o age yobok aakumi ineenik agago mippiige eyom paga eenik a'nuk mi'narigin ti neenu o.”

²⁵Yoge mbareegi, Yetut nen at yoge logonet, “Aakumi ineenik agago mippiige minggirak an aret me, aap ambit ambi nen iniki noba panggombunuk, abet nombake kenok, kambemenggerak kwe, eenik a'nuk, mi'narigin o.

²⁶Ndi, aap ambit ambi eenik logonet, iniki noba panggombunuk, abet nombake kenok, kambigin mondok lek o. Wone yi nogo abet mbaken a, lek a?”

²⁷ Yoge mbareegi, at kwe Marata nen, “E o, nogoba. Ala aput leenogo mippereegerak Keritut o nggween paga yime woroorak nogo, kat aret kombake agarik o,” yinuk, yoreegerak.

²⁸Ti yoge nagagerik, at Marata oweeluk Mariya nogo mbawok wiiri nage nagagerik, wage mbareegi, yoge logonet, “Mariya wae. Ninogoba ngguru aru time logonet, wiigege agaarik o.”

²⁹Yoge nogo Mariya konengge nagagerik, pilak togon mi'na'nuk, Yetut owagam nagagerak.

³⁰Yetut nogo o yaga'lelo nogome unggwi waga'lek Marata imbirak lambuneegwam taa'nogo awo wonage me ka nagagerak.

³¹Ndi, it aap Yakuri mendek kwe Mariya inom oome logonet, iniki eyak wappugwi nogo nen kwe Mariya pilak togon mi'na'nuk, wungge inigen kogo nogogwaarik, “At kanggerak pegam nogome le yi nage,” mba'nuk mugurok nogogwaarak.

³²Mugurok nogwe me, kwe Mariya Yetut wonage me ka nage nagagerik, Yetut abu'me tebe yinuk, “Ai, nogoba! Kat yime mbet-mbet woraanetak en, an noweeluk kambenetak lek o.”

³³Yoge mbareegi, Mariya inom, it aap Yakuri mendek Mariya mugurok nogogwaarak nogo inom, leenggu maakwi Yetut iige nagagerik, “Yi agaarak neebi o,” yinuk, iniki aagi wo agan lagangge logonet,

³⁴“Wologwe! At eebe nggeeme pogotak o?” Yorage mbareegi, “Pekka nawok nduk, mok o, nogoba.”

³⁵Yogo mbareegwa, Yetut le yereegerak.

³⁶Le ari mbareegi, it aap Yakuri mendek nen, “Wologwe! At Latarut iniki kunik lombok me le ari yi kaanip o.”

³⁷Yogwi iigak, it ando nen perak, “Wologwe! At yi, aap enegen mbuk obeelom eereegerak nogo nen at Latarut kangge kero, eenik kagak, obeelom eeriyak meek kenok, wonagaarik, ari mbakop?” yogogwaarak.

³⁸Yogo mbareegwa, Yetut ne ambinom iniki aagi wo agan lagangge kagak, Latarut kambeegerak pereegwam nogome aret nagagerak. Kambeegerak pereegwam nogo ti, ndoome yugum tu narak aret wonage me,

³⁹Yetut nen, “Yugum tu narak ti, ponggonogo nappinip o.” Yorage mbareegi, at kambeegerak awuluk Marata nogo nen, “Nogoba o. Kanggerak kagak nogo kenagan yegerak me, muk obari agaarak o.”

⁴⁰Yoge mbareegi, Yetut nen, “Kat kiniki noba panggombunuk, abet nombake keenok, Ala endage abu tiyanak logonet, eeke menggerak kaamunggun o, yokkigirak nogo lek a?”

⁴¹ Yoge mbareegi, yugum ponggonogo nappogo mbareegwa, Yetut nogo ena ni'nage nagagerik, “Nogoba o. Kat an noone muk konenggendak me wa yokkigi o.

⁴²Kat an noone mondok konengge menggendak nogo, an abu neenu aret kwe, it aakumi ugun mi'ndak wonogwe yi nogo, kat nen nappani wagagindak abet aret mbaruwak nduk, yokkigi o.”

⁴³Yoge nagagerik, at oone nggwok paga, “Latarut wae! Wundi mok o.”

⁴⁴Yoge mbareegi, at kambeegerak nogo eenggi-iyok nggerenak, yum etenggen-ogobak pirik-perek eerak kagak wundi wagagerak. Wundi wage mbareegi, at Yetut nen it yorage logonet, “Nege logowak nduk, yum perenak ti, piinggaanip o,” yinuk, yoragagerak.

⁴⁵ Yorage mbareegi, it Yakuri mendek ambik Mariya ka nogogwaarak nogo nen Yetut eeke inigen kogo nogogwaarik, iniki Yetut oba panggombunuk, abet mbareegwaarak.

⁴⁶Ndi, it ando nen perak, Pariti mendek iya nogo nogogwaarik, Yetut eekerak nogo, mbininogo yorogo mbareegwa,

⁴⁷it aap Ala unde inoweewi inom, it aap Pariti mendek inom, nen aap wone amburu mbangga nogo kuwak eeppiigo nogogwaarik, yorogo logonet, “Aap ti, ineenu agak inagabiti warak mendek apit aret eerit nage menggerak me, nit nonggop eerumun o?

⁴⁸Eerit nege logowak nduk teppugwi niinok, it aakumi abok aret iniki at oba panggombunuk, abet mbako logonet, mugurok nogwe iinok, it aap Oroma mendek nen wogo logomenggaarik, Ala awi wurik inom, nit aakumi nineebe inom, lek eerogo pinanugwi iyoorak me, nonggop eerumun o?” yinuk, yereegwaarak.

⁴⁹Yogo mbareegwa, tahun ti paga aap it mendek ambi Ala unde inowe nggwok wonagagerak endage Kayapat nogo nen, “Wologwe! Kit abu kineenggo'lek kobak logonet yogwe kiigi o.

⁵⁰Aakumi nit mendek nineebe abok aret lek eerogo pinaniyak ti meek o. Ata, aap ambit nen aakumi nit mendek abok ninake kambuurak perak, op aret yi kogo ogotik?” yinuk, yoragagerak.

⁵¹Wone yoragagerak nogo ti, at alik iniki koombunuk nen yoroolik o. Ata, tahun ti paga Ala unde inowe nggwok logonet, eeke nagagerak me, Ala nen at eeppege kagak, peebi at Yetut aakumi Iterali mendek inake kambuurak me nduk, yoragagerak.

⁵² Aakumi Iterali mendek inake mban ti lek o. Ata, it aap Ala apuri yi awi ndi awi mak eerak wonogwe nogo kuwak eeppiyamenggerak iniki ambit lambunik logorak inake kambuurak me nduk, yoragagerak.

⁵³Yoragagerak ne ti eyom paga nen Yetut mondok wariyak nduk, iniki ambit eeppunuk wone mbaneegwaarak.

⁵⁴Wone togop aret mbaneegwaarak me, Yetut aap Yakuri inenggaanom nggwok paga ambinom nege logolik. Time nen o kota ambi endage Eperayim karume koorok time nagagerak. Nage nagagerik, at oone waganggwi mendek inom time aret wonagagerak.

⁵⁵ Wonage me, it Yakuri laago Obaga Mbo Nagagerak lariyak eyom panggoni wage mbareegi, laka'lek iigak, it aakumi inabin kooppunuk, ugun nawok nduk, iname lombok nen o Yerutalem wogogwaarak.

⁵⁶Wogo nogogwaarik, it aap Ala unde inoweewi inom, it aap Pariti mendek inom, nen, “At eebe nggeeme wonage nogo liippogo logomonggotik, eebe nit pigaawok nduk, yo'nira wa'nu o,” yinuk, wone lengganeegwaarak me, it aakumi abok nen Ala awi wurik oore'nggam time inigen luk eeko logonet, “At Yetut lakome woraagin ilik, lek a? Kit nonggop mbakop o?” yinuk, it-it wone mbaneegwaarak.