Read Western Dani Yaya 12 Bible Online

Yaya 12 - Western Dani bible

Yaya 12

¹Nogo 5 yippunuk, laago Obaga Mbo Nagagerak lariyak eyom panggoni wage kagak, at Yetut o Mbetaniya aap Latarut kambeegerak eenik agago mippereegerak wonage me nagagerak.

²Nage mbareegi, it aakumi time nen anooniya lareegwaarak me, Marata nen laago tumburirage kagak, aakumi Yetut inom kwi'na'nuk mbi nunggwi me, Latarut inom nenggegerak.

³ Nunggwi me, at Mariya nen iri'ngga narwastu amburu obari abe mendek liter ambit negen toolak onggo nggwok pogo menggaarak nogo mendek waganogo Yetut iyok paga kilippege nagagerik, at eeruwak paga wolonggagagerak. Wolonggage kagak, amburu obari oome nogome ndak wa'nagagerak.

⁴ Ndak wa'nage mbareegi, at Yetut oone waganggwi mendek ambi Yetut onggo mbanigin Yurat Ikariyot nogo nen,

⁵“A puk! Amburu obari abe mendek yi paga wu 300 dinar kumbunuk aap inamendek lek kenok, wogoroorak mendek eekerak yi, nonggop nduk eeki mbakop?” yereegerak.

⁶Wone yereegerak nogo ti, it aap inamendek lek nogo inabuwa mba'nuk yereegerak ti lek o. Ata, at aap kiraaka mendek me, inawu yonggolak nogo at aret porogo logonet, ando kolagak eeke nagagerak me nduk, yereegerak.

⁷ Ari mbareegi, at Yetut nen, “It aap inamendek lek nogo ti, kinom mondok logomunggup kwe, an perak ninom mondok logogin lek me, kwe yi, an neebe kambunuk, ndoome mambaniyak me nduk, amburu yi eeppanggerak me, teppinip o,” yinuk, yoragagerak.

⁸

⁹Yorage kagak, it Yakuri apit nogo nen Yetut o Mbetaniya nogome wonage konenggo nogogwaarik, at Yetut mban inigen kaawok nduk noolik o. Ata, aap Latarut kambeegerak Yetut nen eenik agago mippereegerak nogo kunduk inigen kaawok nduk, nogogwaarak.

¹⁰Nogo mbareegwa, Yetut nen Latarut eenik agago mippereegerak paga it Yakuri mendek apit aret inoweewi inoone mbo punuk, iniki Yetut oba panggombunuk, abet mbako mbareegwa, it aap Ala unde inoweewi nen Latarut kunduk, waruwok nduk, wone mbaneegwaarak.

¹¹

¹²Ko'lu it aakumi apit laago lakome kuwak ogogwaarak nogo nen Yetut o Yerutalem wage konenggo nogogwaarik,

¹³ eyo wono engga pendenogo wonok Yetut ka wunggo nogogwaarik, inom wogo logonet, “Otana o! Ninogoba Ala endage paga wage yi, wogoppuwak o. Nit aap Iterali ninowe endagembogut yi, wogoppuwok o,” yinuk, keekok agan wogogwaarak.

¹⁴ At Ala nen ari logonet, “O Tiyon aagalogwe yi, kinagabiti yugup o. Kit kinowe endagembogut keledai awooluk amborowak paga kwi'ndak wage yi kaanip o,” yinuk, yereegerak liiru mbanak nogo ndak-ndak, at Yetut keledai awooluk ambi kwaakkage nagagerik, amborowak paga kwi'na'nuk wagagerak.

¹⁵

¹⁶Ti eereegerak nogo at Yetut oone waganggwi mendek aa'nduk kobak wonogogwaarak kwe, peebi at Yetut tiyappege mbareegi, “At togop eeppugun o,” yinuk, liiru mbanak nogo, “Nit aret eeppogoorak kogo o,” yinuk, abereegwaarak.

¹⁷It aakumi ambik Yetut inom logonet, Latarut kambeegerak eenik agago mippege nagagerik, ndoome nen wundi woraawak nduk, “Mok o,” yoge kogogwaarak nogo nen, “Yetut togop eeke kogoorak o,” yinuk, aakumi paganogo yoranet nogogwaarak.

¹⁸Paganogo yoranet nogo mbareegwa, ineenu ariyak inagabiti warak mendek at eereegerak ti, it aakumi apit konenggo nogogwaarik, at Yetut ka wundeegwaarak.

¹⁹Ka wunggo mbareegwa, it Pariti mendek nen it-it wone mbanggo logonet, “Wologo wae! Yi aakumi ndi aakumi abok aret at mugurok nogwe me, nit ambi at eeppurak kenok, abe ariyak lek yi kogo ogotik?” yinuk, yogogwaarak.

²⁰Ala alut eeruwok nduk, laago lakome wogogwaarak nogo ti, it aakumi Yunani mendek inom aret wogogwaarak me,

²¹aap o Nggalileya awi Mbetayira mendek endage Piliput nogo owagam nogo nogogwaarik, yogo logonet, “Ninogoba wae! Nit Yetut kaawok nduk, wogo o.”

²²Yogo mbareegwa, at Piliput nen Andereyat yori nage nagagerik, ti'nuk, imbirak Yetut yori nogogwaarak.

²³Yogo mbareegwa, at Yetut nen, “An aap aret nda'nagagirak tiyappaniyak eyom muk panggoni wagaarak o.

²⁴Mbato awi nggween paga yakaatak agabolo nggonengga'lek kagak, ambit aret menggerak o. Ndi, agabolo nggonengge nagaatik, awi mbilangge kenok perak, anggen ambik aret yege menggerak o.

²⁵ Aap ambit ambi nen at eebe eenik logorak inikilom mbake kenok, at eebe kobak aret arigin o. Ndi, o nggween paga yime logonet, at eebe eenik logorak eebi mbake kenok, eenik mondok-mondok aret logogin o.

²⁶Aap ambit ambi nen an nake eeriyak mbake kenok, mondok mu'neren aret wage logowak o. An logogin nogome nayeloman kunduk nimbirak time aret logogun o. Ndi, an nake eeke kenok, nogoba nen at tiyappigin o, yinuk, mondok abet aret yokkiragi o,” yoragagerak.

²⁷Yorage nagagerik, at nen ari logonet, “Yogondak niniki abu puru yegerak me, an nonggop yi o? Yogondak eeppaniyak koonggwi yi, eeppanugwi iyo, lek eerogo pu o, nogoba, yori ilik?” mbareegerak mendek, ti'nuk, ogoba yoge logonet, “Lek o. Yi eeppanuwak nduk aret wagagirak me,

²⁸Nogoba o. Kat kendage tiyappatu o,” yinuk, yoreegerak. Yoge mbareegi, mbogut paga nen oone ari logonet, “Nendage muk tiyappakirak me, ambinom aret tiyappatigin o.”

²⁹Yinuk, it aakumi ambik taati wonogogwaarak nogo mbogut paga nen oone ari konenggo nogogwaarik, “Ie! Ti o ngguurubu ari o,” yogwe, ndi, it ando nen, “Lek o. Malayikat nen wone ambi at yoge o,” yogwe, eereegwaarak.

³⁰Eeko mbareegwa, at Yetut nen, “Wologwe! Wone konenggotak nogo ti, an neenok ari lek o. Kit kiinok aret yigi o.

³¹It aakumi o nggween paga yime menggaarak inowak loonogo maluk inoba piyoorak nogo, o yogondak yi aret o. At o nggween paga yime unde menggerak nogo tebenogo puurak yogondak aret o.

³²Togop kwe, aakumi nggween paga mendek nen an mippanugwi iinok perak, an nen yi aakumi ndi aakumi abok aret nowagam woraawak nduk, iniki kooninabikit o,” yinuk, yoragagerak.

³³Wone yoragagerak nogo ti, it aakumi nen at nonggop eerogo pugwi iinok, kambigin ineenu aruwak nduk, yoragagerak.

³⁴ Yorage mbareegi, it aakumi nogo nen at yogo logonet, “Ala nen, An leenogo mippereegirak Keritut nogo ti, eenik mondok-mondok aret, logogin o, yinuk, yereegerak liiru mbaneegerak nogo, nit konenggwi kwe, At aap aret nda'nagagerak peebi mippuurak, yagandak ti, nonggop yagan o? Aap aret nda'nagagerak ti, ta o?”

³⁵Yogo mbareegwa, at Yetut nen it yorage logonet, “Eya eekkinake menggerak nogo ne ambiriluk kinom logogin o. Kiniki o apit pogom eekkinabi wage kero, eya eekkinake kagak, nogo logonip o. Aap ambit ambi nen o apit paga nage kenok, Ndime noorak, at eenggo'lek kagak, nage menggerak.

³⁶At eya eekkinake nogo kinom logonet, at apuri arubagip nduk, kiniki eya nogo oba panggombunuk, abet mba'nip o,” yinuk, yoragagerak. Wone nogo yorage nagagerik, at Yetut nogo aakumi mbo piinok, at kwaakkogwe iyo, kumaa'nari nagagerak.

³⁷Aakumi ineenu ariyak inagabiti warak mendek abok aret it inenggaanom eeke nagagerak kwe, iniki at oba panggombunuk, abet mbaka'lek aret wonogogwaarak.

³⁸ Abet mbaka'lek wonogogwaarak nogo ti, aap Ala yoge kagak yoraga Yetaya nogo nen ari logonet, “Ninogoba o. Wone nit agan wogoorak nogo, taani nen abet mbakwi, Ndi, kat keenggi omaawi tiyanak nogo, taamini nen inigen kogwe, Eereegwaarak mbakop?” yinuk, yereegerak liiru mbaneegerak nogo, a'me lik yereegerak o.

³⁹ Ndi, wone ambi Ala nen ari logonet, “It aakumi ti, inigen kogwe, iniki liippugwi, Eeppunuk, Yunggup melak eekwi iinok, an nen obeelom eeginake neyo, Iniki mbuk eerogo piige, iniki apit eerogo piige, Eereegirak o,” yinuk, yereegerak Yetaya nen liiru mbaneegerak nogo ndak-ndak, iniki apit eerogo piyareegerak me, it iniki at oba panggombunuk, abet mbariyak abu meek aret wonogogwaarak.

⁴⁰

⁴¹At Yetaya wone yoragagerak nogo ti, Keritut abu tiyanak kage nagagerik, abok mbiningge logonet, yoragagerak.

⁴²At Yetaya togop aret liiru mbaneegerak kwe, kagak, aakumi inoweewi apit aret iniki Yetut oba panggombunuk, abet mbareegwaarak. Abet mbareegwaarak kwe, it Pariti mendek nogo Yakuri tamban eeko menggam nen wumbiigwi iyo, inagabiti nen, “Nit at oone waganggwi mendek aret o,” yinuk, pagangga'lek aret wonogogwaarak.

⁴³ It nogo ti, Ala nen tiyappinaniyak mbaka'lek logonet, “Aakumi nen tiyappinanuwak,” mban inikilom mbako nogogwaarak ti paga, “Nit at oone waganggwi mendek aret o,” yinuk, pagangga'lek aret wonogogwaarak.

⁴⁴Togop mbakwi iigak, at Yetut oone nggwok paga it yorage logonet, “Kit ambi kiniki noba panggombunuk, abet nombakwi kiinok, an mban abet nombakwi lek o. Ata, at nappani wagagerak nogo aret kiniki oba panggombunuk, abet ombako monggotak.

⁴⁵Kit ambi nen an kinigen neegwi kiinok, at nappani wagagerak nogo aret kinigen kogo monggotak.

⁴⁶Kit ambi nen kiniki noba panggombunuk, abet nombakwi kiinok, o apit paga wonogwe kiyo, o eya paga logobagip nduk, an eya pogom aret o nggween paga yime wagagirak.

⁴⁷Kit aakumi abok nggween paga monggotak nogo, kinowak loonogo maluk kinoba pinagakit nduk, woroolik o. Kinagap ndarikit nduk aret wagagirak me, kit ambi nen an noone konembunuk, eekwi lek kiinok, an nen kinowak loonogo maluk kinoba pinagagin lek o.

⁴⁸Kit ambi nen an mbo panugo logonet, an noone waganggwi lek kiinok, kinowak loonogo maluk kinoba pinagarak nduk ambi wonage o. An niniki koombunuk nen wone yokkirage logolik o. Ata, an nogoba nappani wagagerak nogo nen, Yogop yu o, ndogop yu o, yinuk, lengganogo yo'nege kenok, yokkirage minggirak me, o age yobok togon an wone yokkirage nagarak nogo paga kinowak loonogo maluk kinoba pinagagin o.

⁴⁹

⁵⁰Ndi, at wone, Yogop ee'nu, ndogop ee'nu, ari menggerak konenggwi kiinok, at nen mondok-mondok kineenik eekkinaburak an neenu aret o. An yokkirage minggirak ti, an nogoba nen yo'nege ndak-ndak aret ari minggirak o,” yinuk, yoragagerak.