Read Western Dani Yaya 14 Bible Online

Yaya 14 - Western Dani bible

Yaya 14

¹Yorage nagagerik, wone ambinom yorage logonet, “Kit kiniki piirik logogup o. Ala inom, an inom, kiniki ninoba panggombunuk, abet ninombako logonip o.

²An nogoba ame time aakumi logorak inake ogoorak ambik wonage o. Togop lek logonetak en, kit logowam time an pipuk eerogo pinagakit nduk, nage o, yinuk, yokkiranetak lek o.

³An nen kit logowam time pipuk eerogo pinagi nage logominggirik, kit an wonage me ninom logowok nduk, peebi wokkinabi woraagin o.

⁴An nawam time tu noorak nogo kit kineenu aret o,” yinuk, yoragagerak.

⁵Yorage mbareegi, Tomat nen, at yoge logonet, “Nogoba o! Kat nawam time nit nineenggo'lek aret me, tu nonggop togon nineenu arugun o?”

⁶Yoge mbareegi, at Yetut nen, “Ala kineenu ariyak tu inom, Ala ndogop menggerak, paganogo yokkirage inom, ndi, kineenik eekkinake minggirak inom, ti an mban aret o. Ala kineenu ariyak nduk tu an paga wogwe lek kenok, an nogoba owagam namunggup lek aret o.

⁷Kit abet aret an kineenu wonogwe kenok, an nogoba kunduk, kineenu aret wonogwe o. At eebe kinigen kogotak me, yogondak yi kuli paga nen at kineenu aret o,” yinuk, yoragagerak.

⁸Yorage mbareegi, at Piliput nen, “Nogoba o! Kat kogoba ninigen kaawok nduk ni'niyet o. Ni'niige kenok, niniki tayok yugun o.”

⁹ Yoge mbareegi, at Yetut nen, “Piliput wae! An o maan togon nimbirak wonage minggirak kwe, kat awo liippanega'lek me, ari agandik? Aap ambit ambi an enegen neege kenok, an nogoba aret enegen kage me, kat nen, Kogoba ni'niyet o, yagandak ti, nonggop nduk yagan o?

¹⁰An ti, nogoba inikime wonage, ndi, nogoba ti, an ninikime wonage nogo ti, kat abet mbaka'lek agandik? Wone an yokkirage minggirak ti, an niniki koombunuk nen yokkirageelik o. Ata, an nogoba ninikime wonage nen aret yokkirage menggerak o.

¹¹An nogoba inikime wonage, ndi, nogoba ti, an ninikime wonage nogo abet mbako logonip o. Ndi, ti abet mbariyak meek kenok, an eerit nage minggirak nogo paga nogoba nimbirak nineebe ambit monggoorak nogo abet mbako logonip o.

¹²Aap ambit ambi iniki noba panggombunuk, abet nombake kenok, an eeke minggirak nogo at aret eeke logogin o. An eeke minggirak yi mbuuluk negen o. Ndi, an nogoba ka naminggirak ti paga, at abunuk nggwok aret eeke logogin o, yinuk, mondok abet aret yokkirage agarik o.

¹³Kit nen an nendage kunogo, Ndogop eeppanu o, yinuk, nggino yo'nugwi kiinok, aput an eeriminggirak paga nogoba endage tiyak yuwak nduk, aret eeppinagage neyaamunggup o.

¹⁴Ambi eeppinagarak nduk nendage kunogo nggino yo'nugwi kiinok, an nen aret eeppinagage neyaamunggup o,” yinuk, yoragagerak.

¹⁵ Yorage nagagerik, ambinom yorage logonet, “Kit an kiniki kunik ee'nakwi kiinok, an nen, Yogop ee'nu, ndogop ee'nu, yokkirage minggirak nogo aret eeko logomunggup o.

¹⁶An nogoba nggino yoge neenok, at alik ambi, Ala ndogop menggerak, paganogo yokkirage menggerak Aberiniki nogo, mondok-mondok kinom logonet, kiniki eyak wappinagage logowak nduk, wokkiraagin o.

¹⁷It o nggween paga yime menggaarak nogo nen Aberiniki inigen kogwe, ndi, eeke yelok kogwe, eeka'lek me, it at eebe woorak ti meek o. Kit perak, at kinom wonage, ndi, peebi, kinikime logogin me, eebe kineenu aret o.

¹⁸Napurilogwe o! An elege wenebela negen mbo pinaganuk nagin lek o. Kiya woraagin aret o.

¹⁹An ne ambiriluk logonuk nagin me, it aakumi o nggween paga yime menggaarak ambinom neyaagun lek kwe, kit perak, neego logomunggup aret o. An neenik wonage me, kit kunduk kineenik logomunggup.

²⁰Ti eyom paga an nogoba inikime wonage, kit an ninikime wonogwe, ndi, an kit kinikime wonage nogo kineenu arumunggup o.

²¹ Aap ambit ambi nen an noone, Yogop ee'nu, ndogop ee'nu, yoge nogo waganogo eeke logomenggerak kenok ti, an iniki kunik ee'nake aret o. At nen an iniki kunik ee'nake kenok ti, an nogoba nen aap ti, iniki kunik eeke logogin. Ndi, an kunduk, at niniki kunik eeke logonet, at nen an neebe neyaawak nduk, nikkaagin o,” yinuk, yoragagerak.

²²Yorage mbareegi, at Yurat Ikariyot nogo lek aap Yurat alik ambi nen Yetut yoge logonet, “Nogoba o! It aakumi abok lek o. Nit mban keebe ni'niyoorak yagandak ti, nonggop mba'nuk yagan o?”

²³Yoge mbareegi, at Yetut nen, “Aap ambit ambi iniki kunik ee'nake kenok, an noone liirogon aret eeke logogin o. Ti eeke kenok, an nogoba nen at iniki kunik eerigin o. Ndi, an nogoba nimbirak at ka wogo logomonggoorik, ninom aret logogun o.

²⁴ Aap ambit ambi an iniki kunik ee'nake lek kenok ti, an noone eeke logogin lek aret o. Wone an yokkirage kit konenggwi nogo ti, an niniki koombunuk nen yokkirage lek o. Ata, at nappani wagagerak nogoba nogo ari kenok, yokkirage agarik o.

²⁵Wone yokkirage abok aret ti, an awo ninom logonet, yokkiragi o.

²⁶Aberiniki kit kiniki eyak wappinagage logowak nduk, nogoba nen an nobaane'me nappi woraagin nogo nen yi wone ndi wone apit aret mamunggirage, ndi, yi wone ndi wone yokkirage nagagirak nogo abok aret abekkirage, eeke logogin o.

²⁷ Kiniki piirik logonet, kinagabiti yugup o. Kiniki ugun tayenak logobagip nduk, eeppinaganuk nage agarik o. It aakumi o nggween paga yime menggaarak nen inoreewi inogut limbiigo mengga kwak, an togop eeppinagage lek o. Ata, an niniki ugun tayenak minggirak nogo aret eeppinagage agarik o.

²⁸An nage logominggirik, kiya woraagin o, yokkiragarak nogo muk konenggotak o. An ti, mbuuluk negen. Ndi, an nogoba perak, nggwok aret me, kit kiniki kunik ee'nabenetak en, At ogoba ka nage me, yinuk, kiniki ale'nggen nggwok mbako logonetak.

²⁹Wone yi yokkiragi nogo, a'me lik ari kenok, kiniki noba panggombunuk, abet nombarumunggup nduk, awo aga'lek kagak, yokkiragi o.

³⁰It aakumi o nggween paga menggaarak inowe nogo wage aret me, wone ambinom nggorek yokkiraagin lek o. At wage logomenggerik, at nen wone ambiriluk ambi an yo'nirigin mondok lek o.

³¹It o nggween paga yime menggaarak nogo nen an nogoba niniki kunik minggirak ineenu aruwak nduk, an nogoba nen, Yogop ee'nu, ndogop ee'nu, yo'nege nogo ndak-ndak aret eeke minggirak o.” Yorage nagagerik, “O yime mbo punuk, mbet-mbet nawi o,” yinuk, yoragagerak.