Read Western Dani Yaya 15 Bible Online

Yaya 15 - Western Dani bible

Yaya 15

¹Yorage nagagerik, ambinom yorage logonet, “Eyo abe ero ti, an aret o. Ndi, eebe unde ti, nogoba aret.

² Eyo eno'mbak ambi an nimbirak kunik logonet, anggen yegeelik kenok, nogoba nen mbanogo mbo nappege, ndi, eyo eno'mbak paga anggen yege kenok, ambinom yi'nage logowak nduk, mbeenogo teppege, eeke menggerak.

³An wone yokkirage nagagirak nogo paga mbeenogo pinagareegirak wonogo ogotik.

⁴Kit an ninom kunik, ndi, an kit ninom kunik logowok o. Eno'mbak eyo ero paga kunik lek kenok, alik nen anggen yi'nageelik nogo kwak, kit an ninom kunik lek kenok, anggen yi'nogo logomunggup lek o. Eno'mbak ero paga kunik kenok mban anggen yege menggerak.

⁵Eyo ero ti, an aret o. Ndi, eno'mbak ti kit o. Kit an ninom kunik, ndi, an kit ninom kunik wonogo logonet, anggen ambik yogo logomunggup. An lek neegak, kit ambi eeriyak ti abu meek aret o.

⁶Eno'mbak mbanogo mbo nappegaatak mbuk age kenok, aakumi nen kuwak eerogo kani kunik me mbo mambugwi iinok, kani nen nengge menggi kwak, kit an ninom kunik lek kiinok, togop aret eeppinagagin o.

⁷Kit an ninom kunik logonet, an noone kinikime wonage kenok, Nit ndi mendek wo'niraawak, mba'nuk, nggino yo'nugwi kiinok, ti aret wokkirage neyaamunggup o.

⁸Anggen ambik yi'nogo logomonggotak paga kit abet aret an noone waganggwi mendek kiyaagun me, ti paga an nogoba endage tiyak yigin o.

⁹Nogoba nen iniki kunik ee'nabeegerak kwak, an kunduk togop aret niniki kunik eekkinabeegerak o. Ndi, an niniki kunik eekkinabeegirak me, ninom kunik aret logonip o.

¹⁰Nogoba nen, Yogop ee'nu, ndogop ee'nu, yo'nereegerak nogo an eeke nagagirak paga iniki kunik ee'nabeegerak nogo kwak, an nen, Yogop ee'nu, ndogop ee'nu, yokkirage nogo eekwi kiinok, niniki kunik eekkinabigin me, ninom kunik aret logomunggup o.

¹¹Wone yi yokkirage ti, an niniki ale'nggen mbake nogo kit kinikime logonet, kiniki ale'nggen nggwok aret kogo logobagip nduk, yokkiragi o.

¹² An niniki kunik eekkinabeegirak nogo pogom, kit niniki-kiniki kunik eeko logobagip nduk, wone ambit ti aret yokkiragi o.

¹³Aakumi nen inoreewi we iniki kunik eeginakwi ti, meek negen kwe, aap ambi nen oreewi inagap ndarogo inake kangge kenok perak, oreewi mondok iniki kunik nggwok lombok mbake logonet, eeke me, iya tit mbariyak o.

¹⁴Kit an noone, Yogop ee'nu, ndogop ee'nu, yokkirage nogo aret eekwi kiinok ti, kit an noreewi aret kinombarigin o.

¹⁵Ogoba eeke nogo ayeloman mini ineenggo'lek menggaarak kwe, an yi wone ndi wone abok nogoba nen yo'nereegerak nogo yokkiragarak me, yogondak yi kuli paga nen, Nayeloman mini o, yinuk, yokkiraagin lek o. Ata, Noreewi aret o, yinuk, yokkirage logogin o.

¹⁶Kit nen an mii'nabulik o. Ata, an nen aret kit miikkinake nagagirik, kit anggen ambik mondok logorak mendek yi'nogo logobagip nduk, leenogo pinagareegirak o. Ti eerit nugu logonet, Ti mendek wo'niraawak o, yinuk, an nendage kumbunuk nogoba nggino yogwi kiinok, at nen wokkiraagin aret o.

¹⁷Niniki-kiniki kunik eeko logobagip nduk, wone ambit ti aret yokkiragi o,” yinuk, yoragagerak.

¹⁸Yorage nagagerik, ambinom yorage logonet, “It o nggween paga yime menggaarak nogo nen ineebi kinombakwi iinok, an aa'nduk ineebi nombako nogogwaarak nogo kiniki abe'nu o.

¹⁹Kit nen it aakumi o nggween paga yime menggaarak nogo mendek logonetak en, it muk iniki kunik eekkinabenetak kwe, kit it mendek lek me, ndi, it nogo iigak, an miirogo leengginabeegirak me, ineebi kinombako agaarik o.

²⁰ Ogoba tebenak kagak, ayeloman tiyanak wonageelik o, yokkiragagirak nogo abe'nip o. It nen an piya'nako nogogwaarak me, kit togon, togop aret piyakkinako logogun o. Ndi, it nen an noone waganggo nogogwaarak kenok, kit togon, kinoone waganggo logogun o.

²¹At nappani wagagerak nogo it ineenggo'lek me, eekkinabemenggaarak nogo ti, alom an paga aret eekkinako logogun o.

²²An iya wage nagagirik, wone yorage logonetak lek en, it maluk ineenggo'lek ugun aret logonetak kwe, yora wagagirak me, yogondak it maluk eekwi nogo ti, nonggop togon, Nit maluk eeka'lek o, yuurak.

²³It aakumi nen an ineebi nombakwi iinok ti, an nogoba kunduk, ineebi ombakwi aret o.

²⁴An it inenggela'me logonet, eekulik mendek eeke logonetak lek en, it maluk ineenggo'lek ugun aret logonetak kwe, yogondak perak, an eeke nagagirak nogo, it muk neego nagaarik, an nogoba nimbirak aret ineebi ninombako agaarik o.

²⁵ Ineebi ninombakwi nogo ti, Ala nen ari logonet, Alom lek kagak ineebi nombakwi o, yinuk, yereegerak liiru mbanak nogo, a'me lik yuwak nduk, ineebi ninombako agaarik o.

²⁶Ala ndogop menggerak o, yinuk paganogo yokkirage logonet, kiniki eyak wappinagage logowak nduk, Aberiniki an nogoba wonage me nen nappi woraminggirak wage logomenggerik, an nabok paganogo yokkirage logogin o.

²⁷Kit o aa'nduk nen ninom wonogogutak me, kit kunduk, an nabok paganogo yoranet nugu logomunggup o,” yinuk, yoragagerak.