Read Western Dani Yaya 17 Bible Online

Yaya 17 - Western Dani bible

Yaya 17

¹Wone ti yorage nagagerik, at Yetut ena mbogut paga ni'na'nuk, ogoba yoge logonet, “Ai, nogoba o! An ee'naburak eyom panggoni wagaarak o. An kaput nen kat tiyappagakit nduk, kaput an naa'nduk tiyappanu o.

²An kaput, yi aakumi ndi aakumi abok tigitogon unde logonet, aakumi wo'nereegindak nogo mondok-mondok ineenik eeginabikit nduk, mippaneegindak o.

³It aakumi mondok-mondok ineenik logorak nogo ti, kat Ala abet aret kalik menggendak inom, ndi, kat nen nappani wagagindak an Yetut Keritut inom, ineenu ogwe ti aret o.

⁴Eeriyak unde eeppaneegindak nogo, abu worok togon eekirak me, ti paga o nggween paga yime kat kendage tiyak yegerak o.

⁵Togop me, nogoba o! O awo wakkaga'lek kagak, kat nimbirak logonet, tiyanak wonagagirak nogo ndak-ndak yogondak kat wonage me time tiyappanu o.

⁶It aakumi o nggween paga yime menggaarak ando leenogo wo'nereegindak nogo, kat Ala eeke menggendak abok paganogo yoragagirak o. It aakumi wo'nereegindak nogo ti, kat kapuri kenok aret wo'nereegindak me, kat koone yoragagirak nogo aret eeko menggaarak o.

⁷Yogondak yi eekak ndi eekak eeke minggirak nogo abok aret kat nen unde eeppaneegindak paga eeke minggirak nogo ineenu agaarak o.

⁸Kat wone yo'nereegindak nogo abok aret yorage mbareegi, waganggo nogogwaarik, an kat wonage me nen abet aret wagagirak ineenu ogogwaarak me, kat nen an nappani wagagindak nogo it abet aret mbareegwaarak o.

⁹An nen it inake tamban eeke agarik o. It aakumi o nggween paga yime menggaarak inake tamban eeke lek o. Ata, it kat wo'nereegindak nogo ti, kat kapuri aret me, inake tamban eeke agarik o.

¹⁰An napuri ti, kat kapuri, ndi, kat kapuri ti, an napuri aret o. It eekwi nogo paga an tiyappanugo menggaarak.

¹¹An o nggween paga yime ambinom logogin lek o. Yogondak an keya wage kwe, it kapuri yi perak, o yime aret logogun o. Ai, nogoba! Kat kikak nakeelik mondok alik leenak menggendak o. Kat nimbirak niniki ambit monggoorak nogo ndak-ndak, it kat nen wo'nereegindak nogo iniki ambit aret logowak o. Kat kendage nggwok logonet, komaawi lombok eeppaneegindak nogo paga kapuri yi, ndegeninake logot o.

¹² It wo'nereegindak nogo an ninom logonet, kat komaawi eeppaneegindak nogo paga ndegeninake nagarak o. Ndegeninake neegak, ambi kobak arulik kwe, at ambi kobak ariyak nduk nda'nagagerak nogo perak, Ala wone yugu liiru mbaneegerak nogo a'me lik yuwak nduk, kobak agaarak o.

¹³Yogondak perak, an keya wage agarik o. It aap yi, nale'nggen nggwok inikime lombok kaawak nduk, an o nggween paga yime awo logonet, wone yi yokkege agarik o.

¹⁴Wone yo'nereegindak nogo an muk yoragagirak o. An it aakumi nggween paga mendek lek nogo pogom, it kunduk, nggween paga mendek lek mban me, it nggween paga mendek nen, ineebi inombako agaarik o.

¹⁵It aap nggween paga yime menggaarak iigak, kat kapuri mban nggigininabenok nduk, yokkege lek o. Ata, at maluk eeke menggerak nogo nen maluk eeppiya wage kero, liirogon ndegeninake logonok nduk, yokkigi o.

¹⁶An it aakumi nggween paga mendek lek nogo pogom, it kunduk, nggween paga mendek lek o.

¹⁷Kat koone ari menggendak nogo ti, abet aret me, An Ala ndogop minggirak o, yinuk, paganogo yorage paga, it kapuri yi, leenogo patu o.

¹⁸Kat nen aakumi o nggween paga yime menggaarak inowagam nappani wagagindak nogo pogom, it kapuri yi, togop aret aakumi o nggween paga yime menggaarak inowagam nappiigirak o.

¹⁹Kat nen, An ndogop minggirak o, wone paganogo yorage nogo paga, it kapuri yi abet aret kat kake leenak logowak nduk, an neebe it inake aret leenogo pakirak o.

²⁰It inalik mban inake tamban eeke lek o. Ata, it nen wone yoramenggaarak paga iniki noba panggombunuk, abet nombarugun nogo inom aret inake tamban eeke agarik o.

²¹It abok aret inom iniki ambit logowak nduk, inake tamban eeke agarik o. Ai, nogoba! Kat nen an kiniki kunik, ndi, an nen kat niniki kunik monggo kwak, it nit ninom niniki ambit kunik wonogwe niinok, it aakumi o nggween paga yime menggaarak nogo nen kat nappani wagagindak abet nombaruwak nduk, it kapuri yi, inake tamban eeke agarik o.

²²Kat nimbirak niniki ambit wonogwe nogo kwak, it togop aret iniki ambit aret logowak nduk, kat nen an tiyappaneegindak nogo kokwak, an nen it muk tiyappiigirak o.

²³It iniki abu ambit lombok aruwak nduk, it nen an iniki kunik, ndi, kat nen an kiniki kunik wonogwe niinok, it o nggween paga yime menggaarak nen kat abet aret an nappani wagagindak inom, ndi, kat kiniki kunik ee'nake kwak, it togop aret kiniki kunik eeginabeegindak nogo inom, ineenu arugun o.

²⁴Ai, nogoba o! Mbogut-nggween yi awo wakkaga'lek kagak, kiniki kunik ee'nake logonet, tiyappaneegindak wonagagirak nogo kwak, An keya wage neenok tiyappaneme-nggendak wonage me, it aap wo'nereegindak yi nen, neyaawak nduk, an nawam time ninom logowok lak, ao, mbake agarik o.

²⁵Ai, nogoba! Kat kiniki mondok abe koonak mban menggendak o. It aakumi o nggween paga yime menggaarak nogo nen kat Ala ineenggo'lek kwe, an perak, kat neenu aret o. Ndi, kat nen abet aret nappani wagagindak nogo, it aap yi, muk ineenu agaarak o.

²⁶Kat kabok nogo it aap yi, yorage nagarak me, kat an kiniki kunik ee'nake menggendak nogo kwak, it togop aret niniki-kiniki kunik eekwi, an it iniki me wonage, eeko logowok nduk, kat kabok ambinom paganogo yorage logogin o,” yinuk, yoreegerak.