Read Western Dani Yaya 18 Bible Online

Yaya 18 - Western Dani bible

Yaya 18

¹At Yetut nogo tamban eeke nagagerik, at oone waganggwi mendek inom niyo Kiriron enebaga wunda nogo nogogwaarik, time eyo tayitun yarak me unggwi nogogwaarak.

²Yetut at oone waganggwi mendek inom eyo tayitun yarak me nogome kulinik aret nogo nogogwaarak me, at Yetut onggo mbanigin Yurat nogo kunduk, eyo yarak me time eenu wonagagerak.

³Eenu wonagagerak me, it aap Ala unde inoweewi inom, aap Pariti mendek inom, nogo nen aap yigin unde ambi aago inom, aap Ala awi wurik arum waka inom, nappiigo mbareegwa, yigin-wooluwak waganggwi, nggawi wa'na wuninik waganggwi, ndi wuninik waganggwi, eeko mbareegwa, Yurat nen wogoren eyo yarak me nogome aret nagagerak.

⁴Yetut nogo at eeppuurak abok aret eenu wonagagerak me, it nogo Yetut ka nogo mbareegwa, at nogo iya wage nagagerik yorage logonet, “Kit ta kwaarit wogop o?”

⁵Yorage mbareegi, “Lek o. Yetut Nataret mendek kwaarit wogo o.” Yogo mbareegwa, Yetut nen, “Ti an aret o,” yinuk, aap Yetut onggo mbanigin Yurat nogo inom aret me yoragagerak.

⁶“Ti an aret o,” yorage mbareegi, inakom niruk nogo logonet, nggween paga ngginnarit nogogwaarak.

⁷Ngginnarit nogo mbareegwa, at Yetut ne ambinom yorage logonet, “Kit ta kwaarit wogop?” Yorage mbareegi, “Yetut Nataret mendek kwaarit wogo o.”

⁸Yogo mbareegwa, Yetut nen, “An aret muk yokkiragarak nogo o! Kit an aret kwaa'nabit wogotak kenok, noreewi yi, nawak nen teppiyaanip o,” yinuk, yoragagerak.

⁹Ti yoragagerak nogo ti, aa'nduk Yetut nen, “Kat wo'nereegindak nogo it ambi kobak arulik o,” yinuk, Ala yoreegerak nogo a'me lik yuwak nduk, yoragagerak.

¹⁰Ti yorage mbareegi, Timon Peterut paloowi porogo wonage me, nggigik togon agago aap Ala unde inowe nggwok ayeloman endage Malukut nogo aruk abe'nggan tabok togon nappereegerak.

¹¹ Aruk tabonggage mbareegi, Yetut nen at Peterut yoge logonet, “Peterut wae. Kobaloowi obaane'me yonggolu o. Yiiwa'na toolak kwak an ee'naburak nogoba nen koonogo paneegerak yi, an noorak lek nombakendak ya? Lek o. Nagin aret o,” yinuk, yoreegerak.

¹²Ti'nuk, it aap yigin unde ambi aago inowe inom, ndi, it aap Yakuri mendek Ala awi wurik arum waka inom, nen Yetut pigogo keele maareegwaarak.

¹³Keele maako nogogwaarik, aa'nduk at Kanat owagam wonok wogogwaarak. Aap Kanat ti, aap Ala unde inowe nggwok tahun ti paga eeke nagagerak aap Kayapat arugelo nogo aret o.

¹⁴ Aap ambit nen it aakumi Yakuri mendek yorage logonet, “Aap ambi nen nit aakumi ninake kambuurak perak op o,” yoragagerak nogo ti, at Kayapat ti nen aret yoragagerak.

¹⁵Aap Kanat owagam wonok nogo mbareegwa, Timon Peterut inom, aap Yetut oone waganggwi mendek ambi inom, Yetut ambokan nogogwaarak. Ambokan nogo nogogwaarik, Peterut endekem tu nggambe paga kagak, Yetut oone waganggwi mendek ambi nogo aap Ala unde inowe nggwok eenu wonagagerak me, Yetut imbirak aap Ala unde inowe nggwok nogo awoore'nggam unggwi nogogwaarak.

¹⁶Unggwi nogo nogogwaarik, ti'nuk, Yetut oone waganggwi mendek ambi aap Ala unde inowe nggwok eenu nogo nen, kolaga tu arum wonagagerak nogo yori wungge nagagerik, Peterut wonok oome unggwi nagagerak.

¹⁷Wonok oome unggwi nage mbareegi, kolaga tu arum wonagagerak nogo nen Peterut yoge logonet, “Kat kunduk at oone waganggwi mendek nogo lek a?” Yoge mbareegi, Peterut nen, “An lek o,” yoreegerak.

¹⁸ Yoge mbareegi, o time togwi wonagagerak me, aap Ala unde inowe nggwok ayeloman mini inom, aap Ala awi wurik arum waka mendek inom, kani kumbunuk, togwi worakkologwe me, at Peterut inom togwi worakkolage nagagerak.

¹⁹Togwi worakkologwe iigak, at aap Ala unde inowe nggwok nogo nen Yetut kin wokkage logonet, “Koone waganggwi mendek ti taani o? Ndi, wone mamuninake nagandak nogo ti, nonggop o?” yinuk, kin wokkagagerak.

²⁰Kin wokkage mbareegi, at Yetut nen, “It aakumi o nggween paga yime menggaarak nogo wone mamuninake logonet, kote mamuninake logolik o. Ata, tena'me mban yorage nagarak o. It Yakuri tamban eeko menggam inom, Ala awi wurik me inom, it aakumi Yakuri mendek komaako menggam abok aret mamuninake nagarak kwe,

²¹kat nonggop nduk, an kin wo'neege agandik? An wone ngge mendek yorage nagarak nogo, it konenggo nagaarak ineenu me, yokkiruwak nduk, kin wogiyet o.”

²²Wone ti, yoge mbareegi, aap Ala awi wurik arum waka mendek ambi nen taati mi'ndak wonagagerak nogo nen eenggi telak Yetut wake logonet, “Aap Ala unde inowe nggwok nen wone yokkege me, onggo togop yoriyak op mbaken?”

²³Yoge mbareegi, at Yetut nen, “An maluk ari neegendak kenok ti, Maluk yagandak o, yo'niriyak kwe, abet aret ari neegak, kat nonggop nduk, nooken?”

²⁴Yoge mbareegi, at Kanat nen Yetut keele maarak aret aap Ala unde inowe nggwok Kayapat nogo owagam nappereegerak.

²⁵Owagam nappereegerak nage kagak, at Timon Peterut nogo awo togwi worakkolage me, it aap time wonogwe nogo nen at yogo logonet, “Kat kunduk, at oone waganggwi mendek nogo lek a?” Yogo mbareegwa, at nen, “An lek ubi!”

²⁶Yorage mbareegi, aap Ala unde inowe nggwok ayeloman aap Peterut nen aruk tabonggagagerak nogo ore ambi nen Peterut yoge logonet, “Kat kimbirak eyo tayitun yarak me taati keegirak nogo lek a?”

²⁷Yoge mbareegi, at Peterut nen ambinom lik-lek ari mbareegi, ayam oone yereegerak.

²⁸Ayam oone ari mbareegi, it Yakuri mendek inoweewi nogo nen aap Kayapat ame nen Yetut piganok aap inowak loonggo menggam gubernur wonage menggim nogome wonok nogogwaarak. O awo wigangga'lek kagak wonok nogogwaarak. Wonok nogo nogogwaarik, laago Obaga Mbo Nagagerak lakwi iinok, ugun noorak me, “Nit maluk eekkolookwak,” mba'nuk, inowak loonggo menggam unggwi noolik, endekem puk ogogwaarak.

²⁹Endekem puk wonogwe me, at Pilatut nogo iya wungge nagagerik, “Wologwe! Aap yi, nonggop eekerak kenok, wonok wogotak?”

³⁰Yorage mbareegi, it nen, “Lek o. Aap yi maluk eeke logonetak lek nen, nit wonok wokkiri woraanetak lek o.”

³¹Yogo mbareegwa, at Pilatut nen, “Kit nen aret aap yi wonok nogo logomonggotik, eeko logorak wone yugu liiru mbanak nogo ndak-ndak owak looni nanip o.” Yorage mbareegi, it aap Yakuri mendek nen, “Lek o. Nit nen aakumi mondok inooriyak mage yugu me, aap yi, owak looniyak lek o,” yoreegwaarak.

³² Wone yoreegwaarak nogo ti, Yetut nen, “An nonggop eerogo nookwi iinok, kambigin,” yoragagerak nogo, a'me lik yuwak nduk, yoreegwaarak.

³³Togop aret yogo mbareegwa, at Pilatut nogo nen ambinom unggwi nanuk, Yetut wiireegerak nage mbareegi, yoge logonet, “Aakumi Yakuri mendek inowe endagembogut nogo, kat yi aret ilik?”

³⁴Yoge mbareegi, at Yetut nogo nen, “Kat yagandak ti, kalik kiniki mba'nuk nen yagan ilik, it ando nen an nabok yokkegaarak paga yagan a?”

³⁵Yoge mbareegi, at Pilatut nogo nen, “An aap Yakuri mendek nombakendak ya? Kat kowe-kawot inom, aap Ala unde inoweewi inom, nen aret keebe waganogo wo'negaarak me, nonggop eekendak o?”

³⁶Yoge mbareegi, Yetut nen at yoge logonet, “An nendagembogut logonet, nabu'me piige menggim nogo ti, o nggween paga yime lek o. Nabu'me piige menggim o nggween paga yime logonetak en, an neebe waganogo it aap Yakuri wogorogwe iyo, an nawuri inom wim nambuko logonetak o. An nabu'me piige minggim nogo ti, o alik ambi me wonage o.”

³⁷Yoge mbareegi, at Pilatut nen, “Ti kenok, kat aap kendagembogut aret ilik?” Yoge mbareegi, at Yetut nen, “Kendagembogut yo'negendak ti, abet aret yo'negen o. An togop aret logokit nduk nda'nagagirak. Ndi, Ala ndogop menggerak wone paganogo yokkirage logokit nduk, o nggween paga yime wambi wagagirak nogo o! Ala ndogop menggerak, wone yorage nogo waganggwi iinok, Ala apuri aret me, an noone konenggo menggaarak o.”

³⁸Yoge mbareegi, at Pilatut nen, “Ala ndogop menggerak o, mban agan nege ti, nano wone agan nege o?” yinuk, yoreegerak. At Pilatut nen wone ti, yo'nuk, aap Yakuri mendek endekem iya wungge nagagerik, yorage logonet, “Wologwe! Aap yi, maluk ambi abu eerulik aret kagi o.

³⁹Laago Obaga Mbo Nagagerak lako logonet, aap keele maarak ambi piinogo teppikit nduk, yo'nogo monggotak me, kit aap Yakuri mendek kinowe endagembogut yi, piinogo wokkiroorak mbako ogotik ilik, lek a?”

⁴⁰Yorage mbareegi, it inoone nggwok paga yogo logonet, “Aap yi lek o. Aap Mbarabat nogo aret piinogo wo'niret o,” yoreegwaarak. At Mbarabat nogo “Ninalik aruwok o,” yogo logonet, at keele maarogo mambereegwaarak wonage kagak, yoreegwaarak.