Read Western Dani Yaya 2 Bible Online

Yaya 2 - Western Dani bible

Yaya 2

¹Nogo mbere yinuk, ko'lu o Nggalileya yaga'lelo ambi endage Kana aap ambi kwe kolage me, Yetut agalo time inom wonagagerak.

²Ndi, Yetut at oone waganggwi mendek inom aap kwe kolage me nogome woraawak nduk, inayonggo pereegwaarak wogogwaarak me,

³anggur amburu nogo lek age mbareegi, Yetut agalo nen at Yetut yoge logonet, “Anggur amburu nogo abu lek agaarak o.”

⁴Yoge mbareegi, at Yetut nen, “An eeke logorak eyom awo panggoni waga'lek me, nagalo kat nonggop nduk, an yo'nege agandik?”

⁵Yoge mbareegi, at agalo nen aap laago unde ayeloman mini nogo yorage logonet, “At yokkirage kenok ti aret ee'nu o,” yinuk, yoragagerak.

⁶It aap Yakuri mendek nen wone lengganak eeko logonet, yi mendek ndi mendek kookak yuurak nduk, togolowak yugum mendek 6 kuli aret nogome kwi'ndak wonagagerak. Togolowak yo'nggok nogome 100 liter negen alitak lombok tooko nogogwaarak.

⁷At Yetut nen aap laago unde ayeloman mini nogo yorage logonet, “Togolowak time niyo eno korok togon too'nip o,” yorage mbareegi, eno korok togon tooleegwaarak.

⁸Tooko mbareegwa, Yetut nen, “Yogondak! Niyo ando toologo aap laago unde ti, wogori nanip o.” Yorage mbareegi, toologo wogori nogogwaarak.

⁹Wogori nogo mbareegwa, aap laago unde nogo nen niyo toolak nogo ombat wakkage logonet, anggur amburu agagerak kage nagagerik, ayeloman mini nogo nda ndi nen tooleegwaarak ineenu iigak kwe, at perak kobak me, aap kwe kolage nogo wiige nagagerik, wage mbareegi, yoge logonet,

¹⁰“Wulaga! Anggur amburu ombat abe mendek aa'nduk tumburirogo nagaatik, ndonggorogon nunggwi iinok, ti'nuk, peebi amburu ombat maluk negen tumburirogo menggaarak kwe, kat perak, anggur amburu ombat abe mendek peebi wo'niroorak nduk, porogo wonagandak keegi o,” yinuk, yoreegerak.

¹¹At Yetut nen ineenu ariyak inagabiti warak mendek aa'nduk lombok eereegerak nogo ti, o Nggalileya yaga'lelo Kana nogome logonet, eereegerak ti aret. Time logonet, at tiyanak menggerak nogo abok paganeegerak me, at oone waganggwi nogo iniki at oba panggombunuk, abet mbareegwaarak.

¹² Ti'nuk, at Yetut nogo at agalo inom, awuri inom, at oone waganggwi mendek inom, o Kaperenawum nogo nogogwaarik, time logonet, ne mande negen wonogogwaarak.

¹³ Nogome wonogwe me, it aap Yakuri laago Obaga Mbo Nagagerak lariyak eyom panggoni wage mbareegi, at Yetut o Yerutalem wambi wagagerak.

¹⁴Wambi wage nagagerik, Ala awi wurik me unggunuk, it aakumi nen tapi inom, ndomba inom, towe puume inom, onggo mbanggwi, ndi, it ando wu onggo-onggo eeko menggaarak nogo eeko menggam taa'nogo wu onggo-onggo eekwi, eekwi enegen iyareegerak.

¹⁵Eekwi enegen iige nagagerik, ligi laanak waganogo muun yawi negen ogobakkigippunuk, ndomba tapi abok aret Ala awi wurik me nen teerogo wumbiige, ndi, it aap wu onggo-onggo eekwi nogo inageyo ndoonak ogobakkigirik abut laganogo nggimbege, inawu nogo a'nggan yumbunik-telenak eerogo nappege, eereegerak.

¹⁶Eeke nagagerik, it towe puume onggo mbanggwi nogo yorage logonet, “Towe yi apit aret wogoret nanip o. Kit an nogoba awi wurik me yime, yi mendek ndi mendek kunggo menggam negen eerogo pogotak me, neebi a,” yinuk, yoragagerak.

¹⁷ Yoragagerak nogo at Yetut oone waganggwi nogo nen, “Nogoba Ala wae! Kawi wurik nogo op logowak nduk, niniki aganggen kerek togon eerit nage paga niniki lek ee'nake o,” yinuk, yereegerak wone liiru mbanak nogo abereegwaarak.

¹⁸It aap Yakuri nen at yogo logonet, “Kat yi eekendak nogo, ta nen yokkereegerak paga eekendak nineenu aruwok nduk, ambi nano eeke keyaawi o.”

¹⁹ Yinuk, inoone panggok togon yogo mbareegwa, at Yetut nen, “Lek o. Ala awi wurik yi, minogo pinip o. Minogo pugwi kiinok, wuke neegak, nogo mbere aret yumunggup o.”

²⁰Yorage mbareegi, it aap Yakuri nen, “A puk! Ala awi yi, wukwi niigak tahun 46 aret eereegerak kwe, kat nen, Wuke neegak, nogo mbere mban yuurak, yagan ya? Wi!” yinuk, yoreegwaarak.

²¹Ala awi wurik yoragagerak nogo ti, at eebe nduk aret yoragagerak.

²²Peebi Ala nen Yetut kambunuk, nogo menggam nen eenik agago mippege mbareegi, at oone waganggwi nen wone yoragagerak ti, abereegwaarak. Abeko nogogwaarik, Ala wone liiru mbanak inom, wone Yetut nen yoragagerak nogo inom, abet mbareegwaarak.

²³At Yetut o Yerutalem laago Obaga Mbo Nagagerak lakome nogome logonet, ineenu ariyak inagabiti warak mendek eerit nege nogo aakumi apit aret inigen kogo nogogwaarik, iniki at oba panggombunuk, abet mbareegwaarak.

²⁴It aap apit iniki at oba panggombunuk, abet mbareegwaarak kwe, at Yetut perak, yi aap ndi aap abok inobaabut eenu me, “It aakumi yi, abet aret iniki noba panggombegaarak kagi,” inombarulik o.

²⁵It aakumi iniki mbakwi nogo ti, Yetut eenu menggerak me, aap ambit nen at ambi eeke abok paganogo at yoriyak mondok lek aret o.